Bɔ ni Ooofee Ona Miishɛɛ yɛ Kaselɔ Feemɔ Mli
MIISHƐƐ ni yaa shɔŋŋ lɛ ateŋ ekome ni mɔ ko baanyɛ ana ji Nyɔŋmɔ hefatalɔ nitsulɔ ni eeetsɔ. Nɔ ni fata Nyɔŋmɔ nitsumɔ lɛ he ŋmɛnɛ ji gbɔmɛi ni sumɔɔ jalɛ nifeemɔ ni abuaa amɛnaa awoɔ Kristofoi asafo lɛ mli, ni atsɔseɔ amɛ akɛ Kristofoi kɛhaa wala bianɛ kɛ agbɛnɛ yibaamɔ kɛmiiya jeŋ hee ko mli lɛ.—Mika 4:1-4; Mateo 28:19, 20; 2 Petro 3:13.
Efee miishɛɛ jɛɛhe babaoo kɛha Yehowa Odasefoi ni yɔɔ Latin Amerika akɛ amɛaana ni gbɔmɛi akpeiakpe ebatsɔmɔ Yesu Kristo kaselɔi kɛjɛ 1980. Yɛ ŋmɔ ni woɔ yibii babaoo nɛɛ mli, he ni mɛi pii yɔɔ bulɛ kɛha Biblia lɛ, ni amɛheɔ amɛyeɔ hu lɛ, be-fɛɛ sɔɔlɔi komɛi enyɛ amɛye amɛbua gbɔmɛi babaoo ni amɛjɔɔ amɛwala nɔ amɛha Yehowa. Akɛni amɛyɔɔ niiashikpamɔ babaoo ni tamɔ nɛkɛ hewɔ lɛ, ekolɛ amɛbaanyɛ amɛgba wɔ miishɛɛnamɔ ni yɔɔ kaselɔ feemɔ mli lɛ he sane. Amɛ ŋaawoi lɛ ekomɛi baanyɛ aye abua bo ni ona miishɛɛ yɛ kaselɔi afeemɔ mli yɛ he ni oyɔɔ lɛ.
Mɛi ni Baanyɛ Atsɔmɔ “Tooi” lɛ Yɔsemɔ
Beni Yesu tsu ebɔfoi lɛ ni amɛyashiɛ lɛ, ekɛɛ amɛ akɛ: “Shi maŋ fɛɛ maŋ aloo akrowa fɛɛ akrowa ni nyɛaatee lɛ, nyɛbia mɔ ni sa shi yɛ jɛi.” (Mateo 10:11) Kɛ otee gbɔmɛi lɛ aŋɔɔ lɛ, te ooofee tɛŋŋ oyɔse mɛi ni abaanyɛ aye abua amɛ yɛ mumɔŋ? Edward, be-fɛɛ sɔɔlɔ fe afii 50 lɛ kɛɔ akɛ: “Amɛjieɔ enɛ kpo kɛtsɔɔ hiɛdɔɔ ni amɛkɛbiɔ saji kɛ amɛtsui ni nyɔɔ amɛmli kɛ akɛ hetooi ni jɛ Ŋmalɛi lɛ amli ha amɛ lɛ nɔ.” Carol kɛfata he akɛ: “Kɛ mɔ ko gba mi eteemɔŋ naagba loo haomɔ ko lɛ, eji bolɔmɔ kɛha yelikɛbuamɔ diɛŋtsɛ. Mibɔɔ mɔdɛŋ ni maná saji ni yeɔ buaa kɛjɛ Buu Mɔɔ Asafo lɛ woji amli. Bei pii lɛ, mɔ he miishɛɛ ni anaa nɛkɛ lɛ kɛ mɔ yaa Biblia mli nikasemɔ mli.” Ni kɛlɛ, ebɛ mlɛo be fɛɛ be akɛ aaana anɔkwafoi nɛɛ. Luis gba akɛ: “Mɛi ni fee tamɔ amɛyɔɔ he miishɛɛ waa lɛ bafee mɛi ni bɛ he miishɛɛ kwraa, shi mɛi krokomɛi ni kɛjɛ shishijee lɛ amɛfee tamɔ amɛteɔ shi amɛwoɔ lɛ tsake beni amɛnu nɔ ni Biblia lɛ kɛɔ diɛŋtsɛ lɛ.” Akɛni Latin Amerika bii pii buɔ Biblia lɛ hewɔ lɛ, ekɛfata he akɛ, “Miyɔseɔ mɛi ni abaanyɛ aye abua amɛ yɛ mumɔŋ lɛ kɛ amɛkpɛlɛ nɔ ni Biblia lɛ tsɔɔ lɛ nɔ beni mitsɔɔ amɛ enɛ lɛ.” Mɛi ni “sa” nɛɛ ni ayeɔ abuaa amɛ koni amɛya amɛhiɛ yɛ mumɔŋ lɛ kɛ anɔkwa miishɛɛ kɛ tsui ni nyɔɔ mɔ mli baa. Mɛɛ gbɛ nɔ oootsɔ ofee enɛ yɛ?
