Be Enyiɛ Esa akɛ Ohiafoi lɛ Amɛ Kɛyashi?

“Kɛji adesai anɔyeli ni ŋmɛɔ heyeli gbɛ lɛ nyɛɛɛ aye abua mɛi babaoo ni yeɔ ohia lɛ, no lɛ enyɛŋ ehere mɛi fioo ni ji niiatsɛmɛi lɛ ayiwala.”—John F. Kennedy.

“MASUMƆ ni wɔsɛɛ be ahi aha mɔ fɛɛ mɔ—mɔ ko yeee ohia, mɔ ko bɛ ni ebɛ shia ni ewɔɔ mli, shihilɛ lɛ atsɔ paradeiso!” Nɛkɛ ji bɔ ni gbekɛ nuu ko ni eye afii 12, ni ejɛ São Paulo, yɛ Brazil lɛ wie. Shi ani abaanyɛ ajie ohia kɛya kwraa? Be enyiɛ esa akɛ ohiafoi lɛ amɛ kɛyashi?

Mɛi komɛi tsɛɔ amɛhe ohiafoi akɛni amɛnyɛɛɛ amɛhe nibii ni amɛtaoɔ lɛ hewɔ. Shi kɛlɛ, susumɔ mɛi ni yeɔ ohia diɛŋtsɛ lɛ ashihilɛ ni yɔɔ mɔbɔ lɛ he okwɛ. Ani obaanyɛ ofee gbɔmɛi nɛɛ ashihilɛ ni mli wa waa, ni miishɛɛ ko kwraa bɛ mli lɛ he mfoniri? Mɛi komɛi yɛ ni amɛkɛ okai kɛ obishii shiɔ mple, ni amɛmiigbɛ tumu nɔ jwɛi amli kɛmiitao niyenii! Be enyiɛ adesai baaye ohia ni naa wa tamɔ nɛkɛ kɛyashi? Federico Mayor, ni ji UNESCO (United Nations Educational, Scientific, and Cultural Organization) lɛ nɔ onukpa fe fɛɛ lɛ faikpamɔ wiemɔi nɛɛ sa jogbaŋŋ, akɛ: “Nyɛhaa wɔkpooa tsui ni anaa ni yiŋ etɛɛɛ mɔ yɛ he, ni haa wɔnaa tsui wɔhaa shihilɛi fɔji ni ehiii kwraa—ohia, hɔmɔ, kɛ amanehului ni adesai akpekpei abɔ naa lɛ.”

Ani jeŋ fɛɛ shihilɛ kpakpa he lamɔ lɛ baaba mli kɛ̃? Mɛɛ hiɛnɔkamɔ ohiafoi lɛ yɔɔ?

Mɛɛ Hegbɛi Yɔɔ Kɛha Ohiafoi?

Hiɛnyiɛlɔi ni hiɛ jwɛŋmɔ kpakpa lɛ wieɔ nitsumɔi babaoo, nyɔmɔwoo kpakpa, shihilɛi ahe gbɛjianɔtoi ni etee hiɛ, kɛ shikpɔŋ saji ahe tsakemɔi ahe. Ekolɛ amɛkɛ nɔ ni tsutsu U.S. maŋ nɔyelɔ John F. Kennedy wie lɛ kpaa gbee, akɛ: “Kɛji adesai anɔyeli ni ŋmɛɔ heyeli gbɛ lɛ nyɛɛɛ aye abua mɛi babaoo ni yeɔ ohia lɛ, no lɛ enyɛŋ ehere mɛi fioo ni ji niiatsɛmɛi lɛ ayiwala.” Shi kɛlɛ, yiŋtoi kpakpai kɛkɛ faaa kɛha ohia jiemɔ. Akɛ nɔkwɛmɔ nɔ lɛ, ani shika gbɛfaŋ shweremɔ baaye abua ohiafoi fɛɛ? Jeee be fɛɛ be. Tsutsu India hiɛnyiɛlɔ Jawaharlal Nehru wie akɛ: “Kɛ ashi hewalɛi ni kudɔɔ adesai ashihilɛ ni bɔɔ jwetri amɛhaa amɛhe lɛ ni akudɔɔɔ lɛ lɛ, ehaa niiatsɛmɛi lɛ naa nii babaoo, ni ohiafoi lɛ hu yeɔ ohia waa.” Shi, kɛfata amanehulu kɛ ohia lɛ he lɛ, henumɔ ni ohiafoi lɛ naa akɛ amɛhe bɛ sɛɛnamɔ ko lɛ haa amɛ jatsu lɛ tsiiɔ waa. Ani adesai ahiɛnyiɛlɔi baanyɛ aye abua ohiafoi lɛ ni amɛye nijiaŋwujee henumɔi ni amɛnaa nɛɛ nɔ kunim?

Yɛ anɔkwale mli lɛ, mɛi ni yeɔ ohia waa lɛ ateŋ mɛi pii ekase ohia lɛ mli hilɛ, ni amɛye henumɔi ni amɛnaa akɛ abɛ bulɛ kɛha amɛ yɛ jaramɔ shihilɛi ni mli wa ni amɛyɔɔ mli, tamɔ nibii ajara ni wa waa kɛ nitsumɔ ni amɛbɛ hewɔ lɛ nɔ kunim. Kɛfata he lɛ, abaajie hɔmɔ, shihilɛ he ni abɛ, kɛ amanehului ni anaa nɛɛ fɛɛ kɛya kwraa. Ani enɛ miifee bo naakpɛɛ? Wɔmiifɔ bo nine ni okane sane ni nyiɛ sɛɛ lɛ: “Etsɛŋ, Mɔ Ko Yeŋ Ohia Dɔŋŋ!”