“Hemɔkɛyeli lɛ, Mihiɛ Mli Tswɛ”

TAAKƐ BRUNELLA INCONDITI NANEMƐI GBA

“HƆƆ bafee gbi ni hooo oya, ni mihe fee shoo waa. Eshwɛ mikome pɛ yɛ tsu lɛ mli, ni mihiɛnɔkamɔ fɛɛ eta. Efee mi akɛ mitsɔ ablanaa lɛ nɔ kɛya. Nɔ fɛɛ nɔ miiya nɔ jogbaŋŋ, ni trukaa nɔŋŋ kɛkɛ ni mɔ ko ŋa shinaa lɛ waa yɛ mihiɛ tuuŋtu, ni he ko kwraa bɛ ni matsɔ, ni mɔdɛŋ ni mibɔ waa lɛ kɔɔɔ he eko.”

Nijiaŋwujee kpele miihe aye Brunella Inconditi ni eye afii 15 lɛ tsui nɔ kwraa. Gbi ni he hiaa fe fɛɛ yɛ ewala akɛ obalayoo lɛ mli lɛ miihe aho aya. Nakai afi lɛ shishijee gbɛ lɛ, suɔmɔ ni eyɔɔ kɛha Yehowa kɛ Biblia lɛ, ni yaa nɔ edaa lɛ tsirɛ lɛ koni ejɔɔ ewala nɔ eha lɛ. Kulɛ abaabaptisi lɛ yɛ July 1990 mli yɛ “Wiemɔ Krɔŋŋ” Kpokpaa Wulu nɔ Kpee ni Yehowa Odasefoi fee yɛ Montreal, yɛ Canada lɛ shishi. Shi yɛ no najiaŋ lɛ, etsɛŋ ni Brunella kɛ ehemɔkɛyeli lɛ he kaa ko ni baahi shi ewala be fɛɛ ni eshwɛ lɛ baakpe.

Beni eshwɛ gbii enyɔ ni ekpaa gbɛ akɛ ebaafee ehenɔjɔɔmɔ lɛ he okadi kɛtsɔ nu mli baptisimɔ nɔ lɛ, Brunella ná ele akɛ ena la mli hela ko ni ji leukemia. Datrɛfoi ni yɔɔ maŋ lɛŋ gbekɛbii ahelatsamɔ he lɛ miitao amɛbɔi lɛ tsofa-feemɔ nɔŋŋ, no hewɔ lɛ atsĩ Brunella naa yɛ helatsamɔ he lɛ.

Lɛ Diɛŋtsɛ Ewiemɔi Tsirɛ Datrɛfoi Lɛ

Brunella le akɛ la yɛ krɔŋkrɔŋ kɛha Yehowa Nyɔŋmɔ. (3 Mose 17:11) Efɔlɔi, Edmondo kɛ Nicoletta, efee lɛ faŋŋ akɛ akɛ la ni akɛwoɔ mɔ mli lɛ akatsu nii kwraa yɛ amɛbiyoo lɛ tsofa-feemɔ mli. Etsɛ kaiɔ akɛ: “Brunella miisumɔ ni datrɛfoi lɛ anu kɛjɛ lɛ hu enaa, eyɛ mli akɛ eji gbekɛ bibioo. Ekɛ shifimɔ kɛɛ amɛ akɛ esumɔŋ tsofa-feemɔ ni baaku Biblia mli kita ni biɔ ni ‘atsi he kɛjɛ la he’ lɛ mli.”—Bɔfoi lɛ Asaji 15:20.

Yɛ July 10, 1990 lɛ, datrɛfoi etɛ kɛ maŋbii ashihilɛ he nitsulɔ kome kɛ Brunella fɔlɔi kɛ Yehowa Odasefoi asafo ni yɔɔ maŋ lɛ mli lɛ mli sɔɔlɔi enyɔ kpe. Ela mli kwɛmɔ ma nɔ mi akɛ Brunella la mli wala yibii ni ji lymphoblast lɛ efa fe nine. Datrɛfoi lɛ tsɔɔ mli akɛ amɛto amɛyiŋ akɛ amɛkɛ hela lɛ baawuu. Amɛtsɔ ŋaa gbɛ nɔ amɛtsɔɔ mli akɛ hela nɛɛ tsamɔ wa waa. Asafo lɛ mli onukpai lɛ ateŋ mɔ kome kaiɔ akɛ: “Brunella jeŋba kɛ efaishitswaa akɛ ebaabo Nyɔŋmɔ toi lɛ sa datrɛfoi lɛ kɛ maŋbii ashihilɛ he nitsulɔ lɛ he. Amɛná suɔmɔ ni efɔlɔi yɔɔ, kɛ bɔ ni nanemɛi ni jɛ Kristofoi asafo lɛ mli lɛ fi esɛɛ amɛha lɛ he miishɛɛ waa. Amɛhiɛ sɔ bɔ ni wɔnu amɛ shishi ni wɔjie bulɛ kpo wɔha amɛgbɛhe lɛ hu waa.”

