Amɛyɛ Miishɛɛ yɛ Jeŋ ni Bɛ Miishɛɛ Mli
THE NEW YORK TIMES ni ji January 26, 1995 nɔ lɛ je emli sane titri lɛ ŋmaa shishi akɛ: “Kɛ hoo lɛ, enɛ efee Satan afii oha ni ehiii fe fɛɛ. Be ko bako yɛ tsutsu ni gbɔmɛi ejie hesaa kɛ akɔnɔ babaoo kpo kɛha gbɔmɛi krokomɛi akpekpei abɔ gbee yɛ weku, jamɔ loo kuu hewɔ nɛkɛ da.”
Afii 50 gbijurɔyeli ni akɛkaiɔ mɛi ni efeko efɔŋ ko ni awo amɛ tsuŋ yɛ Nazi gbele ŋsarai amli lɛ ajiemɔ lɛ kanya nɛkɛ adafitswaa woji amli saji titrii ni wɔkane nɛɛ aŋmalamɔ. Ni kɛlɛ, gbɔmɔgbeei ni hiŋmɛigbelemɔ bɛ mli nɛɛ nɔŋŋ eko yaa nɔ lolo yɛ Afrika kɛ Europa Bokagbɛ hei komɛi.
Gbɔmɛi ni nyɛɛɛ afa amɛhe lɛ agbee, wekui ashishi bulemɔ, mɛi ni wieɔ wiemɔi komɛi ahiɛkpatamɔ—bɔ fɛɛ bɔ ni atsɛɔ amɛ ahaa lɛ—nɔ ni jɛɔ mli baa ji awerɛho babaoo. Ni kɛlɛ, nɔ ni jeɔ kpo kɛjɛɔ yiwalɛ nifeemɔ nɛɛ mli ji miishɛɛ gbeei ni naa wa. Akɛ nɔkwɛmɔ nɔ lɛ, nyɛhaa wɔkwɛa Germany yɛ 1930 afii lɛ amli.
Beni shɛɔ 1935 April mli lɛ, Hitler kɛ e-Nazi kuu lɛ egu Yehowa Odasefoi akɛ amɛkatsu nɔyeli lɛ mli maŋ sɔɔmɔ nitsumɔ ko. Amɔmɔ Odasefoi lɛ hu ni awo amɛ tsuŋ, ni akɛ amɛ tee gbokɛlɛfoi aŋsarai amli akɛni amɛhi shi akɛ Kristofoi ni kɛ amɛhe wooo maŋ saji amli hewɔ. (Yohane 17:16) Yɛ 1936 August naagbee mli lɛ, amɔmɔ Yehowa Odasefoi babaoo. Akɛ amɛteŋ mɛi akpei abɔ tee gbokɛlɛfoi aŋsarai amli, he ni amɛteŋ mɛi pii hi kɛyashi 1945 kɛ amɛyɛ wala mli. Shi, te Odasefoi lɛ fee amɛ nii yɛ niseniianiifeemɔ ni esaaa akɛ afeɔ gbɔmɔ ni amɛkɛkpe yɛ ŋsarai lɛ amli lɛ he amɛha tɛŋŋ? Etamɔ naakpɛɛ sane akɛ, amɛnyɛ amɛhiɛ miishɛɛ mli yɛ shihilɛ ni miishɛɛ bɛ mli ni ebɔle amɛhe lɛ fɛɛ sɛɛ.
“Tɛsaa ni Yɔɔ Ŋmɔtɔ Mli”
Ŋleshi yinɔsaneŋmalɔ, Christine King bibii Katolik yoo ko ni yɔɔ ŋsarai lɛ amli lɛ sane. Dr. King kɛɛ: “Ekɛ wiemɔ kuku ko tsu nii ni mihiɛ kpako nɔ. Ewie babaoo yɛ bɔ ni shihilɛ lɛ yɔɔ gbeyei ha, nyaŋemɔ shihilɛ ni ehi mli lɛ he. Ni ekɛɛ ele Odasefoi lɛ, ni nakai Odasefoi lɛ ji tɛsaa ni yɔɔ ŋmɔtɔ mli. He ko ni yɔɔ shiŋŋ yɛ nakai ŋmɔtɔ lɛ fɛɛ mli. Ekɛɛ amɛ pɛ ji gbɔmɛi ni efɛɛɛ lajɔ̃ kɛ́ bulɔi lɛ ho. Amɛ pɛ ji gbɔmɛi ni tsɔɔɔ hetsɛ̃ nɔ amɛtsuuu enɛɛmɛi fɛɛ he nii, shi amɛtsɔ suɔmɔ kɛ hiɛnɔkamɔ kɛ henumɔ nɔ ákɛ yiŋtoo ko yɛ.”
