‘Ani Mihe Hiaa Nyɔŋmɔ?’

“ANI Mihe Hiaa? Ani Nyɔŋmɔ Jwɛŋɔ Mihe?” Nɛkɛ ji bɔ ni sane ko ni je kpo yɛ Christianity Today mli lɛ yitso kaneɔ. “Miwala be mli nitsumɔ akɛ niŋmalɔ lɛ mli saji babaoo ebɔle naagba ni ji piŋmɔ he,” taakɛ Philip Yancey, mɔ ni ŋma nakai sane lɛ wie lɛ. “Mikuɔ sɛɛ shii abɔ kɛyaa sanebimɔi lɛ nɔŋŋ ahe, tamɔ nɔ ni mikɛ miwao miishwɛ fala momo ni gboko jogbaŋŋ lɛ he ekoŋŋ. Minuɔ saji kɛjɛɔ mɛi ni kaneɔ miwoji lɛ aŋɔɔ, ni amɛwiemɔi ni tsɔɔ hejaramɔ lɛ haa yiŋkɔshikɔshi feemɔi ni minaa lɛ feɔ anɔkwale.”

Ekolɛ bo hu osusu he pɛŋ akɛ ani Nyɔŋmɔ yɛ oshihilɛ he miishɛɛ lo. Oo, ekolɛ ole nɔ ni aŋma yɛ Yohane 3:16 lɛ jogbaŋŋ, he ni kɛɔ akɛ “Nyɔŋmɔ sumɔ je lɛ, akɛ eŋɔ ebi koome lɛ eha.” Aloo ekolɛ okane Mateo 20:28 dã, he ni kɛɔ akɛ Yesu ba “ni eŋɔ esusuma lɛ eha yɛ mɛi pii akpɔmɔ hewɔ lɛ.” Shi kɛlɛ, ekolɛ obaabi akɛ, ‘Ani Nyɔŋmɔ naa mi? Ani ejwɛŋɔ mihe akɛ mɔ aŋkro?’ Yiŋtoo kpakpa yɛ ni ooodamɔ nɔ ohe oye akɛ efeɔ nakai, taakɛ wɔbaana lɛ.