Esa akɛ Mɔ Fɛɛ Mɔ Abu Ehe Akɔntaa Eha Nyɔŋmɔ
“Wɔteŋ mɔ fɛɛ mɔ baabu lɛ diɛŋtsɛ ehe akɔntaa eha Nyɔŋmɔ.”—ROMABII 14:12.
1. Mɛɛ husu aje awo Adam kɛ Hawa heyeli he?
YEHOWA NYƆŊMƆ bɔ wɔ klɛŋklɛŋ fɔlɔi, Adam kɛ Hawa akɛ gbɔmɛi ni nyɛɔ amɛkpɛɔ amɛyiŋ amɛhaa amɛhe. Eyɛ mli akɛ amɛbaa shi fe ŋwɛibɔfoi lɛ moŋ, shi amɛji bɔɔ nii ni yɔɔ nilee ni nyɛɔ amɛkpɛɔ amɛyiŋ yɛ nilee mli. (Lala 8:5, 6) Kɛlɛ, nakai heyeli ni Nyɔŋmɔ kɛha lɛ jeee hegbɛ ni akɛtsuɔ nɔ ni hi kɛ nɔ ni ehiii haaa mɔ diɛŋtsɛ lɛ he nii. Amɛbaabu amɛhe akɔntaa amɛha amɛ Bɔlɔ lɛ, ni akɔntaabuu nɛɛ mli ekpã kɛyashɛ amɛ seshibii fɛɛ nɔ.
2. Mɛɛ akɔntaa etsɛŋ Yehowa baaha abu, ni mɛni hewɔ?
2 Amrɔ nɛɛ ni wɔmiibɛŋkɛ yiwalɛ nibii agbɛjianɔtoo nɛɛ naagbee lɛ, Yehowa baabu akɔntaa yɛ shikpɔŋ lɛ nɔ. (Okɛto Romabii 9:28 he.) Etsɛŋ ni gbɔmɛi ni leee Nyɔŋmɔ lɛ baabu amɛhe akɔntaa amɛha Yehowa Nyɔŋmɔ, yɛ shikpɔŋ lɛ mli nibii ni amɛfite lɛ, adesa wala ni amɛkpata hiɛ, kɛ titri lɛ, etsuji lɛ ayi ni amɛwa lɛ hewɔ.—Kpojiemɔ 6:10; 11:18.
3. Mɛɛ sanebimɔi wɔbaasusu he?
3 Akɛni nibii ni akpaa gbɛ ni esa akɛ asusu he nɛɛ kã wɔhiɛ hewɔ lɛ, sɛɛnamɔ yɛ he akɛ wɔɔsusu bɔ ni Yehowa kɛ ebɔɔ nii ye ha yɛ jalɛ mli, yɛ bei ni eho lɛ amli lɛ he. Mɛɛ gbɛ nɔ Ŋmalɛi lɛ aaatsɔ aye abua wɔ, yɛ wɔgbɛfaŋ, ni wɔbu wɔhe akɔntaa ni nɔkpɛlɛmɔ yɔɔ mli wɔha wɔ-Bɔlɔ lɛ? Mɛɛ nɔkwɛmɔ nii baanyɛ aye abua, ni te nɔ ni esa akɛ wɔkwa amɛ kasemɔ?
Ŋwɛibɔfoi Buɔ Amɛhe Akɔntaa
4. Te wɔfeɔ tɛŋŋ wɔleɔ akɛ Nyɔŋmɔ haa ŋwɛibɔfoi buɔ amɛ nifeemɔi ahe akɔntaa?
4 Yehowa bɔɔ nii ni ji ŋwɛibɔfoi lɛ buɔ amɛhe akɔntaa amɛhaa lɛ, tamɔ bɔ ni wɔji lɛ pɛpɛɛpɛ. Dani Noa gbi lɛ mli Nu Afua lɛ aaaba lɛ, ŋwɛibɔfoi komɛi tsake amɛhe gbɔmɛi yɛ toigbele mli, bɔni afee ni amɛkɛ yei aná bɔlɛ. Ákɛ mɛi ni nyɛɔ amɛkpɛɔ amɛyiŋ amɛhaa amɛhe lɛ, mumɔŋ bɔɔ nii nɛɛ baanyɛ akpɛ yiŋ ni tamɔ nɛkɛ, shi kɛlɛ, Nyɔŋmɔ kɛɛ amɛbaabu amɛhe akɔntaa amɛha lɛ. Beni ŋwɛibɔfoi toigbolɔi lɛ kũ amɛsɛɛ kɛtee mumɔŋ nɔyeli he lɛ, Yehowa eŋmɛɛɛ amɛ gbɛ ni amɛhi amɛ shishijee gbɛhe lɛ mli dɔŋŋ. Kaselɔ Yuda kɛɔ wɔ akɛ, “ekɛ naanɔ kpãai efimɔ amɛ eto duŋ kpii mli eha gbi wulu lɛ nɔ kojomɔ lɛ.”—Yuda 6.
