Kwɛmɔ jogbaŋŋ ni Okaná Nifeemɔi Ahe Jwɛŋmɔ Fɔŋ
TƐLIVISHIN nɔ shiɛlɔ ko ni ale lɛ waa gbe naanyo shiɛlɔ ko he guɔ waa akɛ éfite gbala. Shi, yɛ afi mli lɛ, amɔ̃ shiɛlɔ naafolɔlɔ lɛ kɛ yoo ajwamaŋ ko.
Yɛ sane kroko mli lɛ, jeŋ hewalɛ ko ni ale waa tsu najiaŋdamɔlɔi koni amɛyaha toiŋjɔlɛ aba kui ni kɛ amɛhe wuɔ ta lɛ ateŋ. Beni enɛ yaa nɔ lɛ, nakai maŋ lɛ nɔŋŋ tsu etawuu nii ahɔ̃ɔlɔi amrɔ nɔŋŋ yɛ teemɔŋ kɛtee maŋsɛɛ maji anɔ koni amɛyahɔ̃ɔ tawuu nibii ni jara shɛɔ dɔlai akpekpei toi akpei abɔ.
Akɛni osato ni afeɔ yɛ faŋŋ mli egbɛ eshwã waa hewɔ lɛ, ani eyɛ naakpɛɛ akɛ yiŋkɔshikɔshifeemɔ ejie hekɛnɔfɔɔ kɛtee kwraa? Yɛ mɛi pii agbɛfaŋ lɛ, sane ni amɛbiɔ yɛ mɛi krokomɛi anifeemɔi ahe lɛ ebatsɔ amɛsubaŋ.
Akɛ Kristofoi lɛ, esa akɛ wɔkwɛ jogbaŋŋ koni wɔkaha subaŋi ni tamɔ nɛkɛ sa wekukpaa ni kã wɔ kɛ nanemɛi heyelilɔi anɔkwafoi lɛ ateŋ lɛ he. Eyɛ mli akɛ Yesu Kristo wo wɔ hewalɛ ni ‘wɔhiɛ atɛ̃ tamɔ onufui’ yɛ be mli ni wɔyɔɔ wɔhenyɛlɔi ateŋ lɛ moŋ, shi ekɛɛɛ akɛ esa akɛ wɔná enɔkwa sɛɛnyiɛlɔi lɛ ahe jwɛŋmɔ fɔŋ. (Mateo 10:16) No hewɔ lɛ, mɛɛ osharai yɔɔ mɛi krokomɛi anifeemɔ he jwɛŋmɔ fɔŋ ni wɔɔna lɛ he? Mɛɛ hei nɛkɛ esa akɛ wɔkwɛ jogbaŋŋ diɛŋtsɛ yɛ koni wɔkwa susumɔ ni tamɔ nɛkɛ? Ni te wɔɔfee tɛŋŋ wɔbu wekukpaa ni jara wa ni kã wɔ kɛ wɔnanemɛi Kristofoi ateŋ lɛ he lɛ?
Nɔ ni Akaseɔ Kɛjɛɔ Nɔ ni Ba Tsutsu lɛ Mli
Mɛi krokomɛi anifeemɔi ahe jwɛŋmɔ fɔŋ ni wɔɔná ni yiŋtoo ko bɛ he lɛ, tamɔ nɔ ni wɔmiikojo amɛ pɛpɛɛpɛ. Etamɔ nɔ ni wɔmiimu sane naa oya akɛ, amɛ wiemɔi loo nifeemɔi ji lakamɔ kɛkɛ, ni akɛtsĩmɔɔ ŋaatsɔɔ kɛ hetsɛ̃ nɔ. Bei pii lɛ, nɔ diɛŋtsɛ ni kɛ naagba lɛ baa ji saji ahe jwɛŋmɔ ni ejaaa ni anaa, taakɛ abaanyɛ ana kɛjɛ Biblia mli sane ni yɔɔ Yoshua yitso 22 lɛ.
