Nyɔŋmɔ he Nilee he Miihia Adesai
“No dani ooonu Yehowa gbeyeishemɔ shishi, ni ooona Nyɔŋmɔ he nilee.”—ABƐI 2:5.
1. Mɛni hewɔ abaanyɛ akɛɛ akɛ adesa tsui lɛ ji adebɔɔ nii ni aje gbɛ afee lɛ jogbaŋŋ lɛ?
ADESA tsuii aaashɛ 5,600,000,000 miitswa yɛ shikpɔŋ nɛɛ nɔ bianɛ. Daa gbi lɛ, bo diɛŋtsɛ otsui tswaa shii 100,000, ni eshiɔ lá ni falɛ shɛɔ litai 7,600 kɛtsɔɔ ogbɔmɔtsoŋ lá fãji sɔrɔtoi babaoo ni kɛji akɛ akɛtsara lɛ, ekɛlɛ baashɛ kilomitai 100,000 lɛ amli. Gbɔmɔtso lɛ mli henɔ̃ kroko ko bɛ ni tsuɔ nii waa fe Nyɔŋmɔ adebɔɔ ni eje gbɛ efee lɛ jogbaŋŋ nɛɛ.
2. Te oootsɔɔ bɔ ni mfoniri-feemɔŋ tsui lɛ ji lɛ mli oha tɛŋŋ?
2 Mfoniri-feemɔŋ tsuii 5,600,000,000 hu miitsu nii yɛ shikpɔŋ nɔ. Nɔ ni yɔɔ mfoniri feemɔŋ tsui lɛ mli ji wɔ henumɔi, wɔ kanyamɔi kɛ akɔnɔ. Jɛmɛ ji he ni wɔsusumɔi, wɔ shishinumɔ, kɛ wɔ suɔmɔnaa nii yɔɔ. Mfoniri-feemɔŋ tsui lɛ baanyɛ awo ehe nɔ loo eba ehe shi, ebaanyɛ eye awerɛho loo ena miishɛɛ, ebaanyɛ ewo duŋ loo emli atse.—Nehemia 2:2; Abɛi 16:5; Mateo 11:29; Bɔfoi lɛ Asaji 14:17; 2 Korintobii 4:6; Efesobii 1:16-18.
3, 4. Akɛ sanekpakpa lɛ miishɛ gbɔmɛi atsuii amli yɛ mɛɛ gbɛ nɔ?
3 Yehowa Nyɔŋmɔ baanyɛ akane adesa tsui lɛ mli saji. Abɛi 17:3 kɛɔ akɛ: “Niiahetsuumɔ kukwɛi lɛ, eyɛ ha jwiɛtɛi, ni flɔnɔɔ yɛ ha shika; shi Yehowa ji mɔ ni kaa tsuii ekwɛɔ.” Shi, ni eeele tsui fɛɛ tsui mli saji ni ekojo kɛkɛ lɛ, Yehowa kɛ e-Dasefoi lɛ miitsu nii koni amɛkɛ sanekpakpa lɛ ashɛ gbɔmɛi atsuii amli. Enɛ kɛ bɔfo Paulo wiemɔi nɛɛ kpaa gbee: “ ‘Mɔ fɛɛ mɔ ni aaabo atsɛ Nuntsɔ [Yehowa, NW] gbɛi lɛ, aaahere eyiwala.’ Shi te aaafee tɛŋŋ ni amɛaabo amɛtsɛ mɔ ni amɛheko lɛ amɛyeko lɛ? Ni te aaafee tɛŋŋ ni amɛaahe mɔ ni amɛnuko ehe sane lɛ amɛye hu? Ni asaŋ, te aaafee tɛŋŋ ni amɛaanu kɛ shiɛlɔ ko bɛ lɛ? Ni te aaafee tɛŋŋ ni amɛaashiɛ, kɛ atsuko amɛ lɛ? Taakɛ bɔ ni aŋma akɛ: ‘Kwɛ bɔ ni hejɔlɛ he sanekpakpa shiɛlɔi ni shiɛɔ nii kpakpai lɛ anaji yɔɔ fɛo ha!’ ”—Romabii 10:13-15.
