Ani Oji Gbɛgbalɔ ni Ŋmɛɔ Pɛpɛɛpɛ?

TSƐ lɛ hiɛ kpɛ́ kɛ miishɛɛ beni egbɛ enijiaŋ ni emɛɔ ni ebiyoo lɛ kɛ shishashaomɔ afamɔ enaji klɛŋklɛŋ kwraa lɛ. Kɛ egbee shi trukaa lɛ, ewoɔ lɛ hewalɛ ni ebɔ mɔdɛŋ ekoŋŋ. Ele akɛ etsɛŋ ni ebaadamɔ shi ni ebaana hewalɛ.

Yɛ nakai gbɛ nɔŋŋ hu be kɛ hewalɛwoo he baahia sɔɔlɔ gbɛgbalɔ hee dani enyɛ ena pɛpɛɛpɛ-ŋmɛɛ ni he hiaa ni baaha eye omanye akɛ be-fɛɛ Maŋtsɛyeli shiɛlɔ. Gbɛgbalɔi pii yaa nɔ amɛsɔmɔɔ yɛ miishɛɛ mli afii nyɔŋmai abɔ. Amɛteŋ mɛi fioo ko laajeɔ pɛpɛɛpɛ ni amɛŋmɛɔ lɛ yɛ amɛ shihilɛ mli nibii ni baa trukaa hewɔ. Mɛi komɛi po laajeɔ miishɛɛ ni amɛyɔɔ lɛ. Yɛ maŋ ko mli lɛ, mɛi ni jeɔ gbɛgbamɔ shishi lɛ ateŋ oha fɛɛ mli 20 kpaa yɛ klɛŋklɛŋ afii enyɔ lɛ mli. Mɛni baaha gbɛgbalɔ aje sɔɔmɔ ni ŋɔɔ fe fɛɛ nɛɛ mli? Ani abaanyɛ afee nɔ ko ni akɛtsi nibii ni gbalaa mɔ sɛɛ nɛɛ anaa?

Eyɛ mli akɛ gbɔmɔtsoŋ hewalɛ kpakpa ni bɛ, shika gbɛfaŋ hiamɔ nii, kɛ weku mli gbɛnaa nii baanyɛ aha mɛi komɛi ashi be-fɛɛ sɔɔmɔ lɛ moŋ, shi nɔ ni etsɔ nanetɔtɔmɔ kɛha mɛi krokomɛi ji pɛpɛɛpɛ ni hi ni amɛnyɛɛɛ amɛŋmɛ yɛ Kristofoi agbɛnaa nii sɔrɔtoi lɛ amli hewɔ. Pɛpɛɛpɛ-ŋmɛɛ tsɔɔ “shihilɛ ni fã kome, shishijee nɔ̃, hefatamɔ nɔ̃ ko, loo nii ni naa mɔ nɔ hewalɛ tsiiɔ fe ekroko, loo ekɛ ekrokomɛi lɛ eŋmɛɛɛ pɛpɛɛpɛ.”

Yesu Kristo tsɔɔ ekaselɔi lɛ bɔ ni esa akɛ afee shiɛmɔ kɛ kaselɔ-feemɔ nitsumɔ lɛ aha. Ni efee bɔ ni esa akɛ aŋmɛ pɛpɛɛpɛ lɛ he nɔkwɛmɔ nɔ hu yɛ lɛ diɛŋtsɛ esɔɔmɔ lɛ mli. Yesu tsɔɔ akɛ Yudafoi ajamɔ mli hiɛnyiɛlɔi lɛ eŋmɛɛɛ pɛpɛɛpɛ, ekɛɛ amɛ akɛ: “Nyɛhãa kowɛ kɛ anisi kɛ kumino mlijaa nyɔŋma-nyɔŋma, shi mla lɛ mli nii ni he jaraa, ni ji kojomɔ kɛ mɔbɔnalɛ kɛ hemɔkɛyeli lɛ moŋ lɛ, nyɛshiɔ; shi kulɛ eja akɛ nyɛfeɔ enɛɛmɛi, ni nyɛkashi eko lɛ hu.”—Mateo 23:23.

