Ani Oji Nyɔŋmɔ Shieŋtsɛ?—Nɔ ni Osɔlemɔi Jieɔ lɛ Kpo
ANI ekolɛ onu trukaa ni mɛi enyɔ komɛi miigba sane dã? Ŋwanejee ko bɛ he akɛ etsɛɛɛ kwraa ni onyɛ ona bɔ ni wekukpaa ni kã amɛteŋ lɛ ji—kɛji nanemɛi ni le amɛhe jogbaŋŋ loo gbɔi ji amɛ, aloo mɛi ni le amɛhe kɛkɛ loo nanemɛi ni bɛŋkɛ kpaakpa, ni heɔ amɛhe amɛyeɔ. Nakai nɔŋŋ hu wɔsɔlemɔi baanyɛ ajie wɔkɛ Nyɔŋmɔ teŋ wekukpaa kpo.
Biblia lɛ maa nɔ mi kɛhaa wɔ akɛ Nyɔŋmɔ kɛ “wɔteŋ mɔ fɛɛ mɔ teŋ jɛkɛɛɛ.” (Bɔfoi lɛ Asaji 17:27) Yɛ anɔkwale mli lɛ, efɔ̃ɔ wɔ nine akɛ wɔle lɛ. Wɔbaanyɛ wɔtsɔmɔ eshieŋtsɛmɛi po. (Lala 34:9; Yakobo 2:23) Wɔbaanyɛ wɔná wɔkɛ lɛ teŋ wekukpaa ni bɛŋkɛ kpaakpa diɛŋtsɛ mli ŋɔɔmɔ! (Lala 25:14) Eyɛ faŋŋ akɛ, wɔkɛ Nyɔŋmɔ teŋ wekukpaa ji nii ni jara wa waa fe fɛɛ ni wɔ adesai ni yeee emuu lɛ baanyɛ aná. Ni Yehowa buɔ wɔkɛ lɛ naanyobɔɔ lɛ waa. Enɛ jeɔ kpo faŋŋ ejaakɛ wɔkɛ lɛ teŋ naanyobɔɔ lɛ damɔ hemɔkɛyeli ni wɔyɔɔ yɛ e-Bi koome lɛ, ni kɛ ewala hã yɛ wɔ hewɔ lɛ mli lɛ nɔ.—Kolosebii 1:19, 20.
No hewɔ lɛ, esa akɛ wɔsɔlemɔi atsɔɔ suɔmɔ kɛ hiɛsɔɔ ni mli kwɔ ni wɔyɔɔ kɛha Yehowa. Shi, ani onu he pɛŋ akɛ, eyɛ mli akɛ bulɛ yɛ osɔlemɔi lɛ amli moŋ, shi amɛtamɔ nɔ ni tsui mli henumɔi diɛŋtsɛ bɛ mli tsɔ̃? Enɛ jeee nɔ ni efɔɔɔ kaa. Mɛni ji gbɛ titri ni oootsɔ nɔ oha eya hiɛ? No ji okɛ Yehowa Nyɔŋmɔ teŋ naanyobɔɔ lɛ ni oookwɛ ni oha emli awa jogbaŋŋ.
Be ni Aaatao Kɛha Sɔlemɔ
Klɛŋklɛŋ kwraa lɛ, naanyobɔɔ ni aaaha eya hiɛ ni emli awa waa lɛ heɔ be. Ekolɛ oŋãa loo okɛ gbɔmɛi babaoo gbaa sane po daa gbi—akutsoŋbii, nanemɛi nitsulɔi, bɔs kudɔlɔi, kɛ shwapoi amli nitsulɔi. Shi kɛlɛ, enɛ etsɔɔɔ akɛ onanemɛi diɛŋtsɛ ji nɛkɛ gbɔmɛi nɛɛ. Naanyobɔɔ yaa hiɛ beni okɛ mɔ ko gbaa sane kɛyaa hiɛ saŋŋ, ni owieee saji ni he ehiaaa pɛ he, shi moŋ otsaa nɔ kɛyaa hiɛ ni ojieɔ omligbɛ henumɔi kɛ susumɔi akpo lɛ.