4 Esa Yehowa hiɛ akɛ eeetsu e-Dasefoi lɛ kɛaaya shikpɔŋ lɛ naagbee hei fɛɛ ni ‘amɛyashiɛ nii kpakpai ahe sanekpakpa,’ ni amɛtao mɛi ni yɔɔ tsuii ni kpɛlɛɔ sane lɛ nɔ. Amrɔ nɛɛ wɔ yifalɛ fe 5,000,000—kɛ aja mli lɛ, Odasefonyo 1 kɛha mɛi aaashɛ 1,200 yɛ shikpɔŋ nɛɛ nɔ. Sanekpakpa lɛ ni akɛaashɛ shikpɔŋ nɔ bii akpekpei toi akpei abɔ lɛ fɛɛ ŋɔɔ lɛ bɛ mlɛo. Shi Nyɔŋmɔ miikudɔ nitsumɔ nɛɛ kɛmiitsɔ Yesu Kristo nɔ, ni eegbala mɛi ni yɔɔ jalɛ tsuii lɛ kɛmiiba. No hewɔ lɛ, gbalɛ ni aŋma yɛ Yesaia 60:22 lɛ miiba mli anɔkwale, akɛ: “Mɔ bibioo ko aaatsɔ mɛi akpe, ni mɔ fioo hu aaatsɔ maŋ ni wa. Kɛ shɛ ebe lɛ, mi, Yehowa, maha afee oya.”
5. Mɛni ji nilee, ni mɛni abaanyɛ awie yɛ je lɛ nilee he?
5 Nakai be lɛ ji amrɔ nɛɛ, ni nɔ kome ko yɛ faŋŋ—nilee he miihia gbɔmɛi akpekpei akpei abɔ ni yɔɔ shikpɔŋ nɔ lɛ. Klɛŋklɛŋ lɛ, nilee shishi ji le ni aleɔ anɔkwa saji, ni anaa kɛtsɔɔ niiashikpamɔ, niyɔsemɔ, loo nikasemɔ nɔ. Je lɛ ebua nilee babaoo naa. Atee hiɛ waa yɛ nibii tamɔ tsɔnei ni akɛfãa gbɛ, gbɔmɔtsoŋ hewalɛnamɔ, kɛ gbɛi ni atsɔɔ nɔ akɛ mɛi yeɔ sharamɔ yɛ shɔŋŋ lɛ gbɛfaŋ. Shi ani jeŋ nilee ji nɔ ni he hiaa adesai diɛŋtsɛ? Dabi! Tai, nɔnyɛɛ, helai, kɛ gbele miiya nɔ eehao adesai lolo. Bei pii lɛ, je lɛ nilee feɔ tamɔ shia ni ahum looɔ kɛjɛɔ shia-ŋa nɔ kɛyaa he fɛɛ he ni esumɔɔ.
6. Yɛ lá gbɛfaŋ lɛ, kɛ akɛ Nyɔŋmɔ nilee to je lɛ nilee he lɛ, mɛni anaa?
6 Akɛ nɔkwɛmɔ nɔ lɛ: Aaafee afii ohai enyɔ ni eho nɛ lɛ, nɔ ni afɔɔ feemɔ ji akɛ, afoɔ mɔ lá fãi lɛ eko ni ahãa lá hoɔ lɛ aahu, ni asusuɔ akɛ enyɛɔ etsaa mɔ. Afolɔ George Washington, ni ji United States klɛŋklɛŋ nɔyelɔ lɛ lá fãi lɛ ekomɛi ni lá ho lɛ aahu, beni eshwɛ ŋmɛlɛtswai fioo ko ni ebaagbo lɛ. Ni eshɛ he ko ni ekɛɛ akɛ: “Nyɛhaa magboa yɛ hejɔlɛ mli; misɛɛ etsɛŋ dɔŋŋ.” Ni esane ja, ejaakɛ egbo nakai gbi lɛ nɔŋŋ—ni ji December 14, 1799. Yɛ lá ni aaaha eho mɔ najiaŋ lɛ, nɔ ni amaa nɔ mi ŋmɛnɛ ji lá ni aaagbala awo adesa gbɔmɔtso lɛ mli. Nɔ ni eyi nifeemɔi enyɔ nɛɛ fɛɛ mli ji naagbai ni gbeɔ mɔ. Shi yɛ nɛkɛ be nɛɛ mli fɛɛ lɛ, Nyɔŋmɔ Wiemɔ lɛ ekɛɛ akɛ: ‘Nyɛhia . . . lá.’ (Bɔfoi lɛ Asaji 15:29) Nyɔŋmɔ he nilee ja be fɛɛ be, anyɛɔ akɛ he fɔ̃ɔ nɔ, ni esa kɛha wɔ amrɔ be nɛɛ.