Israelbii lɛ egbe amɛ Shiwoo Shikpɔŋ lɛ nɔ kunimyeli lɛ naa, ni kpaako amɛnine eshɛ amɛ akutsei sɔrɔtoi lɛ ashikpɔŋkukuji lɛ anɔ. Ruben kɛ Gad akutsei lɛ kɛ Manase akutso lɛ fã ma afɔleshaa latɛ “kpeteŋkpele ni yɔɔ faŋŋ” yɛ Yordan Faa lɛ naa. Akutsei krokomɛi lɛ susu yɛ gbɛ ni ejaaa nɔ akɛ, enɛ ji hemɔkɛyeli kwamɔ he nifeemɔ. Asusu akɛ akutsei etɛ lɛ baasha afɔle yɛ latɛ kpeteŋkpele nɛɛ nɔ, moŋ fe ni amɛaaya kpee buu ni yɔɔ Shilo lɛ mli, he ko ni ahala akɛ jamɔ hé lɛ. Amrɔ nɔŋŋ ni akutsei naafolɔlɔi lɛ saa amɛhe kɛha tawuu.—Yoshua 22:10-12.
Nɔ ni amɛfee ni sa mɔ hiɛ ji akɛ, amɛtsɔ najiaŋdamɔlɔi ni amɛtsu amrɔ nɔŋŋ ni Pinehas nyiɛ amɛhiɛ lɛ nɔ amɛkɛ amɛ nyɛmimɛi Israelbii lɛ gba sane. Beni akutsei ni etamɔ nɔ ni amɛtɔ̃ lɛ nu anɔkwa ni ayeee, atuatsemɔ, kɛ hemɔkɛyeli ni akwáa ashiɔ Yehowa ni akɛfolɔɔ amɛnaa lɛ ahe lɛ, amɛtsɔɔ nɔ hewɔ ni amɛma afɔleshaa latɛ agbo nɛɛ. Yɛ nɔ najiaŋ ni eeefee latɛ kɛha afɔleshaa lɛ, ama koni “efee odase” kɛha ekomefeemɔ ni kã Israel akutsei lɛ ateŋ yɛ Yehowa jamɔ mli. (Yoshua 22:26, 27, NW) Najiaŋdamɔlɔi lɛ ku amɛsɛɛ kɛtee shia kɛ miishɛɛ, ejaakɛ tɔmɔ ko bɛ amɛ nyɛmimɛi lɛ ahe. No hewɔ lɛ, ahaaa maŋ ta kɛ lashishwiemɔ ni yɔɔ gbeyei aba.
Kwɛ bɔ ni eji nikasemɔ kɛha wɔ akɛ wɔkafee oya ni wɔná mɛi krokomɛi anifeemɔ he jwɛŋmɔ fɔŋ kɔkɔɔkɔ! Bei pii lɛ, nɔ ni asusuɔ akɛ eji anɔkwale yɛ be mli ni anaa lɛ hiɛiaŋhiɛiaŋ lɛ bafeɔ nɔ kroko kwraa kɛ apɛi mli jogbaŋŋ. Enɛ ji anɔkwale yɛ Kristofonyo shihilɛ gbɛi sɔrɔtoi babaoo mli.
Jwɛŋmɔ ni Wɔhiɛ yɛ Onukpai lɛ Ahe
Yɛ be mli ni onukpai lɛ tsuɔ amɛgbɛnaa nii akɛ “amɛkwɛ Nyɔŋmɔ asafo lɛ nɔ” lɛ he nii lɛ, bei komɛi lɛ amɛnaa akɛ ehe hiaa ni amɛwo aŋkroaŋkroi komɛi aŋaa yɛ asafo lɛ mli. (Bɔfoi lɛ Asaji 20:28) Akɛ nɔkwɛmɔ nɔ lɛ, te wɔfeɔ wɔnii wɔhaa tɛŋŋ, kɛ onukpa ko kɛ wɔ wie wɔbii ahe, yɛ saji tamɔ naanyobɔɔ fɔŋ loo nuu kɛ yoo teŋ jeŋba ni esaaa lɛ he lɛ? Ani wɔsusuɔ akɛ ehiɛ jwɛŋmɔ ko yɛ teemɔŋ, ni wɔkɛɔ wɔhe akɛ, ‘Esumɔɔɔ wɔ weku lɛ sane’? Kɛ wɔŋmɛ gbɛ ni henumɔi ni tamɔ nɛkɛ ye wɔnɔ lɛ, wɔbaashwa wɔhe yɛ sɛɛ mli. Ekolɛ, wɔbii lɛ amumɔŋ hilɛ-kɛhamɔ ebaje oshara mli, ni esa akɛ wɔhiɛ asɔ Ŋmalɛ mli ŋaawoo ni yeɔ ebuaa lɛ.—Abɛi 12:15.
