Amɛfee Yehowa Suɔmɔnaa Nii

Tsɛ ko ni Efee Klalo akɛ Ekɛ Sane Aaake

ATSƐ́ lɛ akɛ sane kuku ni fe fɛɛ eko ni aŋma pɛŋ—ní yiŋtoo kpakpa yɔɔ sɛɛ. Yesu abɛbua ni kɔɔ suɔmɔ ni tsɛ ko yɔɔ kɛha ebinuu ni laaje lɛ he, tamɔ samfɛlɛ ko mli ni wɔtsɔɔ kɛnaa mɔbɔnalɛ ni Nyɔŋmɔ yɔɔ kɛha eshafeelɔi ni tsakeɔ amɛtsui lɛ jogbaŋŋ.

Elaaje ni Ana Lɛ

Nuu ko yɛ bihii enyɔ. Gbekɛ lɛ kɛɛ lɛ akɛ: ‘Miitao migboshinii lɛ amrɔ nɔŋŋ, moŋ fe ni mamɛ kɛyashi beni obaagbo dã.’ Tsɛ lɛ kpɛlɛ nɔ, ni eeenyɛ eba akɛ eha lɛ nii fɛɛ ni eyɔɔ lɛ mlijai etɛ mli ekome—nɔ ni ji mɔ ni ji gbekɛ yɛ bihii enyɔ ateŋ lɛ gbɛfaŋ nɔ yɛ mla naa. (5 Mose 21:17) Obalanyo lɛ kɛ oyaiyeli bua enibii lɛ anaa ni edom etee maŋsɛɛ shɔŋŋ he ko, ni jɛmɛ ekɛ nyenyeŋtswibɔɔ sɛɛtiumɔ yakpata eshika lɛ fɛɛ hiɛ yɛ.—Luka 15:11-13.

Kɛkɛ ni hɔmɔ ni naa wa ko bate shi. Akɛni obalanyo lɛ nijiaŋ eje wui hewɔ lɛ, ekpɛlɛ nitsumɔ nɔ akɛ kpolotoi akwɛlɔ—nitsumɔ ko ni feɔ Yudanyo taŋ. (3 Mose 11:7, 8) No mli lɛ niyenii námɔ wa aahu akɛ ebɔi etsinebaa akɛ eye yɔɔ ni kpolotoi lɛ yeɔ lɛ eko! Naagbee lɛ, obalanyo lɛ hiɛ tserɛ lɛ. Esusu eyiŋ akɛ: ‘Ahaa mitsɛ tsuji lɛ niyenii jogbaŋŋ fe mi! Maku misɛɛ maya shia, mayajaje mihe eshai lɛ matsɔɔ, ni mayakpa mitsɛ fai koni eŋɔ mi efee tamɔ epaafoi lɛ ateŋ mɔ kome.’a—Luka 15:14-19.

Obalanyo lɛ kɛ tɔlɛ nyiɛ blɛoo kɛku esɛɛ kɛtee shia. Ŋwanejee ko bɛ he akɛ egbɔmɔtso su etsake saŋŋ. Fɛɛ sɛɛ lɛ, etsɛ yoo lɛ “beni enyiɛ shɔŋŋ kɛbaa beebe lɛ.” Ekɛ musuŋtsɔlɛ sha foi kɛyaloo ebinuu lɛ atuu ni, “eshɔshɔɔ enaa.”—Luka 15:20.