Datrɛfoi lɛ fee amɛjwɛŋmɔ akɛ amɛkɛ la woŋ emli. Akɛ tsofai sɔŋŋ baatsu Brunella he nii, shi tsofai nɛɛ anaa waŋ tsɔ tamɔ bɔ ni ale ni amɛji daa lɛ. Enɛ baaha bɔ ni tsofa-feemɔ lɛ baanyɛ afite ela mli wala yibii lɛ ekomɛi lɛ aba shi kwraa. Nicoletta tsɔɔ mli akɛ: “Datrɛfoi lɛ susu Brunella gbɔmɔtsoŋ, henumɔŋ, kɛ mumɔŋ hiamɔ nii ahe. Beni wɔkɛɛ amɛ akɛ amɛyana datrɛfonyo ni ekase nakai hela lɛ he nii, ni eyɛ gbekɛbii ala mli hela ni akɛ la tsuuu he nii lɛ mli niiashikpamɔ lɛ, amɛkpɛlɛ nɔ.” Brunella kɛ helatsamɔ he lɛ nitsulɔi lɛ ná suɔmɔ ni yɔɔ miishɛɛ amɛha amɛhe.

Mumɔŋ Otii

Eyɛ amli akɛ nibii kpakpai komɛi jɛ shishijee tsofa-feemɔ lɛ mli ba moŋ, shi Brunella piŋmɔi lɛ ashishijee moŋ ni. Beni shɛɔ November 1990 lɛ, hela lɛ naa eba shi saŋŋ, no hewɔ lɛ abaptisi lɛ oya nɔŋŋ. Beni esusuɔ nyɔji fioo ni tsɔ hiɛ lɛ ahe lɛ, Brunella kpɛlɛ nɔ akɛ: “Ebɛ mlɛo kwraa. Hewalɛ babaoo diɛŋtsɛ he miihia, ni esa akɛ ojwɛŋ jogbaŋŋ hu. . . . Aka mihemɔkɛyeli lɛ akwɛ, shi midamɔ shi shiŋŋ, ni mikpɛ miyiŋ lolo akɛ mikɛ daa gbɛgbamɔ [be-fɛɛ sɔɔlɔ] baafee miwala be mli nitsumɔ.”

Yɛ 1991 shishijee gbɛ lɛ, Brunella hela lɛ mli wa ekoŋŋ. Shwɛ fioo ni egbo beni akɛ tsofai tsuɔ ehe nii lɛ, shi nɔ ni fee mɔ fɛɛ mɔ naakpɛɛ kɛ miishɛɛ ji akɛ, ena hewalɛ ekoŋŋ. Beni shɛɔ August lɛ, ena hewalɛ bɔ ni sa, ni eye nyɔŋ muu lɛ fɛɛ yɛ maŋ sɔɔmɔ nitsumɔ lɛ mli akɛ gbɛgbalɔi awalɔ. Ehela lɛ mli bawo wu ekoŋŋ, ni beni shɛɔ November 1991 lɛ, kansa efee egbɔmɔtso lɛ hei babaoo. Datrɛfoi akuu kroko hu bɔi lɛ tsofa-feemɔ kɛ nɔ ni atsɛɔ lɛ radiation therapy yɛ helatsamɔ he kroko.

Yɛ nɛkɛ shihilɛi ni mli wawai nɛɛ ashishi po lɛ, Brunella tee nɔ edamɔ shi shiŋŋ ni ekɛ mumɔŋ otii mamɔ ehiɛ. Beni enaa eleɔ leukemia lɛ he sane klɛŋklɛŋ kwraa lɛ, akɛɛ lɛ akɛ ekolɛ ebaahi shi nyɔji ekpaa pɛ. Amrɔ nɛɛ, aaafee afi kɛ fa sɛɛ nɛɛ, Brunella kã he eeto gbɛjianɔ kɛha wɔsɛɛ be lolo. Asafo lɛ mli onukpa ko wie akɛ: “Efiteee be ko kwraa yɛ otii ni mamɔ ehiɛ lɛ ahe nitsumɔ mli. Brunella hemɔkɛyeli yɛ Nyɔŋmɔ Paradeiso ni ewo shi yɛ he lɛ mli lɛ waje lɛ aahu yɛ emanehulu lɛ mli. Etee hiɛ kɛyashɛ Kristofoi adalɛ mli, eyɛ mli akɛ edako yɛ afii amli. Ejeŋba kɛ esu wo asafo lɛ hewalɛ ni eha mɛi ni le lɛ lɛ na ehe miishɛɛ waa, kɛ mɛi ni tsuɔ nii yɛ helatsamɔ he lɛ hu.” Emami kaiɔ akɛ: “Ewieee nɔ ko nɔ ko he. Kɛ mɔ ko bi lɛ akɛ te eyɔɔ tɛŋŋ lɛ, ehaa hetoo akɛ, ‘Miyɛ jogbaŋŋ,’ aloo, ‘Miyɛ bɔ ni sa, bo hu te oyɔɔ tɛŋŋ?’ ”