Kɛ asafoŋ onukpa ko wo wɔ ŋaa lɛ, nyɛkahaa wɔnáa enifeemɔ lɛ he jwɛŋmɔ fɔŋ ko. Shi moŋ, nyɛhaa wɔbia wɔhe kɛ́ gbɛ ko yɛ ni wɔbaanyɛ wɔtsɔ nɔ wɔna Biblia mli ŋaawoo ni ekɛhaa wɔ lɛ he sɛɛ. Bɔfo Paulo ŋma akɛ: “Shi tsɔsemɔ fɛɛ tsɔsemɔ lɛ, amrɔmrɔ nɛɛ efeee mɔ akɛ miishɛɛ nɔ̃ ni, shi dɔlɛ nɔ̃ moŋ; shi kɛ fee sɛɛ lɛ, ewoɔ hejɔlɛ yibii ni ji jalɛ lɛ ehaa mɛi ni etsɔ nɔ ekase nɔ ko lɛ.” (Hebribii 12:11) No hewɔ lɛ, nyɛhaa wɔjiea hiɛsɔɔ kpo wɔtsɔa, ni wɔsusu saji ahe, ni wiemɔ-kɛ-shimɔ ko bɛ mli. Kaimɔ akɛ, bei pii lɛ, ewa kɛha onukpai lɛ akɛ amɛaawo wɔ ŋaa, taakɛ eji kɛha wɔ hu akɛ wɔɔkpɛlɛ nɔ lɛ.
Henumɔi ni Anaa yɛ Fɔlɔi Ahe
Gbekɛbii komɛi teɔ shi woɔ amɛ fɔlɔi kɛ amɛkɛ naatsii ni fɔlɔi kɛbaa lɛ miikpe. Ekolɛ, gbekɛbii komɛi baakɛɛ akɛ: ‘Mɛni hewɔ mifɔlɔi woɔ mlai babaoo nɛkɛ? Amɛsumɔɔɔ ni maná shihilɛ mli ŋɔɔmɔ.’ Shi, yɛ nɔ najiaŋ ni amɛaamu sane naa nakai lɛ, ehe miihia ni gbekɛbii lɛ asusu shihilɛ lɛ he jogbaŋŋ.
Fɔlɔi kɛ afii abɔ ekwɛ amɛbii. Amɛkɛ heloonaa nibii babaoo kɛ nibii krokomɛi esha afɔle kɛtsu enɛ. Ani yiŋtoo ko yɛ ni aaadamɔ nɔ amu sane naa akɛ amrɔ nɛɛ, amɛtswa amɛfai shi akɛ amɛbaaha amɛbii lɛ ashihilɛ afee mɔbɔ? Ani ejeee nɔ ni jwɛŋmɔ yɔɔ mli babaoo akɛ aaasusu akɛ suɔmɔ tsirɛɔ fɔlɔi nɛɛ koni amɛbu amɛbii lɛ ahe, ni amɛkwɛ amɛnɔ? Ani jeee suɔmɔ nɛɛ nɔŋŋ baatsirɛ amɛ ni amɛtsĩ amɛbii, ni amrɔ nɛɛ amɛkɛ kaai heei kpeɔ yɛ amɛshihilɛ mli lɛ anaa yɛ nibii komɛi ahe? Kwɛ bɔ ni ebaafee mɔbɔ kɛ hiɛsɔɔ ni abɛ akɛ aaana fɔlɔi ni yɔɔ suɔmɔ nɛɛ anifeemɔi ahe jwɛŋmɔ fɔŋ!—Efesobii 6:1-3.
Su ni Wɔjieɔ lɛ Kpo yɛ Wɔnanemɛi Kristofoi Ahe
Mɛi pii tsɔɔ hiɛ amɛkojoɔ mɛi krokomɛi, ni amɛtsakeee jwɛŋmɔ ni amɛna yɛ amɛhe lɛ. Ni kɛ wɔ diɛŋtsɛ hu, wɔhiɛ su ni tamɔ nɛkɛ, ni wɔnaa mɛi krokomɛi ahe jwɛŋmɔ fɔŋ hu? Ani je lɛ baanyɛ ana wɔnɔ hewalɛ yɛ nɛkɛ gbɛ nɔ?