7. Kɛ akɛ Ŋmalɛ mli anɔkwa nilee ni kɔɔ gbekɛbii atsɔsemɔ he lɛ to je lɛ nilee he lɛ, te anaa tɛŋŋ?
7 Susumɔ jeŋ nilee ni anyɛɛɛ akɛ he afɔ nɔ lɛ he nɔkwɛmɔ nɔ kroko he okwɛ. Afii pii nɛ ni jwɛŋmɔ he nilelɔi kɛ susumɔ ko ba akɛ aŋmɛ gbekɛbii agbɛ ni amɛfee nɔ ni amɛsumɔɔ, yɛ amɛ tsɔsemɔ mli, shi sɛɛ mli lɛ, mɛi ni kɛ susumɔ nɛɛ ba lɛ ateŋ mɔ kome kpɛlɛ nɔ akɛ eji tɔmɔ. Kuu ko ni atsɛɔ amɛ German Philological Association lɛ kɛɛ be ko akɛ, gbɛ ni aŋmɛɔ ni afeɔ nɔ fɛɛ nɔ ni asumɔɔ lɛ “ji nɔ ni, kɛ hoo lɛ, ekɛ naagbai ni wɔnaa amrɔ nɛɛ yɛ gbekɛbii agbɛfaŋ lɛ ba, yɛ gbɛ ko nɔ.” Jeŋ nilee nyɛɔ etsakeɔ be fɛɛ be, tamɔ nɔ ni kɔɔyɔɔ tswaa lɛ kɛyaa kɛbaa, shi Ŋmalɛ mli nilee ni ja lɛ efee nɔ ni hosooo. Biblia lɛ kɛ ŋaawoo ni ŋmɛɔ pɛpɛɛpɛ haa yɛ bi tsɔsemɔ he. Abɛi 29:17 kɛɔ akɛ: “Tsɔsemɔ obi, ni eeeha ohe ajɔo, ni eeeha osusuma mii ashɛ ehe.” Esa akɛ akɛ tsɔsemɔ ni tamɔ nɛkɛ aha yɛ suɔmɔ mli, ejaakɛ Paulo ŋma akɛ: “Tsɛmɛi lɛ, nyɛkawoa nyɛbii amlifu, shi moŋ nyɛlɛa amɛ yɛ Nuntsɔ [Yehowa, NW] tsɔsemɔ kɛ ŋaawoo lɛ mli.”—Efesobii 6:4.
“Nyɔŋmɔ he Nilee”
8, 9. Te obaatsɔɔ nɔ ni Abɛi 2:1-6 kɛɔ yɛ nilee ni he hiaa adesai diɛŋtsɛ lɛ mli oha tɛŋŋ?
8 Eyɛ mli akɛ Paulo le woloŋ moŋ, shi ekɛɛ: “Kɛji mɔ ko susuɔ akɛ nilelɔ ji lɛ yɛ nyɛteŋ yɛ je nɛŋ lɛ, ha etsɔ ehe kwashia, koni etsɔ nilelɔ. Ejaakɛ je nɛŋ nilee lɛ ji kwashiaiasane yɛ Nyɔŋmɔ hiɛ.” (1 Korintobii 3:18, 19) Nyɔŋmɔ pɛ baanyɛ ekɛ nilee ni he hiaa adesai diɛŋtsɛ lɛ aha amɛ. Abɛi 2:1-6 wie nilee nɛɛ he akɛ: “Mibi, kɛ omɔ miwiemɔi lɛ amli, ni okɛ mikitai lɛ to omasɛi, koni oba otoi shi oha nilee, ni okɛ otsui ha sanesɛɛkɔmɔ; hɛɛ, kɛ obolɔ otsɛ sɛɛyoomɔ, ni owó ogbee nɔ oha sane shishinumɔ, kɛji otao esɛɛ gbɛ tamɔ jwiɛtɛi, ni otao tamɔ jwetri ni aŋɔtee lɛ: No dani ooonu Yehowa gbeyeishemɔ shishi, ni oooná Nyɔŋmɔ he nilee. Ejaakɛ Yehowa haa aleɔ nii, edaaŋ nilee kɛ sanesɛɛkɔmɔ jɛɔ.”
