MAŊTSƐYELIJAJELƆIBƆAMANIƐ

Shiɛmɔ yɛ Jaramɔ Be Mli

BƆFO Paulo gba efɔ shi akɛ “naagbee gbii lɛ anɔ lɛ jaramɔ bei baaba.” (2 Timoteo 3:1) Kwɛ bɔ ni nakai wiemɔi lɛ ja jogbaŋŋ ha kɛmɔ shi! Gbɔmɛi ni yɔɔ El Salvador yɛ Central America lɛ ena nɛkɛ niiashikpamɔ ni yɔɔ dɔlɛ nɛɛ bei babaoo. Nɔ ni fe afii nyɔŋma sɔŋŋ ho, ni maŋ ta miiya nɔ yɛ nakai maŋ lɛ mli, ni ekɛ amanehulu kɛ gbele ba mɛi akpei babaoo nɔ. Amrɔ nɛɛ ta lɛ sɛɛ efo, shi amanehulu lɛ kã he eyɛ lolo. Awuiyeli etee hiɛ oyayaayai waa yɛ ta lɛ sɛɛ. Nyɛsɛɛ nɛɛ, mɔ ko ni wieɔ yɛ maŋ lɛ tɛlivishin nitsumɔ he lɛ wie akɛ: “Amrɔ nɛɛ awuiyeli kɛ ojotswaa etsɔ nɔ ni wɔnaa yɛ wɔ daa gbi shihilɛ mli.”

Nɛkɛ awuiyeli ni yaa nɔ waa nɛɛ saa Yehowa Odasefoi hu he. Julɔi eyajwara Maŋtsɛyeli Asai pii ni amɛju tsɔnei ni awieɔ awoɔ mli kɛ nɔ ni akɛtswaa lala lɛ kɛtee. Obalahii ni hiɛ awuiyeli nibii ebatutua Maŋtsɛyeli Asai shii abɔ yɛ be mli ni Kristofoi akpeei miiya nɔ, ni amɛju shika, mɛi awatsii, kɛ nibii krokomɛi ni jara wa kɛjɛ mɛi ni eba kpeei lɛ adɛŋ. Ojotswalɔi egbe Odasefoi babaoo yɛ be mli ni amɛkɛ amɛhe ewo amɛ daa gbi nitsumɔi amli.

Yɛ nɛkɛ gbɛtsii nii nɛɛ fɛɛ sɛɛ lɛ, Yehowa Odasefoi ni yɔɔ El Salvador lɛ yaa nɔ amɛtsuɔ nii waa yɛ sanekpakpa lɛ shiɛmɔ mli. Amɛfeɔ enɛ akɛ toiboo ni amɛfeɔ amɛhaa Ŋmalɛ naa famɔ nɛɛ, akɛ: “Ni ja ashiɛ sanekpakpa lɛ atsɔɔ jeŋmaji fɛɛ dã.” (Marko 13:10) Mɛi babaoo yɛ shikpɔŋ nɛɛ nɔ lolo ni miishwe ni amɛna Maŋtsɛyeli hiɛnɔkamɔ ni Biblia lɛ kɛhaa lɛ, ni Odasefoi lɛ miibɔ mɔdɛŋ waa ni amɛshɛ amɛteŋ mɔ fɛɛ mɔ ŋɔɔ. Trukaa odaseyeli ebatsɔ shiɛmɔ gbɛ ko ni mɔɔ shi jogbaŋŋ.

Beni afeɔ Odasefonyo ko tsofa yɛ helatsamɔ he ko lɛ, ekɛ hegbɛ fɛɛ hegbɛ ni ena lɛ tsu nii ni ekɛ helatsɛmɛi krokomɛi lɛ wie Nyɔŋmɔ shiwoi kɛha wɔsɛɛ, taakɛ anaa yɛ Biblia lɛ mli lɛ he. Helatsɛ ko ni bɛ hewalɛ waa, kɛ awerɛho wie akɛ: “Etsɛŋ ni magbo!” Shi nɛkɛ helatsɛ nɛɛ nii ni efee mɔbɔ nɛɛ ejeee Odasefonyo lɛ nijiaŋ wui yɛ Nyɔŋmɔ Maŋtsɛyeli lɛ he sanekpakpa lɛ shiɛmɔ mli. Shi moŋ, ekane Obaanyɛ Ohi Shi Kɛya Naanɔ yɛ Paradeiso yɛ Shikpɔŋ Nɔ wolo ni Yehowa Odasefoi fee lɛ, waa eha nuu nɛɛ. Gbii fioo sɛɛ lɛ, Odasefonyo nɛɛ shi helatsamɔ he lɛ, ni ekɛ awerɛho susuɔ akɛ nuu lɛ ka gbele saa nɔ.

Afii ejwɛ sɛɛ lɛ, ebalɛ akɛ esa akɛ Odasefonyo lɛ aya helatsamɔ he kroko kɛha tsofafeemɔ. Beni eyɔɔ jɛmɛ lɛ, helatsɛ ko banina lɛ ni ekɛɛ lɛ akɛ: “Ani okaiɔ mi?” Nuu ni ekɛ lɛ kpe aaafee afii ejwɛ ni eho nɛ, nuu ni esusu akɛ ebaagbo lɛ ni! Kwɛ bɔ ni ena miishɛɛ waa, ni enaa kpɛ ehe hu, beni nuu lɛ fua lɛ atuu ni ekɛfata he akɛ: “Agbɛnɛ mi hu mibatsɔ Yehowa Odasefoi ateŋ mɔ kome!” Nuu lɛ kpɛlɛ Biblia hiɛnɔkamɔ kɛha wɔsɛɛ be lɛ nɔ, ni ekɛ Yehowa Odasefoi kase Biblia lɛ, ni ejɔɔ ewala nɔ eha Yehowa. Jeee akɛ ebatsɔ Odasefonyo kɛkɛ, shi moŋ ekɛ ehe ewo be-fɛɛ sɔɔmɔ nitsumɔ lɛ mli akɛ daa gbɛgbalɔ aaafee afii enyɔ sɔŋŋ nɛ.

Yɛ enɛ mli lɛ, anɔkwale wui ni adũ kɛtsɔ trukaa odaseyeli nɔ lɛ yashɛ tsui ni boɔ sane toi lɛ mli. Nɛkɛ hegbɛ ni ji mɛi krokomɛi ni aaaye abua amɛ ni amɛbale anɔkwale lɛ tsirɛɔ anɔkwa Kristofoi ni amɛya nɔ yɛ shiɛmɔ nitsumɔ lɛ mli yɛ nɛkɛ “jaramɔ bei” ni wɔyɔɔ mli nɛɛ fɛɛ sɛɛ.