Amɛfee Yehowa Suɔmɔnaa Nii

He-kɛ-Afɔleshaa kɛ Anɔkwayeli He Nɔkwɛmɔnɔ

KƐHA obalanyo hulɔ ni gbɛi ji Elisha lɛ, nɔ ni je shishi akɛ edaa gbi nifeemɔ ni ji humɔ lɛ batsɔ gbi ni he hiaa fe fɛɛ yɛ eshihilɛ mli. Be ni etsuɔ nii yɛ ŋmɔshi lɛ, Elisha ná gbɔ ko ni ekpaaa lɛ gbɛ, ni ji Elia, Israel gbalɔ ni fe fɛɛ lɛ. Ekolɛ Elisha baasusu eyiŋ akɛ, ‘Mɛni hewɔ etaoɔ mi?’ Ehe ehiaaa ni emɛ be kakadaŋŋ kɛha hetoo. Elia shɛ etade ni ekɛtsuɔ nii lɛ efɔ̃ Elisha nɔ, ni tsɔɔ akɛ gbi ko lɛ Elisha baaye esɛɛ. Elisha ebuuu ninefɔ̃ɔ nɛɛ akɛ nɔ ko bibioo. Amrɔ nɔŋŋ ni eshi eŋmɔ lɛ mli ni ebatsɔ Elia sɔɔlɔ.—1 Maŋtsɛmɛi 19:19-21.

Aaafee afii ekpaa sɛɛ lɛ, be bashɛ ni Elia kɛbaashi. Atsɛɔ sane ni kɔɔ eyaa lɛ he yɛ Hebri Ŋmalɛi lɛ amli lɛ akɛ “saji ni yɔɔ miishɛɛ fe fɛɛ lɛ eteŋ ekome.”

Elia Saa Ehe Koni Eshĩ

Elia miisumɔ ni eyasara Betel, Yeriko, kɛ Yordan naagbee nɔ kwraa. Enɛ baabi nyiɛmɔ babaoo, ni ekomɛi yɛ gɔji ashikpɔŋ nɔ. He fɛɛ he ni amɛbaashɛ yɛ gbɛfaa lɛ mli lɛ, Elia woɔ Elisha hewalɛ koni ehi jɛmɛ. Shi Elisha maa nɔ mi akɛ ebaahi enuntsɔ lɛ masɛi kɛyashi naagbee.—2 Maŋtsɛmɛi 2:1, 2, 4, 6.

Beni amɛyɔɔ Betel kɛ Yeriko lɛ, “gbalɔi abii lɛ” ba Elisha ŋɔɔ.a Amɛbi lɛ akɛ: “Ani ole akɛ ŋmɛnɛ Yehowa baaŋɔ onuntsɔ kɛjɛ oŋɔɔ kɛya?” Ni eha hetoo akɛ: “Mi hu mile, nyɛfea diŋŋ kɛkɛ!”—2 Maŋtsɛmɛi 2:3, 5.

Agbɛnɛ Elia kɛ Elisha tsa nɔ kɛmiiya Yordan Faa lɛ naa. Beni amɛshɛ Yordan naa lɛ, Elia fee naakpɛɛ nɔ ko yɛ be mli ni gbalɔi abii 50 komɛi miikwɛ kɛmiijɛ shɔŋŋ lɛ. “Ni Elia jie etade lɛ ni ekota, ni ekɛtswa nu lɛ mli, ni emli gba kɛtee biɛ kɛ biɛ, ni amɛyi enyɔ lɛ fɛɛ amɛnyiɛ shikpɔŋ gbiŋ nɔ kɛfo mli.”—2 Maŋtsɛmɛi 2:8.