Shishitoo mla nɛɛ kɔɔ wɔhe nakai nɔŋŋ ŋmɛnɛ, titri lɛ gbɛgbamɔ sɔɔmɔ lɛ. Akɛni miishɛɛ kɛ jwɛŋmɔ kpakpa ekanya amɛ hewɔ lɛ, mɛi komɛi kɛ amɛhe woɔ gbɛgbamɔ mli beni amɛsako amɛhe kɛhako enɛ, loo amɛsusuko nibii ni kɔɔ he lɛ fɛɛ he jogbaŋŋ. (Luka 14:27, 28) Mɛi krokomɛi hu kɛ amɛhe ewo sɔɔmɔ nitsumɔ lɛ mli vii aahu akɛ amɛku amɛhiɛ amɛshwie Kristojamɔ mli nibii krokomɛi ni he hiaa lɛ anɔ. Mɛɛ gbɛ nɔ amɛaatsɔ ni amɛŋmɛ pɛpɛɛpɛ ni amɛhiɛ mli hu?

Hii Shi akɛ Mɔ ni He Wa Yɛ Mumɔŋ!

Yesu ekuuu ehiɛ eshwieee emumɔŋ shidaamɔ lɛ nɔ kɔkɔɔkɔ. Eyɛ mli akɛ asafoi ni ba koni amɛbabo lɛ toi, ni atsa amɛ lɛ he ebe babaoo yɛ gbɛ ni ekaaa nɔ moŋ, shi eto be he gbɛjianɔ kɛha sɔlemɔ nɔjwɛŋmɔ. (Marko 1:35; Luka 6:12) Gbɛgbamɔ ni ŋmɛɔ pɛpɛɛpɛ ŋmɛnɛ lɛ hu biɔ ni mɔ kɛ gbɛjianɔ fɛɛ ni ato ni akɛhi mumɔŋ hewalɛ mli lɛ atsu nii. Paulo bi akɛ: “Agbɛnɛ bo ni otsɔɔ mɛi krokomɛi anii lɛ, otsɔɔɔ bo diɛŋtsɛ ohe?” (Romabii 2:21) Ebaafee tɔmɔ diɛŋtsɛ akɛ mɔ ko kɛ ebe fɛɛ aaawo mɛi krokomɛi ni eshiɛɔ ehaa amɛ lɛ mli, yɛ be mli ni eku ehiɛ eshwie teemɔŋ nikasemɔ kɛ sɔlemɔ ni sa ni eeefee nɔ.

Kumiko efee gbɛgbalɔ afii nyɔŋmai enyɔ. Eyɛ mli akɛ eyɛ bii etɛ kɛ wu ni heee yeee moŋ, shi ena kɛtsɔ niiashikpamɔ mli akɛ, be ni hi fe fɛɛ ni ekɛaakane ni ekase Biblia lɛ ji, beni eshwɛ fioo ni ebaawɔ gbɛkɛ. Beni eyaa nɔ ekaseɔ nii lɛ, ejeɔ gbɛ ekadiɔ saji otii ni ebaanyɛ ekɛtsu nii yɛ sɔɔmɔ nitsumɔ lɛ mli, bɔni afee ni eha edaa gbi sɔɔmɔ lɛ afee ehee daa ni eŋɔɔ hu. Gbɛgbalɔi krokomɛi ni eye omanye hu teɔ shi mra kɛtsɔɔ weku lɛ mli bii krokomɛi lɛ ahiɛ, koni amɛna mumɔŋ hewalɛ mli ŋɔɔmɔ dioo yɛ maŋkɛ̃. Ekolɛ oyɛ bei krokomɛi ni sa ni oto oma shi koni okɛsaa ohe oha kpeei, ni okane Kristofoi awoji ni eba ehee lɛ. Kɛ oosumɔ ni ohiɛ miishɛɛ ni oyɔɔ yɛ sɔɔmɔ lɛ mli lɛ mli lɛ, belɛ teemɔŋ nikasemɔ jeee nɔ ni awoɔ lɛ foi loo akuɔ hiɛ ashwieɔ nɔ.