Bɔ ni Ajeɔ Biblia Kasemɔi Ashishi
Biblia kasemɔ woji ni “tsulɔ anɔkwafo kɛ nilelɔ” lɛ fee lɛ kɛ nitsumɔ ji gbɛ ni hi fe fɛɛ ni aaatsɔ nɔ aye abua mɛi ni amɛnu Biblia mli anɔkwale lɛ shishi. (Mateo 24:45) Te ooofee tɛŋŋ oha hiɛsɔɔ kɛha Biblia kasemɔ he woji nɛɛ aya hiɛ? Edward kɛɔ akɛ: “Akɛni shihilɛi ni gbɔmɛi yɔɔ mli, amɛ su kɛ baŋ, kɛ jwɛŋmɔ yɔɔ sɔrɔto babaoo hewɔ lɛ, mibɔɔ mɔdɛŋ ni mafee tswãa yɛ nikasemɔi ashishijee mli.” Onyɛŋ okɛ gbɛ kome atsu mɔ fɛɛ mɔ he nii.
Mɛi komɛi yɛ ni ehe baahia ni akɛ amɛ asusu Ŋmalɛi lɛ ahe shii abɔ dani akɛ Biblia lɛ kasemɔ he wolo ko afɔ amɛhiɛ. Kɛlɛ, maŋsɛɛ sanekpakpa shiɛlɔi gbalashihilɛ mli hefatalɔi ko bɔ amaniɛ akɛ: “Wɔkɛ nikasemɔ fɔɔ mɔ lɛ hiɛ beni wɔtee jɛmɛ klɛŋklɛŋ kwraa.” Nakai nɔŋŋ hu Odasefonyo ko ni eye ebua gbɔmɛi 55 kɛtee henɔjɔɔmɔ mli lɛ kɛɔ akɛ: “Gbɛ titri ni mitsɔɔ nɔ mijeɔ Biblia kasemɔi ashishi ji ni maje shishi kɛjɛ Obaanyɛ Ohi Shi Kɛya Naanɔ yɛ Paradeiso yɛ Shikpɔŋ Nɔ wolo lɛ mli tɛ̃ɛ.” Eyɛ mli akɛ mɛi komɛi sumɔɔɔ nɔ̃ ko kɛkɛ ni aaakase moŋ, shi mɛi krokomɛi hu he miitswa shi akɛ amɛaakase nɔ fɛɛ nɔ ni amɛheɔ amɛyeɔ akɛ eeeye ebua amɛ yɛ shihilɛ mli. Biblia lɛ kasemɔ yɛ shia ni aheee nɔ ko lɛ ŋɔɔ gbɔmɛi ni tamɔ nɛkɛ naa waa. Maŋsɛɛ sanekpakpa shiɛlɔi komɛi tsɔɔ enɛ feemɔ mli, ni amɛkɛɔ akɛ: “Masumɔ ni matsɔɔ bo bɔ ni wɔfeɔ lɛ wɔhaa. Kɛ oosumɔ lɛ, obaanyɛ otsa nɔ. Kɛ osumɔɔɔ hu lɛ, bo osane ni.” Kɛ akɛfɔ mɔ lɛ hiɛ yɛ nɛkɛ gbɛ nɔ lɛ, gbɔmɛi sheee gbeyei akɛ amɛaakpɛlɛ nɔ.