Akɛ nɔkwɛmɔ nɔ lɛ, ŋɔɔ lɛ akɛ, wɔ mumɔŋ nyɛmimɛi lɛ ateŋ mɔ ko yɛ shia fɛfɛo, kɛ kar ko ni jara wa waa. Ani esa akɛ wɔmu sane naa amrɔ nɔŋŋ akɛ ediɔ heloonaa nibii asɛɛ, ni ekɛ Maŋtsɛyeli lɛ he nibii yeee klɛŋklɛŋ gbɛhe yɛ eshihilɛ mli? Ekolɛ, Kristofoi komɛi baanyɛ ahe nibii kpakpai, shi no etsɔɔɔ akɛ amɛhiɛ jwɛŋmɔi fɔji loo ‘amɛtaooo maŋtsɛyeli lɛ klɛŋklɛŋ.’ Ekolɛ, amɛbɛ dekã kwraa yɛ mumɔŋ nitsumɔi amli, ni amɛjɛɔ amɛsuɔmɔ mli amɛkɛ amɛ heloonaa nibii haa, koni Maŋtsɛyeli lɛ he nibii lɛ aya hiɛ, ekolɛ kɛtsɔ gbɛ ni anaaa nɔ.—Mateo 6:1-4, 33.
Gbɔmɛi sɔrɔtoi fɛɛ—niiatsɛmɛi kɛ ohiafoi ji mɛi ni fee klɛŋklɛŋ afii oha lɛ mli Kristofoi asafo lɛ. (Bɔfoi lɛ Asaji 17:34; 1 Timoteo 2:3, 4; 6:17; Yakobo 2:5) Jeee shika ni gbɔmɛi ena lɛ nɔ Nyɔŋmɔ damɔɔ ekɛleɔ bɔ ni gbɔmɛi ji, ni esaaa akɛ wɔfeɔ nakai. Esa akɛ wɔsumɔ wɔnanemɛi heyelilɔi ni akpɛlɛ amɛnɔ, ni yeɔ anɔkwa lɛ, ‘ni . . . wɔkafee nɔ ko yɛ niiaŋkpamɔ naa.’—1 Timoteo 5:21.
Yɛ jeŋ ni kã Satan hewalɛ nɛɛ mli lɛ, mɔ he jwɛŋmɔ fɔŋ ni anáa ni atsakeee lɛ baa yɛ gbɛi sɔrɔtoi anɔ. Akɛ nɔkwɛmɔ nɔ lɛ, ekolɛ, yɛ shihilɛ mli ni mɔ ko jɛ kɛkɛ hewɔ lɛ, abuɔ lɛ akɛ eyitsoŋ wa loo ediɔ heloonaa nibii asɛɛ. Shi akɛ Kristofoi lɛ, esaaa akɛ wɔkɛ wɔhe woɔ subaŋi ni tamɔ nɛkɛ mli. Yehowa gbɛjianɔtoo lɛ jeee he ni mɔ ko haa esane ŋɔɔ lɛ diɛŋtsɛ enaa ni anáa mɔ he jwɛŋmɔ fɔŋ yɛ. Ehe miihia ni anɔkwa Kristofoi fɛɛ akase Yehowa Nyɔŋmɔ, mɔ ni ‘yeee sane ni ejaaa ni ekwɛɛɛ hiɛaŋ’ lɛ.—2 Kronika 19:7; Bɔfoi lɛ Asaji 10:34, 35.
