Maŋtsɛyeli Jajelɔi Bɔ Amaniɛ
“Nyɛtea Shi Nyɛwoa Abonsam, ni Eeejo Nyɛnaa Foi”
YƐ KLƐŊKLƐŊ afii oha lɛ mli lɛ, “ŋkunyaayelɔi” ni kɛ amɛhe eha, ni yɔɔ Efeso lɛ here Kristofoi ashɛɛ sane lɛ nɔ kɛtsɔ amɛ ŋkunyaayeli woji lɛ ni amɛshã fɛɛ yɛ faŋŋ mli lɛ nɔ. (Bɔfoi lɛ Asaji 19:19) Nɛkɛ woji nɛɛ ajara ni abu naa lɛ feɔ jwiɛtɛi kukuji 50,000. Kɛ Biblia lɛ tsĩ denario, ni ji Roma jwiɛtɛi kuku tã lɛ, kɛ hoo lɛ, ejara baafee $37,000!
Mɛi babaoo yɛ ŋmɛnɛ, ni be ko lɛ amɛyɛ woji ni kɔɔ ashwaiafeemɔ he, shi amɛjie faishitswaa ni tamɔ blema Efesobii lɛ anɔ lɛ kpo. Susumɔ niiashikpamɔ ni nyiɛ sɛɛ nɛɛ ni jɛ Canada lɛ he okwɛ.
Aaafee afii enumɔ nɛ lɛ, Yehowa Odasefoi lɛ ateŋ mɔ kome miishiɛ yɛ shia-kɛ-shia, kɛkɛ ni beni eshɛ shinaa ko naa lɛ, yoo ko ni atsɛɔ lɛ Nora lɛ gbala lɛ diɛŋtsɛ kɛtee eshia lɛ mli. Afii babaoo ni ekɛtao mumɔŋ nibii aahu lɛ mli fɛɛ lɛ, Nora kɛbua jamɔ kɛ mumɔi atsɛmɔ woji ohai abɔ naa, shi eetao ni ele nɔ ni Biblia lɛ hu yɔɔ kɛɛmɔ yɛ hiɛnɔkamɔ ni yɔɔ kɛha gbohii lɛ he. Odasefonyo lɛ ha lɛ Mɛɛ Hiɛnɔkamɔ Yɔɔ Kɛha Suɔlɔi ni Amɛgboi? dɛhiɛmɔ wolo lɛ ekome. Eha Nora sanebimɔi lɛ ahetoo, ni ekpɛlɛ nɔ akɛ ebaashɛ Buu-Mɔɔ kɛ Awake! woji tɛtrɛbii lɛ eko.
Yɛ sɛɛ mli lɛ, efã kɛtee he kroko ni ekɛ Yehowa Odasefoi lɛ ekpeee dɔŋŋ. Shi, yoo nɛɛ tee nɔ enine shɛ woji tɛtrɛbii lɛ anɔ kɛtsɔ woji kɛ majemɔ nɔ yɛ adrɛs hee ni etee lɛ. Eshɛ Biblia kasemɔ woji ni atsĩ tã yɛ woji tɛtrɛbii lɛ amli lɛ ekomɛi hu. Yɛ be ko sɛɛ lɛ, Yehowa Odasefoi lɛ ateŋ mɔ ko ba eŋɔɔ yɛ eshinaa naa. Akɛni ena he miishɛɛ waa akɛ Odasefonyo lɛ yaa Biblia lɛ mli tɛɛ kɛ eeha saji ahetoo hewɔ lɛ, Nora here lɛ hiɛmɛɛ ni efɔ lɛ nine akɛ esaa eba eshia lɛ ekoŋŋ ni amɛtsa sanegbaa lɛ nɔ.
Shi kɛlɛ, ebawa waa kɛha Odasefonyo lɛ akɛ enine aaashɛ Nora nɔ ekoŋŋ. Etee eshia lɛ yɛ gbi lɛ mli bei sɔrɔtoi amli, kɛ agbɛnɛ otsi lɛ mli gbii sɔrɔtoi amli hu, shi eyeee omanye. Yɛ be ko sɛɛ lɛ, ehiɛmiamɔ lɛ wo yibii, ni nibii kpakpai jɛ mli ba. Amɛje daa Biblia mli nikasemɔ shishi, ni yɛ Nora diɛŋtsɛ wiemɔ naa lɛ, bei pii lɛ amɛfeɔ shii etɛ yɛ otsi mli. Nibii ni ekaseɔ lɛ kanya lɛ ni ekɛ enanemɛi kɛ ewekumɛi lɛ gba he sane, ni nɔ ni jɛ mli ba ji amɛteŋ mɛi etɛ ni bi ni Yehowa Odasefoi kɛ amɛ afee Biblia mli nikasemɔ.
Nora na ele kɛtsɔ enikasemɔ lɛ nɔ akɛ apasa jamɔi kɛ amale gbalɔi babaoo diɛŋtsɛ yɛ, shi gbɛ koome pɛ kɛ mɔ yaa wala mli. Afii babaoo nɛ ni etaoɔ esanebimɔi lɛ ahetoo aahu yɛ apasa jamɔi amli, shi beni ekase nɔ ni Biblia lɛ kɛɔ yɛ daimonioi ahe lɛ sɛɛ lɛ, efee enii tamɔ blema Efesobii ni atsĩ amɛ tã yɛ Bɔfoi lɛ Asaji 19:19 lɛ. Ejie nibii ni ehiii lɛ fɛɛ kɛjɛ ewoji atoohe lɛ, ni yɛ gbii saŋŋ mli lɛ, ekpata woji ni fa fe akpe, ni kɔɔ ashwaiafeemɔ kɛ apasa jamɔ tsɔɔmɔi ahe lɛ fɛɛ hiɛ kwraa. Yɛ woji ni ekpata hiɛ nɛɛ ateŋ lɛ, kuu kome ko yɛ mli ni woji ejwɛ ni feɔ kuu lɛ fɛɛ ajara fe $800!
Eka shi faŋŋ akɛ, akɛni amɛnaaa Nora nifeemɔi nɛɛ ahe miishɛɛ hewɔ lɛ, daimonioi lɛ hao lɛ aahu aaafee otsii enyɔ sɔŋŋ. Shi, nɛkɛ mumɔi fɔji nɛɛ nyɛɛɛ amɛje enijiaŋ wui ni ekatsa e-Biblia mli nikasemɔ lɛ nɔ, ni ekɛ ŋmɛnɛŋmɛnɛ beaŋ Yehowa gbɛjianɔtoo lɛ hu akpa bɔɔ.
Niiashikpamɔi ni tamɔ nɛkɛ haa anaa bɔ ni Biblia mli wiemɔi nɛɛ ji anɔkwale ha, akɛ: “No hewɔ lɛ nyɛbaa nyɛhe shi nyɛnaa Nyɔŋmɔ; nyɛtea shi nyɛwoa Abonsam, ni eeejo nyɛnaa foi.”—Yakobo 4:7.