Babaoo Heŋmɛɛmɔ Kɛha Nɔ ko Wulu

TAAKƐ JULIUS OWO BELLO GBA

Mikɛ afii 32 sɔŋŋ tee Aladura sɔlemɔ lɛ.a Mihe miye akɛ hemɔkɛyeli tsamɔ kɛ sɔlemɔi baaha mana minaagbai fɛɛ anaa tsabaa ni ebaatsa helai fɛɛ hu. Miheee tsofa ko kwraa, tsofai ni jɔɔ piŋmɔ he lɛ eko po. Nakai afii lɛ amli fɛɛ lɛ, atsiii miweku lɛ mli nyo ko kwraa naa yɛ helatsamɔ he. Be fɛɛ be ni mibii lɛ eko he baaye lɛ, misɔleɔ mihaa amɛ nyɔɔŋ kɛ shwane aahu kɛyashiɔ be mli ni amɛnaa hewalɛ. Mihe miye akɛ Nyɔŋmɔ miiha misɔlemɔi lɛ ahetoo ni eejɔɔ mi.

MIFATA Egbe Jolly, ni ji naanyobɔɔ kuu ko ni ale waa yɛ Nigeria anaigbɛ maŋ ni atsɛɔ lɛ Akure mli lɛ he. Niiatsɛmɛi fe fɛɛ kɛ mɛi ni yɔɔ hewalɛ waa yɛ wɔmaŋ lɛ mli lɛ ji minanemɛi. Bei pii lɛ, Deji, ni ji Akure maŋtsɛ lɛ, basaraa mi yɛ shia.

Mikɛ yei pii ehi shi, ni miyɛ ŋamɛi ekpaa kɛ hemɛi babaoo. Minitsumɔ shwere waa. Nɔ fɛɛ nɔ miiya nɔ jogbaŋŋ kɛha mi. Ni kɛlɛ, taakɛ guɔyelɔ gbɛfalɔ ni yɔɔ Yesu abɛbua ni kɔɔ adiagba ko he lɛ mli lɛ ji lɛ, mina nɔ ko ni jara wa aahu akɛ miŋmɛɛ miŋamɛi lɛ ateŋ mɛi enumɔ, mihemɛi lɛ, sɔlemɔ lɛ, naanyobɔɔ kuu lɛ, kɛ gbɛi ni miná yɛ je lɛŋ lɛ he ni mikɛtsake no.—Mateo 13:45, 46.

Bɔ ni Fee ni Mibɔi Aladura Sɔlemɔ lɛ Yaa

Minu Aladura sɔlemɔ lɛ he klɛŋklɛŋ kwraa yɛ 1936 mli, beni miye afii 13. Minaanyo ko ni atsɛɔ lɛ Gabriel kɛɛ mi akɛ: “Kɛ otee Kristo Apostolik Sɔlemɔ lɛ, obaanu ni Nyɔŋmɔ miiwie.”

Mibi lɛ akɛ: “Mɛɛ gbɛ nɔ Nyɔŋmɔ tsɔɔ ewieɔ?”

Ni ekɛɛ: “Ba, ni obaana.”

Miishwe ni mabo Nyɔŋmɔ toi. No hewɔ lɛ, mikɛ Gabriel tee sɔlemɔ lɛ nakai gbɛkɛ lɛ. Tsu bibioo lɛ eyi obɔ kɛ jálɔi. Mɛi ni eba sɔlemɔ lɛ bɔi lamɔ akɛ: “Nyɛbaa, nyɛ gbɔmɛi! Biɛ ji he ni Yesu yɔɔ!”