Odasefonyo kroko ni eye ebua ohiafoi ni bɛ woloŋlee tsɔ ko lɛ kɛɔ akɛ: “Mina akɛ dɛhiɛmɔ woji lɛ ahe yɛ sɛɛnamɔ waa titri lɛ yɛ Biblia kasemɔi ashishijee mli.” Be-fɛɛ tsɔɔlɔi lɛ bɔɔ mɔdɛŋ amɛmaa Biblia lɛ nɔ mi titri yɛ wolo fɛɛ wolo ni amɛkɛaatsu nii lɛ mli. Carola kɛɔ akɛ: “Mikɛ mfonirii kɛ ŋmalɛi aaafee enumɔ pɛ tsuɔ nii yɛ klɛŋklɛŋ nikasemɔ lɛ mli, bɔni afee ni saji otii lɛ aje kpo faŋŋ, ni Biblia lɛ efeee nɔ ko ni wa.”
Miishɛɛ lɛ ni Aaaha Eya Nɔ
Gbɔmɛi nyãa nɔyaa henumɔ ni amɛnaa lɛ he, no hewɔ lɛ Jennifer jieɔ yi akɛ: “Ha nikasemɔ lɛ afee nɔ ni miishɛɛ yɔɔ mli. Nyɛyaa nɔ.” Nikasemɔ ni yaa nɔ ni afooo mli otsii abɔ lɛ hu yeɔ ebuaa amɛ ni amɛnuɔ he akɛ amɛmiiya amɛhiɛ. Gbɛgbalɔ krɛdɛɛ ko ni atsɔse lɛ yɛ akrowaiaŋ lɛ tsɔɔ bɔ ni ehe hiaa ni aha sane mlitsɔɔmɔ lɛ afee mlɛo, ni agbala jwɛŋmɔ kɛya saji otii lɛ anɔ, koni mɛi ni skul fioo ko pɛ amɛtee lɛ anyɛ aya amɛhiɛ. Ekɛɔ akɛ: “Yɛ mi-krowa lɛ shishi lɛ, kɛ wɔdu dumɔwui lɛ wɔgbe naa lɛ, wɔkɛ nu shwãa nɔ. Kɛ wɔkɛ nu babaoo shwã ŋmɔji lɛ anɔ lɛ, shikpɔŋ lɛ waa keketee ni ehaaa dumɔwui ni kwɛ̃ɔ atsɔ mli, ni amɛgboiɔ. Nakai nɔŋŋ hu kɛ oloo saji otii babaoo oshwie mɛi heei ni enya wiemɔ lɛ he lɛ anɔ lɛ, ebaafee nɔ ni wa kɛha amɛ ni amɛnijiaŋ baaje wui.” Esa akɛ gbɔmɛi ni taoɔ ni amɛle nibii amli lɛ po ajwɛŋ sane kome he yɛ be kome mli, kɛ amɛaanyɛ amɛya amɛhiɛ yɛ shishinumɔ mli. Yesu kɛɛ ebɔfoi lɛ akɛ: “Miyɛ nii pii lolo ni makɛɛ nyɛ; shi nyɛnyɛŋ mli nyɛmɔ amrɔ nɛɛ.”—Yohane 16:12.
Gbɛ kroko ni atsɔɔ nɔ ahaa miishɛɛ lɛ yaa nɔ ji ni owo mɛi ni oyasaraa amɛ lɛ hewalɛ ni amɛya nɔ amɛjwɛŋ Nyɔŋmɔ Wiemɔ lɛ he beni otee lɛ. Yolanda jieɔ yi akɛ: “Okɛ sanebimɔ ko ashi amɛ. Ha amɛ nɔ ko ni amɛbaatsu yɛ shia, tamɔ Biblia lɛ fa ko kanemɔ loo sane ko ni kɔɔ amɛhe lɛ mlipɛimɔ.”