5. Mɛɛ shigbeemɔ eba Satan kɛ edaimonioi lɛ anɔ, ni mɛɛ gbɛ nɔ aaatsɔ abu amɛ atuatsemɔ lɛ he akɔntaa?
5 Nɛkɛ ŋwɛibɔfoi toigbolɔi, loo daimonioi nɛɛ, yɛ Satan Abonsam akɛ amɛ nɔyelɔ. (Mateo 12:24-26) Nɛkɛ ŋwɛibɔfo yiwalɔ nɛɛ tse atua eshi e-Bɔlɔ lɛ, ni etswa ja ni Yehowa nɔyeli ja lɛ mpoa. Satan nyiɛ wɔ klɛŋklɛŋ fɔlɔi lɛ ahiɛ kɛtee esha mli, ni nɔ ni jɛ mli ba yɛ naagbee ji, amɛ gbele. (1 Mose 3:1-7, 17-19) Eyɛ mli akɛ Yehowa ŋmɛ Satan gbɛ yɛ ŋwɛi gwabɔi amli yɛ be ko mli yɛ no sɛɛ moŋ, shi Biblia mli wolo ni ji Kpojiemɔ lɛ gba fɔ shi akɛ, yɛ Nyɔŋmɔ be ni sa mli lɛ, abaashɛ nɛkɛ mɔ fɔŋ nɛɛ afɔ shikpɔŋ nɛɛ nɔ he ko. Odaseyeli tsɔɔ akɛ, enɛ ba mli beni Yesu Kristo nine shɛ Maŋtsɛyeli hewalɛ nɔ yɛ 1914 lɛ sɛɛ nɔŋŋ. Yɛ naagbee lɛ, Abonsam kɛ edaimonioi lɛ baaya naanɔ hiɛkpatamɔ mli. Akɛni ana nɔyeli he sane lɛ naa kwraa hewɔ lɛ, no mli abaabu atuatsemɔ lɛ he akɔntaa yɛ jalɛ naa agbe naa.—Hiob 1:6-12; 2:1-7; Kpojiemɔ 12:7-9; 20:10.
Nyɔŋmɔ Bi lɛ Buɔ Ehe Akɔntaa
6. Te Yesu buɔ akɔntaa ni lɛ diɛŋtsɛ ebuɔ ehaa e-Tsɛ lɛ ehaa tɛŋŋ?
6 Mɛɛ nɔkwɛmɔ nɔ kpakpa po Nyɔŋmɔ Bi, Yesu Kristo fee efɔ shi nɛkɛ! Ákɛ nuu ni eye emuu ni kɛ Adam yeɔ egbɔ lɛ, Yesu mli fili lɛ akɛ eeefee ŋwɛi suɔmɔnaa nii. Eyɛ miishɛɛ hu akɛ, akɛ Yehowa mla nɔ yeli he akɔntaabuu aaafɔ̃ enɔ. Lalatsɛ lɛ gba yɛ ehe yɛ gbɛ ni sa nɔ akɛ: “Mi-Nyɔŋmɔ, eŋɔɔ minaa akɛ mafee osuɔmɔnaa nii, ni omla lɛ yɛ mitsui mli.”—Lala 40:9; Hebribii 10:6-9.