Mɛni ha Yehowa Odasefoi nyɛ amɛfee ‘tɛsaai ni yɔɔ ŋmɔtɔ mli’ lɛ? Yehowa Nyɔŋmɔ kɛ e-Bi Yesu Kristo mli hemɔkɛyeli ni hosooo. No hewɔ lɛ, Hitler mɔdɛŋbɔɔi lɛ nyɛɛɛ atsi amɛ Kristofoi asuɔmɔ kɛ miishɛɛ lɛ naa.
Bo toi, beni mɛi enyɔ ni je ŋsara lɛ mli lɛ kaiɔ enɛ, yɛ afii nyɔŋmai enumɔ sɛɛ, beni amɛye hemɔkɛyeli he kaa nɛɛ mli omanye lɛ. Mɔ kome kɛɛ: “Miishɛɛ yiɔ mimli obɔ akɛni mile akɛ mina hegbɛ ni ekaaa ni mikɛaaye misuɔmɔ kɛ shidaa kɛha Yehowa lɛ he odase yɛ shihilɛi ni yiwaa ni fe fɛɛ yɔɔ mli lɛ shishi lɛ hewɔ. Mɔ ko mɔ ko enyɛɛɛ minɔ akɛ mifee enɛ! Nɔ ni tamɔɔɔ nakai lɛ, mɛi ni bɔ mɔdɛŋ ni amɛnyɛ wɔnɔ lɛ ji wɔhenyɛlɔi ni bɔ mɔdɛŋ kɛtsɔ hegbeyeiwoo nɔ koni amɛha wɔbo Hitler toi babaoo moŋ fe Nyɔŋmɔ lɛ—shi amɛyeee omanye! Jeee akɛ miyɛ miishɛɛ bianɛ kɛkɛ, shi yɛ henilee kpakpa hewɔ lɛ, mina miishɛɛ po yɛ be mli ni miyɔɔ tsuŋwoo he lɛ.”—Maria Hombach, ni eye afii 94.
Odasefonyo kroko hu jaje akɛ: “Misusuɔ mitsuŋwoo gbii lɛ ahe kɛ shidaa kɛ miishɛɛ. Afii ni miye yɛ Hitler shishi yɛ tsuŋwoo hei lɛ kɛ gbokɛlɛfoi aŋsarai amli lɛ wa ni eyi obɔ kɛ kaai. Shi miyasumɔɔɔ ni majo naa foi, ejaakɛ amɛtsɔɔ mi bɔ ni mikɛ mihe aaafɔ Yehowa nɔ kwraa.”—Johannes Neubacher, ni eye afii 91.
“Mikɛ mihe afɔ Yehowa nɔ kwraa”—no ji miishɛɛ ni Yehowa Odasefoi na lɛ naa samfee. No hewɔ lɛ, amɛyɛ miishɛɛ, eyɛ mli akɛ jeŋ ni miishɛɛ bɛ mli ebɔle amɛhe. Amɛ miishɛɛ lɛ je kpo faŋŋ yɛ “Miishɛɛ Yijielɔi” Kpokpaa Wulu nɔ Kpeei ni afee yɛ nyɛsɛɛ nyɔji ni ho nɛɛ amli lɛ shishi. Nyɛhaa wɔtia henaabuamɔi ni miishɛɛ yɔɔ mli nɛɛ amli kuku.
[Mfoniri ni yɔɔ baafa 4]
Maria Hombach