Wɔsɛɛ Be ni Nɔmimaa Yɔɔ He

Brunella to gbɛjianɔ akɛ ebaaya “La Hiɛlɔi” Kpokpaa Wulu nɔ Kpee ni Yehowa Odasefoi fee yɛ July 1992 mli lɛ eko. Shi, beni kpee be lɛ shɛɔ lɛ, no mli lɛ Brunella kã helatsamɔ he, ni ewala miihe aba naagbee kwraa. Shi yɛ fɛɛ sɛɛ lɛ, eta shwiili mli kɛtee kpee lɛ, kɛ yiŋkpɛɛ akɛ ebaana drama ni yitso ji Nii ni Ja yɛ Yehowa Hiɛ ni Wɔɔfee.

Eku sɛɛ eba shia kɛba eweku lɛ ŋɔɔ kɛha ewala gbii fioo ni eshwɛ lɛ. Nicoletta kɛɛ: “Etee nɔ esusu mɛi krokomɛi ahe babaoo fe lɛ diɛŋtsɛ ehe, aahu kɛyashi naagbee tɔ̃ɔ. Ewoɔ amɛ hewalɛ ni amɛkase Biblia lɛ, ni ekɛɔ amɛ akɛ, ‘Wɔbaahi shi ekoŋŋ yɛ Paradeiso.’ ”

Brunella gbo yɛ July 27, 1992, kɛ hiɛnɔkamɔ ni ma shi shiŋŋ akɛ abaatee lɛ shi kɛba wala mli yɛ Paradeiso yɛ shikpɔŋ nɔ. Ebɔi otii ni ekɛmamɔ ehiɛ lɛ asɛɛtiumɔ pɛ, shi eto gbɛjianɔ akɛ ebaatsa ehenɔjɔɔmɔ gbɛ lɛ nɔ yɛ eshitee lɛ sɛɛ. Beni eshwɛ gbii fioo ko ni ebaagbo lɛ, Brunella ŋma wolo nɛɛ, ni akane yɛ eyarafeemɔ lɛ shishi.

“Misuɔmɔ Nanemɛi:

“Miida nyɛ shi akɛ nyɛba. Miweku lɛ ena ba ni nyɛba lɛ he miishɛɛ waa.

“Kɛha mɛi hu ni bɛŋkɛ mi kpaakpa lɛ—wɔtsɔmɔ nibii babaoo mli. Wɔkɛ shihilɛi ni mli wawai ekpe, shi bei komɛi hu eho ni eyɛ ŋmɔlɔ waa. Ta ni mli wa ni sɛɛ tsɛɔ hu ni, shi minuuu he akɛ minine enyɛ shi. Taakɛ ekɛɔ yɛ Ŋmalɛi lɛ amli lɛ, ‘Ta kpakpa lɛ, miwuu; foidamɔ lɛ, mida migbe naa; hemɔkɛyeli lɛ, mihiɛ mli tswɛ.’—2 Timoteo 4:7.

“Mikase nibii babaoo hu, ni mida bɔ ni sa, ni minanemɛi kɛ mɛi ni yɔɔ mimasɛi lɛ ena tsakemɔ lɛ. Miisumɔ ni mada mɛi fɛɛ ni kɛ amɛsɛɛfimɔ ha mi lɛ ashi jogbaŋŋ.

“Nyɛ mɛi ni nyɛheɔ gbɛjianɔtoo hee lɛ kɛ Yehowa nyɛyeɔ lɛ le akɛ gbohiiashitee baaba, taakɛ Yohane 5:28, 29 kɛɔ lɛ. No hewɔ lɛ nyɛyaa nɔ nyɛhe awaa yɛ anɔkwale lɛ mli, ni wɔbaanyɛ wɔna wɔhe ekoŋŋ.

“Miisumɔ ni mada mɛi fɛɛ ni le nɔ ni mitsɔ mli lɛ shi waa diɛŋtsɛ. Miifua nyɛ fɛɛ ni miishɔ nyɛnaa hu waa. Miisumɔ nyɛ fɛɛ.”

Brunella haaa gbekɛ ni eji loo ehela lɛ atsi ehenɔjɔɔmɔ kɛha Nyɔŋmɔ lɛ eto sɛɛ. Ehemɔkɛyeli kɛ faishitswaa he nɔkwɛmɔ nɔ lɛ woɔ gbekɛbii kɛ onukpai fɛɛ hewalɛ ni amɛkɛ nɔ fɛɛ nɔ ni baanyɛ atsĩ amɛnaa ni amɛkanyɛ amɛda wala foi lɛ jogbaŋŋ lɛ afɔ afã.—Hebribii 12:1.