7. Mɛni hewɔ Yesu baanyɛ awie wiemɔi ni aŋmala yɛ Yohane 17:4, 5 beni esɔleɔ yɛ gbɛkɛ ni enɔ jetsɛremɔ abaagbe lɛ lɛ?
7 Yɛ shitee-kɛ-woo ni hetsɛ̃ yɔɔ mli ni Yesu kɛkpe lɛ fɛɛ sɛɛ lɛ, efee Nyɔŋmɔ suɔmɔnaa nii, ni ehiɛ emuuyeli mli kɛtee gbele mli yɛ sɛŋmɔtso nɔ. No hewɔ lɛ, ewo kpɔ̃mɔ jara lɛ, koni ekɛkpɔ̃ adesai kɛjɛ gbele ni jɛɔ Adam esha lɛ mli baa lɛ mli. (Mateo 20:28) No hewɔ lɛ, Yesu nyɛ esɔle yɛ hekɛnɔfɔ̃ɔ mli, yɛ gbɛkɛ ni tsɔ egbele lɛ hiɛ lɛ mli akɛ: “Mi lɛ miwo ohiɛ nyam yɛ shikpɔŋ lɛ nɔ, akɛni nitsumɔ lɛ ni oŋɔha mi tsumɔ lɛ, migbe naa lɛ. Ni agbɛnɛ, Ataa, ŋɔɔ anunyam ni miyɔɔ yɛ oŋɔɔ dani je lɛ yɔɔ lɛ owo mihiɛ nyam.” (Yohane 17:4, 5) Yesu baanyɛ awie nakai wiemɔi lɛ etsɔɔ eŋwɛi Tsɛ lɛ, ejaakɛ eekpee akɔntaabuu he kaa lɛ naa yɛ omanyeyeli mli, ni Nyɔŋmɔ kpɛlɛ enɔ.
8. (a) Mɛɛ gbɛ nɔ Paulo tsɔ etsɔɔ yɛ akɛ, esa akɛ wɔbu wɔhe akɔntaa wɔha Yehowa Nyɔŋmɔ? (b) Mɛni baaye abua wɔ ni wɔna nɔkpɛlɛmɔ yɛ Nyɔŋmɔ hiɛ?
8 Wɔyeee emuu ejaakɛ wɔtamɔɔɔ Yesu Kristo ni yeɔ emuu lɛ. Ni kɛlɛ, wɔbaabu wɔhe akɔntaa wɔha Nyɔŋmɔ. Bɔfo Paulo kɛɛ: “Shi bo lɛ, mɛɛba okojoɔ onyɛmi? Aloo bo hu, mɛɛba ogbeɔ onyɛmi he guɔ? Ejaakɛ wɔ fɛɛ wɔbaadamɔ Kristo kojomɔ sɛi lɛ hiɛ. Ejaakɛ aŋma akɛ: ‘Nuntsɔ, lɛ kɛɛ: Akɛ nɔ ni mi mihiɛ kã nɛɛ, nakutso fɛɛ nakutso aaakoto mi, ni lilɛi fɛɛ lilɛi aaajaje Nyɔŋmɔ atsɔɔ.” ’ No hewɔ lɛ, wɔteŋ mɔ fɛɛ mɔ baabu lɛ diɛŋtsɛ ehe akɔntaa eha Nyɔŋmɔ.” (Romabii 14:10-12) Bɔni afee ni wɔnyɛ wɔfee nakai, ni Yehowa akpɛlɛ wɔnɔ lɛ, ejɛ suɔmɔ mli ekɛ henilee kɛ e-Wiemɔ, Biblia lɛ, ni jɛ mumɔŋ lɛ fɛɛ eha wɔ, koni ekudɔ wɔ yɛ nɔ ni wɔwieɔ kɛ nɔ ni wɔfeɔ lɛ mli. (Romabii 2:14, 15; 2 Timoteo 3:16, 17) Hegbɛ ni Yehowa mumɔŋ gbɛjianɔtoo lɛ kɛhaa lɛ fɛɛ ni wɔkɛaatsu nii, ni wɔnyiɛ wɔ henilee ni Biblia lɛ etsɔse lɛ lɛ sɛɛ lɛ baaye abua wɔ ni wɔna Nyɔŋmɔ nɔkpɛlɛmɔ. (Mateo 24:45-47) Yehowa mumɔ krɔŋkrɔŋ, loo enifeemɔ hewalɛ lɛ ji hewalɛ kɛ gbɛtsɔɔmɔ jɛɛhe ni akɛfata he. Kɛ wɔfee nii yɛ mumɔ lɛ kudɔmɔ kɛ wɔ henilee ni Biblia etsɔse lɛ lɛ hiɛnyiɛmɔ kɛ gbeekpamɔ naa lɛ, wɔtsɔɔ akɛ ‘wɔkwaaa Nyɔŋmɔ,’ mɔ ni wɔbaabu wɔ nifeemɔi fɛɛ he akɔntaa wɔha lɛ lɛ.—1 Tesalonikabii 4:3-8; 1 Petro 3:16, 21.