9 Mɛi ni tsuii kpakpai kanyaa amɛ lɛ boɔ nilee toi kɛtsɔɔ nilee ni Nyɔŋmɔ kɛha lɛ ni amɛkɛtsuɔ nii yɛ gbɛ kpakpa nɔ lɛ nɔ. Amɛkɛ amɛtsuii haa sɛɛyoomɔ, ni amɛsusuɔ anɔkwa saji ni amɛkaseɔ lɛ ahe jogbaŋŋ. Enɛ ni amɛfeɔ lɛ tsɔɔ akɛ, amɛbolɔɔ amɛtsɛɔ sane shishinumɔ, aloo nyɛmɔ ni amɛkɛnaa bɔ ni sane oti ko mli nibii kɛ otii sɔrɔtoi ni yɔɔ mli lɛ kpaa gbee haa. Mɛi ni yɔɔ jalɛ tsuii lɛ tsuɔ nii tamɔ nɔ ni amɛmiitsa jwiɛtɛi ni amɛmiitao jwetrii ni aŋɔtee. Shi mɛɛ jwetrii babaoo mɛi ni yɔɔ tsuii ni boɔ sane toi lɛ naa? No ji “Nyɔŋmɔ he nilee” lɛ. Mɛni ji no? Kɛ aaawie he kuku lɛ, no ji nilee ni anaa yɛ Nyɔŋmɔ Wiemɔ, Biblia, lɛ mli lɛ.
10. Mɛni esa akɛ wɔfee koni wɔna mumɔŋ hewalɛ kpakpa mli ŋɔɔmɔ?
10 Nyɔŋmɔ he nilee lɛ hi, eyɛ shiŋŋ, ehaa wala. Ehaa anaa mumɔŋ hewalɛ. Paulo wo Timoteo hewalɛ akɛ: “Hiɛmɔ tsamɔ wiemɔ ni onu yɛ minaa lɛ akadi lɛ mli yɛ hemɔkɛyeli kɛ suɔmɔ ni yɔɔ Kristo Yesu mli lɛ mli.” (2 Timoteo 1:13, NW) Wiemɔ fɛɛ wiemɔ yɛ emli wiemɔ he okadii. Nakai nɔŋŋ “wiemɔ krɔŋŋ” ni ji Ŋmalɛ mli anɔkwale lɛ hu yɛ ‘tsamɔ wiemɔi lɛ ahe okadi’ ni damɔ Biblia mli saneyitso ni ji Yehowa maŋtsɛyeli lɛ bembuu kɛtsɔ Maŋtsɛyeli lɛ nɔ lɛ nɔ titri. (Zefania 3:9) Esa akɛ wɔhiɛ nɛkɛ tsamɔ wiemɔi ahe okadi nɛɛ mli yɛ wɔjwɛŋmɔ kɛ wɔtsui mli. Kɛ wɔɔnyɛ wɔkwa okadi tsui hela, ni wɔhi shi akɛ mɛi ni yɔɔ hewalɛ yɛ mumɔŋ lɛ, no lɛ esa akɛ wɔkɛ Biblia lɛ atsu nii yɛ wɔshihilɛ mli daa, ni wɔkɛ mumɔŋ nibii ni Nyɔŋmɔ toɔ he gbɛjianɔ kɛtsɔɔ “tsulɔ anɔkwafo kɛ nilelɔ” lɛ nɔ lɛ atsu nii kɛmɔ shi. (Mateo 24:45-47; Tito 2:2) Nyɛhaa wɔkaia be fɛɛ be akɛ, kɛ wɔɔna mumɔŋ hewalɛ kpakpa lɛ, belɛ Nyɔŋmɔ he nilee he miihia wɔ.
11. Mɛni ji yiŋtoi komɛi ahewɔ ni Nyɔŋmɔ he nilee he hiaa adesai lɛ?
11 Susumɔ yiŋtoi krokomɛi ahewɔ ni Nyɔŋmɔ he nilee he hiaa shikpɔŋ nɔ gbɔmɛi akpekpei toi akpei abɔ lɛ he okwɛ. Ani adesai fɛɛ le bɔ ni fee ni shikpɔŋ lɛ kɛ adesai ba shihilɛ mli? Dabi, jeee amɛ fɛɛ amɛle. Ani adesai fɛɛ le anɔkwa Nyɔŋmɔ lɛ kɛ e-Bi lɛ? Ani mɔ fɛɛ mɔ le saji ni Satan tee amɛ shi yɛ ŋwɛi maŋtsɛyeli lɛ kɛ adesai emuuyeli mlihiɛmɔ he lɛ he nɔ ko? No hu hetoo ji dabi. Ani gbɔmɛi le nɔ hewɔ ni wɔgbɔlɔɔ ni wɔgboiɔ lɛ? Esa akɛ wɔkɛɛ ekoŋŋ akɛ dabi. Ani shikpɔŋ nɔ gbɔmɛi fɛɛ yɔseɔ akɛ Nyɔŋmɔ Maŋtsɛyeli lɛ miiye nɔ bianɛ ni akɛ naagbee gbii lɛ amli wɔyɔɔ lɛ? Ani amɛle akɛ mumɔi fɔji asafoi yɛ? Ani adesai fɛɛ yɛ nilee ni anyɛɔ akɛ he fɔɔ nɔ ni tsɔɔ bɔ ni amɛaafee amɛna weku ni yɔɔ miishɛɛ? Ni ani gbɔmɛi babaoo nɛɛ le akɛ miishɛɛ shihilɛ yɛ Paradeiso ji wɔ Bɔlɔ lɛ yiŋtoo kɛha adesai toibolɔi? Hetoo ni wɔkɛhaa sanebimɔi nɛɛ hu ji dabi. Belɛ eyɛ faŋŋ akɛ, Nyɔŋmɔ he nilee he miihia adesai.