Weku Gbɛnaa Nii ni Aaaha Eŋmɛ Pɛpɛɛpɛ

Ehe miihia ni fɔlɔi ni ji gbɛgbalɔi lɛ aha ehi amɛjwɛŋmɔ mli akɛ, “Nuntsɔ [Yehowa, NW] lɛ suɔmɔnaa nii” kɛha amɛ lɛ fã babaoo kɔɔ amɛ diɛŋtsɛ amɛwekui lɛ agbɔmɔtsoŋ, henumɔŋ, kɛ mumɔŋ hiamɔ nii anɔkwɛmɔ he. (Efesobii 5:17; 6:1-4; 1 Timoteo 5:8) Yɛ bei komɛi amli lɛ, gbalashihilɛ mli hefatalɔ ni heɔ yeɔ lɛ kɛ weku lɛ mli bii po sheɔ gbeyei akɛ, kɛ ŋa, ni ji nyɛ lɛ je gbɛgbamɔ shishi pɛ lɛ, amɛnine shɛŋ miishɛɛ kɛ sɛɛfimɔ nɔ kɛjɛŋ eŋɔɔ dɔŋŋ. Nɔ ni jɛɔ henumɔi ni tamɔ nɛkɛ mli baa ji miishɛɛ ni faaa yɛ gbɛgbalɔ ni eshweɔ ni etsɔ lɛ he. Shi, kɛ eto gbɛjianɔ ni etsɔ hiɛ esusu he jogbaŋŋ lɛ, abaanyɛ aŋmɛ pɛpɛɛpɛ.

Gbɛgbalɔi pii bɔɔ mɔdɛŋ ni amɛtsu amɛ shiɛmɔ nitsumɔ lɛ fɛɛ beni weku lɛ mli bii bɛ shia. Kumiko, ni wɔtsɔ hiɛ wɔtsi eta lɛ, hiɔ eweku lɛ masɛi beni amɛyeɔ leebi niyenii, ekɛ ewu kɛ ebii yeɔ shɛɛ leebi, ni ebaa shia dani amɛkuɔ amɛsɛɛ. Ehoɔ niyenii babaoo kɛtsɔɔ hiɛ daa Ju, koni enyɛ ejɔɔ ehe ni enyɛ ekɛ eweku lɛ aye nii, fe ni eeefee mɔ ni bɛ deka yɛ kpatashi. Nitsumɔi pii fe ekome tsumɔ yɛ be kome mli, tamɔ shia nitsumɔ kroko, yɛ be mli ni ahoɔ niyenii hu yeɔ ebuaa. Yɛ nakai gbɛ nɔ lɛ, Kumiko naa be po ekɛfɔ̃ɔ nine etsɛɔ ebii ananemɛi kɛbaa ni ekɛ niyenii krɛdɛɛi komɛi shɛjeɔ amɛmii.

Beni gbekɛbii lɛ daraa kɛjɛɔ afii nyɔŋma kɛ etɛ kɛyaa lɛ, bei pii lɛ ehe bahiaa ni fɔlɔi agbala amɛjwɛŋmɔ kɛya amɛnɔ babaoo, koni amɛnyɛ amɛdamɔ henumɔi, akɔnɔi, yiŋkɔshikɔshi feemɔi heei, kɛ nibii pii ni amɛsheɔ he gbeyei lɛ anaa. Enɛ biɔ hiɛ ni hiɔ he nɔ, kɛ tsakemɔ yɛ fɔlɔ ni ji gbɛgbalɔ lɛ gbɛjianɔtoo mli. Susumɔ Hisako, nyɛ ko ni ji gbɛgbalɔ, ni hiɛ bii etɛ lɛ he. Mɛni efee beni ebiyoo nukpa lɛ je shishi ejie nyamɔ kɛ miishɛɛ ni enaaa eha Kristofoi akpeei kɛ shiɛmɔ nitsumɔ lɛ, yɛ je lɛŋ skul nanemɛi ni gbalaa lɛ lɛ hewɔ? Hiamɔ lɛ titri ji ni ebiyoo lɛ aha anɔkwale lɛ afee lɛ diɛŋtsɛ enɔ̃, ni ehe eye diɛŋtsɛ akɛ je lɛ ni atsiɔ he kɛjɛɔ he lɛ ji gbɛ ni hi fe fɛɛ.—Yakobo 4:4.

