Ni Ooohi Shi yɛ Ogbalashihilɛ Kitakamɔ lɛ Naa!

YOOKPEEMƆ gbi lɛ ji miishɛɛ gbi. Eji nifeemɔ ni hiɛdɔɔ yɔɔ mli waa. Ayemforo kɛ ayemforo wu lɛ jɛɔ amɛtsuiŋ tɔ̃ɔ amɛkɛ shiwoo ko ni baasa amɛshihilɛ be ni eshwɛ lɛ fɛɛ he haa amɛhe. Mɛi ni baa yookpeemɔ lɛ akɛ mɛi ni afɔ̃ amɛ nine lɛ yeɔ nɛkɛ shiwoo ni jɛɔ tsuiŋ tɔ̃ɔ nɛɛ he odase, shi Yehowa Nyɔŋmɔ ji Odasefonyo kpele fe fɛɛ.

Biblia lɛ biii nifeemɔ gbɛi pɔtɛɛ komɛi aloo yookpeemɔ nifeemɔ titri ko. Shi kɛlɛ, yɛ ejɛɛhe ni ji ŋwɛi lɛ nɔkpɛlɛmɔ hewɔ lɛ, bei pii lɛ atsuɔ gbalashihilɛ lɛ he nii kɛtsɔɔ yookpeemɔ kitakamɔi ni akɛɔ yɛ be mli ni afeɔ jamɔ mli nifeemɔi lɛ nɔ. Afii saŋŋ nɛ ni Yehowa Odasefoi kɛ gbalashihilɛ kitakamɔ ni nyiɛ sɛɛ nɛɛ etsu nii aahu, akɛ: “Mi —— miiŋɔ bo —— akɛ mikpeemɔ (ŋa/wu) ni masumɔ bo, ni mahiɛ bo dɔdɔɔdɔ (Ayemforo: ni mikɛ bulɛ ni mli kwɔ aha bo) taakɛ eji yɛ Nyɔŋmɔ mla ni yɔɔ Ŋmalɛ Krɔŋkrɔŋ lɛ mli kɛha (ŋamɛi/wumɛi) Kristofoi lɛ naa, bei abɔ ni wɔyi enyɔ lɛ fɛɛ wɔkɛaahi shi yɛ he kome yɛ shikpɔŋ nɔ taakɛ Nyɔŋmɔ gbalashihilɛ he gbɛjianɔtoo lɛ ji lɛ.”a

Nɔ ko ni Esa akɛ Asusu He

Kɛji oosusu gbalashihilɛ mlibotemɔ he lɛ, no lɛ ehe baaba sɛɛnamɔ waa akɛ osusu bɔ ni kitakamɔ nɛɛ mli kwɔ ha, kɛ eshishinumɔ hu he jogbaŋŋ, dani yookpeemɔ gbi lɛ ashɛ. Salomo kɛɛ: “Kaaha onaa miifee blɛblɛ, ni otsui hu akaye oyai ewie wiemɔ ko yɛ Nyɔŋmɔ hiɛ.” (Jajelɔ 5:1) Shi kɛji obote gbalashihilɛ mli momo hu? No lɛ bɔ ni nakai kita ni jɛ otsuiŋ tɔ̃ɔ ni okã yɛ Yehowa hiɛ lɛ he hiaa ha, ní ooosusu he ni ojwɛŋ nɔ jogbaŋŋ lɛ he baaba sɛɛnamɔ waa kɛha bo. Ani oohi shi yɛ naa? Kristofoi buɔ kita ni amɛkãa lɛ akɛ eji hiɛdɔɔ sane. Salomo tee nɔ akɛ: “Shi ni owo lɛ, ye nɔ! Faŋ nɔ ni owooo shi fe nɔ ni owo shi ni oyeee nɔ. Kaaŋmɛ onaabu gbɛ ni eha oheloo miifee esha, ni kaakɛɛ yɛ bɔfo lɛ hiɛ akɛ: Tɔmɔ kɛkɛ ni!”—Jajelɔ 5:3-5.

Ŋwanejee ko bɛ he akɛ, gbalashihilɛ kitakamɔ nɛɛ mli wiemɔ kuku fɛɛ wiemɔ kuku hesusumɔ baaha shishinumɔ ni oyɔɔ yɛ shiwoo ni jɛ tsuiŋ tɔ̃ɔ nɛɛ he lɛ mli akwɔ waa.