Jeŋmaji ni Buɔ Amɛhe Akɔntaa
9. Namɛi ji Edombii lɛ, ni mɛni ba amɛnɔ yɛ bɔ ni amɛkɛ Israel ye ha lɛ hewɔ?
9 Yehowa biɔ ni jeŋmaji lɛ abu amɛ nifeemɔi ahe akɔntaa. (Yeremia 25:12-14; Zefania 3:6, 7) Susumɔ blema Edom maŋtsɛyeli ni yɔɔ Ŋshɔ ni Egbo lɛ wuoyigbɛ kɛ Aqaba Ŋshɔnine lɛ kooyigbɛ lɛ he okwɛ. Edombii lɛ ji Sembii, ni amɛkɛ Israelbii lɛ yɛ wekukpaa ni bɛŋkɛ kpaakpa. Eyɛ mli akɛ Edombii lɛ ablematsɛ ji Abraham nabi Esau moŋ, shi amɛŋmɛɛɛ Israelbii lɛ agbɛ ni amɛfoŋ kɛtsɔ Edom yɛ “maŋtsɛ gbɛjegbɛ lɛ nɔ” beni amɛfãa gbɛ kɛyaa Shiwoo Shikpɔŋ lɛ nɔ lɛ. (4 Mose 20:14-21) Edom nyɛ̃ɛ yɛ afii ohai abɔ lɛ amli lɛ tee nɔ etsɔ hetsɛ̃ ni mɔbɔnalɛ bɛ mli kɛha Israel. Yɛ naagbee lɛ, ehe bahia ni Edombii lɛ abu amɛhe akɔntaa, yɛ Babilonbii lɛ ni amɛwo amɛ hewalɛ ni amɛkpata Yerusalem hiɛ yɛ afi 607 D.Ŋ.B. lɛ hewɔ. (Lala 137:7) Yɛ afii ohai ekpaa D.Ŋ.B. lɛ mli lɛ, Babilon asraafoi ni yɔɔ Maŋtsɛ Nabonido shishi lɛ ye Edom nɔ kunim, ni ebatsɔ amaŋfɔ̃, taakɛ Yehowa wo akpɔ lɛ.—Yeremia 49:20; Obadia 9-11.
10. Mɛni Moab-bii lɛ fee Israelbii, ni Nyɔŋmɔ ha Moab bu ehe akɔntaa yɛ mɛɛ gbɛ nɔ?
10 Nɔ ni tamɔ nakai nɔŋŋ ba Moab nɔ. Moab-bii amaŋtsɛyeli lɛ yɛ Edom kooyigbɛ kɛ Ŋshɔ ni Egbo lɛ bokagbɛ. Dani Israelbii lɛ aaabote Shiwoo Shikpɔŋ lɛ nɔ lɛ, Moab-bii lɛ efeee amɛ gbɔ yɛ mlihilɛ naa, ni eyɛ faŋŋ akɛ, amɛha amɛ aboloo kɛ nu koni amɛkɛná amɛhe sɛɛ kɛkɛ yɛ shika gbɛfaŋ. (5 Mose 23:3, 4) Moab Maŋtsɛ Barak bɔ gbalɔ Bileam apaa koni elomɔ Israel, ni akɛ Moab yei tsu nii koni amɛlaka Israel hii kɛbote ajwamaŋbɔɔ kɛ wɔŋjamɔ mli. (4 Mose 22:2-8; 25:1-9) Shi kɛlɛ, Yehowa haaa hetsɛ̃ ni Moab yɔɔ kɛha Israel lɛ aho ni enaaa. Taakɛ agba afɔ shi lɛ, Babilon bii lɛ fee Moab amaŋfɔ̃. (Yeremia 9:25, 26; Zefania 2:8-11) Hɛɛ, Nyɔŋmɔ hã Moab bu ehe akɔntaa.
11. Moab kɛ Amon batsɔmɔ tamɔ mɛɛ maji, ni mɛni Biblia gbalɛi tsɔɔ yɛ ŋmɛnɛŋmɛnɛ yiwalɛ nibii agbɛjianɔtoo lɛ he?
11 Jeee Moab pɛ, shi ehe bahia ni Amonbii lɛ hu abu amɛhe akɔntaa amɛha Nyɔŋmɔ. Yehowa egba efɔ shi akɛ: “Moab aaatsɔ tamɔ Sodom, ni Amonbii lɛ hu aaatamɔ Gomora; sansrɔ̃i amaamɔ he kɛ ŋoo bui kɛ naanɔ amaŋfɔ̃i.” (Zefania 2:9) Akpata Moab kɛ Amon shikpɔji lɛ ahiɛ, tamɔ bɔ ni Nyɔŋmɔ kpata Sodom kɛ Gomora maŋtiasei lɛ ahiɛ lɛ. Taakɛ Shikpɔŋ kɛ Wala he Yinɔsane Kuu ni yɔɔ London lɛ tsɔɔ lɛ, nibii amlipɛilɔi kɛɔ akɛ amɛna he ni Sodom kɛ Gomora maji ni efite lɛ yɔɔ lɛ, yɛ Ŋshɔ ni Egbo lɛ bokagbɛ ŋshɔnaa. Nɔ̃ pɛ ni odaseyeli fɛɛ odaseyeli ni baaje kpo yɛ sɛɛ mli yɛ enɛ gbɛfaŋ, ni anyɛɔ akɛ he fɔ̃ɔ nɔ lɛ baanyɛ afee pɛ ji, ni efi Biblia gbalɛi ni tsɔɔ akɛ, abaabi ni ŋmɛnɛŋmɛnɛ yiwalɛ nibii agbɛjianɔtoo nɛɛ hu abu ehe akɔntaa eha Yehowa lɛ sɛɛ.—2 Petro 3:6-12.