Nakai nɔŋŋ hu sɔlemɔ yeɔ ebuaa wɔ ni wɔbɛŋkɛɔ Yehowa. Shi esa akɛ wɔto be ni sa wɔha enɛ; babaoo he miihia fe shidaa sɔlemɔ kuku ni wɔɔsɔle yɛ niyeli bei amli kɛkɛ. Babaoo ni okɛ Yehowa wieɔ lɛ, babaoo ni onyɛɔ ohalaa bo diɛŋtsɛ ohenumɔi, okanyamɔi, kɛ onifeemɔi amli ji no. Naagbai ni mli wa lɛ anaa tsabaa jeɔ shishi amɛjieɔ amɛhe kpo yɛ be mli ni Nyɔŋmɔ mumɔ lɛ hãa shishitoo mlai ni jɛ e-Wiemɔ lɛ mli lɛ baa ojwɛŋmɔ mli lɛ. (Lala 143:10; Yohane 14:26) Kɛfata he lɛ, beni osɔleɔ lɛ, Yehowa bafeɔ mɔ ni yɔɔ diɛŋtsɛ jogbaŋŋ kɛhaa bo, ni obaleɔ suɔmɔ mli ni ejɛɔ enáa ohe miishɛɛ, ni esusuɔ ohe hu lɛ babaoo.
Enɛ baa lɛ nakai, titri lɛ kɛji oná hetooi kɛha osɔlemɔi lɛ. Ejaakɛ, Yehowa “nyɛɔ efeɔ kɛtekeɔ nɔ babaoo fe nii fɛɛ ni wɔkpaa he fai loo wɔjwɛŋɔ”! (Efesobii 3:20) Enɛ etsɔɔɔ akɛ Nyɔŋmɔ feɔ naakpɛɛ nii yɛ ogbɛfaŋ. Shi kɛlɛ, ekolɛ ekɛ ŋaawoo kɛ gbɛtsɔɔmɔ ni he hiaa bo lɛ baaha bo kɛtsɔ e-Wiemɔ ni aŋma, kɛ woji ni tsulɔ anɔkwafo kuu lɛ feɔ lɛ, loo wɔnyɛmimɛi hii kɛ yei ni yɔɔ suɔmɔ lɛ awiemɔi anɔ. Aloo ekolɛ ebaaha bo hewalɛ ni he hiaa bo ni okɛŋmɛ otsui shi loo okɛdamɔ kaa ko naa. (Mateo 24:45; 2 Timoteo 4:17) Niiashikpamɔi ni tamɔ nɛkɛ haa wɔtsuii yimɔɔ obɔbɔ kɛ hiɛsɔɔ kɛha wɔ-Naanyo ni yɔɔ ŋwɛi lɛ!
No hewɔ lɛ esa akɛ mɔ ato be kɛha sɔlemɔ. Eji anɔkwale akɛ, deka bɛ tsɔ̃ yɛ nɛkɛ haomɔ gbii nɛɛ amli. Shi kɛji akɛ osusuɔ mɔ ko he lɛɛlɛŋ lɛ, no lɛ efɔɔ kaa akɛ onaa be ohaa nakai mɔ lɛ. Kadimɔ bɔ ni lalatsɛ lɛ wie lɛ diɛŋtsɛ ehe eha: “Bɔ ni ofrote shweɔ faai lɛ, nakai misusuma shweɔ bo Naanyɔŋmɔ. Nyɔŋmɔ ni ji Mawu hiɛkalɔ lɛ he kumai miiye misusuma. Te be po ni maba mabapue yɛ Nyɔŋmɔ hiɛŋ?” (Lala 42:2, 3) Ani oshweɔ yɛ gbɛ ni tamɔ nɛkɛ nɔ akɛ okɛ Nyɔŋmɔ aaawie? No lɛ too be ni okɛfee nakai!—Okɛto Efesobii 5:16 he.
Akɛ nɔkwɛmɔ nɔ lɛ, ekolɛ obaabɔ mɔdɛŋ ni ote shi leebi maŋkpa koni oná be oha bo diɛŋtsɛ ohe ni okɛsɔle. (Lala 119:147) Ani bei komɛi lɛ oshiɔ kpe ni onyɛɛɛ owɔ? No lɛ, taakɛ lalatsɛ lɛ fee lɛ, obaanyɛ obu nɛkɛ haomɔ bei nɛɛ akɛ hegbɛ ni okɛaajie osusumɔi akpo otsɔɔ Nyɔŋmɔ. (Lala 63:7) Aloo eeenyɛ efee sɔlemɔi kukuji babaoo ni ooosɔle yɛ gbi lɛ mli. Lalatsɛ lɛ kɛɛ Nyɔŋmɔ akɛ: “Bo mibolɔɔ mitsɛɔ daa jenamɔ!”—Lala 86:3.