12. Te wɔɔfee tɛŋŋ wɔja Nyɔŋmɔ “yɛ mumɔ kɛ anɔkwale mli”?
12 Nyɔŋmɔ he nilee he miihia adesai hu, yɛ nɔ ni Yesu wie yɛ sɔlemɔ mli yɛ eshikpɔŋ nɔ shihilɛ lɛ naagbee gbɛkɛ lɛ hewɔ. Eeenyɛ eba akɛ ekanya ebɔfoi lɛ waa beni amɛnu ni eekɛɛ akɛ: “Enɛ ji naanɔ wala lɛ, akɛ amɛaana bo, anɔkwa Nyɔŋmɔ kome pɛ lɛ, kɛ Yesu Kristo, mɔ ni otsu lɛ lɛ he nilee.” (Yohane 17:3, NW) Nilee ni tamɔ nɛkɛ kɛ nitsumɔ ji gbɛ kome pɛ ni wɔɔtsɔ nɔ wɔja Nyɔŋmɔ ni esa ehiɛ. Yesu kɛɛ: “Nyɔŋmɔ lɛ Mumɔŋ, ni mɛi ni jaa lɛ lɛ, ja amɛja lɛ yɛ mumɔ kɛ anɔkwale mli.” (Yohane 4:24) Wɔjaa Nyɔŋmɔ “yɛ mumɔ” mli, kɛ́ tsuii ni hemɔkɛyeli kɛ suɔmɔ eyimɔ amɛ obɔbɔ lɛ tsirɛ wɔ. Mɛɛ gbɛ nɔ wɔtsɔɔ wɔjaa lɛ “kɛ anɔkwale”? Kɛtsɔ e-Wiemɔ lɛ kasemɔ kɛ lɛ jamɔ yɛ enɔkwale ni ejie lɛ kpo—“Nyɔŋmɔ he nilee” lɛ nɔ.
13. Mɛɛ sane aŋma afɔ shi yɛ Bɔfoi lɛ Asaji 16:25-34, ni mɛni wɔbaanyɛ wɔkase kɛjɛ mli?
13 Akpei abɔ jeɔ shishi amɛjaa Yehowa daa afi. Ni kɛlɛ, ani esa akɛ akɛ mɛi ni yɔɔ wiemɔ lɛ he miishɛɛ lɛ afee Biblia mli nikasemɔ yɛ be kakadaŋŋ mli, aloo mɛi ni yɔɔ jalɛ tsuii lɛ baanyɛ ashɛ baptisimɔ he oya nɔŋŋ? Ojogbaŋŋ, susumɔ nɔ ni ba yɛ gbokɛlɛfoi akwɛlɔ lɛ kɛ eshiabii lɛ asane lɛ mli ni atsi ta yɛ Bɔfoi lɛ Asaji 16:25-34 lɛ he okwɛ. Ayawo Paulo kɛ Sila tsuŋ yɛ Filipi, shi nyɔɔŋteŋ lɛ, shikpɔŋ hosomɔ kpele ko gbele tsuŋwoo he lɛ naa shinaai lɛ. Akɛni gbokɛlɛfoi akwɛlɔ lɛ susu akɛ gbokɛlɛfoi lɛ fɛɛ ejo foi, ni no hewɔ lɛ abaagbala etoi waa hewɔ lɛ, kulɛ eka akɛ eeegbe ehe, shi Paulo kɛɛ lɛ akɛ amɛ fɛɛ amɛyɛ tsu lɛ mli lolo. Paulo kɛ Sila “jaje Nuntsɔ [Yehowa, NW] wiemɔ lɛ amɛtsɔɔ lɛ kɛ mɛi fɛɛ ni yɔɔ ewe lɛ.” Jeŋmajiaŋbii ni bɛ Ŋmalɛ Krɔŋkrɔŋ lɛ mli tsɔsemɔ ko ji nakai gbokɛlɛfoi akwɛlɔ lɛ kɛ eweku lɛ. Shi kɛlɛ, amɛbatsɔmɔ héyelilɔi yɛ nakai gbɛkɛ kome lɛ mli. Nɔ ni fe nakai lɛ, “ni abaptisi lɛ kɛ ewe lɛ bii lɛ fɛɛ.” Enɛɛmɛi feɔ shihilɛi komɛi ni ekaaa, shi atsɔɔ mɛi heei lɛ shishijee anɔkwalei lɛ, ni amɛkase nibii krokomɛi yɛ asafoŋ kpeei ashishi. Esa akɛ anyɛ afee nɔ ko ni tamɔ nɛkɛ ŋmɛnɛ.