12. Eyɛ mli akɛ esa akɛ Israel abu ehe akɔntaa eha Nyɔŋmɔ yɛ ehe eshai lɛ ahewɔ moŋ, shi mɛni agba afɔ shi yɛ Yuda shwɛɛnii lɛ ahe?
12 Eyɛ mli akɛ Yehowa duro Israel waa moŋ, shi ehe bahia ni ebu ehe akɔntaa eha Nyɔŋmɔ yɛ ehe eshai lɛ ahewɔ. Beni Yesu Kristo ba Israel maŋ lɛ mli lɛ, mɛi ni fa kpoo lɛ. Shwɛɛnii fioo ko pɛ na emli hemɔkɛyeli, ni amɛbatsɔmɔ esɛɛnyiɛlɔi. Paulo kɛ gbalɛi komɛi to nɛkɛ Yudafoi ashwɛɛnii nɛɛ ahe beni eŋma akɛ: “Yesaia bo yɛ Israel hewɔ akɛ: ‘Kɛ Israelbii lɛ ayibɔ tamɔ ŋshɔ naa shia lɛ, mɛi ni eshwɛ lɛ yiwala aaahere. . . . Ejaakɛ sane ni afo lɛ kuku Nuntsɔ lɛ aaaye yɛ shikpɔŋ lɛ nɔ.’ Ni taakɛ Yesaia ekɛɛ eto momo lɛ, akɛ: ‘Efee akɛ tai a-Nuntsɔ [Yehowa, NW] eshwɛɛɛ seshi ko ehaaa wɔ kulɛ, wɔtamɔ Sodoma, ni wɔtsɔmɔ tamɔ Gomora.’ ” (Romabii 9:27-29; Yesaia 1:9; 10:22, 23) Bɔfo lɛ tsĩ gbɔmɛi 7,000 ni yɔɔ Elia be lɛ mli ni kulako shi amɛhako Baal lɛ anɔkwɛmɔ nɔ lɛ tã, kɛkɛ ni ekɛɛ akɛ: “Nakai nɔŋŋ kɛ̃ ŋmɛnɛŋmɛnɛ bei nɛɛ amli hu, eshwɛ mɛi komɛi yɛ duromɔ halamɔ naa.” (Romabii 11:5) Mɛi ni fee nakai shwɛɛnii lɛ ji aŋkroaŋkroi ni baabu amɛhe akɔntaa amɛha Nyɔŋmɔ.
Aŋkroaŋkroi Akɔntaabuu He Nɔkwɛmɔ Nii
13. Mɛni ba Kain nɔ, beni Nyɔŋmɔ bi lɛ ni ebu ehe akɔntaa yɛ enyɛmi nuu Habel ni egbe lɛ lɛ hewɔ?
13 Biblia lɛ tsĩɔ aŋkroaŋkroi pii ni bu amɛhe akɔntaa amɛha Yehowa Nyɔŋmɔ lɛ atã. Ŋɔɔ Adam kromɔ bi Kain akɛ nɔkwɛmɔ nɔ. Lɛ kɛ enyɛmi nuu Habel fɛ̃ɛ shã afɔlei amɛha Yehowa. Nyɔŋmɔ kpɛlɛ Habel afɔleshãa lɛ nɔ, shi ekpɛlɛɛɛ Kain nɔ̃ lɛ nɔ. Beni abi ni Kain abu ehe akɔntaa yɛ enyɛmi lɛ ni ekɛ yiwalɛ gbe lɛ lɛ he lɛ, ekɛ henumɔ ni ebɛ kɛɛ Nyɔŋmɔ akɛ: “Minyɛmi lɛ kwɛlɔ ji mi lo?” Yɛ ehe esha nɛɛ hewɔ lɛ, atswa Kain nane shi tũ kɛtee ‘Kobɔfoi ashikpɔŋ nɔ yɛ Eden bokagbɛ.’ Ejieee anɔkwa tsuitsakemɔ kpo yɛ efɔŋ ni efee lɛ he, ni etoigbalamɔ ni sa lɛ lɛ pɛ he etsɔ̃ɔ dɔlɛ yɛ.—1 Mose 4:3-16.
