Maŋtsɛyeli Jajelɔi Bɔ Amaniɛ

‘Agbele Shinaa Kpele ni Nitsumɔ Yɔɔ Mli Naa’ yɛ Cuba

BƆFO Paulo ji Nyɔŋmɔ Maŋtsɛyeli lɛ he sanekpakpa shiɛlɔ ni ale jogbaŋŋ. Ekɛ hegbɛ fɛɛ hegbɛ ni ena lɛ tsu nii ni ekɛ mɛi krokomɛi gba Bɔlɔ lɛ shiwoo ni ji naanɔ wala kɛha adesai toibolɔi lɛ he sane. Beni etee eyasara blema Efeso lɛ, Paulo na shihilɛi heei komɛi kwraa ni baaŋmɛ lɛ gbɛ ni eye ebua mɛi babaoo. Ewie akɛ: “Mibahi Efeso . . . , ejaakɛ agbele shinaa kpeteŋkpele naa aha mi, ni nitsumɔ pii yɛ mli.”—1 Korintobii 16:8, 9.

Yehowa Odasefoi ni yɔɔ Cuba lɛ hu naa amɛhe yɛ shihilɛi heei kwraa mli. Eyɛ mli akɛ akɛ amɛgbɛi woko woji amli lolo yɛ mla naa moŋ, shi Odasefoi lɛ nyɛɔ amɛkɛ amɛnanemɛi maŋbii lɛ wieɔ amɛ Biblia mli hiɛnɔkamɔ lɛ he yɛ faŋŋ mli. Nyɛsɛɛ nɛɛ, Cuba nɔyeli lɛ wie akɛ eyɛ he miishɛɛ waa akɛ eeeŋmɛ jamɔ kui sɔrɔtoi agbɛ ni amɛtsu amɛjamɔ he nii yɛ heyeli mli. Maŋ Nɔyelɔ Castro tsĩ Yehowa Odasefoi atã yɛ faŋŋ mli akɛ jamɔ kuu ni amrɔ nɛɛ Cuba nɔyeli lɛ kɛ amɛ naa wekukpaa ni etee hiɛ jogbaŋŋ mli ŋɔɔmɔ.

Nɛkɛ shihilɛ hee nɛɛ egbele ‘shinaa kpeteŋkpele ni nitsumɔ yɔɔ mli naa’ kɛha Odasefoi. Akɛ nɔkwɛmɔ nɔ lɛ, nyɛsɛɛ nɛɛ, Yehowa Odasefoi gbele nitsumɔ he naa yɛ Cuba, ni eyeɔ ebuaa amɛ ni amɛtoɔ amɛ shiɛmɔ nitsumɔ lɛ he gbɛjianɔ jogbaŋŋ yɛ nakai maŋ lɛ mli. Odasefoi ni fa fe 65,000 miiye kɛmiibua gbɔmɛi ni amɛkase Biblia lɛ ni amɛnu shishi. Amɛkɛ Biblia kasemɔ woji, tamɔ Buu-Mɔɔ kɛ Awake! woji tɛtrɛbii lɛ tsuɔ nii. Cubabii ni sumɔɔ jalɛ nifeemɔ lɛ ateŋ mɛi pii miina Biblia ni amɛkɛ Yehowa Odasefoi kaseɔ lɛ he sɛɛ.

Odasefoi lɛ hu feɔ kpeei daa yɛ kui bibii amli yɛ ŋshɔkpɔ lɛ nɔ fɛɛ. Bei komɛi lɛ, amɛnaa hegbɛ amɛfeɔ henaabuamɔi wuji yɛ kui ni mɛi aaashɛ 150 yɔɔ mli lɛ amli. Amɛhiɛ sɔɔ gbɛŋmɛɛ ni amɛna kɛjɛ Cuba nɔyelɔi lɛ adɛŋ, ni haa amɛnaa hegbɛ amɛkɛ amɛ mumɔŋ nyɛmimɛi hii kɛ yei kpeɔ, ni amɛlaa kɛjieɔ Nyɔŋmɔ yi, ni amɛfeɔ ekome kɛsɔleɔ kutuu lɛ waa diɛŋtsɛ.

Nyɛsɛɛ nɛɛ, afee “Nyɔŋmɔ Gbeyeishemɔ” Kpokpaa Wulu nɔ Kpee lɛ nɔ ni fe shii 1,000 yɛ otsii anaagbee etɛ pɛ mli. Amaniɛbɔɔ ko tsɔɔ mli akɛ anaa “gbɛjianɔtoo kpakpa, bulɛ, kɛ toiŋjɔlɛ” yɛ kpeei lɛ eko fɛɛ eko shishi. Nɔyelɔi lɛ jie Odasefoi lɛ ayi yɛ oti nɛɛ hewɔ.

Anɔkwa Kristofoi bɔɔ mɔdɛŋ yɛ je lɛŋ he fɛɛ he akɛ amɛaatsu famɔ ni Nyɔŋmɔ kɛha amɛ akɛ amɛshiɛ Nyɔŋmɔ Maŋtsɛyeli lɛ he sanekpakpa lɛ he nii. Yɛ nakai beaŋ nɔŋŋ lɛ, amɛbɔɔ mɔdɛŋ akɛ amɛaaha toiŋjɔlɛ ahi amɛkɛ maŋ nɔyelɔi ateŋ. (Tito 3:1) Yehowa Odasefoi nyiɛɔ bɔfo Paulo ŋaawoo nɛɛ sɛɛ, mɔ ni ŋma akɛ: “Agbɛnɛ nɔ klɛŋklɛŋ ni miwoɔ he ŋaa ji akɛ ahiɛ faikpamɔi, sɔlemɔi, mlidaamɔi, shidaai amli, aha gbɔmɛi fɛɛ, aha maŋtsɛmɛi kɛ mɛi fɛɛ ni yeɔ onukpai lɛ, koni wɔhi shi kpoo yɛ hejɔlɛ mli, yɛ Nyɔŋmɔ jamɔ kɛ jeŋba ni hiɛ sɔɔ fɛɛ mli.”—1 Timoteo 2:1, 2.