Nikpamɔ lɛ Fa!
14. Mɛni hewɔ ehe ehia akɛ afee Biblia mli nikasemɔi babaoo ni mɔɔ shi yɛ be kuku mli lɛ?
14 Ebaahi jogbaŋŋ kɛ Yehowa Odasefoi aaanyɛ afee Biblia mli nikasemɔi babaoo ni mɔɔ shi yɛ be kukuoo mli. Enɛ ni wɔɔfee lɛ he miihia waa diɛŋtsɛ. Akɛ nɔkwɛmɔ nɔ lɛ, yɛ Europa Bokagbɛ shikpɔji komɛi anɔ lɛ, esa akɛ aŋmala mɛi agbɛi ni amɛmɛ dani akɛ amɛ afee Biblia mli nikasemɔ. Nakai nɔŋŋ ji bɔ ni shihilɛ lɛ yɔɔ yɛ hei krokomɛi hu. Yɛ maŋ ko mli yɛ Dominican Republic nɛkɛ lɛ, Odasefoi enumɔ ná mɛi babaoo ni miitao ni akɛ amɛ akase nii, shi amɛnyɛɛɛ amɛkɛ amɛ fɛɛ akase nii. Mɛni amɛfee? Amɛwo mɛi ni yɔɔ wiemɔ lɛ he miishɛɛ lɛ hewalɛ ni amɛba kpeei yɛ Maŋtsɛyeli Asa lɛ nɔ, ni aŋmala amɛgbɛi, ni amɛmɛ koni akɛ amɛ afee Biblia mli nikasemɔ lɛ. Shihilɛ ni tamɔ nakai nɔŋŋ yɛ je lɛŋ hei pii.
15, 16. Mɛni akɛha koni akɛgbɛ Nyɔŋmɔ he nilee lɛ ashwã oyayaayai, ni mɛni ji anɔkwa saji komɛi ni kɔɔ enɛ he?
15 Shikpɔŋkukuji ni dara—ŋmɔji wuji kɛha nikpamɔ—anaa miigbele kɛmiiha Nyɔŋmɔ webii. Eyɛ mli akɛ Yehowa, “Nikpamɔ Nuntsɔ” lɛ miitsu nitsulɔi pii moŋ, shi babaoo yɛ lolo ni amɛbaatsu. (Mateo 9:37, 38, NW) No hewɔ lɛ, bɔni afee ni agbɛ Nyɔŋmɔ he nilee lɛ ashwa oyayaayai lɛ, “tsulɔ anɔkwafo” lɛ kɛ nɔ ko ni kɛ saji pɔtɛɛ haa yɛ gbɛ kuku nɔ eha, koni Biblia kaselɔi anyɛ aya amɛhiɛ yɛ mumɔŋ beni amɛkaseɔ saji lɛ eko fɛɛ eko lɛ. Eji wolo hee ni abaanyɛ akase yɛ shia Biblia mli nikasemɔ mli oyayaayai—ekolɛ yɛ nyɔji fioo mli. Ni wɔbaanyɛ wɔkɛwo wɔ baagii amli, aloo wɔ dɛhiɛmɔ baagii bibii, aloo wɔ kotokui amli po yɛ gbɛ ni waaa nɔ! Gbɔmɛi akpei ohai abɔ ni bua amɛhe naa yɛ Yehowa Odasefoi, “Miishɛɛ Yijielɔi,” Kpokpaa Wulu nɔ Kpeei lɛ ashishi lɛ na miishɛɛ akɛ amɛnine aaashɛ wolo hee ni hiɛ baafai 192, ni yitso ji Nilee Ni Kɛ Mɔ Yaa Naanɔ Wala Mli lɛ nɔ.