Ha Suɔmɔ Atsirɛ Bo
Ŋmalɛi lɛ kɛɔ yɛ faŋŋ mli akɛ, “mɛi fɛɛ efee esha, ni Nyɔŋmɔ anunyam lɛ ebɔ amɛ.” (Romabii 3:23) No hewɔ lɛ, ehe hiaa ni wɔna wɔnanemɛi Nyɔŋmɔ jalɔi lɛ akɛ mɛi ni kɛ wɔ efee ekome kɛmiibɔ mɔdɛŋ ni akɛ sɔɔmɔ ni sa aha Yehowa. Kɛ wɔŋmɛ gbɛ ni mɔ he jwɛŋmɔ fɔŋ ni anáa loo henumɔi ni ejaaa esa wɔ kɛ wɔmumɔŋ nyɛmimɛi hii kɛ yei ateŋ wekukpaa he lɛ, no lɛ, nyɛhaa wɔsɔlea wɔbia Nyɔŋmɔ dɛŋ yelikɛbuamɔ, koni wɔwu wɔshi subaŋ ni tamɔ nɛkɛ, ni wɔkagbee Satan tsɔne mli. (Mateo 6:13) Etsɔ̃ Hawa yiŋ ni ehe eye akɛ Yehowa hiɛ amɛhe jwɛŋmɔi fɔji, ni esusuuu ehilɛ-kɛhamɔ he, ni eetsĩ eheyelii ni baaha ena anɔkwa miishɛɛ lɛ gbɛ. (1 Mose 3:1-5) Wɔnyɛmimɛi ahe jwɛŋmɔi fɔji ni wɔɔna lɛ tsuɔ otii ni mamɔ ehiɛ lɛ ahe nii.—2 Korintobii 2:11; 1 Petro 5:8.
Kɛ wɔna akɛ wɔsumɔɔ ni wɔná mɛi krokomɛi anifeemɔi ahe jwɛŋmɔ fɔŋ lɛ, susumɔ Yesu Kristo nɔkwɛmɔ nɔ lɛ he. Eyɛ mli akɛ Nyɔŋmɔ Bi ni eye emuu ji lɛ moŋ, shi etaooo nifeemɔi fɔji yɛ ekaselɔi lɛ ahe. Yɛ no najiaŋ lɛ, Yesu tao nibii kpakpai ni yɔɔ amɛmli lɛ. Beni ekaselɔi lɛ peleɔ hegbɛ ni nɔ kwɔ he lɛ, esusuuu akɛ amɛhiɛ jwɛŋmɔi fɔji, ni no hewɔ lɛ, ekɛ bɔfoi heei 12 ato amɛnajiaŋ. (Marko 9:34, 35) Akɛni amɛyeee emuu hewɔ lɛ, ekolɛ Yudafoi ajamɔ ni ekwa hemɔkɛyeli lɛ ni maa henɔwomɔ kɛ gbɔmɛi amlijiemɔ nɔ mi lɛ ena amɛnɔ hewalɛ. Yesu le akɛ suɔmɔ ni esɛɛnyiɛlɔi lɛ yɔɔ kɛha Yehowa lɛ ji nɔ̃ titri ni tsirɛ amɛ. Akɛni amɛjie suɔmɔ ni tamɔ nɛkɛ kpo amɛtsɔɔ, ni amɛkpɛtɛ Yesu he gbagbalii hewɔ lɛ, awo amɛ nyɔmɔ babaoo diɛŋtsɛ.—Luka 22:28-30.
Kɛji akɛ wɔɔkwɛ wɔnanemɛi heyelilɔi anɔkwafoi lɛ kɛ jwɛŋmɔ fɔŋ lɛ, enɛ baafee tamɔ nɔ ni aaakwɛ nii kɛmiitsɔ nikwɛmɔ glase ni ehiii mli. Onaŋ nɔ ko nɔ ko tamɔ bɔ ni eji diɛŋtsɛ. No hewɔ lɛ, nyɛhaa wɔkwɛa nii kɛtsɔa suɔmɔ nikwɛmɔ glase lɛ mli. Odaseyelii pii yɛ ni tsɔɔ akɛ nanemɛi Kristofoi ni yeɔ anɔkwa lɛ sumɔɔ wɔ, ni esa akɛ wɔkɛ mlihilɛ asusu amɛhe. (1 Korintobii 13:4-8) No hewɔ lɛ, eba akɛ wɔɔjie suɔmɔ ni tamɔ nɛkɛ kpo wɔtsɔɔ amɛ, koni wɔkwɛ jogbaŋŋ ni wɔkaná gbɔmɛi anifeemɔi ahe jwɛŋmɔ fɔŋ.
[Mfoniri ni yɔɔ baafa 26]
Te obuɔ mɛi krokomɛi ni jaa Nyɔŋmɔ yɛ anɔkwale mli lɛ ohaa tɛŋŋ?
[Mfoniri ni yɔɔ baafa 27]
Hekɛnɔfɔɔ kɛ bulɛ feɔ Yehowa Odasefoi weku kome ni yɔɔ miishɛɛ