“Mi —— miiŋɔ bo”: Enɛɛmɛi ji kitakamɔ lɛ shishijee wiemɔi. Amɛmaa nɔ mi akɛ ookpɛlɛ oyiŋ ni okpɛ akɛ obaabote gbalashihilɛ mli lɛ nɔ akɛ gbɛnaa nii ni ka onɔ.

Yɛ Kristofoi agbɛjianɔtoo naa lɛ, sɔ̃ ko kãaa mɔ ko nɔ yɛ Ŋmalɛ naa akɛ ebote gbalashihilɛ mli. Yesu Kristo diɛŋtsɛ boteee gbalashihilɛ mli, ni ejie oshija shihilɛ yi eha mɛi ni “aaanyɛ mli amɔ lɛ.” (Mateo 19:10-12) Yɛ gbɛ kroko nɔ lɛ, Yesu bɔfoi lɛ ateŋ mɛi pii ji hii ni ebote gbalashihilɛ mli. (Luka 4:38; 1 Korintobii 9:5) Eyɛ faŋŋ akɛ yiŋ ni akpɛɔ akɛ abaabote gbalashihilɛ mli lɛ ji mɔ diɛŋtsɛ sane. Adesa ko bɛ Ŋmalɛ naa hegbɛ ko akɛ enyɛɔ mɔ kroko nɔ ewoɔ gbalashihilɛ mli.

No hewɔ lɛ, eji ogbɛnaa nii akɛ ooohala akɛ ooobote gbalashihilɛ mli. Ekolɛ, bo ohala mɔ ni okɛ lɛ boteɔ gbalashihilɛ mli lɛ. Kɛ okã gbalashihilɛ kita lɛ, ni okɛɛ akɛ, ‘Miiŋɔ bo ——’ lɛ, oŋɔɔ loo okpɛlɛɔ nakai mɔ lɛ nɔ kɛ esui kpakpai fɛɛ—shi, kɛ nakai mɔ lɛ tɔmɔi fɛɛ hu.

Yɛ be ko sɛɛ lɛ, ekolɛ obaayoo ohefatalɔ lɛ sui komɛi ni okpaaa gbɛ kwraa. Nijiaŋwujeei baanyɛ aba yɛ be kɛ bei amli. Biblia lɛ kɛɔ akɛ “mɛi fɛɛ efee esha, ni Nyɔŋmɔ anunyam lɛ ebɔ amɛ.” (Romabii 3:23) No hewɔ lɛ, ekolɛ ehe baahia ni ofee tsakemɔi komɛi bɔni afee ni onyɛ okɛ ohefatalɔ lɛ ahi shi. Ekolɛ enɛ feemɔ baawa, ni bei komɛi hu lɛ, ekolɛ obaanu he tamɔ nɔ ni okpa kwraa. Shi kaimɔ akɛ, okã gbalashihilɛ kita lɛ yɛ Yehowa hiɛ. Ebaanyɛ eye ebua bo ni oye omanye.

“Akɛ mikpeemɔ (ŋa/wu)”: Yɛ klɛŋklɛŋ yookpeemɔ lɛ shishi, beni akɛ Hawa ha Adam yɛ gbalashihilɛ mli lɛ, Yehowa Nyɔŋmɔ wie akɛ “amɛaatsɔ heloo kome.” (1 Mose 2:24; Mateo 19:4-6) Enɛ hewɔ lɛ, gbalashihilɛ ekomefeemɔ lɛ ji wekukpaa ni yɔɔ gbagbalii fe fɛɛ ni baanyɛ ahi adesai enyɔ teŋ. Gbalashihilɛ kɛ bo woɔ weku hee kwraa mli. Okpɛlɛɔ mɔ ko nɔ akɛ eji “okpeemɔ ŋa” loo “okpeemɔ wu.” Etamɔɔɔ wekukpaa kroko ko kwraa. Nifeemɔi ni yeɔ awui fioo ko pɛ yɛ wekukpai krokomɛi amli lɛ baanyɛ aye awui waa yɛ gbalashihilɛ gbɛjianɔtoo lɛ mli.

