Ani Okaiɔ?

Ani ohiɛ esɔ Buu-Mɔɔ ni okane nyɛsɛɛ nɛɛ lɛ? Ojogbaŋŋ, kwɛmɔ akɛ obaanyɛ oha sanebimɔi ni nyiɛ sɛɛ nɛɛ ahetoo lo:

▫ Mɛni hewɔ klɛŋklɛŋ Kristofoi lɛ yeee Yesu fɔmɔgbi lɛ? Taakɛ The World Book Encyclopedia lɛ tsɔɔ lɛ, “Klɛŋklɛŋ Kristofoi lɛ yeee [Yesu] fɔmɔgbi ejaakɛ amɛbuɔ mɔ fɛɛ mɔ fɔmɔgbiyeli akɛ wɔŋjalɔi akusum-nifeemɔ.”—12/15, baafa 4.

▫ Ani esa akɛ akɛ sɔlemɔi aha Yesu? Dabi, ejaakɛ sɔlemɔi ji jamɔ ko ni ji Nyɔŋmɔ Ofe lɛ pɛ nɔ̃. No hewɔ lɛ, kɛ wɔkɛ wɔsɔlemɔi fɛɛ ha Yehowa Nyɔŋmɔ lɛ, wɔtsɔɔ akɛ wɔkpɛlɛ gbɛ ni Yesu tsɔɔ akɛ wɔtsɔ nɔ wɔsɔle lɛ nɔ: “Wɔ-Tsɛ ni yɔɔ ŋwɛi.” (Mateo 6:9)—12/15, baafa 25.

▫ Mɛni hewɔ akɛ kojomɔ kroko tsu esha ni hiɛdɔɔ yɔɔ mli ni Maŋtsɛ David fee lɛ he nii, kɛ akɛto Anania kɛ Safira eshai lɛ ahe lɛ? (2 Samuel 11:2-24; 12:1-14; Bɔfoi lɛ Asaji 5:1-11). Maŋtsɛ David esha lɛ jɛ heloo lɛ gbɔjɔmɔ. Beni akɛ nɔ ni efee lɛ fɔ ehiɛ lɛ, etsake etsui, ni Yehowa kɛke lɛ—eyɛ mli akɛ ena nɔ̃ yɛ nɔ ni jɛ esha ni efee lɛ mli ba lɛ hewɔ. Anania kɛ Safira fee esha ejaakɛ amɛkɛ osatofeemɔ male, ni amɛmiibɔ mɔdɛŋ ni amɛlaka Kristofoi asafo lɛ, ni ‘amɛmale amɛtsɔɔ mumɔ krɔŋkrɔŋ lɛ kɛ Nyɔŋmɔ.’ (Bɔfoi lɛ Asaji 5:3, 4) Enɛ bafee tsui fɔŋ he odaseyeli, no hewɔ lɛ akojo amɛ waa.—1/1, baafai 27, 28.

▫ Mɛni baanyɛ aye abua wɔ ni wɔkɛ miishɛɛ tsui asɔmɔ Yehowa? Esa akɛ wɔna wɔ jɔɔmɔi kɛ sɔɔmɔ hegbɛi ni Nyɔŋmɔ kɛha wɔ lɛ he hiɛsɔɔ kɛ jwɛŋmɔ kpakpa, ni esaaa akɛ wɔhiɛ kpaa nɔ akɛ, kɛ wɔnyiɛ Nyɔŋmɔ Wiemɔ lɛ sɛɛ lɛ, belɛ wɔmiisa ehiɛ.—1/15, baafai 16,17.

▫ Mɛɛ nibii enyɔ esa akɛ wɔha ahi jwɛŋmɔ mli kɛ wɔɔnyɛ wɔkɛ hewalɛwoo ni mɔɔ shi aha? Klɛŋklɛŋ lɛ, susumɔ nɔ ni obaakɛɛ koni hewalɛwoo lɛ afee pɔtɛɛ lɛ he. Nɔ ni ji enyɔ lɛ, taomɔ hegbɛ lɛ koni oya mɔ ni sa yijiemɔ loo ehe hiaa ni atswa lɛ ama shi lɛ ŋɔɔ.—1/15, baafa 23.

▫ Mɛni hewɔ “asafo babaoo” lɛ hiɛ “blɛoi yɛ amɛdɛ” lɛ? (Kpojiemɔ 7:9) Blɛoi ni amɛfɔɔ lɛ tsɔɔ akɛ “asafo babaoo” lɛ kɛ miishɛɛ jieɔ Yehowa Maŋtsɛyeli lɛ kɛ Maŋtsɛ, Yesu Kristo ni efɔ lɛ mu lɛ yi. (Kwɛmɔ 3 Mose 23:39, 40.)—2/1, baafa 17.