Yehowa he Suɔmɔ ni Anaa
Omiishɛɛ baafa kɛ oye obua mɛi ni okɛ amɛ kaseɔ nii lɛ ni amɛtsɔmɔ “wiemɔ lɛ nɔyelɔi shi jeee wiemɔ lɛ nulɔi kɛkɛ” lɛ. (Yakobo 1:22) Te ooofee tɛŋŋ ofee enɛ? Suɔmɔ kɛha Yehowa kanyaa anɔkwa Kristofoi. Pedro, ni jɛ Mexico lɛ tsɔɔ mli akɛ: “Gbɔmɛi nyɛŋ asumɔ mɔ ko ni amɛleee lɛ, no hewɔ lɛ mijɛɔ nikasemɔ lɛ shishijee tɔ̃ɔ mitsɔɔ amɛ Nyɔŋmɔ gbɛi yɛ Biblia lɛ mli, ni mitaoɔ hegbɛi ni mana ni mikɛma Yehowa sui anɔ mi.” Obaanyɛ otsɔ sanegbaa nɔ otswa hiɛsɔɔ kɛha Yehowa owo emli kɛtsɔ bɔ ni onuɔ ehe ohaa lɛ wiemɔ nɔ. Elizabeth kɛɔ akɛ: “Mibɔɔ mɔdɛŋ mitsiɔ Yehowa nijuji lɛ ata be fɛɛ be. Kɛ miikase nii lɛ, kɛ mina fɔfɔi fɛfɛo ko, loofɔlɔ fɛfɛo ko, loo alɔnte bi ko ni miishwɛ lɛ, mitsiɔ ta be fɛɛ be akɛ eji Yehowa nitsumɔ.” Jennifer wo ŋaa akɛ: “Wiemɔ jeŋ hee ni Nyɔŋmɔ ewo shi yɛ he lɛ he akɛ nɔ ko pɔtɛɛ ni ole akɛ ebaaba. Bi amɛ nɔ ni amɛbaasumɔ ni amɛfee yɛ jeŋ hee lɛ mli.”
Kɛ mɔ ko kɛ hiɛsɔɔ jwɛŋ nɔ ni ekaseɔ yɛ Yehowa he lɛ nɔ lɛ, eboteɔ etsui mli ni etsirɛɔ lɛ kɛhaa nifeemɔ. Shi enyɛŋ ejwɛŋ nɔ ja ekaiɔ. Saji titrii etɛ loo ejwɛ mlitii kuku yɛ nikasemɔ lɛ eko fɛɛ eko sɛɛ yeɔ buaa kaimɔ. Biblia tsɔɔlɔi pii haa mɛi heei lɛ ŋmalaa ŋmalɛi titrii kɛ saji krokomɛi yɛ Biblia lɛ naagbee mligbɛ. Maŋsɛɛ sanekpakpa shiɛlɔ ko ni jɛ England tsɔɔ sɛɛnamɔ kroko ni yɔɔ nikasemɔ mlitii mli: “Mibiɔ bɔ ni sane lɛ he eba sɛɛnamɔ kɛha amɛ. Enɛ haa amɛkɛ hiɛsɔɔ jwɛŋɔ Yehowa gbɛ̀i kɛ emlai ahe.”
Odasefonyo anɔkwafo ko ni gbe nikasemɔ naa kɛjɛ Gilead klas ni ji etɛ lɛ mli lɛ kɛɔ akɛ: “Esa akɛ wɔkɛ miishɛɛ awie. Esa akɛ mɛi ni wɔkɛ amɛ kaseɔ nii lɛ ayoo akɛ wɔheɔ nɔ ni wɔtsɔɔ amɛ lɛ wɔyeɔ.” Hemɔkɛyeli ni eha ofee “nɔyelɔ ni tsuɔ he nii” ni yɔɔ miishɛɛ lɛ baanyɛ atsɛŋe mɛi kɛ ojie lɛ kpo otsɔɔ.—Yakobo 1:25.