16 Niŋmalɔi ni jɛ shikpɔji sɔrɔtoi anɔ ŋmala saji ni ato he gbɛjianɔ jogbaŋŋ, ni akɛba naagbee kwraa yɛ Nilee wolo lɛ mli lɛ. No hewɔ lɛ mɛi ni jɛ maji sɔrɔtoi amli lɛ baasumɔ. Shi ani ebaatsɛ dani abaajie wolo hee nɛɛ kpo yɛ wiemɔi sɔrɔtoi ni gbɔmɛi wieɔ yɛ je lɛŋ lɛ amli? Dabi, ejaakɛ abaanyɛ atsɔɔ wolo ni hiɛ baafai 192 lɛ shishi oya fe woji wuji. Aaafee October 1995 mli beebe lɛ, no mli lɛ Nɔyeli Kuu lɛ Niŋmaa Ajinafoi Akuu lɛ ekpɛlɛ nɔ akɛ atsɔɔ wolo nɛɛ shishi kɛjɛ Ŋleshi mli kɛya wiemɔi ni fa fe 130 mli.
17. Mɛɛ nibii esa akɛ nomɛi aha efee mlɛo kɛha wɔ ni wɔkɛ Nilee wolo lɛ atsu nii?
17 Esa akɛ saji pɔtɛɛ ni yɔɔ Nilee wolo lɛ yitso fɛɛ yitso mli lɛ aha nikaselɔi lɛ aya amɛhiɛ oya yɛ mumɔŋ bɔ ni sa. Wolo lɛ kɛ Ŋmalɛ mli anɔkwalei lɛ haa yɛ gbɛ ni tswaa mɔ maa shi nɔ. Ewieee apasa tsɔɔmɔi ahe babaoo. Esa akɛ bɔ ni ewiemɔ mli kã shi faŋŋ kɛ esane naatsɔɔmɔ ni ja ni tsara nɔ lɛ aha wolo nɛɛ kɛ nitsumɔ kɛha Biblia mli nikasemɔ feemɔ afee mlɛo, ni eye ebua ni gbɔmɛi anu Nyɔŋmɔ he nilee lɛ shishi. Kɛfata ŋmalɛi ni aŋmala amɛmli wiemɔi lɛ ahe lɛ, ayɛ Biblia ŋmalɛi hu ni atsɛ ni esa akɛ awo nikaselɔ lɛ hewalɛ ni ekane beni esaa ehe kɛhaa nikasemɔ lɛ. Abaanyɛ akane ŋmalɛi nɛɛ beni afeɔ nikasemɔ lɛ, kɛ be yɛ, eyɛ mli akɛ efeŋ nɔ ni nilee yɔɔ mli akɛ akɛ saji krokomɛi ni baanyɛ atsimɔ otii lɛ anɔ lɛ afata nikasemɔ lɛ he. Shi moŋ, esa akɛ mɛi ni feɔ Biblia mli nikasemɔ lɛ abɔ mɔdɛŋ ni amɛnu nɔ ni wolo lɛ maa nɔ mi yɛ yitso fɛɛ yitso mli lɛ shishi, ni atsɔɔ nikaselɔ lɛ nomɛi. Enɛ tsɔɔ akɛ, esa akɛ tsɔɔlɔ lɛ akase wolo nɛɛ jogbaŋŋ, koni otii lɛ afee faŋŋ yɛ ejwɛŋmɔ mli.