Nɛkɛ suɔmɔ heremɔ nɛɛ ha efee mlɛo kɛha obalanyo lɛ ni ekɛjie ejatsui lɛ eshwie shi. Ekɛɛ: “Ataa, mifee esha mishi ŋwɛi, ni mifee esha mishi bo. Misaaa akɛ atsɛɔ mi obi dɔŋŋ. Ŋɔɔ mi ofee tamɔ opaafoi lɛ ateŋ mɔ kome.” Tsɛ lɛ tsɛ etsuji lɛ kɛba. Efã akɛ: “Nyɛfea oya! Nyɛyajiea atade ni yɔɔ fɛo fe fɛɛ lɛ kɛbaa, ní nyɛkɛbawoa lɛ, ni nyɛwo enine kpotia kɛ enaji tokotai. Ni nyɛkɛ tsina bi ni ewo fɔ lɛ abaa nyɛbagbea, ni nyɛhaa wɔyea nii ni wɔnáa tsuijurɔ, ejaakɛ mibi nɛɛ gbo, ni ehiɛ etsɛ ekoŋŋ; elaaje, ni ana lɛ.”—Luka 15:21-24, NW.

Aŋmɛ okpɔlɔ wulu ko, ni lala kɛ joo fata he. Bi nukpa lɛ nu jooi kɛ lalai agbɛɛmɔ lɛ he yɛ be mli ni ekuɔ esɛɛ kɛjɛɔ ŋmɔ mli kɛbaa shia lɛ. Beni ená ele akɛ enyɛmi lɛ eku esɛɛ eba shia, ni ákɛ no hewɔ ni ayeɔ gbi jurɔ lɛ, emli fu. Eye ŋkɔmɔ etsɔɔ etsɛ akɛ: ‘Misɔmɔ bo afii babaoo, ni mitɔko okita ko nɔ dã, ni kɛlɛ, ohako mi tookpakpo ko tete dã, koni mikɛ mishieŋtsɛmɛi aná tsuijurɔ. Shi amrɔ nɔŋŋ ni obinuu ni yakpata onii ahiɛ nɛɛ ba lɛ, oŋmɛ lɛ okpɔlɔ.’ Etsɛ lɛ ha lɛ hetoo blɛoo akɛ: ‘Mibi, bo lɛ okɛmi yɔɔ daa nɛɛ, ni nɔ fɛɛ nɔ ni miyɔɔ lɛ onɔŋ. Shi esa akɛ wɔnyã ni wɔmii ashɛ wɔhe, ejaakɛ onyɛmi lɛ gbo, ni ehiɛ etsɛ̃. Elaaje, ni ana lɛ.’—Luka 15:25-32.

Nikasemɔi Kɛha Wɔ

Tsɛ ni yɔɔ Yesu abɛbua lɛ mli lɛ damɔ shi kɛha wɔ-Nyɔŋmɔ, Yehowa mɔbɔnalɔ lɛ. Taakɛ binuu ni laaje lɛ ji lɛ, mɛi komɛi yɛ ni yɛ be ko mli lɛ, amɛshiɔ Nyɔŋmɔ hebuu shishi yɛ eshia lɛ mli, shi amɛkuɔ amɛsɛɛ amɛbaa sɛɛ mli. Te Yehowa naa mɛi ni tamɔ nɛkɛ ehaa teŋŋ? Mɛi ni kuɔ amɛsɛɛ amɛbaa Yehowa ŋɔɔ kɛ anɔkwa tsui tsakemɔ lɛ baanyɛ aná nɔmimaa akɛ “ehiɛɛɛ béi amli daa, ni ebɛɛɛ mɔ ewooo emli kɛyaa naanɔ.” (Lala 103:9) Yɛ abɛbua lɛ mli lɛ, tsɛ lɛ sha foi kɛyaloo ebinuu lɛ atuu. Nakai nɔŋŋ Yehowa hu lɛ, jeee akɛ eesumɔ akɛ ekɛ eshafeelɔi ni etsake amɛtsui lɛ ahe eshai ake amɛ kɛkɛ, shi moŋ eeshwe ni ekɛke. Efee “klalo akɛ ekɛ sane aaake,” ni efeɔ nakai “yɛ gbɛ ni da nɔ.”—Lala 86:5, NW; Yesaia 55:7, NW; Zakaria 1:3.

