Akɛ Shihilɛ Kpakpa He Shiwoo Eha

ANI obaasumɔ ni oye ohe kɛjɛ naagbai ni haa shihilɛ feɔ nɔ ni wa lɛ amli? Ani oosumɔ ni ohi shi yɛ jeŋ ko ni shihilɛ ŋɔɔ tamɔ bɔ ni áfee he mfoniri yɛ wolo tɛtrɛɛ nɛɛ hiɛ kɛ esɛɛ lɛ mli? Kwɛmɔ nakai mfoniri lɛ jogbaŋŋ. Gbɔmɛi yɛ nibii pii ni amɛyeɔ. Amɛbaanya nakai niyenii ni ŋɔɔ lɛ yeli he diɛŋtsɛ. Mɔ fɛɛ mɔ yɛ miishɛɛ. Gbɔmɛi ni jɛ hewolɔ nɔ sui sɔrɔtoi amli kɛ amɛhe miihi shi yɛ toiŋjɔlɛ mli. Toiŋjɔlɛ yɛ kooloi lɛ po ateŋ! Mɔ ko mɔ ko beee. Mɔ ko mɔ ko bɛ ni ji ohiafo. Mɔ ko mɔ ko he yeee. Nibii ni yɔɔ miishɛɛ ni ebɔle amɛhe lɛ amli shihilɛ ŋɔɔ, tsei fɛfɛji, kɛ nui ni yɔɔ krɔŋŋ ni mli tse yɛ. Mɛɛ gbɛjianɔtoo ni nɔ bɛ po nɛ!

Ani shikpɔŋ nɛɛ baatamɔ nɛkɛ gbi ko? Hɛɛ, ebaafee paradeiso. (Luka 23:43) Nyɔŋmɔ, mɔ ni bɔ shikpɔŋ lɛ eto eyiŋ akɛ, adesai baana shihilɛ kpakpa mli ŋɔɔmɔ yɛ paradeiso shikpɔŋ nɔ. Ni obaanyɛ ohi jɛmɛ!

Mɛɛ Shihilɛ Obaasumɔ?

Mɛɛ gbɛ nɔ wɔsɛɛ be shikpɔŋ nɔ Paradeiso lɛ baatsɔ afee nɔ ni yɔɔ sɔrɔto yɛ jeŋ ni wɔyɔɔ mli bianɛ lɛ he? Amrɔ nɛɛ, gbɔmɛi fe akpekpei akpe kome wɔɔ kɛ hɔmɔ daa gbi. Shi mɔ fɛɛ mɔ baana niyenii babaoo aye yɛ Paradeiso ni Nyɔŋmɔ eto eyiŋ yɛ he kɛha shikpɔŋ lɛ mli. Biblia lɛ woɔ shi akɛ: “Ni Yehowa Zebaot aaaŋmɛ okpɔlɔ . . . aha majimaji fɛɛ: fɔnii kɛ wein kpakpa, . . . wein kpakpa ni atsere nɔ.” (Yesaia 25:6) Niyenii etaŋ dɔŋŋ, ejaakɛ Biblia lɛ kɛɔ akɛ: “Shikpɔŋ lɛ nɔ aaaba abele babaoo kɛyashwie gɔji lɛ ayiteaŋ.”—Lala 72:16.

Ŋmɛnɛ, mɛi pii hiɔ tsũi kɛ shihilɛ hei ni ehiii mli, loo amɛgboɔ deŋme yɛ amɛtsũ nyɔmɔwoo mli. Mɛi krokomɛi bɛ shia, ni amɛwɔɔ yɛ gbɛjegbɛi anɔ. Taakɛ Jeŋ Hewalɛnamɔ Gbɛjianɔtoo lɛ tsɔɔ lɛ, gbekɛbii ni amɛyifalɛ shɛɔ akpekpei 100 ni yɔɔ jeŋ fɛɛ lɛ bɛ shiai ni amɛhiɔ mli. Shi yɛ Paradeiso ni baaba lɛ mli lɛ, mɔ fɛɛ mɔ baana shia ni eeetsɛ lɛ akɛ lɛ diɛŋtsɛ enɔ̃. Nyɔŋmɔ Wiemɔ lɛ kɛɔ akɛ: “Shi amɛaamamɔ tsũi ni amɛaahi mli, ni amɛaafee weintromi, ni amɛaaye mli yibii!”—Yesaia 65:21.

Mɛi pii gboɔ deŋme yɛ nitsumɔ ni amɛsumɔɔɔ he. Bei pii lɛ, amɛkɛ ŋmɛlɛtswai babaoo tsuɔ nitsumɔ ni wa, shi nɔ ko fioo pɛ amɛnine shɛɔ nɔ. Gbɔmɛi ni yɔɔ je lɛŋ lɛ ateŋ mɛi 5 mli 1 nyɔmɔwoo shɛɛɛ dɔla 500 afi. Shi, yɛ Paradeiso ni baa lɛ mli lɛ, gbɔmɛi baanya amɛ nitsumɔ he, ni amɛbaana nibii kpakpai ni baa kɛjɛɔ mli lɛ. Nyɔŋmɔ woɔ shi akɛ: “Mɛi ni mihala lɛ aaaye amɛnine naa nitsumɔ lɛ mli nii aahu po. Amɛgboŋ deŋme yakatswaa.”—Yesaia 65:22, 23.

Helai yɛ he fɛɛ he bianɛ. Mɛi pii eshwila. Mɛi komɛi nuuu nii. Mɛi krokomɛi nyɛɛɛ anyiɛ. Shi yɛ Paradeiso lɛ, gbɔmɛi baaye amɛhe kɛjɛ hela he. Yehowa kɛɔ akɛ: “Ni maŋ bii lɛ ateŋ mɔ ko ekɛɛŋ akɛ: ‘Mihe miiye.’ ” (Yesaia 33:24, NW) Yɛ mɛi ni etsɔmɔ obubuafoi lɛ agbɛfaŋ lɛ, shiwoo ni haa mɔ tsui nyaa lɛ ji: “No mli lɛ aaagbele shwilafoi ahiŋmɛii, ni aaagbele toimulɔi atoii. No mli lɛ obubuafoi aaatumɔ akɛ ofrote, ni mumui lilɛi hu aaala kɛ nyamɔ.”—Yesaia 35:5, 6.

Nɔ̃naa kɛ piŋmɔ, kɛ awerɛho kɛ gbele yɛ ŋmɛnɛ. Shi nɛkɛ nibii nɛɛ fɛɛ ehiŋ shi yɛ shikpɔŋ nɔ Paradeiso lɛ mli. Hɛɛ, gbele po etee kwraa! Biblia lɛ kɛɔ akɛ: “Nyɔŋmɔ diɛŋtsɛ kɛ amɛ aaahi shi. . . . Ni Nyɔŋmɔ aaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ; ejaakɛ tsutsu nii lɛ eho etee.”—Kpojiemɔ 21:3, 4.

Belɛ, eka shi faŋŋ akɛ, Yehowa shiwoo, Paradeiso shikpɔŋ lɛ baatsɔɔ shihilɛ kpakpa kɛha adesai. Shi te wɔɔfee tɛŋŋ wɔna nɔmimaa akɛ ebaaba? Mɛɛ be ebaaba, ni yɛ mɛɛ gbɛ nɔ? Mɛni esa akɛ ofee koni ohi jɛmɛ?