Faishitswaa Akɛ Aaasɔmɔ Yehowa!

“MIHAŊ oya shiɛmɔ ŋmɛnɛ!” “Kaaha ojamɔ lɛ mlibii lɛ miiba biɛ!” Kristofoi yei pii nuɔ enɛ kɛ wiemɔi krokomɛi ni tamɔ enɛ kɛjɛɔ amɛwumɛi ni teɔ shi woɔ amɛ lɛ anaa. Shi kɛ hii nɛɛ ji asraafoi lɛ, amɛŋamɛi lɛ kɛ amɛ hemɔkɛyeli kaa titri ko kpeɔ. (Yesaia 2:4; Yohane 17:16) Belɛ, te feɔ tɛŋŋ ni ŋamɛi Kristofoi ni tamɔ nɛkɛ lɛ bɔɔ mɔdɛŋ amɛhiɛɔ amɛ mumɔŋ shidaamɔ lɛ mli waa ni amɛhe waa yɛ Maŋtsɛyeli sɔɔmɔ lɛ mli lɛ?

Anɔkwale ni amɛyeɔ amɛhaa Yehowa Nyɔŋmɔ ni amɛ faishitswaa fata he lɛ ji nɔ ni yeɔ buaa amɛ ni amɛfiɔ shi lɛ. Yvonne, ni ji asraafonyo ko ŋa lɛ tsɔɔ mli akɛ, “Misusuɔ akɛ enɛ jɛ faishi ni mitswa lɛ kɛkɛ. Mile akɛ gbɛi komɛi yɛ ni manyɛ matsɔ nɔ maha miwu lɛ shitee-kɛ-woo lɛ afee yaka.” Ni ekomɛi yɛ lɛlɛŋ.

Kristofonyo yoo kroko, ni egbalashihilɛ mli hefatalɔ lɛ ji asraafonyo nukpa lɛ tsɔɔ bɔ ni eshidaamɔ ni tsɔɔ efai shi ni etswa lɛ po haa shihilɛ feɔ mlɛo kɛhaa ewu lɛ. Etsɔɔ mli akɛ, “Ele bɔ ni minibii ahe gbɛjianɔtoo ji ha kɛ lɛ hu enɔ lɛ, ni asraafoi amii shɛɔ no he.” Shi kɛlɛ, sɔɔmɔ ni etee nɔ ekɛha Yehowa lɛ jeee nɔ ni yɔɔ mlɛo kwraa.

Shoofeemɔ nɔ Kunimyeli

Bei pii lɛ asraafoi aŋamɛi kɛ kaa ni etsɔɔ adafitswaa ni atsɔɔɔ hiɛ akɛhaaa yɛ be kakadaŋŋ mli koni mɔ lɛ kɛ eweku lɛ afa gbɛ kɛya he kroko lɛ kpeɔ kɛji ehe miihia ni amɛfata amɛwumɛi ahe kɛya he ko ni kɛ shia jɛkɛ ni afa amɛ akɛ amɛya lɛ. Kɛkɛ lɛ, kɛ amɛyahi he ko ni eleee jɛmɛ shihilɛ jogbaŋŋ lɛ, ewaaa kwraa akɛ ehe aaafee shoo. Shi ehe ehiaaa ni ebaa lɛ nɛkɛ. Mɛi ni sɔmɔɔ Yehowa lɛ yɛ nɔ ni baaye abua amɛ. Mɛni ji no? Taakɛ Kristofonyo bɔfo Petro tsɔɔ lɛ, no ji “nyɛmimɛi asafo muu lɛ.” Amrɔ nɛɛ Yehowa Odasefoi ni naa shɛɔ mɛi akpekpei abɔ ni yɔɔ maji 231 mli lɛ tsuɔ nii akɛ Kristofoi aweku wulu kome, “nyɛmimɛi anaanyobɔɔ.” Obaanyɛ ona amɛ yɛ he fɛɛ he.—1 Petro 2:17, NW, shishigbɛ niŋmaa.

