Amɛfee Yehowa Suɔmɔnaa Nii

Gbekɛ Yoo Fioo ni kɛ Ekãa Wie

YƐ AFII ohai nyɔŋma D.Ŋ.B. lɛ, no mli lɛ ekomefeemɔ ni ka Israel kɛ Siria [Aram] teŋ lɛ efite. Tawuu teɔ shi yɛ amɛteŋ bei pii akɛ, beni afii etɛ ho ni basabasa feemɔ ko eteee shi lɛ, ebatsɔ yinɔsane ni aŋma afɔ shi.—1 Maŋtsɛmɛi 22:1.

Mɛi ni woɔ mɛi ahe gbeyei yɛ nakai be lɛ mli titri ji Siria asafoi ni haa nii, ni asraafoi aaafee oha yɔɔ ekomɛi amli lɛ. Nɛkɛ tabilɔi nɛɛ batutuaa ni amɛhaa Israelbii lɛ anibii, amɛmɔmɔɔ amɛteŋ mɔ fɛɛ mɔ kɛkɛ ekãa naa ni amɛfeɔ amɛteŋ mɛi pii nyɔji—ni gbekɛbii po fata he.

Yɛ nɛkɛ tutuamɔ nɛɛ ekome mli ni akɛ yiwalɛ shɔ̃ “gbekɛ obalayoo fioo ko” kɛjɛ eweku ni sheɔ Nyɔŋmɔ gbeyei lɛ dɛŋ. (2 Maŋtsɛmɛi 5:2) Akɛ lɛ tee Siria, ni anyɛ enɔ ni ehi maŋsɛɛ bii ni ekolɛ ebaashe amɛ gbeyei lɛ ateŋ—gbɔmɛi ni jaa hulu, nyɔŋtsere, ŋulamii, tsei, kwɛ̃ɛnii, kɛ tɛi po. Kwɛ bɔ ni amɛyɔɔ sɔrɔto kwraa yɛ eweku lɛ kɛ enanemɛi ni jaa anɔkwa Nyɔŋmɔ kome, Yehowa, lɛ he! Shi, gbekɛ yoo nɛɛ jie ekãa ni ekaaa kpo yɛ Yehowa jamɔ he yɛ maŋsɛɛ shihilɛ nɛɛ po mli. Nɔ ni jɛ mli ba ji akɛ, etsake maŋ onukpa waa ko ni sɔmɔɔ yɛ Siria maŋtsɛ lɛ shishi lɛ shihilɛ. Nyɛhaa wɔkwɛa bɔ ni fee.

Ekãa ni Akɛwieɔ Faŋŋ

Atsiii gbekɛ yoo fioo lɛ gbɛi ata yɛ Biblia mli sane lɛ mli. Ebatsɔ Naeman, tatsɛ nukpa kɛ kãkãlɔ ni yɔɔ Maŋtsɛ Ben-hadad II shishi lɛ ŋa lɛ abaawa. (2 Maŋtsɛmɛi 5:1) Eyɛ mli akɛ abuɔ lɛ waa moŋ, shi Naeman miiye kpiti ni ji hela ni anyaŋeɔ.

Ekolɛ bɔ ni gbekɛ yoo lɛ buɔ mɔ ehaa hewɔ lɛ eha Naeman ŋa lɛ kɛ lɛ gba eteemɔŋ sane. Ekolɛ yoo lɛ bi gbekɛ yoo lɛ akɛ, ‘Mɛni afeɔ ahaa kpitiyelɔi yɛ Israel?’ Nɛkɛ Israel obalayoo fioo nɛɛ hiɛ gbooo akɛ ekɛ ekãa aaawie: “Mina ni mi-nuntsɔ yaje gbalɔ ni yɔɔ Samaria lɛ ŋɔɔ kulɛ, eeetsa ekpiti nɛɛ eha lɛ kwa!”—2 Maŋtsɛmɛi 5:3.

Ashɛrɛɛɛ nɛkɛ gbekɛ yoo nɛɛ wiemɔi lɛ ashwieee akɛ gbekɛ ko yiŋsusumɔ ko. Nɔ ni tamɔɔɔ nakai lɛ, abɔ Maŋtsɛ Ben-hadad amaniɛ, ni etsu Naeman kɛ mɛi krokomɛi kɛtee Samaria, gbɛfaa ni feɔ kilomitai 150, koni amɛyatao gbalɔ nɛɛ.—2 Maŋtsɛmɛi 5:4, 5.