14. Mɛɛ gbɛ nɔ atsɔ afee akɔntaa ni mɔ aŋkro lɛ baabu aha Nyɔŋmɔ lɛ he nɔkwɛmɔ nɔ, yɛ osɔfonukpa Eli kɛ ebihii lɛ sane lɛ mli?
14 Afee aŋkroaŋkroi ni buɔ amɛhe akɔntaa lɛ hu he nɔkwɛmɔ nɔ yɛ Israel osɔfonukpa Eli sane lɛ mli. Ebihii Hofni kɛ Pinehas sɔmɔ akɛ osɔfoi, shi taakɛ yinɔsaneŋmalɔ Josephus kɛɛ lɛ, “amɛye fɔ yɛ jalɛsane ni amɛyeee, kɛ Nyɔŋmɔ ni amɛbuuu lɛ krɔŋkrɔŋ lɛ mli, ni amɛtsiii amɛhe kɛjɛɛɛ nɔ fɔŋ ko mli.” Nɛkɛ “yakagbɔmɛi” nɛɛ ebuuu Yehowa, amɛkɛ amɛhe wo musubɔɔ jeŋba mli, ni amɛye jeŋba shara ni ehiii fe fɛɛ lɛ he fɔ. (1 Samuel 1:3; 2:12-17, 22-25) Ákɛ amɛtsɛ kɛ Israel osɔfonukpa lɛ, gbɛnaa nii kã Eli nɔ akɛ egbala amɛtoi, shi kãmɔ ni mli waaa pɛ kɛkɛ ekɛha amɛ. Eli ‘tee nɔ ekɛ woo ha ebihii lɛ fe Yehowa.’ (1 Samuel 2:29) Toigbalamɔ ba Eli we lɛ nɔ. Bihii enyɔ lɛ fɛɛ gboi yɛ gbi kome nɔ tamɔ amɛtsɛ, ni yɛ naagbee lɛ afo amɛ osɔfoyeli weku lɛ ashɛ afɔ̃ kwraa. Nɛkɛ gbɛ nɔ atsɔ atsu akɔntaabuu lɛ he nii.—1 Samuel 3:13, 14; 4:11, 17, 18.
15. Mɛni hewɔ awo Maŋtsɛ Saul binuu Yonatan nyɔmɔ lɛ?
15 Maŋtsɛ Saul binuu Yonatan fee nɔkwɛmɔ nɔ ni yɔɔ sɔrɔto kwraa efɔ shi. Beni David gbe Goliat lɛ sɛɛ etsɛɛɛ ni “Yonatan tsui mɔ David,” ni amɛfee naanyobɔɔ he kpaŋmɔ. (1 Samuel 18:1, 3) Eeenyɛ eba akɛ Yonatan yɔse akɛ, Nyɔŋmɔ mumɔ lɛ eshi Saul, shi ekãa ni lɛ diɛŋtsɛ efeɔ kɛhãa anɔkwa jamɔ lɛ hi shi ni enaa baaa shi. (1 Samuel 16:14) Hiɛsɔɔ ni Yonatan yɔɔ kɛha hegbɛ ni Nyɔŋmɔ kɛha David lɛ hosooo gbi ko gbi ko. Yonatan yɔse ehe akɔntaa ni ebaabu eha Nyɔŋmɔ lɛ, ni Yehowa wo lɛ nyɔmɔ yɛ enifeemɔ ni woo yɔɔ mli lɛ hewɔ, ni ekwɛ koni ewekukpaa lɛ aya nɔ ahi shi yinɔi babaoo.—1 Kronika 8:33-40.