Susan, ni afa lɛ trukaa kɛjɛ ekutso mli ni eyɔɔ lɛ, yahi asraafoi anitsumɔ he ni afa ewu kɛtee jɛmɛ lɛ mli. Akɛni eba hemɔkɛyeli lɛ mli etsɛko ni ena nɔnyɛɛ kɛjɛ ewu ni heee yeee lɛ dɛŋ koni ekɛ ehe akawo Kristofoi asɔɔmɔ nitsumɔ lɛ mli dɔŋŋ hewɔ lɛ, ekɛɛ akɛ: “Amrɔ nɔŋŋ pɛ kɛkɛ ni mitee kpeei ni afeɔ yɛ jɛi akutso lɛ mli lɛ, ni jɛmɛ ji he ni mita ni mikɛ nyɛmimɛi yei krokomɛi lɛ bɔi sanegbaa. Manyɛ majɛ anɔkwale mli makɛɛ akɛ naanyobɔɔ nɛɛ ji nɔ ni tee nɔ wo mi hewalɛ.”

Bei komɛi lɛ shoofeemɔ kɛ nɔnyɛɛ baa. Ni no po diɛŋtsɛ lɛ sanekpakpa kɛ hewalɛwoo ni miishɛɛ yɔɔ mli baa. Glenys, nyɛmiyoo Ŋleshinyo ko ni fata ewu he kɛtee maŋsɛɛ lɛ kɛɛ akɛ: “Beni mibaje nɔnyɛɛ shishi lɛ, mɔ ko ni mile lɛ jeeŋmɔ yɛ afii komɛi ni eho beni mi diɛŋtsɛ lɛ miji asraafonyo yɛ nakai be lɛ mli lɛ ŋma mi wolo ni mikpaaa gbɛ ni ekɛɛ mi akɛ nyɛsɛɛ nɛɛ nɔŋŋ abaptisi lɛ akɛ Yehowa Odasefoi lɛ ateŋ mɔ kome. Wolo lɛ wo mi hewalɛ yɛ ebe naa pɛpɛɛpɛ.”

Jane, ni kɛ ewu fa gbɛ kɛtee Kenya lɛ na akɛ Kristofoi akpeei ashishi lɛ bafee yibaamɔ he ko, eyɛ mli akɛ afeɔ yɛ wiemɔi ni enuuu shishi mli moŋ. Etsɔɔ mli akɛ, “Mile akɛ biɛ ji he ni Yehowa sumɔɔ ni mahi. Mikɛ mimumɔŋ nyɛmimɛi lɛ yɛ, ni amɛji mɛi ni woɔ mɔ hewalɛ yɛ mumɔŋ. Amɛhere mi hiɛmɛɛ, ni minu he akɛ wɔji weku kome.”

Jane ji mɛi babaoo ni ebaje shihilɛi ni tamɔ nɛkɛ mli lɛ ni na mumɔŋ wekumɛi ni kulɛ eleee akɛ eyɔɔ lɛ ateŋ mɔ kome kɛkɛ!—Marko 10:29, 30.

Amɛdamɔ Shi Shiŋŋ yɛ Shitee-kɛ-woo Mli

Yesu bɔ kɔkɔ akɛ: “Nyɛkasusua akɛ miba ni mabaha hejɔlɛ aba shikpɔŋ lɛ nɔ; jeee hejɔlɛ hamɔ miba, shi klante moŋ.” (Mateo 10:34) Te etsɔɔ tɛŋŋ? A. T. Robertson wie yɛ ewolo, Word Pictures in the New Testament lɛ mli akɛ “klante ni afɔ̃ɔ lɛ trukaa” baanyɛ aya nɔ yɛ weku ni akpaa gbɛ akɛ hejɔlɛ ahi mli lɛ po mli. Yesu wie akɛ: “Ni mɔ diɛŋtsɛ shiateŋbii aaatsɔmɔ ehenyɛlɔi.” (Mateo 10:36) Kwɛ bɔ ni wiemɔi nɛɛ ji anɔkwale ha kɛji gbalashihilɛ mli hefatalɔ ko teɔ shi woɔ anɔkwale lɛ!