Beni amɛlaa lala nɛɛ, mɔ ko bo waa akɛ: “Mumɔ krɔŋkrɔŋ, kpelekemɔ shi kɛba!” Mɔ kroko hu tswa ŋmɛlɛ, kɛkɛ ni asafo muu lɛ fɛɛ fee dioo. No sɛɛ lɛ, yoo ko bɔi lilɛi sɔrɔto ko wiemɔ oyayaayai kɛ mlifilimɔ, ni anuuu shishi. Kɛkɛ ni ebo waa shikome akɛ: “Nyɛboa Nyɔŋmɔ shɛɛ sane lɛ toi, Oo nyɛ gbɔmɛi! Bɔ ni Nyɔŋmɔ kɛɛ nɛ: ‘Nyɛsɔlea nyɛhaa gbɔbilɔi lɛ koni amɛkagbe gbɔmɛi adesai!’ ” Tsu lɛ mli fɛɛ yi obɔ kɛ hoofeemɔ kɛ henumɔi akpojiemɔ.

Mihe miye akɛ Nyɔŋmɔ ewie kɛtsɔ yoo lɛ nɔ, no hewɔ lɛ abaptisi mi akɛ Kristo Apostolik Sɔlemɔ lɛ mli nyo yɛ afi ni nyiɛ sɛɛ lɛ mli.

Mra Be Mli Sharamɔ ni Mikɛ Yehowa Odasefoi Ná

Yɛ 1951 mli lɛ, mihe Buu-Mɔɔ wolo tɛtrɛɛ lɛ ekome kɛjɛ Odasefonyo ko ni atsɛɔ lɛ Adedeji Boboye dɛŋ. Wolo tɛtrɛɛ lɛ mli saji yɛ miishɛɛ waa, no hewɔ lɛ mishɛ eko, ni mikaneɔ daa. Yɛ 1952 mli lɛ, mitee gbii ejwɛ kpokpaa wulu nɔ kpee ni Yehowa Odasefoi fee yɛ Ado Ekiti lɛ eko.

Nɔ ni mina yɛ kpee lɛ shishi lɛ fee mi miishɛɛ waa. Mikɛ hiɛdɔɔ susu he jogbaŋŋ akɛ matsɔ Yehowa Odasefoi lɛ ateŋ mɔ kome, shi mitswa susumɔ lɛ mifɔ̃. Minaagba ji akɛ, miyɛ ŋamɛi etɛ kɛ hemɔ kome yɛ nakai beaŋ. Misusu akɛ minyɛŋ mikɛ ŋa kome pɛ ahi shi kɔkɔɔkɔ.

Beni miku misɛɛ kɛtee Akure lɛ, mikɛɛ Adedeji akɛ ekabasara mi dɔŋŋ, ni mishɛɛɛ Buu-Mɔɔ lɛ dɔŋŋ beni nɔ ni mishɛ lɛ tã lɛ. Mikɛ mihe wo misɔlemɔ lɛ mli waa. Ejaakɛ, misusu akɛ, kɛjɛ be mli ni mibɔi Kristo Apostolik Sɔlemɔ lɛ yaa lɛ, Nyɔŋmɔ ejɔɔ mi waa. Mina ŋamɛi etɛ ni mifɔ bii babaoo. Mima mi diɛŋtsɛ mishia. Atsĩko minaa yɛ helatsamɔ he dã. Akɛni etamɔ nɔ ni Nyɔŋmɔ hãa misɔlemɔi ahetoo hewɔ lɛ, mɛni hewɔ esa akɛ matsake mijamɔ?

Mibaná Gbɛi Waa Kɛfata Yiŋfutumɔ He

Mikɛ shika babaoo bɔi tooyeli kɛha sɔlemɔ lɛ. Etsɛɛɛ kɛkɛ ni amɛfee mi sɔlemɔ lɛ mli onukpa, ni ji gbɛhe ko ni ha mibale nibii diɛŋtsɛ ni yaa nɔ yɛ sɔlemɔ lɛ mli. Nɔ ni mina lɛ hao mi waa. Osɔfo lɛ kɛ “gbalɔi” lɛ sumɔɔ shika; amɛ hiɛjoomɔ lɛ ha mihe jɔ̃ mihe.

Akɛ nɔkwɛmɔ nɔ lɛ, yɛ March 1967 mli lɛ, miŋamɛi sɔrɔtoi lɛ fɔ bii etɛ amɛha mi. Kusum ni yɔɔ sɔlemɔ lɛ mli ji akɛ, esa akɛ awo gbekɛbii lɛ agbɛi. No hewɔ lɛ mikɛ nikeenii—ŋshɔŋ loo, abonua dãa, kɛ tɔ mli dãai ni etɔɔɔ mɔ—yahã osɔfo lɛ koni akɛto nifeemɔ lɛ he gbɛjianɔ.