Akɛ nɔkwɛmɔ nɔ lɛ, ŋɔɔ Ŋmalɛ naa ŋaawoo ni anaa yɛ Efesobii 4:26 lɛ nɛkɛ. Biblia lɛ kɛɔ akɛ: “Nyɛmli afũa, shi nyɛkafea esha; hulu akanyɔ shi yɛ nyɛ mlila lɛ nɔ.” Ekolɛ kɛ naagbai ba okɛ owekumɛi kɛ onanemɛi ateŋ lɛ, jeee be fɛɛ be otsuɔ he nii oya tamɔ bɔ ni kulɛ esa akɛ ofee lɛ. Shi ohefatalɔ lɛ bɛŋkɛ bo kpaakpa fe owekunyo loo onaanyo ko. Saji ni aaaba okɛ ogbalashihilɛ mli hefatalɔ lɛ teŋ ni otsuŋ he nii oya lɛ baanyɛ ekɛ wekukpaa krɛdɛɛ ni yɔɔ nyɛteŋ lɛ awo oshara mli.

Ani oŋmɛɔ gbeekpamɔ ni baaa okɛ ohefatalɔ lɛ teŋ lɛ gbɛ ni eyaa nɔ aahu ni etsɔɔ mlifu loo mlilawoo jɛɛhe ni yɔɔ daa? Ani shishinumɔi ni baaa kɛ naagba shihilɛi hiɔ shi aahu gbii babaoo? Bɔni afee ni nyɛhi shi yɛ nyɛ kitakamɔ lɛ naa lɛ, kɛ jaramɔ shihilɛi te shi lɛ, kaaŋmɛ gbɛ ni gbi kome ho ni toiŋjɔlɛ bako okɛ ohefatalɔ lɛ teŋ. Enɛ tsɔɔ akɛ akɛ sane baake ni akaiii dɔŋŋ, ni okpɛlɛ bo diɛŋtsɛ hu ogbɔjɔmɔi kɛ otɔmɔi anɔ.—Lala 51:7; Luka 17:3, 4.

“Ni masumɔ bo”: Nuu ni miina ŋa lɛ kãa kita akɛ ‘ebaasumɔ eyemforo lɛ ni ehiɛ lɛ dɔdɔɔdɔ.’ Nɔ ni fata nɛkɛ suɔmɔ nɛɛ he hu ji nuu kɛ yoo teŋ suɔmɔ ni ekolɛ no ha amɛkɛ amɛhe hi shi lɛ. Shi nuu kɛ yoo teŋ suɔmɔ nɛɛ kɛkɛ faaa. Suɔmɔ ni Kristofonyo kãa kita akɛ ebaana eha ehefatalɔ lɛ mli kwɔ waa ni emli lɛɛ.

Efesobii 5:25 kɛɔ akɛ: “Nyɛ wumɛi lɛ, nyɛsumɔa nyɛ diɛŋtsɛ nyɛ ŋamɛi, taakɛ bɔ ni Kristo hu sumɔ asafo lɛ.” Eka shi faŋŋ akɛ anyɛŋ akɛ suɔmɔ ni Yesu yɔɔ kɛha asafo lɛ kɛ suɔmɔ ni yɔɔ nuu kɛ yoo teŋ lɛ awo kuu kome mli. Wiemɔ “nyɛsumɔa” kɛ “sumɔ” ni akɛtsu nii yɛ ŋmalɛ nɛɛ mli lɛ jɛ wiemɔ a·gaʹpe, ni tsɔɔ suɔmɔ ni shishitoo mla kudɔɔ lɛ lɛ mli. Biblia lɛ miiwo wumɛi kita yɛ biɛ ni amɛjie suɔmɔ ni yɔɔ daa, ni gbaaa afã, ni kpeeɔ shihilɛi fɛɛ anaa lɛ kpo amɛtsɔɔ amɛŋamɛi.

Ejeee akɛ “misumɔɔ bo ejaakɛ bo hu osumɔɔ mi” henumɔ folo ko kɛkɛ. Wu lɛ taoɔ eŋa lɛ hilɛ-kɛhamɔ kɛtsɔɔ lɛ diɛŋtsɛ enɔ po hiɛ, ni ŋa lɛ hu sumɔɔ ewu lɛ yɛ nakai gbɛ nɔŋŋ nɔ. (Filipibii 2:4) Suɔmɔ ni mli kwɔ ni ooona oha ohefatalɔ lɛ baaye abua bo ni ohi shi yɛ ogbalashihilɛ kitakamɔ lɛ naa.