Beni Diane bɔi Yehowa Odasefoi kɛ Biblia lɛ kasemɔ lɛ, ewu ni ji tawuu kɔɔyɔŋ lɛlɛ asraafonyo nukpa lɛ nyaaa he kwraa. Te enɛ na amɛ gbalashihilɛ lɛ nɔ hewalɛ eha tɛŋŋ? Diane tsɔɔ mli akɛ “enɛ tsɔ tamɔ ais kpɔ́ ni ebaka wɔteŋ. Wɔhi gbalashihilɛ mli aahu yɛ miishɛɛ mli. Trukaa lɛ wɔtsɔmɔ mɛi ni yɔɔ shia kome mli kɛkɛ.” Belɛ, te etsu enɛ he nii eha tɛŋŋ? “Faishitswaa ji nɔ ni tsu enɛ he nii, kɛfata yelikɛbuamɔ ni jɛ Yehowa kɛ emumɔ lɛ ŋɔɔ ba lɛ he.” Diane kɛ Biblia mli nɔkwɛmɔ nɔ ni kɔɔ gbalɔ Daniel he lɛ to etsui mli.

Beni aŋɔ lɛ nom kɛtee Babilon ni aha lɛ niyenii ni esaaa akɛ Nyɔŋmɔ tsulɔ yeɔ lɛ, Daniel “kpɛ mli yɛ etsui mli akɛ ekɛ maŋtsɛ lɛ niyenii . . . buleŋ ehe.” Hɛɛ, Daniel kpɛ yiŋ ni mli wa. Ekpɛ mli yɛ etsui mli akɛ ebuleŋ ehe kɔkɔɔkɔ kɛtsɔ nakai niyenii ni eeeye lɛ nɔ. Kwɛ bɔ ni ejie ekãa kpo beni “ekpa piafoi lɛ anukpa lɛ fai, koni ekabule ehe” lɛ! Mɛni jɛ mli ba? Yehowa jɔɔ eshidaamɔ ni tsɔɔ efai shi ni etswa lɛ nɔ.—Daniel 1:8, 9, 17.

Nakai nɔŋŋ ŋmɛnɛ hu wu ko ni teɔ shi woɔ eŋa baabi lɛ ni efɔ̃ɔ asafoŋ kpeei yaa. Te esa akɛ efee enii eha tɛŋŋ? Jane na ehe yɛ shihilɛ ni tamɔ enɛ mli. Etsɔɔ mli akɛ: “Miŋmɛŋ mifai shi ni mitswa lɛ he kɔkɔɔkɔ yɛ nɔnyɛɛ lɛ shishi. Mile akɛ minyɛŋ maŋmɛɛ saji ahe mikɛsaa. Esa akɛ majie bɔ ni kpeei lɛ he baa sɛɛnamɔ babaoo kɛhaa mi lɛ kpo matsɔɔ.” Yehowa jɔɔ efai shi ni etswa lɛ nɔ beni eyaa kpee lɛ nɔtonɔto lɛ.

Glenys kɛɛ akɛ, “Miwu lɛ bɔɔ mɔdɛŋ ni etsĩ minaa koni mikaya kpeei lɛ, shi enɛ sɛɛ etsɛɛɛ tsɔ. Miyaa kpee lɛ lolo. Bei komɛi lɛ eyiɔ mi, kɛ mijɛ kpee lɛ miba shia, ni yɛ bei krokomɛi amli lɛ akɛ mi ewieee.” Kɛlɛ, ehi shihilɛ ni tamɔ enɛ mli, ni esɔleɔ daa. Agbɛnɛ hu, asafo lɛ mli onukpai lɛ ateŋ mɛi enyɔ kɛ lɛ sɔleɔ daa, ni no wo lɛ hewalɛ babaoo koni eka he eya kpee lɛ.—Yakobo 5:13-15; 1 Petro 2:23.

Bei komɛi lɛ, onukpai ni yɔɔ ewu lɛ hiɛ lɛ nyɛɛɔ enɔ koni eje eŋa lɛ nijiaŋ wui koni ekashiɛ sanekpakpa lɛ etsɔɔ. Diane na akɛ esa akɛ etsɔɔ ewu lɛ nɔ ni ji otii ni ekɛmamɔ ehiɛ lɛ yɛ faŋŋ mli. Ekɛɛ akɛ: “Misaa mihe akɛ makpɛlɛ naagbai fɛɛ ni jɛɔ shiɛmɔ ni mikɛ mihe woɔ mli daa lɛ mli baa lɛ nɔ.” Kwɛ bɔ ni enɛ tamɔ bɔ ni bɔfoi lɛ ashidaamɔ ji ha lɛ pɛpɛɛpɛ! (Bɔfoi lɛ Asaji 4:29, 31) Shi kɛlɛ, ekɛ ŋaa tsu nii yɛ eshiɛmɔ nitsumɔ lɛ mli. Ekɛɛ akɛ: “No mli lɛ mibuaa mɛi anaa kɛhaa kɔfe-numɔ ni mihaa mɔ fɛɛ mɔ Anɔkwale wolo lɛ eko.”—Mateo 10:16; 24:14.