Ní gbi lɛ shɛ ni afeɔ sɔlemɔ lɛ, osɔfo lɛ wie yɛ asafo muu lɛ fɛɛ hiɛ akɛ: “Niiatsɛmɛi ni yɔɔ sɔlemɔ nɛɛ mli lɛ eha minaa ekpɛ mihe waa. Amɛmiitao ni awo amɛbii agbɛi aha amɛ, shi nɔ ni amɛkɛba pɛ ji dãa ni etɔɔɔ mɔ kɛ ŋshɔŋ loo. Tsina loo fataaa he! Too fataaa he! Nyɛ diɛŋtsɛ nyɛkwɛa! Kain kɛ yɛlɛ wuji yashã afɔle eha Nyɔŋmɔ, shi Nyɔŋmɔ ekpɛlɛɛɛ nakai afɔleshaa lɛ nɔ ejaakɛ lá bɛ mli. Nyɔŋmɔ miitao nibii ni lá yɔɔ mli. Habel kɛ kooloo ba, ni akpɛlɛ efɔleshaa lɛ nɔ.”

Ni ewie enɛ pɛ, kɛkɛ ni mite shi ni mikɛ mlifu je kpo. Shi kɛlɛ, mikã he mitee sɔlemɔ lɛ lolo. Mitee nɔ mikɛ be babaoo wo naanyobɔɔi kɛ mikuu lɛ kpeeiyaa mli. Bei komɛi lɛ, miyaa kpeei yɛ Maŋtsɛyeli Asa lɛ nɔ, ni misaa mishɛ Buu-Mɔɔ lɛ ekoŋŋ. Shi enɛ fɛɛ sɛɛ lɛ, mifeko klalo lolo akɛ matsɔ Yehowa Odasefoi ateŋ mɔ kome.

Miyiŋ ni Mikpɛ akɛ Masɔmɔ Yehowa

Tsakemɔ be krɛdɛɛ yɛ mishihilɛ mli lɛ ba yɛ 1968 mli. Gbi ko lɛ, mibɔi sane ko kanemɔ yɛ Buu-Mɔɔ lɛ mli, ní miiwie yiwaa ni naa wa waa ni akɛba Yehowa Odasefoi anɔ yɛ Malawi lɛ he. Etsɔɔ bɔ ni afĩ gbekɛ yoo ko ni eye afii 15 akpɛtɛ tso he ni ato lɛ kaabonaa shii ekpaa akɛni eŋmɛɛɛ ehemɔkɛyeli lɛ he ni akɛsaa lɛ hewɔ. Mihe ni jɔ̃ mihe sɔŋŋ hewɔ lɛ, miŋmɛɛ wolo tɛtrɛɛ lɛ he mifɔ̃ shi, shi mitee nɔ misusu he. Miyoo akɛ gbekɛ yoo ko bɛ misɔlemɔ lɛ mli ni baajie hemɔkɛyeli ni tamɔ nɛkɛ kpo. Sɛɛ mli yɛ nakai gbɛkɛ lɛ, mikɔ wolo tɛtrɛɛ lɛ ni mikane nakai baafa lɛ ekoŋŋ.

Mikɛ hiɛdɔɔ bɔi Biblia lɛ kasemɔ. Beni miyaa hiɛ yɛ nilee mli lɛ, mibɔi bɔ ni sɔlemɔ lɛ elaka wɔ aahu lɛ yɔsemɔ. Taakɛ eji anɔkwale yɛ blema beaŋ lɛ, nakai nɔŋŋ wɔ osɔfoi lɛ hu ‘tsuuu nɔ ko fe nishaianii pɛ kɛkɛ.’ (Hoshea 6:9) Gbɔmɛi ni tamɔ nɛkɛ fata amale gbalɔi ni Yesu bɔ kɔkɔ yɛ amɛhe lɛ ahe! (Mateo 24:24) Miheee amɛ ninaai kɛ hewalɛ nitsumɔ lɛ miyeee dɔŋŋ. Mikpɛ miyiŋ akɛ matsi mihe kwraa kɛjɛ apasa jamɔ he, ni maye mabua mɛi krokomɛi hu ni amɛfee nakai.