▫ Mɛɛ nikasemɔi wuji anaa yɛ Hiob wolo lɛ mli? Hiob wolo lɛ tsɔɔ wɔ gbɛ ni wɔɔtsɔ nɔ wɔtsu naagbai ahe nii. Ekɛ nɔkwɛmɔ nii ni mli ka shi faŋŋ haa yɛ gbɛ ni esa akɛ atsɔ nɔ awo mɔ ni kɛ kaai kpeeɔ lɛ ŋaa—kɛ gbɛ ni esaaa akɛ afeɔ lɛ lɛ haa. Agbɛnɛ hu, Hiob diɛŋtsɛ niiashikpamɔ lɛ baanyɛ aye abua wɔ ni wɔfee wɔnii yɛ gbɛ ni ŋmɛɔ pɛpɛɛpɛ nɔ kɛ wɔmiina nɔ̃ yɛ shihilɛi ni ehiii shishi lɛ.—2/15, baafa 27.

▫ Mɛni ji nɔ ni Yesu naakpɛɛ nii lɛ tsɔɔ wɔ? Yesu naakpɛɛ nii lɛ woɔ Nyɔŋmɔ hiɛ nyam, etoɔ okadii kɛhaa Kristofoi koni amɛwo Nyɔŋmɔ hiɛ nyam. (Romabii 15:6) Amɛwoɔ ekpakpa-feemɔ he hewalɛ, ejurɔfeemɔ, kɛ mɔbɔnalɛ kpojiemɔ.—3/1, baafa 8.

▫ Sanebimɔi ni onukpai lɛ kɛ mɛi ni amɛjɔɔ amɛhe nɔ ehee lɛ tiɔ mli lɛ tsuɔ mɛɛ yiŋtoo he nii? Enɛ maa nɔ mi akɛ amɛteŋ mɔ fɛɛ mɔ nuɔ Biblia mli shishijee tsɔɔmɔi lɛ ashishi jogbaŋŋ ni ele nɔ ni Yehowa Odasefonyo ni mɔ ko ji lɛ tsɔɔ.—3/1, baafa 13.

▫ Te aaafee tɛŋŋ ni Biblia mli sɔlemɔi he aaaba sɛɛnamɔ aha wɔ? Kɛtsɔ Ŋmalɛ mli sɔlemɔi akwɛmɔ jogbaŋŋ nɔ lɛ, wɔbaanyɛ wɔyoo nɔ ni awie ni tamɔ shihilɛ mli ni wɔyɔɔ lɛ nɔŋŋ. Kɛ wɔna sɔlemɔi ni tamɔ nɛkɛ ni wɔkane, ni wɔjwɛŋ nɔ lɛ, eeeha sane ni wɔkɛ Yehowa gbaa lɛ aya hiɛ babaoo.—3/15, baafai 3, 4.

▫ Mɛni ji Nyɔŋmɔ gbeyeishemɔ? Nyɔŋmɔ gbeyeishemɔ ji woo ni mli wa ni ayɔɔ kɛha Yehowa, kɛ gbeyei ni asheɔ akɛ afeŋ nɔ ko ni esaaa ehiɛ. (Lala 89:8)—3/15, baafa 10.

▫ Mɛni ji gbɛi etɛ ni Biblia lɛ tsɔɔ akɛ wɔjara wa yɛ Nyɔŋmɔ hiɛ lɛ? Biblia lɛ tsɔɔ akɛ wɔteŋ mɔ fɛɛ mɔ yɛ nɔ ko ni jara wa yɛ ehe yɛ Nyɔŋmɔ hiɛ (Luka 12:6, 7); etsɔɔ nɔ ni jara wa kɛha Yehowa yɛ wɔmli lɛ mli (Maleaki 3:16); ni ekɛ nɔ ni Yehowa efee koni ekɛtsɔɔ suɔmɔ ni eyɔɔ kɛha wɔ lɛ toɔ he. (Yohane 3:16)—4/1, baafai 11, 12, 14.

▫ Mɛni hewɔ Hebribii 10:24, 25 fe famɔ ko kɛkɛ akɛ Kristofoi akpe kutuu lɛ? Nɛkɛ Paulo wiemɔi nɛɛ kɛ taomɔ nii ni jɛ ŋwɛi mamɔɔ shi kɛhaa Kristofoi akpeei fɛɛ—yɛ anɔkwale mli lɛ, kɛha be fɛɛ be ni Kristofoi aaakpe kutuu.—4/1, baafa 16.