Odasefonyo ko ni eye ebua mɛi pii koni amɛja Yehowa lɛ kɛɔ akɛ: “Minaa akɛ gbɔmɛi nuɔ he akɛ amɛbɛŋkɛ Nyɔŋmɔ kɛ miye mibua amɛ ni amɛyoo amɛ sɔlemɔi lɛ ahetooi lɛ. Migbaa amɛ mi diɛŋtsɛ miniiashikpamɔ he nɔkwɛmɔ nii, tamɔ enɛ: Beni mikɛ mi hefatalɔ lɛ yashɛ he ni wɔbaatsu wɔ nitsumɔ hee akɛ gbɛgbalɔi lɛ yɛ lɛ, no mli lɛ yeli baai kɛ butru fioo ko pɛ wɔyɔɔ, ni wɔbɛ shika. Wɔye gbɛkɛ niyenii lɛ fɛɛ wɔgbe naa ni wɔkɛɛ, ‘Amrɔ nɛɛ wɔbɛ nɔ ko kɛha wɔ́.’ Wɔkɛwo sɔlemɔ mli, ni wɔyawɔ. Enɔ jetsɛremɔ leebi maaŋkpa lɛ, maŋ lɛ mli Odasefonyo ko ba ni ebajie ehe kpo akɛ, ‘Misɔle koni Yehowa atsu gbɛgbalɔi kɛba. Agbɛnɛ manyɛ mafata nyɛhe bei pii yɛ gbi lɛ mli, shi akɛni akrowa miyɔɔ hewɔ lɛ, esa akɛ mikɛ nyɛ aye shwane niyenii. No hewɔ lɛ, mikɛ niyenii nɛɛ ba koni wɔ fɛɛ wɔye.’ Eji tsina loo agbo ko kɛ yeli baai babaoo. Mikɛɔ mɛi ni mikɛ amɛ kaseɔ nii lɛ be fɛɛ be akɛ Yehowa shiii wɔ kɔkɔɔkɔ kɛ wɔtao e-Maŋtsɛyeli lɛ klɛŋklɛŋ.”—Mateo 6:33.
Okɛ Yelikɛbuamɔ ni Anyɛɔ Atsuɔ He Nii Aha
Babaoo yɛ ni kɔɔ Kristo kaselɔi afeemɔ he fe Biblia mli nikasemɔ pɛ ni afeɔ. Maŋsɛɛ sanekpakpa shiɛlɔ ko ni sɔmɔ akɛ nɔkwɛlɔ gbɛfalɔ afii pii lɛ kɛɔ akɛ: “Ha amɛ be. Kaaye oyai oshi jɛmɛ kɛ nikasemɔ lɛ ba naagbee nɔŋŋ pɛ. Kɛ hegbɛ yɛ lɛ, hii shi ni nyɛgba sane fioo.” Elizabeth kɛɔ akɛ: “Minyãa amɛhe ejaakɛ ekɔɔ wala he. Mihaoɔ yɛ amɛhe bei pii tamɔ amɛji mi diɛŋtsɛ mibii.” Odasefoi krokomɛi kɛ ŋaawoi nɛɛ ha: “Saramɔ amɛ kɛ amɛhe miiye.” “Kɛ obɛŋkɛ amɛ shia, akɛ nɔkwɛmɔ nɔ lɛ, beni okɛ ohe ewo sɔɔmɔ nitsumɔ lɛ mli lɛ, okɛ be fioo abi amɛ shi ni oha amɛle Odasefoi krokomɛi.” Eva kɛɔ akɛ: “Bo mɔ lɛ toi jogbaŋŋ ni onu bɔ ni eji kɛ shihilɛ ni eyɔɔ mli lɛ shishi. Enɛ saa bɔ ni mɛi feɔ amɛnii yɛ anɔkwale lɛ he lɛ he, ni ebaanyɛ etsi amɛ nɔyaa naa. Feemɔ amɛ naanyo, koni amɛna hekɛnɔfɔɔ ni aaaha amɛwie amɛ naagbai ahe.” Carol kɛfata he akɛ: “Miishɛɛ diɛŋtsɛ ni ooona yɛ mɔ lɛ he lɛ he miihia, ejaakɛ tsakemɔi ni anɔkwale lɛ kɛbaaba eshihilɛ mli lɛ baanyɛ afee wekumɛi kɛ nanemɛi ni eeelaaje yɛ bei komɛi amli. Fɛɛ mli lɛ, ehi akɛ nikaselɔ lɛ aaale he ni wɔyɔɔ ni ena hekɛnɔfɔɔ bɔ ni aaaha eba wɔŋɔɔ yɛ be fɛɛ mli.” Ye obua lɛ ni esusu asafo lɛ he akɛ eweku hee.—Mateo 10:35; Marko 10:29, 30.