Hisako kɛɛ: “Mikpɛ miyiŋ akɛ mikɛ lɛ baakase shishijee tsɔɔmɔi ni yɔɔ Hii Shi Daa wolo lɛ mli lɛ ekoŋŋ daa gbi. Shishijee lɛ, minitii fioo pɛ wɔnyɛ wɔkɛkase nii, ni mibiyoo lɛ fɔɔ wiemɔ akɛ emusuŋ kɔ̃ɔ lɛ, eyitso gbáa lɛ waa, beni nikasemɔ be lɛ eshɛ lɛ. Shi miha nikasemɔ lɛ tee nɔ be fɛɛ be. Yɛ nyɔji fioo ko sɛɛ lɛ, etee hiɛ yɛ esubaŋ mli, ni etsɛɛɛ ni ejɔɔ ehe nɔ ni abaptisi lɛ.” Amrɔ nɛɛ Hisako kɛ ebiyoo lɛ fɛɛ miina be-fɛɛ sɔɔmɔ lɛ mli ŋɔɔmɔ kutuu.

Ehe miihia hu ni tsɛmɛi ni ji gbɛgbalɔi lɛ akwɛ jogbaŋŋ ni amɛkɛ amɛhe akawo mɛi ni yɔɔ wiemɔ lɛ he miishɛɛ lɛ akwɛmɔ kɛ amɛ asafoŋ nitsumɔi amli vii, ni amɛkɛ henumɔŋ sɛɛfimɔ ni mli wa kɛ gbɛtsɔɔmɔ ni sa amɛbii ni daraa lɛ haaa amɛ. Enɛ jeee nɔ ko ni esa akɛ nuu ashi aha eŋa. Kristofonyo onukpa ni bɛ deka, ni ekɛ be kakadaŋŋ efee gbɛgbalɔ, ni ekwɛɔ eheloo gbɛfaŋ nitsumɔ bibioo ko nɔ lɛ hu toɔ be, ni ekɛ ebii ejwɛ lɛ ateŋ mɔ fɛɛ mɔ kaseɔ nii. (Efesobii 6:4) Kɛfata he lɛ, ekɛ eweku lɛ saa amɛhe kɛhaa daa otsi kpeei lɛ. Gbɛgbalɔi ni ŋmɛɔ pɛpɛɛpɛ lɛ ekuuu amɛhiɛ amɛshwieee amɛ wekui aheloo naa loo mumɔŋ hiamɔ nii anɔ.

Shika Helɛtemɔ Mli Pɛpɛɛpɛ-ŋmɛɛ

Jwɛŋmɔ kpakpa ni akɛaakwɛ daa gbi hiamɔ nii hu ji he kroko ni esa akɛ gbɛgbalɔi abɔ mɔdɛŋ ni amɛŋmɛ pɛpɛɛpɛ yɛ. Wɔbaanyɛ wɔkase babaoo kɛjɛ Yesu nɔkwɛmɔ nɔ kɛ ŋaawoo kpakpa lɛ mli yɛ biɛ hu. Ebɔ kɔkɔ eshi yeyeeye ni aaafee tsɔ yɛ heloo gbɛfaŋ nibii ahe. Yɛ no najiaŋ lɛ, ewo ekaselɔi lɛ hewalɛ ni amɛkɛ Maŋtsɛyeli lɛ aye klɛŋklɛŋ gbɛhe, ni ewo shi akɛ Nyɔŋmɔ baakwɛ amɛnɔ, taakɛ efeɔ ebɔɔ nii krokomɛi hu lɛ. (Mateo 6:25-34) Kɛtsɔ ŋaawoo kpakpa nɛɛ sɛɛnyiɛmɔ nɔ lɛ, gbɛgbalɔi pii enyɛ amɛhi be-fɛɛ sɔɔmɔ lɛ mli afii pii, ni Yehowa ejɔɔ amɛ mɔdɛŋbɔi anɔ, koni amɛnine ashɛ ‘daa ŋmaa’ lɛ nɔ.—Mateo 6:11.

