Maŋtsɛyeli Jajelɔi Bɔ Amaniɛ

Aaya nɔ Aashiɛ Biblia Mli Anɔkwalei lɛ yɛ Ireland

BASABASA feemɔi etee nɔ saŋŋ yɛ Ireland maŋ ni mli yɔɔ fɛo lɛ mli yɛ nyɛsɛɛ afii fioo nɛɛ amli. Yɛ nakai beaŋ nɔŋŋ lɛ, Irelandbii kɛ miishɛɛ ehere Biblia mli sane ni haa mɔ hiɛnɔkamɔ, ni Yehowa Odasefoi kɛhaa amɛ lɛ nɔ. Niiashikpamɔi ni nyiɛ sɛɛ, ni jɛ Ireland lɛ yeɔ enɛ he odase.

■ Yehowa Odasefoi ni yɔɔ Dublin lɛ ateŋ mɔ kome kɛ ebiyoo fioo kɛ amɛhe miiwo shia-kɛ-shia shiɛmɔ nitsumɔ lɛ mli. Amɛkɛ yoo ko ni atsɛɔ lɛ Cathy, ni ebii babaoo lɛ akwɛmɔ haaa ena deka kwraa lɛ kpe. Odasefonyo lɛ kɛɛ lɛ akɛ, ebaasumɔ ni ebiyoo, ni miikase shiɛmɔ lɛ kɛ shɛɛ sane kuku ko aha lɛ. Cathy kpɛlɛ nɔ, ni gbekɛyoo fioo lɛ kɛ shiɛmɔ wiemɔ ni mli kã shi faŋŋ, ni esaa lɛ jogbaŋŋ lɛ ha lɛ. Cathy na anɔkwayeli kɛ bulɛ ni gbekɛyoo lɛ kɛwie lɛ he miishɛɛ waa, ni ehe Biblia mli dɛhiɛmɔ wolo ni eshĩ eha lɛ lɛ.

Sɛɛ mli lɛ, Cathy susu bɔ ni gbekɛyoo ni ba eŋɔɔ nɛɛ saa ehe kɛ ejeŋba kpakpa lɛ he. Ekɛɛ: “Mina he miishɛɛ waa akɛ gbekɛyoo bibioo nɛɛ nyɛ ekɛ mi wie wiemɔ ni yɔɔ miishɛɛ nakai ni egbalaaa jwɛŋmɔ kɛbaaa lɛ diɛŋtsɛ enɔ. Mikpɛ miyiŋ akɛ be kroko ni Yehowa Odasefoi baaba miŋɔɔ ekoŋŋ lɛ, mabo amɛ toi.”

Yɛ nakai beaŋ lɛ, Cathy fã kɛyahi maŋ bibioo ko mli yɛ Ireland wuoyi-anaigbɛ, yɛ Cork kɛ Kerry kpokpai lɛ ahusui lɛ amasɛi. Be ko sɛɛ lɛ, Yehowa Odasefoi yatswa eshinaa lɛ, ni eha amɛba mli. Ekpɛlɛ nɔ akɛ akɛ lɛ afee Biblia mli nikasemɔ daa, ni amrɔ nɛɛ ekɛ ebii lɛ ateŋ mɛi babaoo yaa asafoŋ kpeei. Cathy hiɛ esɔ mɔdɛŋ diɛŋtsɛ ni gbekɛyoo fioo lɛ bɔ ákɛ eeeshiɛ sanekpakpa lɛ etsɔɔ lɛ lɛ waa.

■ Odasefoi kɛ yoo ko ni atsɛɔ lɛ Jean ná Biblia mli sanegbaa yɛ Tullamore kpokpaa lɛ nɔ, nɔ ni fe afii kpawo sɔŋŋ. Bei komɛi lɛ, enaa wiemɔ lɛ he miishɛɛ ni eheɔ woji, shi bei krokomɛi hu shɛɔ ni emiishɛɛ baa shi kwraa. Gbi ko, beni Odasefonyo ko ni atsɛɔ lɛ Frances kɛ ehefatalɔ ko tee Jean ŋɔɔ lɛ, amɛna akɛ ebɛ wiemɔ lɛ he miishɛɛ kwraa. “Nɔ fɛɛ nɔ ni wɔkɛɛ lɛ lɛ kɔɔɔ he eko,” taakɛ Odasefonyo lɛ bɔ amaniɛ lɛ, “emlifu lɛ tee nɔ emli wa moŋ. Yɛ naagbee lɛ, ekɛ mlifu kɛɛ wɔ akɛ wɔshi ehiɛ ni wɔya, ni eŋa shinaa lɛ waa ewo wɔyi.”

Frances susu akɛ kɛ atee eŋɔɔ ekoŋŋ lɛ, ebaafee amɛ tamɔ bɔ ni efee amɛ lɛ nɔŋŋ. ‘Ekolɛ ehe ehiaaa ni wɔya eŋɔɔ dɔŋŋ kɛji ebɛ wiemɔ lɛ he miishɛɛ lɛlɛŋ,’ taakɛ Frances susu lɛ. Shi kɛlɛ, ekɛ ewu, Thomas, susu sane lɛ he, ni nuu lɛ ye ebua lɛ waa. Be kroko ni amɛtee nakai akutso lɛ mli lɛ, amɛsaa amɛtee Jean ŋɔɔ ekoŋŋ. Ekɛ miishɛɛ bo amɛ toi ni ehe Buu-Mɔɔ kɛ Awake! woji tɛtrɛbii lɛ eko. Ejie miishɛɛ ni tamɔ nakai kpo yɛ bei krokomɛi ni atee eŋɔɔ lɛ amli, ni Thomas kɛ Frances kɛ lɛ je daa shia Biblia mli nikasemɔ shishi.

Mɛni hewɔ tsakemɔ lɛ ba? Jean tsɔɔ mli akɛ, beni ekɛ mlifu shwie Odasefoi lɛ, no mli lɛ efɔ, ni ajie lɛ kɛjɛ helatsamɔ he lɛ kɛba shia etsɛko. Ebi ŋmɔŋ lɛ fufɔ-hamɔ kɛ ebi fioo lɛ hu ni ekɛ awale woɔ enaa lɛ hewɔ lɛ, ŋmɛlɛtswaa kome kɛ fã pɛ enaa ekɛwɔɔ nyɔɔŋ. “Nɔ ni mitaooo kwraa fe fɛɛ,” taakɛ Jean kɛɛ lɛ, “ji ni akɛ mi abawie jamɔ he sane.”

Beni shɛɔ nyɔji enyɔ lɛ, Jean miiya asafoŋ kpeei fɛɛ, ni aaafee nyɔji ejwɛ sɛɛ lɛ, ekɛ ehe ebɔi shiɛmɔ nitsumɔ lɛ mli woo. Beni eje e-Biblia kasemɔ lɛ shishi lɛ sɛɛ nyɔji nyɔŋma lɛ, abaptisi lɛ. Amrɔ nɛɛ, Jean diɛŋtsɛ niiashikpamɔ nɛɛ yeɔ ebuaa lɛ yɛ shiɛmɔ nitsumɔ lɛ mli. Egba akɛ: “Kɛ mikɛ mɔ ko kpe ni ekɛ mlifu bolɔ ewo mi lɛ, mibɔɔ mɔdɛŋ akɛ manu lɛ shishi. Mikadiɔ enɛ be fɛɛ be. Ekolɛ beni maku misɛɛ be kroko lɛ, no mli lɛ shihilɛ lɛ baatsake; ekolɛ mɔ lɛ ena miishɛɛ ni ebaasumɔ ni ebo toi.”