Heshibaa ni Akɛŋmɛɛɛ Saji Ahe Akɛsaa

Eyɛ mli akɛ gbalashihilɛ mli naagbai haoɔ ŋamɛi Kristofoi lɛ moŋ, shi amɛkpaa wɔsɛɛ shihilɛ lɛ gbɛ ni amɛŋɔɔ amɛhiɛ amɛfɔ̃ɔ Yehowa nɔ. Enɛ yeɔ buaa amɛ ni amɛhiɛɔ jwɛŋmɔ kpakpa mli. Amɛfiɔ amɛwumɛi asɛɛ bɔ ni amɛaanyɛ ni amɛŋmɛɛɛ amɛ hemɔkɛyeli saji ahe amɛkɛsaaa. Yɛ nakai feemɔ mli lɛ, amɛnyiɛɔ Petro ŋaawoo ni jɛ mumɔŋ lɛ sɛɛ akɛ: “Nyɛ yeigbayei lɛ hu, nyɛbaa nyɛhe shi nyɛhaa nyɛ diɛŋtsɛ nyɛwumɛi lɛ.” (1 Petro 3:1) Nɛkɛ bɔfoi aŋaawoo nɛɛ kaneɔ yɛ The Amplified New Testament lɛ mli akɛ: “Nyɛbaa nyɛhe shi akɛ mɛi ni hiɛ gbɛhe ni ji enyɔ ni nyɛkɛ nyɛhe fɔɔ amɛ nɔ, ni nyɛtsakea nyɛhe nyɛwoa amɛshihilɛ mli.” Kadimɔ bɔ ni Jane nyiɛ ŋaawoo nɛɛ sɛɛ eha lɛ. Etsɔɔ mli akɛ, “Miwu kɛɛ mi akɛ esaaa akɛ nɔ ni misumɔɔ akɛ mifeɔ lɛ fiteɔ enitsumɔ. No hewɔ lɛ mibɔ mɔdɛŋ mitao gbɛi anɔ ni matsɔ ni manyɛ maye mabua lɛ.”

Kristofoi aŋamɛi komɛi ekpɛlɛ nɔ akɛ amɛkɛ amɛwumɛi baaya hiɛtserɛjiemɔi ni afɔ nine atsɛ amɛwumɛi akɛ amɛya lɛ. Shi fɛɛ sɛɛ lɛ, amɛtswa amɛfai shi akɛ amɛŋmɛŋ amɛ hemɔkɛyeli he saji ahe amɛkɛsaŋ kɔkɔɔkɔ. Jane he be ni ekɛ ewu lɛ wie enɛ he. Ejɛ mlihilɛ mli etsɔɔ mli akɛ eesumɔ ni eya eko moŋ, shi esumɔɔɔ ni jɛmɛ ni eeeya lɛ haoɔ ewu lɛ. “Mile akɛ bei pii lɛ akpaa gbɛ akɛ mɛi ni eba lɛ fɛɛ afee ekome ni awo dãa kɛ glase lɛ nɔ ni anu akɛwo henaabuamɔ lɛ hiɛ nyam. Mikase akɛ Yehowa pɛ ji mɔ ni sa ákɛ akɛ jamɔ aha lɛ, ni dãa kɛ glase lɛ nɔwomɔ lɛ fe bulɛ folo kpo ni ajieɔ. Miwu lɛ yoo bɔ ni shihilɛ lɛ kɛ naagba baaba aha lɛ, no hewɔ lɛ ekɛɛ kɛkɛ akɛ: ‘Kaaba!’ Mibo lɛ toi.”

