‘Mɛi Babaoo ni Ona Amɛshihilɛ nɔ Hewalɛ lɛ Ateŋ Mɔ Kome Pɛ’

JANUARY 1996 ni ho lɛ, Carol he baye kɛ aŋsɔ fuumɔ hela. No mli lɛ eye fe afii 60, ni kɛbashi nakai beaŋ lɛ, eji yoo ni yɔɔ miishɛɛ, kɛ hewalɛ kpɛŋŋ diɛŋtsɛ, ni ekɛ hewalɛwoo wiemɔ haa mɔ fɛɛ mɔ. Shi amrɔ nɛɛ datrɛfoi miibɔ mɔdɛŋ ni amɛye fuumɔ hela ni gbeɔ mɔ nɛɛ nɔ kunim. Carol nine shɛ wolo ni nyiɛ sɛɛ nɛɛ nɔ, beni epeleɔ ehe lɛ:

“Suɔmɔ Carol:

“Edɔ mi waa yɛ ogbɔmɔtsoŋ hewalɛ ni baa shi lɛ hewɔ. Heniianaa lɛ, wɔyɛ hiɛnɔkamɔ diɛŋtsɛ ni Biblia lɛ yeɔ ebuaa wɔ ni wɔleɔ ni wɔsumɔɔ hu lɛ. Hiɛnɔkamɔ nɛɛ ji akɛ, Yehowa Maŋtsɛyeli lɛ baaye shikpɔŋ lɛ nɔ, bɔni afee ni wɔnyɛ wɔhi paradeiso shihilɛ mli, ni ji be ko ni wɔ fɛɛ wɔkpaa lɛ gbɛ lɛ.

“Miisumɔ ni ole akɛ bo diɛŋtsɛ oshiɛmɔ nitsumɔ ni otsu lɛ ehere mɛi pii ayiwala kɛjɛ naanɔ gbele mli. Miji nɛkɛ gbɔmɛi nɛɛ ateŋ mɔ kome. Miheee miyeee akɛ okaiɔ klɛŋklɛŋ be ni wɔkpe lɛ. No mli lɛ miye afii 20. Miyiteŋ tsɔi kɛ kakadaŋŋ, ni mihɔ̃ɔ tsofai fɔji, ni mikɛ awuiyelɔi akuu ko yaa-kɛ-baa ni wɔleee nɔ ni wɔfeɔ. Wɔ fɛɛ wɔhiɛ tui, ni wɔbɛ suɔmɔ diɛŋtsɛ kɛha mɔ ko, ja wɔ diɛŋtsɛ wɔhe pɛ.

“Okɛ Odasefonyo kroko ni fata ohe lɛ batswa mishinaa lɛ, ni nyɛkɛ Buu-Mɔɔ kɛ Awake! lɛ eko ha mi. Mika akɛ mahã nyɛ dɔla kome, ni mikɛɛ nyɛ akɛ misumɔɔɔ woji tɛtrɛbii lɛ. Ohã mile akɛ jeee tooyeli taomɔ hewɔ titri nyɛshiɛɔ lɛ. Okɛɛ mi akɛ nyɛmiitsu nitsumɔ ko ni nyɛkɛye nyɛbua gbɔmɛi koni amɛkane Biblia lɛ. Mikpaaa shi akɛ mihe woji tɛtrɛbii lɛ aloo mikane. Shi kɛlɛ, odũ anɔkwa dumɔwu lɛ yɛ mishihilɛ mli.

“Afii komɛi asɛɛ lɛ, Odasefonyo kroko, Gary, ba minyɛ shia lɛ yɛ be mli ni miyɔɔ jɛmɛ lɛ. Migba lɛ saramɔ ni obasara mi be ko lɛ he sane. Gary kɛ mi kase Biblia lɛ be kakadaŋŋ kɛyashi naagbee lɛ abaptisi mi yɛ 1984 mli. Amrɔ nɛɛ miitsɔɔ mibii lɛ anɔkwale ni kɔɔ Nyɔŋmɔ Maŋtsɛyeli lɛ he lɛ.

“Miheɔ miyeɔ akɛ miji mɛi babaoo ni ona amɛshihilɛ nɔ hewalɛ yɛ afii ni okɛsɔmɔ yɛ anɔkwayeli mli lɛ ateŋ mɔ kome pɛ. Shi, kɛtsɔ suɔmɔ kɛ mlihilɛ nɛɛ nɔ lɛ, oye obua mi kɛ miweku lɛ ni wɔbaná wɔle Nyɔŋmɔ Kpeteŋkpele lɛ, Yehowa, kɛ e-Bi, Kristo Yesu. Miikpa gbi ni manyɛ mana bo yɛ nibii agbɛjianɔtoo hee lɛ mli, beni Yehowa baatsumɔ wɔhiɛaŋ yaafonui fɛɛ, ni gbele bɛ dɔŋŋ lɛ gbɛ waa diɛŋtsɛ.—Kpojiemɔ 21:4.

“Yɛ mi kɛ miweku lɛ gbɛfaŋ lɛ, eŋɔɔ wɔnaa waa akɛ wɔna hegbɛ ni wɔle bo, ni wɔfata odaseyeli nitsumɔ ni otsuɔ lɛ he. Oyiwaladɔŋŋ.

“Kɛ nyɛmimɛi asuɔmɔ,

Peter”

Yɛ hela ni ye lɛ nyɔji ekpaa sɛɛ lɛ, Carol gbo yɛ March 1996 mli, yɛ be mli ni edũ anɔkwale dumɔwui babaoo yɛ afii 35 ni ekɛtsu nii akɛ sanekpakpa shiɛlɔ ni yɔɔ ekaa lɛ sɛɛ. Ekase akɛ mɔ ko leee be mli ni dumɔwu ko baawo yibii, kɛji ekolɛ afii babaoo sɛɛ po.—Mateo 13:23.