“Ni mahiɛ bo dɔdɔɔdɔ”: Taakɛ wiemɔi komekomei ashishitsɔɔmɔ wolo ko kɛɛ lɛ, ‘ni aaahiɛ dɔdɔɔdɔ’ shishi ji ‘ni abu nii akɛ ejara wa, ni anu suɔmɔ he loo ajie kpo atsɔɔ.’ Esa akɛ ojie osuɔmɔ lɛ kpo yɛ wiemɔi kɛ nifeemɔi fɛɛ mli! Ehe hiaa ni ŋa lɛ titri ana ewu lɛ suɔmɔ lɛ kpojiemɔi be fɛɛ be. Ekolɛ wu lɛ tsuɔ eheloonaa hiamɔ nii ahe nii jogbaŋŋ, shi enɛ kɛkɛ faaa. Ŋamɛi komɛi yɛ ni amɛyɛ niyenii ni fa babaoo kɛ shia ni mli yɔɔ hejɔlɛ, shi amɛnaaa miishɛɛ kwraa yɛ kpoomɔ ni amɛ gbalashihilɛ mli hefatalɔi ekpoo amɛ loo amɛku amɛhiɛ amɛshwie amɛnɔ lɛ hewɔ.

Nɔ ni tamɔɔɔ nakai lɛ, eka shi faŋŋ akɛ ŋa ni le akɛ asumɔɔ lɛ ni ahiɛɔ lɛ dɔdɔɔdɔ lɛ yɛ yiŋtoo ni eeedamɔ nɔ ena miishɛɛ. Ni yɛ anɔkwale mli lɛ, abaanyɛ awie nakai yɛ wu lɛ hu he. Suɔmɔ wiemɔi ni jɛɔ anɔkwayeli mli lɛ haa anɔkwa suɔmɔ mli waa jogbaŋŋ. Tookwɛlɔ ni jie suɔmɔ kpo lɛ jaje yɛ Salomo Lalai lɛ amli akɛ: “Minyɛmi, ayemforo, osuɔmɔ lɛ yɛ fɛo pi! Osuɔmɔ lɛ ŋɔɔ aahu fe wein, omu lɛ jeɔ ŋma fe tsofai-kɛ-ŋmai sɔrɔtoi fɛɛ!”—Salomo Lalai 4:10.

“Ni mikɛ bulɛ ni mli kwɔ aha bo”: Hii komɛi efee yei niseniianii ni amɛba amɛ shi aahu yɛ afii ohai abɔ ni eho lɛ fɛɛ mli. Ŋmɛnɛ po, taakɛ World Health wolo tɛtrɛɛ lɛ kɛɔ lɛ, “yiwalɛ nii ni afeɔ ashiɔ yei lɛ yaa nɔ yɛ maŋ fɛɛ maŋ kɛ kuu kɛ shihilɛi sɔrɔtoi fɛɛ amli. Yɛ hiŋmɛigbelemɔi pii amli lɛ, abuɔ ŋa-yii akɛ hegbɛ ni nuu yɔɔ.” Ekolɛ hii babaoo yeee fɔ yɛ nɛkɛ su nɛɛ gbɛfaŋ. Shi kɛlɛ, etamɔ nɔ ni hii pii ejieee miishɛɛ diɛŋtsɛ kpo yɛ saji ni kɔɔ yei ahe lɛ agbɛfaŋ. Enɛ hewɔ lɛ, eha yei babaoo ena su ko ni ejaaa yɛ hii ahe. Anuɔ ni ŋamɛi komɛi kɛɔ akɛ, “Misumɔɔ miwu, shi minyɛŋ mana bulɛ ko kwraa maha lɛ!”

Shi, Yehowa Nyɔŋmɔ kɛ yijiemɔ haa yoo ni bɔɔ mɔdɛŋ waa akɛ eeejie bulɛ kpo etsɔɔ ewu—kɛji nuu lɛ shɛɛɛ yoo lɛ gbɛkpamɔi ahe yɛ be kɛ bei amli po. Yoo lɛ kpɛlɛɔ nɔ akɛ nuu lɛ yɛ nitsumɔ, loo gbɛhe ko ni Nyɔŋmɔ diɛŋtsɛ kɛha lɛ. (1 Korintobii 11:3; Efesobii 5:23) Enɛ hewɔ lɛ, suɔmɔ ni mli kwɔ ni eeena eha ewu lɛ fata ejamɔ kɛ toiboo ni efeɔ ehaa Yehowa lɛ he. Nyɔŋmɔ ekuuu ehiɛ efɔɔɔ toiboo ni yei ni sheɔ Nyɔŋmɔ gbeyei lɛ jieɔ lɛ kpo lɛ nɔ.—Efesobii 5:33; 1 Petro 3:1-6; okɛto Hebribii 6:10 he.

