Yehowa Odasefoi ni Yɔɔ Jeŋ Muu Fɛɛ—Bahamas

BAHAMAS Maŋ lɛ—shikpɔŋ ni ŋshɔkpɔi wuji kɛ bibii 3,000 yɔɔ nɔ lɛ—ka shi tamɔ adiagba kuɛnii ni foɔ ŋshɔ ni esu tamɔ blu kɛ baaŋmɔŋ ni lɛɛmɔ feɔ kilomitai 900 yɛ Florida kɛ Cuba teŋ lɛ mli. Maŋtsɛyeli jajelɔi agbee ni miiya nɔ eefa daa nɛɛ fata maŋbii 267,000 lɛ ahe. Amɛyijiemɔ lalai lɛ haa akaiɔ Yesaia 42:10-12 lɛ, akɛ: “Nyɛlaa lala hee nyɛhaa Yehowa, nyɛlaa nyɛjiea eyi kɛjɛa shikpɔŋ lɛ naagbee he lɛ! Nyɛ mɛi ni nyɛnyiɛɔ ŋshɔ hiɛ, kɛ nibii fɛɛ ni yɔɔ emli lɛ, ŋshɔkpɔi lɛ, kɛ mɛi ni hiɔ nɔ lɛ! . . . Nyɛhaa amɛbɔ oshe kɛjɛa gɔji lɛ ayiteaŋ! Amɛkɛ anunyam aha Yehowa, ni amɛjaje eyijiemɔ lɛ yɛ ŋshɔkpɔi lɛ anɔ!”

Ate Shi Awo Hemɔkɛyeli Hee

Daa gbɛgbalɔ (be-fɛɛ Maŋtsɛyeli shiɛlɔ) ko kɛ Biblia kasemɔ wolo Obaanyɛ Ohi Shi Kɛya Naanɔ yɛ Paradeiso yɛ Shikpɔŋ Nɔ lɛ ha enaanyo nitsulɔ ko yɛ July 1992 mli. Beni nuu lɛ kane wolo lɛ egbe naa lɛ, ekɛ ehe wie akɛ, ‘Esa akɛ matao jamɔ nɛɛ mli makwɛ.’ Etee kpeei yɛ Hɔgbaa sɔrɔtoi enyɔ ni nyiɛ sɛɛ lɛ mli yɛ Yehowa Odasefoi a-Maŋtsɛyeli Asai sɔrɔtoi enyɔ nɔ. No sɛɛ lɛ, akɛ lɛ je Biblia mli nikasemɔ shishi. Shi beni eje e-Biblia mli nikasemɔ lɛ shishi otsii ekpaa pɛ sɛɛ lɛ, shitee-kɛ-woo ko te shi ni baaka ehemɔkɛyeli hee lɛ—fɔmɔgbi he gbijurɔyelii.

Nitsulɔ lɛ weku kɛ amɛhe woɔ gbijurɔyelii ni tamɔ enɛ mli waa, shi suɔmɔ ni eyɔɔ kɛha Nyɔŋmɔ Wiemɔ lɛ kanya lɛ koni etsa e-Biblia mli nikasemɔ lɛ nɔ. Beni enilee yɛ Ŋmalɛ mli anɔkwale lɛ he lɛ yaa hiɛ lɛ, belɛ babaoo ni eshishinumɔ yɛ fɔmɔgbi he gbijurɔyelii kɛ je lɛŋ gbijuji kɛ bɔ ni Yehowa kwɛɔ enɛɛmɛi ehaa lɛ yaa hiɛ ji no.