Naeman Hela lɛ Tsamɔ

Naeman kɛ ehii lɛ tee Israel Maŋtsɛ Yehoram ŋɔɔ, ni amɛkɛ wolo ni jɛ Ben-hadad ŋɔɔ ni tsɔɔ mɛi ni amɛji kɛ shika nikeenii saŋŋ yaha lɛ. Ebɛ naakpɛɛ akɛ Maŋtsɛ Yehoram ni jaa tsina bi lɛ ejieee hemɔkɛyeli ni gbekɛ yoo tsulɔ lɛ jie lɛ kpo yɛ Nyɔŋmɔ gbalɔ lɛ mli lɛ eko kpo. Yɛ no najiaŋ lɛ, esusu akɛ Naeman eba ni eetao ni ekɛ lɛ abe. Beni Nyɔŋmɔ gbalɔ Elisha nu nɔ ni Yehoram susuɔ nɛɛ he lɛ, amrɔ nɔŋŋ ni eha akɛ shɛɛ sane yaha ni eebi ni maŋtsɛ lɛ atsu Naeman kɛba eshia.—2 Maŋtsɛmɛi 5:6-8.

Beni Naeman yashɛ Elisha shia lɛ, gbalɔ lɛ tsu tsulɔ ko ni eyakɛɛ lɛ akɛ: “Yaa ni oyaju ohe shii kpawo yɛ Yordan mli, ni ohewolo aaahi ekoŋŋ, ni ohe aaatse!” (2 Maŋtsɛmɛi 5:9, 10) Naeman mli fu. Akɛni eekpa naakpɛɛ nifeemɔ hoo ko gbɛ hewɔ lɛ, ebi akɛ: “Ani Abana kɛ Farfar, Damasko faai lɛ ehiii fe Israel nui lɛ fɛɛ, kɛ ka nakai lɛ? kulɛ mijuuu yɛ nomɛi amli ni mihe tse?” Naeman kɛ mlila shi Elisha shia lɛ. Shi beni Naeman tsuji lɛ kɛ lɛ susu saji ahe lɛ, yɛ naagbee lɛ ekpɛlɛ nɔ. Beni eju ehe shii kpawo yɛ Yordan Faa lɛ mli lɛ, “ni ehewolo hi ekoŋŋ tamɔ gbekɛ fioo hewolo, ni ehe tse.”—2 Maŋtsɛmɛi 5:11-14.

Beni eku esɛɛ kɛtee Elisha ŋɔɔ lɛ, Naeman kɛɛ: “Naa, kpaako dani mina mile akɛ Nyɔŋmɔ ko Nyɔŋmɔ ko bɛ shikpɔŋ nɛɛ nɔ fɛɛ, akɛ ja Israel kɛkɛ.” Naeman kã kita akɛ “eshaŋ shaa afɔle loo afɔle kroko ehaŋ nyɔŋmɔ ko nyɔŋmɔ ko dɔŋŋ, akɛ ja Yehowa kɛkɛ!”—2 Maŋtsɛmɛi 5:15-17.

Nikasemɔi Kɛha Wɔ

Eji gbekɛ yoo tsulɔ lɛ kɛ ekãa ewieee kulɛ, Naeman eyaŋ gbalɔ Elisha ŋɔɔ. Ŋmɛnɛ, gbekɛbii pii miifee nakai nɔŋŋ. Ekolɛ nikaselɔi ni bɛ miishɛɛ akɛ amɛaasɔmɔ Nyɔŋmɔ ebɔle amɛhe yɛ skul. Ni kɛlɛ, amɛwieɔ nɔ ni amɛheɔ amɛyeɔ lɛ he yɛ faŋŋ mli. Amɛteŋ mɛi komɛi jeɔ nakai feemɔ shishi beni amɛdarako ko kwraa.

Susumɔ Alexandra, gbekɛ yoo ni eye afii enumɔ ni yɔɔ Australia lɛ he okwɛ. Beni eje skul shishi lɛ, enyɛ to gbɛjianɔ koni etsɔɔ Yehowa Odasefoi ahemɔkɛyeli mli etsɔɔ tsɔɔlɔ lɛ. Shi Alexandra nyɛ lɛ naa baakpɛ ehe. Tsɔɔlɔ lɛ kɛɛ: “Mile nyɛ hemɔkɛyelii lɛ saŋŋ momo, kɛ agbɛnɛ hu nɔ ni Alexandra baafee kɛ nɔ ni efeŋ yɛ skul.” Alexandra nyɛ lɛ hiɛ fee lɛ yaa, ejaakɛ gbekɛbii krokomɛi ni ji Odasefoi bɛ skul lɛ mli. Tsɔɔlɔ lɛ tsɔɔ mli akɛ: “Alexandra etsɔɔ wɔ nɔ fɛɛ nɔ mli.” Hɛɛ, nɛkɛ gbekɛ yoo fioo nɛɛ kɛ etsɔɔlɔ lɛ egba sane yɛ ŋaa mli momo.

Gbekɛbii ni tamɔ nɛkɛ kɛ ekãa wieɔ faŋŋ. No hewɔ lɛ, amɛfeɔ nii yɛ Lala 148:12, 13 kɛ gbeekpamɔ naa: “Obalahii kɛ obalayei hu, onukpai kɛ gbekɛbii bluublu: Ha amɛjie Yehowa gbɛi lɛ yi; ejaakɛ ekome too egbɛi kwɔ gojoo, enunyam lɛ teke shikpɔŋ kɛ ŋwɛi fɛɛ.”