Yɛ Yesu abɛbua lɛ mli lɛ, tsɛ lɛ anɔkwa suɔmɔ lɛ ha efee mlɛo kɛha binuu lɛ ni enyɛ efee ekãa ni eku esɛɛ. Shi susumɔ enɛ he okwɛ: Eji tsɛ lɛ kpoo gbekɛ lɛ loo ekɛ mlifu ni naa wa kɛɛ lɛ akɛ ekaku esɛɛ eba dɔŋŋ kulɛ mɛni baaba? Kulɛ su ni tamɔ no baanyɛ atse obalanyo fioo lɛ kɛjɛ etsɛ he kɛya naanɔ.—Okɛto 2 Korintobii 2:6, 7 he.

Belɛ, yɛ shishinumɔ ko naa lɛ, tsɛ lɛ anɔkwa suɔmɔ lɛ gbele gbɛ kɛha ebi lɛ sɛɛkuu, beni edom lɛ. Ŋmɛnɛ, yɛ bei komɛi amli lɛ, esa akɛ Kristofoi onukpai lɛ ajie eshafeelɔi ni tsakeee amɛtsui lɛ kɛjɛ asafo lɛ mli. (1 Korintobii 5:11, 13) Yɛ no feemɔ mli lɛ, amɛbaanyɛ amɛje shishi amɛgbele gbɛ kɛha eshafeelɔ lɛ sɛɛkuu kɛtsɔ suɔmɔ mli ni amɛaajɛ amɛtsɔɔ lɛ gbɛi ni eeetsɔ nɔ koni ahe lɛ ekoŋŋ kɛba asafo lɛ mli yɛ wɔsɛɛ be mli lɛ. Nɛkɛ anɔkwale mli ni ajɛɔ akaiɔ nibimɔ nɛɛ etsirɛ mɛi pii ni laaje yɛ mumɔŋ lɛ kɛshɛ tsuitsakemɔ he yɛ sɛɛ mli, ni eha amɛku amɛsɛɛ kɛba Nyɔŋmɔ shia lɛ mli ekoŋŋ.—2 Timoteo 4:2.

Tsɛ lɛ jie mɔbɔnalɛ hu kpo yɛ be mli ni ebinuu lɛ ku esɛɛ eba lɛ. Etsɛɛɛ tsɔ ni eyoo gbekɛnuu lɛ anɔkwa tsuitsakemɔ lɛ. Agbɛnɛ, yɛ nɔ najiaŋ ni eeema nɔ mi ni epɛi ebinuu lɛ eshai amli fitsofitso lɛ, etee nɔ ekɛ miishɛɛ here lɛ, ni ejie miishɛɛ kpele kpo yɛ no feemɔ mli. Kristofoi baanyɛ akase nɔkwɛmɔnɔ nɛɛ. Esa akɛ amɛná miishɛɛ akɛ ana mɔ ko ni laaje lɛ.—Luka 15:10.

Tsɛ lɛ subaŋ lɛ tsɔɔ faŋŋ akɛ, etsɔ hiɛ ekpa ebinuu ni edu gbɛ lɛ sɛɛkuu gbɛ aahu. Yɛ anɔkwale mli lɛ, enɛ ji okadi ko kɛkɛ ni tsɔɔ Yehowa gbɛkpamɔ kɛha mɛi fɛɛ ni eshi ewe lɛ. “Esumɔɔɔ akɛ mɛi komɛi alaaje, shi moŋ akɛ mɛi fɛɛ atsake amɛtsui.” (2 Petro 3:9; wɔma efã ko nɔ mi.) No hewɔ lɛ, mɛi ni tsakeɔ amɛtsui kɛjɛɔ amɛhe eshai lɛ amli lɛ baanyɛ aná nɔmimaa akɛ abaanyɛ akɛ ‘hejɔɔmɔ yinɔi ni jɛɔ Yehowa ŋɔɔ,’ lɛ ajɔɔ amɛ.—Bɔfoi lɛ Asaji 3:20.

[Shishigbɛ niŋmai]