Sanebimɔi ni Jɛ Kanelɔi Adɛŋ

Ani halamɔ ni Nyɔŋmɔ hala hii kɛha mra be mli nɔyeli kuu lɛ kɛjɛ hewolonɔ su kome, kɛ maŋ kome mli—ni Yudafoi ji amɛ fɛɛ lɛ, tsɔɔ akɛ Nyɔŋmɔ miikwɛ hiɛaŋ?

Dabi, eka shi faŋŋ akɛ ekwɛɛɛ hiɛaŋ. Yudafoi ji mɛi fɛɛ ni Yesu tsɛ amɛ klɛŋklɛŋ akɛ ekaselɔi lɛ. Kɛkɛ ni, yɛ Pentekoste afi 33 Ŋ.B. lɛ, Yudafoi kɛ mɛi ni amɛtsake kɛba Yudafoi ajamɔ mli lɛ ji mɛi ni afɔ amɛ mu klɛŋklɛŋ, ni amɛbatsɔmɔ mɛi ni kɛ Kristo baaye maŋtsɛ yɛ ŋwɛi. Sɛɛ mli dani akɛ Samariabii kɛ Jeŋmajiaŋbii ni afolɔko amɛ ketia lɛ fata he. No hewɔ lɛ, shishinumɔ yɛ he akɛ Yudafoi sɔŋŋ, ni ji “bɔfoi lɛ kɛ onukpai lɛ ni yɔɔ Yerusalem lɛ,” ji mɛi ni yɔɔ nakai beaŋ nɔyeli kuu lɛ mli, taakɛ atsĩ tã yɛ Bɔfoi lɛ Asaji 15:2 lɛ. Mɛnɛɛmɛi ji hii ni yɔɔ Ŋmalɛi lɛ ahe shishinumɔ ni mli lɛɛ saŋŋ kɛ anɔkwa jamɔ mli niiashikpamɔ babaoo hu, ni amɛná be babaoo ni amɛkɛaaya hiɛ akɛ Kristofoi onukpai ni edara yɛ mumɔŋ.—Okɛto Romabii 3:1, 2 he.

Beni nɔyeli kuu lɛ fee nakai kpee ni awieɔ he yɛ Bɔfoi lɛ Asaji yitso 15 lɛ, no mli lɛ Jeŋmajiaŋbii pii ebatsɔmɔ Kristofoi. Amɛteŋ mɛi komɛi ji Afrikabii, Europabii, kɛ gbɔmɛi ni jɛ kpokpai krokomɛi anɔ. Ni kɛlɛ, nɔ ko bɛ ni aŋma afɔ shi ni tsɔɔ akɛ akɛ nɛkɛ Jeŋmajiaŋbii nɛɛ ekomɛi fata nɔyeli kuu lɛ he koni no aha mɛi ni jeee Yudafoi lɛ ana Kristojamɔ he miishɛɛ. Nɛkɛ Jeŋmajiaŋbii Kristofoi ni atsake amɛ ehee nɛɛ kɛ mɛi krokomɛi fɛɛ yeɔ egbɔ yɛ “Nyɔŋmɔ Israel lɛ” mli moŋ, shi amɛbaana bulɛ amɛha daramɔ ni Yudafoi Kristofoi, tamɔ bɔfoi ni fata nɔyeli kuu lɛ he yɛ nakai beaŋ lɛ edara yɛ mumɔŋ lɛ kɛ niiashikpamɔ babaoo hu ni amɛyɔɔ lɛ. (Gal. 6:16) Kadimɔ bɔ ni abuɔ nakai niiashikpamɔ lɛ waa ahaa, yɛ Bɔfoi lɛ Asaji 1:21, 22.—Heb. 2:3; 2 Pet. 1:18; 1 Yoh. 1:1-3.