Bɔfo Paulo wo nanemɛi Kristofoi aŋaa ni ‘amɛha mɛi fɛɛ ale amɛ hiɛshikamɔ lɛ.’ (Filipibii 4:5) Yɛ anɔkwale mli lɛ, hiɛshikamɔ baabi ni wɔkwɛ wɔ gbɔmɔtsoŋ hewalɛnamɔ jogbaŋŋ. Gbɛgbalɔi ni ŋmɛɔ pɛpɛɛpɛ bɔɔ mɔdɛŋ fɛɛ ni amɛaanyɛ ni amɛjie hiɛshikamɔ kpo yɛ amɛshihilɛ mli, kɛ amɛsubaŋ hu mli yɛ heloo gbɛfaŋ nibii ahe, ejaakɛ amɛle akɛ mɛi krokomɛi naa amɛ jeŋba.—Okɛto 1 Korintobii 4:9 he.

Obalahii kɛ obalayei bibii ni kɛ amɛhe woɔ gbɛgbamɔ sɔɔmɔ mli lɛ kɛ ejurɔ ni amɛfɔlɔi feɔ amɛ lɛ akatsu nii yɛ gbɛ ni esaaa nɔ. Kɛ amɛfɔlɔi ashia amɛyɔɔ lɛ, ebaafee pɛpɛɛpɛ-ŋmɛɛ kɛ hiɛsɔɔ kpojiemɔ akɛ amɛkɛ amɛhe aaawo shia lɛ mli nitsumɔi amli, ni amɛna nitsumɔ ni akɛ be fã tsuɔ, ni baaha amɛnyɛ amɛye amɛbua yɛ shika gbɛfaŋ yɛ shia lɛ kwɛmɔ mli.—2 Tesalonikabii 3:10.

Gbɛgbalɔi ni Ŋmɛɔ Pɛpɛɛpɛ lɛ Ji Jɔɔmɔ Diɛŋtsɛ

Ekolɛ oji gbɛgbalɔ ni miibɔ mɔdɛŋ waa ni oŋmɛ pɛpɛɛpɛ bɔ ni sa. Ná hekɛnɔfɔɔ. Taakɛ bɔ ni be he hiaa gbekɛ bibioo koni ekase bɔ ni eeeŋmɛ alɛŋɛ ni enyiɛ lɛ, nakai gbɛgbalɔi ni amɛdara yɛ mumɔŋ lɛ pii kɛɔ akɛ, ehe be dani amɛŋmɛ pɛpɛɛpɛ yɛ amɛ nitsumɔi fɛɛ nɔ kwɛmɔ mli.

Teemɔŋ nikasemɔ ni akɛ he woɔ mli, weku lɛ mli bii anɔkwɛmɔ, kɛ amɛ diɛŋtsɛ amɛ heloo gbɛfaŋ hiamɔ nibii ni amɛaaná lɛ fata hei ni gbɛgbalɔi bɔɔ mɔdɛŋ ni amɛŋmɛ pɛpɛɛpɛ yɛ mli lɛ ahe. Amaniɛbɔi tsɔɔ akɛ, gbɛgbalɔi pii tsuɔ amɛ gbɛnaa nii ahe nii yɛ gbɛ ni ekaaa nɔ. Amɛji jɔɔmɔ diɛŋtsɛ kɛha akutso lɛ, kɛ yijiemɔ kɛha Yehowa kɛ egbɛjianɔtoo lɛ.