Ní Wɔɔha Bɔ ni Wɔsɔlemɔi Ji lɛ Aya Hiɛ
Bei komɛi lɛ, obaana akɛ kɛ́ oha osɔlemɔ sɛɛ kɛ kakadaŋŋ lɛ, eyeɔ ebuaa. Kɛji osɔle sɔlemɔ kuku lɛ, ekolɛ no baaha owie nibii ni yɔɔ hiɛaŋ-hiɛaŋ lɛ pɛ ahe. Shi kɛ́ osɔle kakadaŋŋ ni emli kwɔ hu lɛ, ehaa ofeɔ klalo babaoo akɛ ooojie osusumɔi kɛ omligbɛ henumɔi akpo. Kɛ́ hoo lɛ, Yesu ye jenamɔ muu fɛɛ shikome yɛ sɔlemɔ mli. (Luka 6:12) Ŋwanejee ko bɛ he akɛ, kɛ́ okɛ oyaiyeli sɔleee lɛ, obaana akɛ osɔlemɔi lɛ baajie oteemɔŋ saji akpo, ni shishinumɔ babaoo baaba he.
Enɛ etsɔɔɔ akɛ esa akɛ osɔlemɔ lɛ mli wiemɔi alɔgɔ shi kɛji nɔ ko bibioo pɛ oyɔɔ kɛɛmɔ; nakai nɔŋŋ hu etsɔɔɔ akɛ esa akɛ owie nɔ koome lɛ nɔŋŋ trilii. Yesu bɔ kɔkɔ akɛ: “Kɛ́ nyɛmiisɔle lɛ, nyɛkawiea trilii tamɔ wɔŋjalɔi lɛ; shi amɛsusuɔ akɛ amɛwiemɔ babaoo hewɔ aaabo amɛ toi. No hewɔ lɛ nyɛkatamɔa amɛ; shi nyɛtsɛ lɛ le nii ni hiaa nyɛ dani nyɛbiɔ lɛ.”—Mateo 6:7, 8.
Kɛ́ osusu saji ni otaoɔ ni owie he lɛ ahe kɛtsɔ hiɛ lɛ, ehaa shishinumɔ babaoo baa sɔlemɔ lɛ he. Nibii ni obaanyɛ osusu he lɛ fa babaoo—miishɛɛ ni wɔnaa yɛ sɔɔmɔ nitsumɔ lɛ mli, wɔ gbɔjɔmɔi kɛ fãtɔɔi, wɔ nijiaŋwujeei, wɔ shika gbɛfaŋ naagbai, nɔnyɛɛi ni wɔkɛkpeɔ yɛ nitsumɔhe loo skul, wɔwekui ahilɛ-kɛhamɔ, kɛ wɔ asafo lɛ mumɔŋ shihilɛ, kɛji wɔɔtsĩ fioo komɛi pɛ tã.
Ani bei komɛi kɛji oosɔle lɛ, ojwɛŋmɔ kpaa shi? No lɛ bɔɔ mɔdɛŋ waa ni ojwɛŋmɔ ahi sɔlemɔ lɛ nɔ. Ejaakɛ, Yehowa miisumɔ ni ‘eto etoi eha wɔbolɔmɔi lɛ.’ (Lala 17:1) Ani esaaa ni wɔsumɔɔ akɛ wɔɔbɔ mɔdɛŋ waa ni wɔha wɔjwɛŋmɔ anyiɛ wɔ diɛŋtsɛ wɔsɔlemɔi lɛ asɛɛ? Hɛɛ, ‘hã ojwɛŋmɔ ahi mumɔŋ nibii anɔ,’ ni okahã ekpa shi.—Romabii 8:5.
Gbɛ ni wɔtsɔɔ nɔ wɔkɛ Yehowa wieɔ lɛ hu he miihia. Eyɛ mli akɛ eesumɔ ni wɔbu lɛ akɛ wɔshieŋtsɛ moŋ, shi esaaa ni wɔhiɛ kpaa nɔ kɔkɔɔkɔ akɛ wɔkɛ jeŋ muu fɛɛ Maŋtsɛ lɛ miiwie. Kanemɔ ni ojwɛŋ shihilɛ ko ni yɔɔ gbeyei, ni afee he mfoniri yɛ Kpojiemɔ yitsei 4 kɛ 5 lɛ he jogbaŋŋ. Yohane na Mɔ ni wɔbɛŋkɛɔ lɛ yɛ sɔlemɔ mli lɛ anunyam kɛ egbojee lɛ he ninaa ko yɛ jɛmɛ. Kwɛ hegbɛ kpele ni wɔná akɛ wɔɔnyɛ wɔbɛŋkɛ “mɔ ni ta maŋtsɛsɛi lɛ nɔ lɛ,” ni wɔná gbɛ kɛya ehiɛ! Wɔsumɔŋ kɔkɔɔkɔ ni wɔwiemɔ afee nɔ ni bulɛ loo hiɛnyamwoo bɛ mli. Shi moŋ, esa akɛ wɔbɔ mɔdɛŋ jogbaŋŋ bɔ ni wɔɔnyɛ ni wɔha ‘wɔdaaŋ wiemɔi kɛ wɔtsui mli jwɛŋmɔi asa Yehowa hiɛ.’—Lala 19:15.