Esa akɛ bulɛ ni aaajie lɛ kpo yɛ gbalashihilɛ mli lɛ ajɛ mɛi enyɔ lɛ fɛɛ ŋɔɔ, ni esa akɛ aná, fe ni aaakpa gbɛ kɛkɛ loo aaabi ni akɛha. Akɛ nɔkwɛmɔ nɔ lɛ, wiemɔi ni wa waa loo jɛmɔ wiemɔi bɛ gbɛhe ko kwraa yɛ gbalashihilɛ gbɛjianɔtoo lɛ mli. Efeŋ nɔ ni suɔmɔ loo bulɛ yɔɔ mli akɛ ooowie owu loo oŋa he heguɔgbee wiemɔi. Nɔ kpakpa ko kwraa jɛŋ ohefatalɔ lɛ gbɔjɔmɔi ni ooojie kpo otsɔɔ mɛi krokomɛi, aloo ni ooowie he yɛ maŋ lɛ mli kɛbaŋ kɔkɔɔkɔ. Yɛ fɛoyeli po mli lɛ, mɔ ko baanyɛ afee mɔ ni ejieee bulɛ kpo kwraa yɛ enɛ gbɛfaŋ. Wiemɔi ni yɔɔ Efesobii 4:29, 32 kɔɔ wu kɛ ŋa fɛɛ he. Biblia lɛ kɛɔ akɛ: “Wiemɔ sha ko wiemɔ sha ko akaje nyɛnaa kwraa; shi moŋ wiemɔ ni hi ni ehia, koni eha mɔ nane amɔ shi . . . Nyɛmli ahia ahaa nyɛhe, nyɛmusuŋ atsɔa nyɛ yɛ nyɛhe.”

“Taakɛ eji yɛ Nyɔŋmɔ mla ni yɔɔ Ŋmalɛ Krɔŋkrɔŋ lɛ mli . . . lɛ naa”: Nyɔŋmɔ miitao ni wɔna nihalamɔ kɛ nifeemɔ mli heyeli mli ŋɔɔmɔ. Ekɛ mlai babaoo ni kudɔɔ gbalashihilɛ eshwieee wɔnɔ tamɔ jatsu. Ni kɛlɛ, ekɛ gbɛtsɔɔmɔ komɛi eha, yɛ wɔ nɔŋŋ wɔ hewɔ.

Ŋmɛnɛ, aŋmala woji sɔrɔtoi babaoo ni kɔɔ gbalashihilɛ mli saji ahe yɛ je lɛŋ, ni mɛi babaoo hu hiɛ amɛ diɛŋtsɛ amɛnileei yɛ he. Shi kwɛmɔ jogbaŋŋ! Saji ni agbɛɔ ashwãa, ni kɔɔ gbalashihilɛ mli saji ahe lɛ mli babaoo ji nɔ ni kɛ Biblia lɛ kpaaa gbee kwraa.

Kadimɔ hu akɛ shihilɛ lɛ tsakeɔ kɛjɛɔ gbalashihilɛ mli hefatalɔi kome nɔ kɛyaa mɛi krokomɛi anɔ. Yɛ gbɛ ko nɔ lɛ, gbalashihilɛ mli hefatalɔi tamɔ snoo kpɔi bibii; kɛ okwɛ kɛjɛ shɔŋŋ lɛ, fɛɛ je amɛhe, shi yɛ anɔkwale mli lɛ, esoro eko fɛɛ eko, esoro lɛ yɛ ekrokomɛi lɛ fɛɛ he. Anyɛŋ ana osu kɛ baŋ kɛ ohefatalɔ lɛ hu nɔ ni akɛtsa lɛ eko kwraa yɛ gbalashihilɛ mli hefatalɔi krokomɛi ahe yɛ je lɛŋ. No hewɔ lɛ kaaye oyai ni okpɛlɛ mɛi krokomɛi asusumɔi ni amɛkɛhaa lɛ anɔ. Gbɔmɔ adesa gbɛtsɔɔmɔ ko bɛ ni tsuɔ nii yɛ gbalashihilɛ fɛɛ gbalashihilɛ mli!