Yolanda kɛɛ: “Ha ohiɛ ahi ohe nɔ ni okɛ yelikɛbuamɔ ni anyɛɔ atsuɔ he nii aha. Okɛ amɛ ata shi yɛ kpeei ashishi, ni oye obua amɛ kɛ amɛbii.” Ni oootsɔɔ mɛi heei lɛ gbɛ ni amɛaatsɔ nɔ amɛtsɔse amɛbii, amɛha amɛ hetsemɔ aya hiɛ, amɛsaa amɛhe kɛha hetoohamɔ yɛ kpeei ashishi, ni amɛha wiemɔ yɛ Teokrase Sɔɔmɔ Skul lɛ mli lɛ fɛɛ ji kaselɔ-feemɔ nitsumɔ lɛ fã. Nyɛmi yoo kroko kɛfata he akɛ: “Ehe miihia ni atsɔse mɛi heei lɛ kɛha sɔɔmɔ lɛ. Kɛ aku hiɛ ashwie tsɔsemɔ ni tamɔ nɛkɛ nɔ lɛ, amɛteŋ mɛi komɛi hiɔ shi akɛ mɛi ni sheɔ shiɛmɔ nitsumɔ lɛ gbeyei, amɛlaajeɔ miishɛɛ ni amɛkɛsɔmɔɔ Yehowa lɛ, ni amɛnyɛɛɛ amɛŋmɛ amɛtsui shi.” No hewɔ lɛ, okɛ tsɔsemɔ ni sa aha yɛ shia kɛ shia nitsumɔ lɛ mli, sɛɛsaramɔi afeemɔ mli, kɛ Biblia mli nikasemɔi ni ajeɔ shishi lɛ mli. Omiishɛɛ baada beni onaa ni mɔ ni okɛ lɛ feɔ nikasemɔ lɛ yaa ehiɛ yɛ oyelikɛbuamɔ kɛ gbɛtsɔɔmɔ hewɔ lɛ.
Wajemɔ Amɛ ni Amɛŋmɛ Amɛtsui Shi
Kaselɔ feelɔ ko ni yɔɔ niiashikpamɔ bɔ kɔkɔ akɛ: “Su ko yɛ ni haa akpaa nikasemɔ kɛ ana abaptisi nikaselɔ lɛ pɛ.” Esa akɛ tsɔɔlɔ lɛ kɛ nikaselɔ lɛ fɛɛ akai akɛ Kristofonyo ni abaptisi lɛ ehee lɛ jeee mɔ ni eda yɛ mumɔŋ. Eyɛ dalɛ babaoo ni ebaada yɛ ehemɔkɛyeli, ehiɛsɔɔ kɛha Nyɔŋmɔ mla, kɛ esuɔmɔ kɛha Yehowa lɛ mli. Ehe miihia ni awo lɛ hewalɛ ni ena teemɔŋ nikasemɔ sui kpakpai koni enyɛ eya ehiɛ.—1 Timoteo 4:15.