Shi, esa akɛ wɔle akɛ bɔ ni wɔnaa tse yɛ wɔwiemɔ mli lɛ haaa wɔsa Yehowa hiɛ. Enáa wɔwiemɔi ni bulɛ yɔɔ mli, ni jɛ wɔtsui mli lɛ he miishɛɛ, ní bɔ ni wɔwieɔ nɔ fɛɛ nɔ faŋŋ wɔhaa lɛ kɔɔɔ he eko.—Lala 62:9.
Miishɛjemɔ kɛ Shishinumɔ yɛ Hiamɔ Bei Amli
Kɛ́ yelikɛbuamɔ kɛ miishɛjemɔ he miihia wɔ lɛ, bei pii lɛ, wɔtsɔɔ wɔhe kɛyaa wɔnaanyo ni bɛŋkɛɔ wɔ kpaakpa ŋɔɔ kɛha sɛɛfimɔ kɛ musuŋtsɔlɛ. Ojogbaŋŋ, wɔnaanyo ko bɛ ni wɔnyɛɔ wɔnáa gbɛ kɛyaa eŋɔɔ yɛ gbɛ ni yɔɔ mlɛo nɔ fe Yehowa. Eji “wɔbuamɔ ni wa ni wɔnáa yɛ fimɔi amli.” (Lala 46:2) Ákɛ “miishɛjemɔ fɛɛ Nyɔŋmɔ lɛ,” enuɔ shihilɛ ni wɔyajeɔ mli lɛ shishi jogbaŋŋ fe mɔ fɛɛ mɔ. (2 Korintobii 1:3, 4; Lala 5:2; 31:8) Ni eyɛ musuŋtsɔlɛ kɛ mɔbɔnalɛ diɛŋtsɛ kɛha mɛi ni yɔɔ jaramɔ shihilɛi amli lɛ. (Yesaia 63:9; Luka 1:77, 78) Kɛ́ wɔnaa Yehowa akɛ wɔnaanyo ni nuɔ wɔ shishi lɛ, no lɛ wɔbaanu he akɛ wɔyɛ hegbɛ ni wɔkɛ lɛ wieɔ kɛ ekãa kɛ hiɛdɔɔ. Etsirɛɔ wɔ ni wɔjieɔ wɔ gbeyeishemɔi kɛ yeyeeyefeemɔi ni mli wa fe fɛɛ lɛ akpo. No hãa wɔ diɛŋtsɛ wɔnáa bɔ ni Yehowa ‘miishɛjemɔi lɛ hãa wɔsusuma mii shɛɔ ehe’ lɛ mli niiashikpamɔ.—Lala 94:18, 19.
Bei komɛi lɛ, ekolɛ wɔbaanu he akɛ wɔjeee mɛi ni sa akɛ wɔbɛŋkɛ Nyɔŋmɔ, yɛ wɔ tɔmɔi lɛ ahewɔ. Shi kɛ́ onaanyo ko ni bɛŋkɛɔ bo kpaakpa tɔ̃ onɔ, ni ekpa bo fai kɛha eshaifaa hu? Ani no tsirɛŋ bo ni oshɛje nakai mɔ lɛ mii ni owo lɛ hewalɛ? Belɛ, mɛni hewɔ esa akɛ wɔkpa nɔ kroko gbɛ yɛ Yehowa he? Ejɛɔ mlihilɛ mli ekɛ enanemɛi ni tɔ̃ɔ yɛ emuu ni adesai yeee hewɔ lɛ ahe keɔ amɛ. (Lala 86:5; 103:3, 8-11) Akɛni wɔle enɛ hewɔ lɛ, wɔshashaooo shi akɛ wɔɔjaje wɔtɔmɔi wɔtsɔɔ lɛ; wɔbaanyɛ wɔná esuɔmɔ kɛ mɔbɔnalɛ lɛ mli hekɛnɔfɔɔ. (Lala 51:19) Kɛ́ wɔnuɔ nɔnyɛɛ he yɛ wɔgbɔjɔmɔi lɛ ahewɔ lɛ, wɔbaanyɛ wɔná miishɛjemɔ kɛjɛ wiemɔi ni yɔɔ 1 Yohane 3:19, 20 lɛ amli, akɛ: “Ni no wɔkɛaale, akɛ anɔkwale lɛ mli wɔjɛ, ni wɔɔtsɛ wɔtsuii wɔŋmɛ wɔmli yɛ ehiɛ, akɛ, kɛji wɔtsuii buɔ wɔ fɔ́ lɛ, Nyɔŋmɔ da fe wɔtsui, ni ele nii fiaa.”
