Yehowa Odasefoi ni Yɔɔ Jeŋ Fɛɛ—Thailand
“MƐI ni eye amɛhe lɛ ashikpɔŋ.” Nɛkɛ ji gbɛi Thailand lɛ shishitsɔɔmɔ. Maŋbii fe 57,000,000 ni he jɔ, ni tsuɔ nii waa nɛɛ kɛ jamɔ mli susumɔi sɔrɔtoi babaoo tsuɔ nii. Eyɛ mli akɛ Buddha jamɔ egbɛ eshwa waa yɛ jɛi moŋ, shi mɛi kɛ amɛhe woɔ Kristendom jamɔi anifeemɔi amli hu yɛ Asia wuoyi-bokagbɛ maŋ wulu nɛɛ mli. Ehe miihia ni mɛnɛɛmɛi fɛɛ anu Nyɔŋmɔ Maŋtsɛyeli lɛ he sanekpakpa lɛ.—Mateo 24:14.a
Abobalɔi Nu Sanekpakpa Lɛ
Biblia mli anɔkwale lɛ miitsu nii waa yɛ Karen abobalɔi fe 10,000 ni yɔɔ abobaa hei ni egbɛ eshwa Thailand gɔji lɛ anɔ fɛɛ aahu kɛtsɔ Myanmar husu lɛ naa lɛ ateŋ. Karen wekui lɛ ekome mlibii ni yɔɔ nɛkɛ he nɛɛ ji Yehowa Odasefoi. Amɛmiigbɛ sanekpakpa lɛ amɛmiishwa yɛ abobalɔi lɛ ateŋ. Te amɛnitsumɔ lɛ je shishi eha tɛŋŋ?
Afii babaoo nɛ ni obalanyo ko kɛ Anglikan Sɔlemɔ lɛ fo tako mli ni ebatsɔ Yehowa Odasefoi ateŋ mɔ kome. Amɛ osɔfo lɛ kɛ ehe wo sane lɛ mli ni eha ewekumɛi te shi wo lɛ. Shi kɛlɛ, ekɛ tsuishitoo ŋmɛ etsui shi, ni yiwaa ni eweku lɛ kɛbaa enɔ lɛ naa ba shi fiofio. Anglikan Sɔlemɔ lɛ mli osɔfoi lɛ tee nɔ amɛye ehe fɛo aahu kɛyashi beyinɔ ni ajie amɛ kɛjɛ amɛ osɔfoyeli gbɛhe afii enyɔ ni ho nɛ yɛ jeŋba gbonyo hewɔ. Akɛni sɔlemɔ lɛ bɛ kwɛlɔ dɔŋŋ hewɔ lɛ, Odasefonyo lɛ weku lɛ mlibii kɛ wekumɛi krokomɛi lɛ ahe jɔ̃ amɛhe ni amɛfee basaa. Amɛteŋ mɛi nyɔŋma-kɛ-ekome shi sɔlemɔ lɛ ni amɛbi ni Odasefoi lɛ kɛ amɛ abakase Biblia lɛ.
Nikasemɔ nɛɛ tee nɔ fɛfɛo, ni abobalɔi krokomɛi hu kɛ amɛhe woɔ mli. Anɔkwale lɛ gbɛ eshwa oyayaayai, ni enɛ ha abaptisi Odasefoi heei 17 yɛ faa ni hoɔ kɛtsɔɔ abobaa he lɛ mli lɛ mli. Kwɛ miishɛɛ nɔ ko ni ba beni amii mɔ ko naa ni eye afii 88 lɛ nu afata amɛhe lɛ!
Video-kwɛmɔ Tee Miishɛɛ Shi
Mɛi ayifalɛ lɛ miiya hiɛ waa kɛ ekaa yɛ abobalɔi lɛ ateŋ. Mɛi 57 ba Kaimɔ ni afee yɛ afi 1993 lɛ. Be mli ni kpokpaa nɔkwɛlɔ lɛ basara amɛ yɛ May nakai afi lɛ, mɛi 67 bua amɛhe naa kɛbo ewiemɔi lɛ ateŋ ekome toi. Ni mɛi aaashɛ 250 bua amɛhe naa ni amɛkwɛ Buu Mɔɔ Asafo lɛ Jehovah’s Witnesses—The Organization Behind the Name video lɛ.
Baptist osɔfo ko ŋa ni yɔɔ abobaa ŋsara lɛ mli lɛ tee eyabo Biblia mli maŋshiɛmɔ ni Odasefoi lɛ to he gbɛjianɔ lɛ toi ni ekadi Biblia ŋmalɛi ni asusu he lɛ. Ekɛɛ ewu lɛ bɔ ni emii shɛɛɛ shiɛmɔi ni ayaa nɔ atiɔ no nɔŋŋ mli shii abɔ yɛ sɔlemɔ lɛ mli lɛ he. Ete shi ewo enɛ, ni ekɛɛ yoo lɛ akɛ kɛ ebɔi Yehowa Odasefoi akpeei yaa lɛ, no lɛ sɔlemɔ lɛ mlibii lɛ hu fɛɛ baaya eko. Beni esaa etee kpeei lɛ ekoŋŋ lɛ, ewu kɔ kakla ekɛnyiɛ esɛɛ ni eshã woji ni eŋmalaa kpee lɛ mli saji yɛ mli lɛ kɛ Biblia kasemɔ woji lɛ. Yɛ enɛ fɛɛ sɛɛ lɛ, esaa eba ekoŋŋ, beni akwɛɔ video lɛ. Sɛɛ mli lɛ yoo nɛɛ kɛɛ ewu lɛ nɔ ni eyana lɛ. Akɛni etsake esubaŋ yɛ enɛ he hewɔ lɛ, ebasumɔ akɛ eeekwɛ video lɛ eko ni edɔ lɛ akɛ eshã yoo lɛ woji ni eŋmalaa saji yɛ mli kɛ Biblia kasemɔ woji lɛ.
Nakai ji bɔ ni feɔ ni mɛi nuɔ sanekpakpa lɛ yɛ Thailand. Enɛ hewɔ lɛ amɛnine miishɛ mumɔŋ heyeli nɔ yɛ “mɛi ni eye amɛhe lɛ ashikpɔŋ” nɔ.—Yohane 8:32.
[Shishigbɛ niŋmai]
a Kwɛmɔ 1994 Calendar of Jehovah’s Witnesses lɛ kɛha ehe saji babaoo.
[Akrabatsa ni yɔɔ baafa 24]
MAŊ LƐ HE SANE 1993 Sɔɔmɔ Afi
YIFALƐ NI FE FƐƐ NI YAA SHIƐMƆ: 1,434
EMLIJAA: Odasefonyo 1 kɛha 40,299
MƐI NI BA KAIMƆ LƐ: 3,342
GBƐGBALƆI AMLIJAA: 232
BIBLIA KASEMƆI AMLIJAA: 1,489
MƐI NI ABAPTISI: 92
ASAFOI SƆRƆTOI AYIBƆ: 39
NITSUMƆ HE NINE: BANGKOK
[Mfoniri ni yɔɔ baafa 25]
Maŋtsɛyeli jajelɔi kɛ ekaa miishiɛ sanekpakpa lɛ
Klɛŋklɛŋ nitsumɔ he nine, 1947
Betel weku lɛ yɛ nitsumɔ he nine tsu hee ni yɔɔ Bangkok, ni ajɔɔ nɔ yɛ February 8, 1992 lɛ hiɛ