Yɛ gbɛ kroko nɔ lɛ, Glenys fata ewu lɛ he kɛtee hiɛtserɛjiemɔ ni tamɔ enɛ, shi ekwɛ onukpai ni tara okpɔlɔ lɛ yitso lɛ. Beni ena akɛ amɛmiito dãa kɛ glase lɛ nɔwomɔ lɛ he gbɛjianɔ lɛ, ekɛ ŋaa tsu nii ni eshi jɛmɛ kɛtee nushwiemɔ he lɛ! Hɛɛ, yei nɛɛ tsake amɛhe amɛwo shihilɛi sɔrɔtoi amli moŋ, shi amɛŋmɛɛɛ saji ahe amɛkɛsaaa kɔkɔɔkɔ.

‘Ashi Wiemɔ lɛ Sɛɛ ni Nine Ashɛ Amɛnɔ’

Yvonne susu sane he nɛkɛ akɛ “kɛ mibɔ mɔdɛŋ waa fe tsutsu lɛ akɛ ŋa lɛ, miwu lɛ baana akɛ anɔkwale lɛ miitsake mi.” No hewɔ lɛ etee nɔ ekane yitso ni yɔɔ Weku Shihilɛ wolo lɛ mli ni hiɛ saneyitso akɛ “Ŋa ni Asumɔɔ Lɛ Jogbaŋŋ” lɛ aahu shii abɔ.a “Mikase sane ni yɔɔ yitso bibioo ni ji ‘Yaafolɔi lɛ, Mɛi ni Yeɔ Mɔ Tsui Lɛ’ shishi lɛ jogbaŋŋ! Shi mina akɛ beni miibɔ mɔdɛŋ waa ni mikɛ miwu lɛ agba sane lɛ, belɛ naagba lɛ miiwo wu moŋ.” Shi kɛlɛ, yɛ naagbee lɛ, eye omanye yɛ ewu ni eye ebua lɛ ni esɔmɔ Yehowa lɛ hewɔ. Yɛ mɛɛ gbɛ nɔ? Kɛtsɔ shishitoo mla ni atsɔɔ yɛ 1 Petro 3:1 lɛ akɛ “ashi wiemɔ lɛ sɛɛ” ni nine ashɛ wumɛi lɛ anɔ lɛ kɛ nitsumɔ nɔ.

Bɔ ni Kristofoi yei kwɛɔ amɛwekui lɛ amɛhaa lɛ jieɔ Kristojamɔ yi waa kɛhaa mɛi krokomɛi. Diane kɛɛ: “Mibɔ mɔdɛŋ akɛ maha ena anɔkwale lɛ he miishɛɛ bɔ ni manyɛ. Kɛ mitee kpeei lɛ, miwu lɛ nuɔ he babaoo akɛ ehe efee shoo, no hewɔ lɛ oti ni mikɛma mihiɛ ji akɛ miwoɔ gbekɛbii lɛ aŋaa koni amɛba amɛjeŋ jogbaŋŋ kɛ wɔshɛ shia. Mibɔ mɔdɛŋ hu akɛ mabɛŋkɛ lɛ babaoo kɛ wɔku sɛɛ kɛtee shia.” Ewu lɛ su yɛ enɛ he lɛ tsake fiofio yɛ be mli ni nuu lɛ kpɛlɛ bɔ ni eweku lɛ jɛɔ mlihilɛ mli amɛbɛŋkɛɔ lɛ lɛ nɔ lɛ.

Nanemɛi Yehowa sɔɔlɔi hu baanyɛ aye abua. Jane kɛɛ akɛ ewu lɛ na Odasefoi maŋsɛɛ sanekpakpa shiɛlɔi ni ekɛkpe yɛ Kenya lɛ anaanyobɔɔ he miishɛɛ. “Amɛkɛ lɛ bɔ naanyo ni amɛgbaa saji ni kɔɔ bɔɔltswaa he, ni amɛhereɔ mɔ hiɛmɛɛ waa. Afɔ wɔ nine kɛtee maŋsɛɛ sanekpakpa shiɛlɔi ashiai sɔrɔtoi amli kɛha niyeli.” Sɛɛ mli lɛ ewu lɛ tsɔɔ mli akɛ: “Mije shishi mikwɛ Jane hemɔkɛyeli lɛ yɛ gbɛ kroko kwraa nɔ. Enanemɛi lɛ le nii waa ni amɛnyɛɔ amɛwieɔ saji sɔrɔtoi babaoo he.” Diane wu hu tsake bɔ ni esusuɔ anɔkwale lɛ he ehaa. Beni kar ni ehiɛ lɛ fite lɛ, Odasefonyo obalanyo ko ba ebaye ebua lɛ. Ekɛɛ: “Nɔ ni efee nɛɛ sa mihiɛ jogbaŋŋ.”