Mɔdɛŋ ni Abɔɔ ni Ahã Mahi Sɔlemɔ lɛ Mli

Beni sɔlemɔ lɛ mli onukpai lɛ na akɛ mikpɛ miyiŋ akɛ mashi sɔlemɔ lɛ, amɛtsu mɛi kɛba miŋɔɔ koni amɛbakpa mi fai. Amɛsumɔɔɔ ni shika jɛɛhe ni he hiaa tamɔ nɛkɛ aje amɛdɛŋ. Amɛkɛɛ mi akɛ amɛbaafee mi Baba Egbe, ni ji Kristo Apostolik sɔlemɔi ni yɔɔ Akure lɛ ekome nɔkwɛlɔ.

Mikpɛlɛɛɛ gbɛhe ni amɛhaa mi nɛɛ nɔ, ni mikɛɛ amɛ nɔ hewɔ. Miwie akɛ: “Sɔlemɔ lɛ elaka wɔ aahu. Amɛkɛɔ akɛ gbɔmɛi kpakpai fɛɛ baaya ŋwɛi. Shi mikane Biblia lɛ, ni miná nɔmimaa diɛŋtsɛ akɛ gbɔmɛi 144,000 pɛ baaya ŋwɛi. Gbɔmɛi krokomɛi ni ji jalɔi lɛ baahi paradeiso shikpɔŋ nɔ.”—Mateo 5:5; Kpojiemɔ 14:1, 3.

Sɔlemɔ lɛ osɔfo lɛ bɔ mɔdɛŋ akɛ ebaaha miŋamɛi lɛ ate shi awo mi. Ekɛɛ amɛ akɛ amɛkahã Yehowa Odasefoi ba wɔshia lɛ. Miŋamɛi lɛ ekome kɛ ebɔɔ wo miniyenii mli. Amɛteŋ mɛi enyɔ hu bɔ mi kɔkɔ yɛ ninaa ko ni amɛna yɛ sɔlemɔ lɛ mli lɛ he. Ninaa lɛ tsɔɔ akɛ kɛ mishi sɔlemɔ lɛ, magbo. Yɛ nibii nɛɛ fɛɛ sɛɛ lɛ, mitee nɔ miye miŋamɛi lɛ odase, ni mifɔ̃ɔ amɛ nine ni amɛfata mihe kɛya kpeei. Mikɛɛ: “Nyɛbaana wumɛi krokomɛi yɛ jɛmɛ.” Shi kɛlɛ, amɛteŋ mɔ ko kwraa ejieee miishɛɛ kpo, ni amɛtee nɔ amɛbɔ mɔdɛŋ akɛ amɛbaaha minijiaŋ aje wui.

Yɛ naagbee lɛ, yɛ February 2, 1970, beni miku misɛɛ kɛjɛ maŋ ko ni bɛŋkɛ wɔ lɛ nɔ kɛba lɛ, mibanina mishia lɛ efolo. Miŋamɛi lɛ fɛɛ kɛ gbekɛbii lɛ ejo foi kɛtee.

Ŋa Kome Pɛ kɛ Shihilɛ

‘Agbɛnɛ manyɛ majaje migbalashihilɛ lɛ,’ taakɛ misusu lɛ. Mifɔ̃ miŋa nukpa, Janet nine akɛ eku esɛɛ kɛba shia lɛ. Ekpɛlɛ nɔ. Shi, ewekumɛi te shi amɛwo susumɔ nɛɛ waa diɛŋtsɛ. Beni miŋamɛi krokomɛi lɛ nu he akɛ mikɛɛ Janet akɛ eku esɛɛ kɛba lɛ, amɛtee etsɛ shia lɛ ni amɛyaka akɛ amɛbaayi lɛ. Kɛkɛ ni ewekumɛi tsɛ mi kpee.