Akɔntaabuu yɛ Kristofoi Asafo lɛ Mli
16. Namɔ ji Tito, ni mɛni hewɔ abaanyɛ akɛɛ akɛ, ebu ehe akɔntaa kpakpa eha Nyɔŋmɔ?
16 Kristofoi a-Hela Ŋmalɛi lɛ wieɔ hii kɛ yei babaoo ni bu amɛhe akɔntaa kpakpa lɛ ahe ekpakpa. Akɛ nɔkwɛmɔ nɔ lɛ, Kristofonyo Helanyo ni atsɛɔ lɛ Tito lɛ yɛ. Asusuɔ akɛ ebatsɔ Kristofonyo yɛ Paulo klɛŋklɛŋ maŋsɛɛ sanekpakpa shiɛmɔ gbɛfãa ni kɛ lɛ tee Kipro lɛ mli. Akɛni ekolɛ Yudafoi kɛ mɛi ni amɛtsake kɛba Yuda jamɔ mli ni jɛ Kipro lɛ ba Yerusalem yɛ Pentekoste afi 33 Ŋ.B. hewɔ lɛ, ekolɛ Kristojamɔ yashɛ ŋshɔkpɔ lɛ nɔ yɛ no sɛɛ be fioo mli. (Bɔfoi lɛ Asaji 11:19) Kɛlɛ, Tito bafee Paulo nanemɛi nitsulɔi anɔkwafoi lɛ ateŋ mɔ kome. Efata Paulo kɛ Barnaba he kɛfa gbɛ kɛtee Yerusalem aaafee afi 49 Ŋ.B., beni ana ketiafoo he sane lɛ naa lɛ. Anɔkwale ni eji akɛ Tito efoko ketia lɛ maa Paulo naataamɔ akɛ, esaaa akɛ mɛi ni atsakeɔ amɛ kɛbaa Kristojamɔ mli lɛ hiɔ Mose Mla lɛ shishi lɛ nɔ mi. (Galatabii 2:1-3) Áye Tito sɔɔmɔ kpakpa lɛ he odase yɛ Ŋmalɛi lɛ amli, ni Paulo po ŋma wolo ni jɛ mumɔŋ eyaha lɛ. (2 Korintobii 7:6; Tito 1:1-4) Eyɛ faŋŋ akɛ, Tito tee nɔ ebu ehe akɔntaa kpakpa yɛ Nyɔŋmɔ hiɛ kɛyashi eshikpɔŋ nɔ sɔɔmɔ lɛ naagbee tɔ̃ɔ.
17. Mɛɛ akɔntaa Timoteo bu yɛ lɛ diɛŋtsɛ ehe, ni nɔkwɛmɔ nɔ nɛɛ baanyɛ asa wɔhe yɛ mɛɛ gbɛ nɔ?
17 Timoteo ji mɔ aŋkro ko ni yɔɔ ekãa waa ni bu ehe akɔntaa ni akpɛlɛɔ nɔ yɛ Yehowa Nyɔŋmɔ hiɛ. Eyɛ mli akɛ helai komɛi gbaa Timoteo naa moŋ, shi ejie ‘hemɔkɛyeli ni osato bɛ mli’ kpo, ni ‘ekɛ Paulo sɔmɔ yɛ sanekpakpa lɛ gbɛɛ-kɛ-shwamɔ mli.’ No hewɔ lɛ, bɔfo lɛ baanyɛ akɛɛ nanemɛi Kristofoi ni yɔɔ Filipi lɛ akɛ: “Mibɛ mɔ ko ni ejwɛŋmɔ kɛ mijwɛŋmɔ yeɔ egbɔ, ni nyɛhe sane dɔɔ lɛ krɔŋŋ tamɔ lɛ [Timoteo].” (2 Timoteo 1:5; Filipibii 2:20, 22; 1 Timoteo 5:23) Wɔ hu wɔbaanyɛ wɔna hemɔkɛyeli ni osato bɛ mli, ni wɔbaanyɛ wɔbu wɔhe akɔntaa yɛ nɔkpɛlɛmɔ mli yɛ Nyɔŋmɔ hiɛ, yɛ adesai agbɔjɔmɔi kɛ kaai krokomɛi ni wɔkɛkpeɔ lɛ amli.
18. Namɔ ji Lidia, ni mɛɛ mumɔ ejie lɛ kpo?
18 Lidia ji yoo ni sheɔ Nyɔŋmɔ gbeyei, ni eka shi faŋŋ akɛ ebu ehe akɔntaa kpakpa yɛ Nyɔŋmɔ hiɛ. Lɛ kɛ eshiabii fata klɛŋklɛŋ aŋkroaŋkroi ni yɔɔ Europa ni kpɛlɛ Kristojamɔ nɔ, yɛ Paulo nitsumɔ yɛ Filipi aaafee afi 50 Ŋ.B. hewɔ lɛ ahe. Ejɛ Tiatira, ni ekolɛ Lidia ji mɔ ni etsake kɛba Yuda jamɔ mli, ni ekolɛ Yudafoi fioo ko pɛ yɔɔ jɛmɛ, ni amɛbɛ kpeehe yɛ Filipi. Lɛ kɛ yei komɛi ni kɛ amɛhe eha Nyɔŋmɔ miikpe yɛ faa ko naa beni Paulo shiɛ etsɔɔ amɛ lɛ. Nɔ ni jɛ mli ba ji akɛ, Lidia batsɔ Kristofonyo, ni enyɛ̃ Paulo kɛ ehefatalɔi lɛ anɔ ni amɛkɛ lɛ ahi shi. (Bɔfoi lɛ Asaji 16:12-15) Gbɔfeemɔ ni Lidia jie lɛ kpo lɛ kã he eji anɔkwa Kristofoi akadimɔ nii.