Shi kɛlɛ, jeee gbalashihilɛ mli hefatalɔi fɛɛ ji mɛi ni nine shɛɔ amɛ nɔ kɛbaa anɔkwale lɛ mli. Belɛ te aaatsu he nii aha tɛŋŋ? Yehowa yeɔ ebuaa anɔkwafoi lɛ koni amɛnyɛ amɛfi shi. (1 Korintobii 10:13) Kwɛmɔ hewalɛwoo ni Glenys yɔɔ kɛha mɛi ni yɔɔ shihilɛ ni tamɔ enɔ lɛ mli lɛ: “Nyɛkajea he ŋwane kɔkɔɔkɔ akɛ Yehowa ji Mɔ ni to gbalashihilɛ shishi, ni eetao ni gbalashihilɛ mli hefatalɔi lɛ afee ekome kɛhi shi. No hewɔ lɛ ekɔɔɔ nɔ ni wu lɛ baafee loo shitee-kɛ-woo ni ooona kɛaajɛ mɛi ni bɛŋkɛo lɛ adɛŋ lɛ he nɔ ko, Yehowa haŋ odidãa kɔkɔɔkɔ.” Eyɛ mli akɛ ewu lɛ jaaa Yehowa lolo moŋ, shi bɔ ni efeɔ enii yɛ yoo lɛ kɛ anɔkwale lɛ he lɛ naa eba shi.

‘Okɛ Yaafo Atɛo; Okɛ Nyamɔ Akpa’

Lɛlɛŋ, nɛkɛ Kristofoi yei nɛɛ etswa amɛfai shi akɛ amɛaasɔmɔ Yehowa. Kɛ oyɛ shihilɛ ni tamɔ nɛkɛ mli lɛ, ha enɛ afee bo hu oyiŋkpɛɛ. Kaimɔ ŋaawoo nɛɛ: “Yehowa, o-Nyɔŋmɔ lɛ, gbeyei oshe, ni lɛ osɔmɔ, ni lɛ ehe okɛ ohe akpɛtɛ.”—5 Mose 10:20.

Lalatsɛ lɛ jaje akɛ: “Ekɛ yaafo hiɛɔ dumɔwui lɛ kɛnyiɛɔ kɛyaa moŋ; shi ekɛ nyamɔ aaahiɛ eŋmaa-yiteremɔi lɛ kɛaaba.” (Lala 126:6) Odasefonyo ko kpɛlɛ nɔ akɛ “yaafonui babaoo hoɔ yɛ ohiŋmɛiiaŋ be mli ni obɔɔ mɔdɛŋ ni otsɔɔ ogbalashihilɛ mli hefatalɔ lɛ anɔkwale lɛ, kɛtsɔ onifeemɔ loo wiemɔ nɔ. Shi yɛ naagbee lɛ omli filiɔ bo kɛ nyamɔ ejaakɛ kɛji ekpɛlɛɛɛ anɔkwale lɛ nɔ po lɛ, Yehowa jɔɔ bo yɛ mɔdɛŋ ni obɔ lɛ hewɔ.”

Mɛi fɛɛ ni kɛ anɔkwayeli sɔmɔɔ Yehowa yɛ yiwaa fɛɛ sɛɛ yɛ shia lɛ naa yijiemɔ waa diɛŋtsɛ. Sɛɛfimɔ kɛ suɔmɔ he miihia amɛ. Eba akɛ amɛaaya nɔ amɛhiɛ amɛ shidaamɔ ni amɛŋmɛɛɛ he amɛkɛsaa lɛ mli daa, ni amɛtswa amɛfai shi akɛ amɛaasɔmɔ Yehowa!

[Shishigbɛ niŋmai]

[Mfoniri ni yɔɔ baafa 28]

Nikasemɔ ni sɔlemɔ fata he lɛ wajeɔ Kristofoi afaishitswaa