18. Mɛɛ ŋaawoi akɛhaa yɛ Nilee wolo lɛ kɛ nitsumɔ he?
18 Te aaafee tɛŋŋ ni Nilee Ni Kɛ Mɔ Yaa Naanɔ Wala Mli wolo lɛ aaaha kaselɔ-feemɔ nitsumɔ lɛ aya nɔ oyayaayai hu? Kɛ akɛaato he lɛ, abaanyɛ akase wolo ni hiɛ baafai 192 nɛɛ yɛ be kuku mli, ni esa akɛ “mɛi abɔ ni ajie ato naanɔ wala lɛ” anyɛ akase nibii babaoo kɛtsɔ ekasemɔ nɔ, koni amɛjɔɔ amɛwala nɔ amɛha Yehowa ni abaptisi amɛ. (Bɔfoi lɛ Asaji 13:48) No hewɔ lɛ, nyɛhaa wɔkɛ Nilee wolo lɛ atsua nii jogbaŋŋ yɛ sɔɔmɔ lɛ mli. Kɛ Biblia mli nikaselɔ ko ekase wolo kroko kɛshɛ shɔŋŋ lɛ, ebaahi akɛ aaagbe naa. Kɛ jeee nakai lɛ, ŋaawoo lɛ ji ni atsake Biblia mli nikasemɔ lɛ kɛba Nilee wolo lɛ mli. Kɛ agbe wolo hee nɛɛ kasemɔ naa lɛ, awooo ŋaa ni akɛ nakai nikaselɔ lɛ nɔŋŋ akase wolo ni ji enyɔ. Mɛi ni mɔɔ anɔkwale lɛ mli lɛ baanyɛ aha amɛ nilee lɛ aye emuu kɛtsɔ Yehowa Odasefoi akpeei ni amɛaaya kɛ agbɛnɛ Biblia lɛ kɛ Kristofoi awoji krokomɛi akanemɔ nɔ yɛ amɛ diɛŋtsɛ amɛ be mli.—2 Yohane 1.
19. Dani aaafee Biblia mli nikasemɔi yɛ Nilee wolo lɛ mli lɛ, mɛni hewɔ ebaaye ebua kɛ ati Organized to Accomplish Our Ministry wolo lɛ baafai 175 kɛyashi 218 lɛ amli lɛ?
19 Aŋma Nilee wolo lɛ kɛ yiŋtoo akɛ, akɛaaye abua mɔ koni enyɛ eha sanebimɔi fɛɛ ni onukpai lɛ kɛ shiɛlɔi ni abaptisiko amɛ ni sumɔɔ ni abaptisi amɛ akɛ Yehowa Odasefoi lɛ tiɔ mli lɛ ahetoo. No hewɔ lɛ, dani oootsake Biblia mli nikasemɔi ni ofeɔ bianɛ lɛ kɛaaya wolo hee nɛɛ mli lɛ, aajie yi akɛ, okɛ ŋmɛlɛtswaa fioo atsu nii ni okɛti sanebimɔi ni yɔɔ Organized to Accomplish Our Ministry wolo lɛ baafai 175 kɛyashi 218 lɛ amli.a Enɛ baaye abua bo ni omamɔ sanebimɔi nɛɛ ahetooi lɛ anɔ mi beni nyɛfeɔ Biblia mli nikasemɔ yɛ Nilee wolo lɛ mli lɛ.
20. Mɛni oto gbɛjianɔ akɛ okɛ Nilee Ni Kɛ Mɔ Yaa Naanɔ Wala Mli wolo lɛ baatsu?
20 Esa akɛ gbɔmɛi ni yɔɔ he fɛɛ he lɛ anu sanekpakpa lɛ he. Hɛɛ, Nyɔŋmɔ he nilee he miihia adesai, ni Yehowa yɛ e-Dasefoi ni amɛaaha mɛi ale. Amrɔ nɛɛ wɔnine eshɛ wolo hee ni wɔŋwɛi Tsɛ ni yɔɔ suɔmɔ lɛ tsɔ tsulɔ anɔkwafo kɛ nilelɔ lɛ nɔ ekɛha lɛ nɔ. Ani okɛbaatsu nii ni okɛtsɔɔ anɔkwale lɛ ni okɛ woo abaha Yehowa gbɛi krɔŋkrɔŋ lɛ? Yehowa baajɔɔ bo kɛ̃, yɛ be mli ni obɔɔ mɔdɛŋ fɛɛ ni ooonyɛ koni mɛi babaoo nine ashɛ nilee ni kɛ mɔ yaa naanɔ wala mli lɛ nɔ lɛ.
[Shishigbɛ niŋmaa]
a Mɛi ni fee ji Watchtower Bible and Tract Society of New York, Inc.
Te Obaaha Hetoo Oha Tɛŋŋ?
◻ Te obaatsɔɔ bɔ ni mfoniri-feemɔŋ tsui lɛ ji lɛ mli oha tɛŋŋ?
◻ Mɛni ji Nyɔŋmɔ he nilee lɛ?
◻ Mɛni hewɔ Nyɔŋmɔ he nilee he hiaa adesai?
◻ Mɛɛ wolo hee yɔɔ bianɛ, ni mɛɛ gbɛjianɔ otoɔ ni okɛtsu nii?
[Mfoniri ni yɔɔ baafa 10]
Yiŋtoi babaoo yɛ ni nomɛi ahewɔ ni Nyɔŋmɔ he nilee he hiaa shikpɔŋ nɔ gbɔmɛi akpekpei toi akpei abɔ lɛ