Gbɔmɛi aaashɛ 80 ba kpee lɛ eko. Janet tsɛkwɛ̃, ni ji weku yitso lɛ, wie akɛ: “Kɛ ootao ni okɛ wɔbiyoo lɛ ahi shi ekoŋŋ lɛ, no lɛ esa akɛ ohã yei krokomɛi lɛ fɛɛ aku amɛsɛɛ kɛba. Shi kɛji akɛ oosumɔ ni okɛ ohe awo ojamɔ hee lɛ mli nifeemɔi amli, ni okɛ ŋa kome ahi shi lɛ, no lɛ esa akɛ oyatao yoo kroko. Kɛ́ ohã Janet ku esɛɛ ekɛ bo bahi shi lɛ, oŋamɛi krokomɛi lɛ baagbe lɛ, ni wɔsumɔɔɔ ni wɔbiyoo lɛ agbo.”

Yɛ wiemɔ babaoo sɛɛ lɛ, weku lɛ na akɛ mitswa mifai shi akɛ mikɛ ŋa kome pɛ baahi shi. Yɛ naagbee lɛ, amɛŋmɛɛ sane lɛ he. Tsɛkwɛ̃ lɛ wie akɛ: “Wɔheŋ oŋa lɛ yɛ odɛŋ. Obaanyɛ okɛ lɛ aya.”

Yɛ May 21, 1970 lɛ, mikɛ Janet bote gbalashihilɛ mli yɛ mla naa. Gbii nɛɛhu sɛɛ lɛ, abaptisi mi akɛ Yehowa Odasefoi ateŋ mɔ kome. Abaptisi Janet hu yɛ December, yɛ nakai afi lɛ nɔŋŋ mli.

Yehowa Jɔɔmɔi Amli Ŋɔɔmɔ Namɔ

Wɔ tsutsu sɔlemɔ lɛ mli bii lɛ egba akɛ kɛ wɔtsɔmɔ Odasefoi lɛ, wɔbaagboi. Amɛgba enɛ aaafee afii 30 ni eho nɛ. Kɛji migbo bianɛ po lɛ, ani eeefee akɛ ejɛ Yehowa Odasefoi ateŋ mɔ kome ni mibatsɔ lɛ hewɔ? Kɛ miŋa gbo bianɛ lɛ, ani mɔ ko baanyɛ akɛɛ akɛ ejɛ Yehowa Odasefoi ateŋ mɔ ko ni ebatsɔ lɛ hewɔ?

Mibɔ mɔdɛŋ waa akɛ matsɔɔ mibii 17 lɛ anɔkwale gbɛ lɛ. Eyɛ mli akɛ amɛteŋ mɛi pii edara momo beni mibatsɔ Odasefonyo lɛ moŋ, shi miwo amɛ hewalɛ ni amɛkase Biblia lɛ, ni mikɛ amɛ tee asafoŋ kpeei kɛ kpeei wuji. Eŋɔɔ minaa waa akɛ mina amɛteŋ mɛi enumɔ ni kɛ mi miisɔmɔ Yehowa. Mɔ kome fata mihe kɛmiisɔmɔ akɛ onukpa yɛ asafo lɛ mli. Mɔ kroko hu miisɔmɔ akɛ asafoŋ sɔɔlɔ yɛ asafo ko ni bɛŋkɛ wɔ lɛ mli. Mibii lɛ ateŋ mɛi enyɔ miisɔmɔ akɛ daa gbɛgbalɔi.

Kɛ misusu be ni eho lɛ he lɛ, minaa kpɛɔ mihe yɛ Yehowa mlihilɛ ni misaaa, ni ekɛye ebua mi mibatsɔ etsulɔ lɛ he. Kwɛ bɔ ni Yesu wiemɔi nɛɛ ji anɔkwale hã, akɛ: “Mɔ ko nyɛŋ aba miŋɔɔ akɛ ja Tsɛ lɛ, ni tsu mi lɛ, gbala lɛ dã”!—Yohane 6:44, NW.

[Shishigbɛ niŋmai]