Sanebimɔi ni Jɛ Kanelɔi Adɛŋ

Klɛŋklɛŋ Yohane 4:18 kɛɔ wɔ akɛ: “Gbeyeishemɔ bɛ suɔmɔ mli, shi moŋ suɔmɔ ni eye emuu lɛ shwieɔ gbeyeishemɔ.” Shi Petro ŋma akɛ: “Nyɛsumɔa nyɛnyɛmimɛi; nyɛshea Nyɔŋmɔ gbeyei.” (1 Petro 2:17) Te wɔɔfee tɛŋŋ wɔha ŋmalɛi kukuji enyɔ nɛɛ kɛ amɛhe akpa gbee?

Petro kɛ Yohane fɛɛ ji bɔfoi ni kase nii tɛɛ kɛjɛ Yesu Kristo diɛŋtsɛ ŋɔɔ. Enɛ hewɔ lɛ wɔbaanyɛ wɔna hekɛnɔfɔɔ akɛ nɔ ni amɛŋma lɛ kɛ amɛhe kpaa gbee. Yɛ kukuji ni atsɛ sɛɛ yɛ yiteŋgbɛ lɛ agbɛfaŋ lɛ, hetoo lɛ kɛkɛ ji akɛ, bɔfoi lɛ miiwie gbeyeishemɔi sɔrɔtoi enyɔ he.

Ha wɔsusu Petro ŋaawoo lɛ he tsutsu. Taakɛ emli sane lɛ tsɔɔ lɛ, Petro kɛ ŋaawoo ni jɛ mumɔŋ miiha nanemɛi Kristofoi yɛ su ni sa akɛ amɛjie lɛ kpo yɛ nɔyelɔi ahe lɛ he. Kɛ wɔɔwie yɛ gbɛ kroko nɔ lɛ, no mli lɛ eewie jwɛŋmɔ kpakpa ni sa akɛ ana yɛ heshibaa kpojiemɔ he yɛ shihilɛi komɛi amli lɛ he. No hewɔ lɛ, ewo Kristofoi ŋaa ni amɛba amɛhe shi amɛha mɛi ni hiɛ hegbɛi ni nɔ kwɔlɔ yɛ adesai anɔyelii amli, tamɔ maŋtsɛmɛi loo amralofoi lɛ. (1 Petro 2:13, 14) Bei eyaa nɔ lɛ, Petro ŋma akɛ: “Nyɛwoa mɛi fɛɛ; nyɛsumɔa nyɛnyɛmimɛi; nyɛshea Nyɔŋmɔ gbeyei; nyɛwoa maŋtsɛ.”—1 Petro 2:17.

Kɛji wɔsusu emli sane lɛ he lɛ, wɔnaa faŋŋ akɛ beni Petro wie akɛ esa akɛ Kristofoi “[ashe] Nyɔŋmɔ gbeyei” lɛ, eetsɔɔ akɛ esa akɛ wɔna woo kɛ bulɛ ni mli kwɔ wɔha Nyɔŋmɔ, ni ji gbeyeishemɔ ni wɔɔna akɛ wɔfeŋ nɔ ko ni esaŋ hegbɛ ni fe fɛɛ lɛ hiɛ.—Okɛto Hebribii 11:7 he.

Shi bɔfo Yohane wiemɔ lɛ hu? Mra mli kɛtsɔ hiɛ yɛ 1 Yohane yitso 4 lɛ, bɔfo lɛ wie bɔ ni ehe hiaa ni wɔka ‘wiemɔi ni jɛ mumɔŋ,’ tamɔ nɔ ni jɛɔ amale gbalɔi aŋɔɔ kɛbaa lɛ wɔkwɛ lɛ he. Eka shi faŋŋ akɛ nakai wiemɔi lɛ jɛɛɛ Yehowa Nyɔŋmɔ ŋɔɔ; amɛjɛ jeŋ fɔŋ nɛɛ mli loo amɛjieɔ esu kpo.

Nɔ ni tamɔɔɔ nakai lɛ, Kristofoi ni afɔ amɛ mu lɛ “jɛ Nyɔŋmɔ mli.” (1 Yohane 4:1-6) Akɛni nakai ji sane lɛ hewɔ lɛ, Yohane wo hewalɛ akɛ: “Suɔmɔ mɛi, nyɛhaa wɔsumɔsumɔa wɔhe, ejaakɛ suɔmɔ lɛ Nyɔŋmɔ mli ejɛ.” Nyɔŋmɔ ŋɔ hegbɛ lɛ ni ekɛjie suɔmɔ kpo—“etsu e-Bi lɛ akɛ ebafee wɔhe eshai lɛ ahe kpatamɔ nɔ.” (1 Yohane 4:7-10) Te esa akɛ wɔhere nɔ wɔha tɛŋŋ?

Eyɛ faŋŋ akɛ, esa akɛ wɔya nɔ wɔkɛ wɔ-Nyɔŋmɔ ni yɔɔ suɔmɔ lɛ afee ekome. Esaaa akɛ ehe ŋmiŋmi mɔɔ wɔ aloo wɔkpokpoɔ yɛ hegbɛ ni wɔyɔɔ akɛ wɔbɛŋkɛɔ lɛ yɛ sɔlemɔ mli lɛ he. Yohane wo ŋaa kɛtsɔ hiɛ akɛ: “Kɛji wɔtsui ebuuu wɔ fɔ lɛ, wɔyɛ ekaa yɛ Nyɔŋmɔ hiɛ, ni nɔ fɛɛ nɔ ni wɔbaa lɛ, wɔnaa yɛ edɛŋ, ejaakɛ ekitai lɛ wɔyeɔ nɔ.” (1 Yohane 3:21, 22) Hɛɛ, henilee kpakpa haa wɔ heyeli ni wɔkɛaabɛŋkɛ Nyɔŋmɔ ni gbeyeishemɔ ni fiteɔ nii loo etsiɔ mɔ gbɛ lɛ eko bɛ mli. Wɔjɛɔ suɔmɔ mli wɔnuɔ he akɛ wɔyɛ hegbɛ akɛ wɔkɛ Yehowa aaawie, loo wɔɔbɛŋkɛ lɛ yɛ sɔlemɔ mli. Yɛ enɛ gbɛfaŋ lɛ, “gbeyeishemɔ bɛ suɔmɔ mli.”

Belɛ ha wɔfee susumɔi enyɔ nɛɛ ekome wɔkwɛ. Esa akɛ Kristofonyo ana gbeyeishemɔ ni woo yɔɔ mli kɛha Yehowa be fɛɛ be, ni jɛ bulɛ ni mli kwɔ ni ayɔɔ kɛha egbɛhe, hewalɛ, kɛ jalɛsaneyeli lɛ mli. Shi wɔsumɔɔ Nyɔŋmɔ hu akɛ wɔ-Tsɛ, ni wɔnuɔ he akɛ wɔbɛŋkɛ lɛ kpaakpa, kɛ heyeli hu ni wɔkɛaaya eŋɔɔ. Yɛ nɔ najiaŋ ni ehe ŋmiŋmi ko aaatsi wɔnaa lɛ, wɔyɛ hekɛnɔfɔɔ akɛ wɔbaanyɛ wɔbɛŋkɛ lɛ, tamɔ bɔ ni gbekɛ bibioo kɛ heyeli bɛŋkɛɔ efɔlɔ ni yɔɔ suɔmɔ lɛ.—Yakobo 4:8.