Beni nuu nɛɛ ŋa to hiɛtserɛjiemɔ he gbɛjianɔ kɛha Tsɛ Gbi lɛ, nuu lɛ kɛ bulɛ kɛɛ lɛ akɛ ekɛ ehe woŋ mli. Yoo lɛ susu akɛ nuu lɛ sumɔɔɔ lɛ dɔŋŋ ni ekɛ ejamɔ miiye klɛŋklɛŋ gbɛhe yɛ lɛ yoo lɛ kɛ weku lɛ najiaŋ. Ejɛ mlijɔlɛ mli etsɔɔ mli akɛ nɔ ni ekaseɔ yɛ Biblia mli ni ekɛtsuɔ nii lɛ miiye miibua ni etsake ni etsɔ wu kpakpa kɛ tsɛ kpakpa. Yɛ naagbee lɛ, yoo lɛ hiɛsɔɔ kɛha bɔ ni nuu lɛ sumɔɔ Ŋmalɛ mli anɔkwale ehaa lɛ tee hiɛ ni ekpɛlɛ akɛ ebaakase Biblia lɛ. Amrɔ nɛɛ nuu lɛ kɛ eweku lɛ feɔ Biblia mli nikasemɔ. Ni mɛɛ miishɛɛ ena nɛkɛ yɛ “Ŋwɛi Nitsɔɔmɔ” Kpokpaa Wulu nɔ Kpee lɛ shishi nyɛsɛɛ afi lɛ! Eŋa kɛ ebiyoo lɛ yɛ jɛmɛ ni amɛna ni aabaptisi lɛ.

Gbɔi ni Ebahi Maŋ lɛ Mli lɛ Nuɔ Lala Hee Lɛ

Haitibii akpei abɔ ni ebahi maŋ lɛ mli lɛ kɛ Bahamas bii lɛ miihi shi yɛ ekomefeemɔ mli. Ehe miihia ni amɛ hu amɛnu Maŋtsɛyeli anɔkwale lala hee lɛ. Odasefoi ni yɔɔ Bahamas lɛ ahiɛ esɔ akɛ Haiti kɛ Amerika gbalashihilɛ mli hefatalɔi akui sɔrɔtoi enyɔ ebashɛ shi. Nɛkɛ aŋkroaŋkroi nɛɛ eye ebua ni amɛwaje Haiti kui heei lɛ yɛ Grand Bahama kɛ Abaco ŋshɔkpɔi lɛ anɔ.

Ákɛ yelikɛbuamɔ nɔ kroko kɛha Haitibii ni yɔɔ Maŋtsɛyeli shɛɛ sane lɛ he miishɛɛ lɛ, afee kpokpaa wulu nɔ kpee yɛ Creole wiemɔ mli klɛŋklɛŋ kwraa yɛ Bahamas kɛjɛ July 31 kɛyashi August 1, 1993. Mɛi ayifalɛ lɛ yashɛ 214, ni abaptisi mɛi heei etɛ ni jɔɔ amɛhe nɔ. Kɛjɛ nakai beaŋ kɛbaa nɛɛ Haitibii babaoo ni kase anɔkwale lɛ yɛ Bahamas lɛ eku amɛsɛɛ kɛtee amɛ ŋshɔkpɔi lɛ anɔ loo amɛyahi he kroko koni amɛkɛ amɛgbeei afata Odasefoi ni yɔɔ nakai maŋ lɛ mli lɛ anɔ he ni amɛla amɛkɛjie Yehowa yi.

[Akrabatsa ni yɔɔ baafa 8]

MAŊ LƐ HE SANE

1993 Sɔɔmɔ Afia

YIFALƐ NI FE FƐƐ NI YAA SHIƐMƆ: 1,294

EMLIJAA: Odasefonyo 1 kɛha 197

MƐI NI BA KAIMƆ LƐ: 3,794

GBƐGBALƆI AMLIJAA: 186

BIBLIA KASEMƆI AMLIJAA: 1,715

MƐI NI ABAPTISI: 79

ASAFOI SƆRƆTOI AYIBƆ: 22

NITSUMƆ HE NINE: NASSAU

[Shishigbɛ niŋmai]

[Mfonirii ni yɔɔ baafa 9]

Klɛŋklɛŋ Maŋtsɛyeli Asa, kɛ nitsumɔ he nine kɛ maŋsɛɛ sanekpakpa shiɛlɔi ashia

Odasefoi kɛ ekaa jajeɔ sanekpakpa lɛ

Milton G. Henschel kɛ Nathan H. Knorr ni maŋsɛɛ sanekpakpa shiɛlɔi fata amɛhe yɛ Nassau afii 45 ni eho nɛ

Nitsumɔ he nine hee lɛ, ni ajɔɔ nɔ yɛ February 8, 1992