Shi kɛlɛ, ehe ehiaaa ni wɔhi jaramɔ shihilɛi amli dani wɔná suɔmɔ mli ni Nyɔŋmɔ jɛɔ esusuɔ wɔhe lɛ mli ŋɔɔmɔ. Yehowa sumɔɔ ni ekɛ ehe awo nɔ fɛɛ nɔ ni baanyɛ asa wɔ mumɔŋ kɛ henumɔŋ hilɛ-kɛhamɔ he lɛ mli. Hɛɛ, ehe ehiaaa ni wɔsusu kɔkɔɔkɔ akɛ wɔhenumɔi, susumɔi, kɛ hiamɔ nii ahe ehiaaa bɔ ni esa akɛ wɔtsĩ tã yɛ sɔlemɔ mli. (Filipibii 4:6) Kɛ́ okɛ onaanyo ni bɛŋkɛ bo kpaakpa yɛ lɛ, ani okɛ lɛ gbaa nibii wuji ni eba yɛ oshihilɛ mli lɛ pɛ ahe sane? Ani okɛ lɛ ewieee nibii ni he ehiaaa tsɔ̃ lɛ hu he? Nakai nɔŋŋ hu, oyɛ hegbɛ ni okɛ Yehowa wieɔ oshihilɛ mli nɔ fɛɛ nɔ he, ejaakɛ ole akɛ ‘esusuɔ ohe.’—1 Petro 5:7.
Shi kɛlɛ, naanyobɔɔ sɛɛ etsɛŋ kɛji ohe saji pɛ ji nibii ni okɛ lɛ wieɔ he be fɛɛ be. Nakai nɔŋŋ hu esaaa akɛ wɔsɔlemɔi lɛ kɔɔ wɔ kome pɛ wɔhe. Esa akɛ wɔjie suɔmɔ kɛ hesusumɔ ni wɔyɔɔ kɛha Yehowa kɛ nibii ni enaa he miishɛɛ lɛ ahe lɛ hu kpo. (Mateo 6:9, 10) Sɔlemɔ jeee hegbɛ ni wɔna ni wɔkɛaabi yelikɛbuamɔ pɛ kɛjɛ Nyɔŋmɔ ŋɔɔ, shi moŋ eji hegbɛ hu ni wɔna ni wɔkɛaada lɛ shi ni wɔkɛjie eyi. (Lala 34:2; 95:2) ‘Nilee ni wɔɔná’ kɛtsɔ wɔ teemɔŋ nikasemɔ ni wɔɔfee daa nɔ lɛ baaye abua wɔ yɛ enɛ gbɛfaŋ, beni eyeɔ ebuaa wɔ ni wɔbaleɔ Yehowa kɛ egbɛ̀i hu jogbaŋŋ lɛ. (Yohane 17:3) Ekolɛ kɛji okane Lalai awolo lɛ ni ona bɔ ni tsuji anɔkwafoi krokomɛi kɛ Yehowa wie amɛha lɛ, ehe baanyɛ aba sɛɛnamɔ babaoo kɛha bo.
Yehowa kɛ naanyobɔɔ ji nikeenii ni jara wa waa diɛŋtsɛ. Eba akɛ wɔɔtsɔɔ akɛ wɔhiɛ sɔɔ enɛ kɛtsɔ wɔsɔlemɔi ni wɔɔha ejie wɔsusumɔi akpo, ní ejɛ wɔtsui mli, ni ekɔ wɔ teemɔŋ saji ahe lɛ nɔ. Ni no lɛ, wɔbaaná miishɛɛ ni lalatsɛ lɛ wie he lɛ mli ŋɔɔmɔ, mɔ ni jaje akɛ: “Miishɛɛ ji mɔ ni ohala ni ohãa ebɛŋkɛɔ bo lɛ.”—Lala 65:4, NW.
[Mfoniri ni yɔɔ baafa 28]
Wɔbaanyɛ wɔkɛ hegbɛ ni wɔnáa lɛ asɔle wɔha Nyɔŋmɔ yɛ gbi muu lɛ fɛɛ mli