Nyɔŋmɔ kɛ Israel maŋ lɛ, ni Yesu hala ebɔfoi lɛ kɛjɛ amɛteŋ lɛ eye yɛ gbɛ krɛdɛɛ nɔ aahu afii ohai babaoo. Ejeee tɔmɔ aloo jalɛsane ni ayeee akɛ bɔfoi lɛ ateŋ mɔ ko jɛɛɛ hei ni ale amrɔ nɛɛ akɛ Amerika Wuoyigbɛ, Afrika, aloo Bokagbɛ Shɔŋŋ lɛ ateŋ eko mli. Yɛ be ni sa mli lɛ, hii kɛ yei ni jɛ nɛkɛ hei nɛɛ baana hegbɛ akɛ amɛnine aaashɛ gbɛhei ni nɔ kwɔlɔ nɔ, fe ni amɛaatsɔmɔ bɔfoi yɛ shikpɔŋ lɛ nɔ, ni amɛaafee klɛŋklɛŋ afii oha lɛ mli nɔyeli kuu lɛ mli nyo, aloo ni aaahala amɛ awo gbɛhe kroko ko mli yɛ Nyɔŋmɔ webii ateŋ ŋmɛnɛ.—Gal. 3:27-29.

Enɛ tsirɛ bɔfoi lɛ ateŋ mɔ kome ni ewie akɛ “Nyɔŋmɔ jeee mɛi ahiɛaŋkwɛlɔ, shi moŋ maŋ fɛɛ maŋ mli lɛ, mɔ ni sheɔ lɛ gbeyei ni etsuɔ jalɛ nii lɛ, lɛ ji mɔ ni saa ehiɛ.” (Bɔf. 10:34, 35) Hɛɛ, Kristo kpɔmɔ nɔ lɛ mli sɛɛnamɔi lɛ yɛ kɛha gbɔmɛi fɛɛ ni hiɛaŋkwɛmɔ ko kwraa bɛ mli. Ni aŋkroaŋkroi ni jɛ akutsei kɛ maji anɔ wiemɔi kɛ jeŋmaŋ fɛɛ jeŋmaŋ mli baafata he yɛ ŋwɛi Maŋtsɛyeli lɛ mli, kɛ agbɛnɛ yɛ asafo babaoo ni baahi shi kɛya naanɔ yɛ shikpɔŋ nɛɛ nɔ lɛ hu mli.

Adesai pii naa henumɔi ni mli wa yɛ hewolonɔ su, wiemɔ, aloo he ni mɔ ko jɛ lɛ he. Nɔ ni wɔkaneɔ yɛ Bɔfoi lɛ Asaji 6:1, ni tsɔɔ sane ko ni kɛ huhuuhu wiemɔ ba Kristofoi ni wieɔ Hela wiemɔ kɛ mɛi ni wieɔ Hebri wiemɔ lɛ ateŋ lɛ, feɔ enɛ he nɔkwɛmɔ nɔ. Ekolɛ bɔ ni atsɔse wɔ aha lɛ eha wɔná, aloo wɔ diɛŋtsɛ wɔná henumɔi ni mli wa amrɔ nɛɛ yɛ wiemɔ, hewolonɔ su, aloo he ni mɔ ko jɛ lɛ he. Akɛni eeenyɛ ebalɛ nakai lɛlɛŋ hewɔ lɛ, wɔɔfee jogbaŋŋ akɛ wɔɔmia wɔhiɛ kɛ mɔdɛŋbɔɔ ni wɔkɛ bɔ ni Nyɔŋmɔ naa wɔ ehaa, ni ji akɛ, adesai fɛɛ yeɔ egbɔ yɛ ehiɛ, ekɔɔɔ he eko bɔ ni wɔji yɛ kponɔgbɛ lɛ, atsake wɔhenumɔi kɛ wɔnifeemɔi. Beni Nyɔŋmɔ ha aŋmala hesaai ni ataoɔ yɛ onukpai kɛ asafoŋ sɔɔlɔi ahe lɛ, etsiii hewolonɔ su kɛ maŋ nɔ ni mɔ ko jɛ lɛ tã. Dabi, egbala jwɛŋmɔ kɛtee mumɔŋ hesaai anɔ titri yɛ mɛi ni baasa akɛ ahala amɛ ni amɛsɔmɔ lɛ ahe. Enɛ ji anɔkwale yɛ wɔ asafoŋ onukpai, nɔkwɛlɔi gbɛfalɔi, kɛ nitsumɔ he nine nitsulɔi ahe ŋmɛnɛ, taakɛ eji anɔkwale yɛ nɔyeli kuu lɛ he yɛ klɛŋklɛŋ afii oha lɛ mli lɛ.