Yelikɛbuamɔ he baahia mɔ hee lɛ koni eshwere ni etsɔ nyɛmimɛi anaanyobɔɔ lɛ mlinyo ni sumɔɔ gbɔfeemɔ. Gbɛtsɔɔmɔ he baahia lɛ yɛ bɔ ni ekɛ nyɛmimɛi lɛ afatɔɔi baaye aha yɛ be mli ni ebɛŋkɛɔ amɛ lɛ. (Mateo 18:15-35) Yelikɛbuamɔ he baahia lɛ koni etsɔ tsɔɔlɔ ni he esa, ni enyɛɔ epɛiɔ lɛ diɛŋtsɛ esaji amli kɛhaa ehe. Maŋsɛɛ sanekpakpa shiɛlɔ ko bɔ amaniɛ akɛ: “Nikaselɔ ko miisumɔ ni eha enyɛmɔ akɛ tsɔɔlɔ lɛ aya hiɛ yɛ ebaptisimɔ lɛ sɛɛ, no hewɔ lɛ ekɛɛ mi akɛ, ‘Esa akɛ mafee nikasemɔ hee yɛ otsi ni baa lɛ mli, shi ehe miihia ni makai mijwɛŋmɔ yɛ yitsei ni mikase momo lɛ ahe. Ofainɛ ani obaanyɛ okɛ mi akase yitsei nɛɛ ekoŋŋ, ekome yɛ be kome mli, koni makadi saji amlitsɔɔmɔ ni ŋmalɛi kɛ mfonirii lɛ kɛha lɛ, koni mikɛtsu nii kɛ mitee akɛ miyafee mi nikasemɔ lɛ?’ Ebatsɔ tsɔɔlɔ ni he esa waa, ni abaptisi mɛi ni ekɛ amɛ kaseɔ nii lɛ ateŋ mɛi ejwɛ yɛ kpee kome shishi.”
Nɔ Hewɔ ni Mɔdɛŋ ni Abɔɔ yɛ Kaselɔ Feemɔ He lɛ Sa Lɛ
Pamela kɛɛ: “Kaselɔi ni afeɔ lɛ tsɔɔ yijielɔi babaoo kɛha Yehowa. Etsɔɔ wala kɛhaa mɛi ni kpɛlɛɔ anɔkwale lɛ nɔ lɛ. Misumɔɔ kɛkɛ ni matsɔɔ mɛi krokomɛi anɔkwale lɛ—eŋɔɔ waa diɛŋtsɛ! Onaa bɔ ni nikaselɔi lɛ daraa fiofio, ni amɛfeɔ tsakemɔi yɛ amɛshihilɛ mli, ni amɛmiiye gbɛtsii nii ni eji jeee Yehowa mumɔ lɛ kulɛ amɛnyɛŋ amɛteke lɛ anɔ kunim. Mɛi ni amɛbasumɔ Yehowa lɛ ateŋ mɛi pii ebatsɔmɔ minanemɛi ni misumɔɔ amɛ waa.”
Maŋsɛɛ sanekpakpa shiɛlɔ ko ni jɛ Germany wie akɛ: “Kɛ misusu mɛi ni miye mibua amɛ ni amɛbatsɔmɔ kaselɔi lɛ ahe lɛ, minaa mɛi komɛi ni bɛ ekãa ni amɛtee amɛhiɛ waa akɛ Nyɔŋmɔ sɔɔlɔi bɔ ni ewa akɛ mahe maye. Minaa gbɔmɛi ni amɛye gbɛtsii nii ni dara anɔ kunim, kɛtsɔ Yehowa yelikɛbuamɔ nɔ yɛ faŋŋ mli. Minaa wekui ni be ko lɛ amɛmli egbala, shi agbɛnɛ amɛfee ekome—bii ni yɔɔ miishɛɛ ni yɔɔ fɔlɔi ni tsuɔ amɛ gbɛnaa nii ahe nii. Minaa gbɔmɛi ni miiná shihilɛ ni shishinumɔ yɔɔ mli lɛ mli ŋɔɔmɔ, ni miijie Yehowa yi. Enɛ ji miishɛɛ ni yɔɔ kaselɔi ni afeɔ lɛ mli lɛ.”
Hɛɛ, Yehowa Nyɔŋmɔ hefatalɔ nitsulɔ ni oji yɛ kaselɔ-feemɔ nitsumɔ lɛ mli lɛ ji miishɛɛ ni anyɛŋ akɛ nɔ ko ato he lɛ jɛɛhe. Maŋsɛɛ sanekpakpa shiɛlɔi kɛ gbɛgbalɔi aniiashikpamɔi eye enɛ he odase. Obaanyɛ ona miishɛɛ kɛ tsui ni nyɔɔ mɔ mli ni tamɔ nakai nɔŋŋ, kɛ okɛ ŋaawoi lɛ tsu nii ni ojɛ susuma muu fɛɛ mli otsu he nii lɛ. Omiishɛɛ lɛ baaye emuu kɛ Yehowa jɔɔmɔ.—Abɛi 10:22; 1 Korintobii 15:58.