Shi kɛ akɛmiito he lɛ, Biblia mli kitai fɛɛ lɛ, anɔkwale ni, ni anyɛɔ akɛtsuɔ nii hu. Bɔfo Paulo ŋma akɛ: “Ŋmalɛ fɛɛ ŋmalɛ ni jɛ Nyɔŋmɔ mumɔ lɛŋ lɛ ehi ha nitsɔɔmɔ kɛ hiɛkamɔ kɛ mɔ saamɔ.” (2 Timoteo 3:16; Lala 119:151) Kɛ okaneɔ Biblia lɛ ni okpɛlɛɔ nɔ akɛ gbɛtsɔɔmɔ yɛ odaa gbi shihilɛ mli lɛ, no lɛ obaanyɛ ohi shi yɛ ogbalashihilɛ kitakamɔ lɛ naa.—Lala 119:105.

“Bei abɔ ni wɔyi enyɔ lɛ fɛɛ wɔkɛaahi shi yɛ he kome yɛ shikpɔŋ nɔ”: Enɛ tsɔɔ ekomefeemɔ ni baahi shi be kakadaŋŋ. Nyɔŋmɔ wo kita akɛ “nuu aaashi etsɛ kɛ enyɛ, ni eeekpɛtɛ eŋa he.” (1 Mose 2:24) Yehowa miitao ni nyɛfee ekome kɛhi shi. Nyɛfea ekome kɛsɔmɔa Nyɔŋmɔ. Nyɛfea ekome kɛkasea e-Wiemɔ lɛ. Nyɛnaa be nyɛnyiɛa, nyɛtaa shi, ni nyɛyea nii kutuu. Nyɛfea ekome kɛnaa shihilɛ mli ŋɔɔmɔ!

Gbalashihilɛ mli hefatalɔi komɛi bɔɔ mɔdɛŋ akɛ amɛaana be daa gbi ni amɛkɛ amɛhe agba sane kɛkɛ. Yɛ gbalashihilɛ afii babaoo sɛɛ lɛ, nɛkɛ ekomefeemɔ nɛɛ he miihia waa yɛ gbalashihilɛ miishɛɛnamɔ mli.

“Taakɛ Nyɔŋmɔ gbalashihilɛ he gbɛjianɔtoo lɛ ji”: Gbalashihilɛ ji nikeenii ni jɛ Yehowa Nyɔŋmɔ, mɔ ni to gbalashihilɛ gbɛjianɔtoo lɛ shishi lɛ dɛŋ. (Abɛi 19:14) Kɛ anyiɛɛɛ egbɛjianɔtoo sɛɛ lɛ, jeee ogbalashihilɛ miishɛɛnamɔ kɛkɛ ekɛbaawo oshara mli, shi moŋ okɛ Bɔlɔ lɛ teŋ wekukpaa hu. Nɔ ni tamɔɔɔ nakai lɛ, kɛ wu kɛ ŋa fɛɛ na amɛkɛ Yehowa teŋ wekukpaa kpakpa, ni amɛjie lɛ kpo akɛ toiboo ni amɛfeɔ amɛhaa egbɛjianɔtoi lɛ, amɛbaana toiŋjɔlɛ yɛ amɛkɛ mɛi krokomɛi ateŋ, ni amɛ diɛŋtsɛ hu amɛfata he.—Abɛi 16:7.

Ohiɛ akakpa nɔ kɔkɔɔkɔ akɛ Yehowa ji Odasefonyo titri kɛha ogbalashihilɛ kitakamɔ lɛ. Yaa nɔ ohi shi yɛ shiwoo ni jɛ otsuiŋ tɔ̃ɔ nɛɛ naa, ni ogbalashihilɛ lɛ baafee yijiemɔ kɛ anunyam jɛɛhe kɛha Yehowa Nyɔŋmɔ!

[Shishigbɛ niŋmaa]

[Wiemɔ ni akɔ ni akɛmiitsu nii/Mfonirii ni yɔɔ baafa 22]

Yɛ gbɛ ko nɔ lɛ, gbalashihilɛ mli hefatalɔi tamɔ snoo kpɔi bibii. Kɛ okwɛ kɛjɛ shɔŋŋ lɛ, fɛɛ je amɛhe, shi yɛ anɔkwale mli lɛ, esoro hefatalɔi fɛɛ hefatalɔi yɛ gbɛ ni yɔɔ sɔrɔto kwraa nɔ

[He ni Sane lɛ Jɛ]

Snoo Kpɔi Bibii/Dover