19. Mɛɛ ejurɔfeemɔi anɔ Dorka tsɔ ekɛbu ehe akɔntaa kpakpa eha Nyɔŋmɔ?
19 Dorka ji yoo kroko ni bu ehe akɔntaa kpakpa eha Yehowa Nyɔŋmɔ. Beni egbo lɛ, Petro tee Yopa, yɛ kaselɔi ni yɔɔ jɛmɛ ni tsɛ lɛ lɛ hewɔ. Hii enyɔ ni kɛ Petro bakpe lɛ “kɛ lɛ tee ŋwɛitsu lɛŋ, ni yei okulafoi lɛ fɛɛ badamɔdamɔɔ emasɛi amɛmiifofoi, ni amɛkɛ flakai kɛ atadei ni Dorka fee, beni ekɛ amɛ yɔɔ lolo lɛ miitsɔɔ lɛ.” Akɛ Dorka ba wala mli ekoŋŋ. Shi, ani abaakai lɛ yɛ esuɔmɔ kɛ ejurɔfeemɔ mumɔ lɛ titri hewɔ? Dabi. Eji “kaselɔ” ni eji anɔkwale akɛ, lɛ diɛŋtsɛ lɛ ekɛ ehe wo kaselɔ-feemɔ nitsumɔ lɛ mli. Ŋmɛnɛ, Kristofoi yei hu ‘eyimɔ obɔbɔ kɛ ejurɔfeemɔ kɛ mɔbɔnalɛ nikeei.’ Amɛ hu amɛyɛ miishɛɛ akɛ, amɛkɛ ekãa aaana Maŋtsɛyeli lɛ he sanekpakpa lɛ jajemɔ kɛ kaselɔi afeemɔ nitsumɔ lɛ mli gbɛfaŋnɔ.—Bɔfoi lɛ Asaji 9:36-42; Mateo 24:14; 28:19, 20.
20. Mɛɛ saji wɔbaanyɛ wɔbi wɔ diɛŋtsɛ wɔhe?
20 Biblia lɛ tsɔɔ yɛ faŋŋ mli akɛ, esa akɛ jeŋmaji kɛ aŋkroaŋkroi abu amɛhe akɔntaa amɛha Nuntsɔ Maŋtsɛ Yehowa. (Zefania 1:7) Kɛ wɔjɔɔ wɔhe nɔ wɔha Nyɔŋmɔ lɛ, no lɛ wɔbaanyɛ wɔbi wɔ diɛŋtsɛ wɔhe akɛ, ‘Te mibuɔ hegbɛi kɛ gbɛnaa nii ni Nyɔŋmɔ kɛha mi lɛ mihaa tɛŋŋ? Mɛɛ mihe akɔntaa mibuɔ mihaa Yehowa Nyɔŋmɔ kɛ Yesu Kristo?’
Mɛni Ji Ohetooi?
◻ Mɛɛ gbɛ nɔ oootsɔ otsɔɔ yɛ akɛ, ŋwɛibɔfoi kɛ Nyɔŋmɔ Bi lɛ buɔ amɛhe akɔntaa amɛhaa Yehowa?
◻ Mɛɛ Biblia mli nɔkwɛmɔ nii yɔɔ ni tsɔɔ akɛ Nyɔŋmɔ haa jeŋmaji lɛ buɔ amɛhe akɔntaa?
◻ Mɛni Biblia lɛ wieɔ yɛ mɔ diɛŋtsɛ he akɔntaa ni ebaabu eha Nyɔŋmɔ lɛ he?
◻ Namɛi ji aŋkroaŋkroi komɛi ni Biblia lɛ wieɔ amɛhe, ni bu amɛhe akɔntaa kpakpa amɛha Yehowa Nyɔŋmɔ?
[Mfoniri ni yɔɔ baafa 10]
Yesu Kristo bu ehe akɔntaa kpakpa eha eŋwɛi Tsɛ lɛ
[Mfoniri ni yɔɔ baafa 15]
Taakɛ Dorka ji lɛ, ŋmɛnɛŋmɛɛ Kristofoi yei buɔ amɛhe akɔntaa kpakpa amɛhaa Yehowa Nyɔŋmɔ
[He ni Mfoniri ni yɔɔ baafa 13 lɛ Jɛ]
Habel gbele/The Doré Bible Illustrations/Dover Publications, Inc.