Beni amɛfo mli sɛɛ lɛ, Elia kɛɛ Elisha akɛ: “Bi mi nɔ ko ni mifee mihao, dani aŋɔ mi kɛjɛ oŋɔɔ kɛya!” Elisha bi Elia emumɔ lɛ “mlijaa enyɔ”—ni ji kromɔ binuu gbɛfaŋnɔ ni eku ebɔ he enyɔ. Eji anɔkwale akɛ, Elisha wo Elia hiɛ nyam taakɛ bɔ pɛ ni binuu baawo etsɛ hiɛ nyam lɛ. Kɛfata he lɛ, afɔ lɛ mu koni ebatsɔ Elia sɛɛyelɔ akɛ Yehowa gbalɔ yɛ Israel. No hewɔ lɛ, enibimɔ lɛ jeee pɛsɛmkunya nifeemɔ loo nɔ ni esaaa. Yɛ fɛɛ sɛɛ lɛ, akɛni ele akɛ Yehowa pɛ ji mɔ ni baaha lɛ nibimɔ nɛɛ hewɔ lɛ, Elia kɛ heshibaa ha hetoo akɛ: “Obi nɔ ko ni wa.” Kɛkɛ ni ekɛfata he akɛ: “Kɛji ooona mi ni aaŋɔ mi kɛjɛ oŋɔɔ kɛya lɛ, aaaba mli nakai ahao; shi kɛ jeee nakai lɛ, ebaŋ mli nakai.”—2 Maŋtsɛmɛi 2:9, 10; 5 Mose 21:17.

Ŋwanejee ko bɛ he akɛ Elisha tswa efai shi fe be fɛɛ akɛ ebaakpɛtɛ enuntsɔ lɛ he gbagbalii. Kɛkɛ ni, “la shwilii kɛ la okpɔŋɔi” je kpo. Elisha hiɛ tuuntu ni lasuogbele baloo Elia kɛtee—atsɔ naakpɛɛ gbɛ nɔ akɛ lɛ tee he kroko.b Elisha kɔ Elia atade lɛ ni eku esɛɛ etee Yordan Faa lɛ naa. Ekɛtswa nu lɛ mli ni ekɛɛ: “Nɛgbɛ Yehowa, Elia Nyɔŋmɔ lɛ, yɔɔ?” Nu lɛ mli gba, ni ekɛ odaseyeli ni yɔɔ faŋŋ ha akɛ Elisha yɛ ŋwɛi sɛɛfimɔ akɛ Elia sɛɛyelɔ.—2 Maŋtsɛmɛi 2:11-14.

Nikasemɔi Kɛha Wɔ

Beni afɔ nine atsɛ lɛ koni ekɛ Elia abana sɔɔmɔ krɛdɛɛ mli gbɛfaŋnɔ lɛ, Elisha kɛ oyaiyeli shi eŋmɔ lɛ mli koni ebasɔmɔ Israel gbalɔ ni fe fɛɛ lɛ. Eyɛ faŋŋ akɛ enitsumɔi lɛ ekomɛi baa shi, ejaakɛ abale lɛ akɛ mɔ ni “fɔse nu shwie Elia niji anɔ lɛ.”c (2 Maŋtsɛmɛi 3:11) Shi kɛlɛ, Elisha bu enitsumɔ lɛ akɛ eji hegbɛ, ni ekɛ anɔkwayeli hi Elia masɛi.

Nyɔŋmɔ tsuji babaoo ni yɔɔ ŋmɛnɛ lɛ jieɔ he-kɛ-afɔleshaa mumɔ ni tamɔ enɛ nɔŋŋ kpo. Amɛteŋ mɛikomɛi eshi ‘amɛŋmɔji,’ amɛ nitsumɔi, koni amɛyashiɛ sanekpakpa lɛ yɛ shikpɔji ni yɔɔ shɔŋŋ nɔ loo ni amɛyasɔmɔ akɛ Betel weku lɛ mli bii. Mɛi krokomɛi efa gbɛ kɛtee maŋsɛɛ shikpɔji anɔ koni amɛyatsu nii yɛ Asafo lɛ tsumaa nitsumɔi amli. Mɛi babaoo ekpɛlɛ nɔ ni ekolɛ abaasusu akɛ nitsumɔ ni baa shi lɛ nɔ. Shi kɛlɛ, mɔ ko mɔ ko bɛ ni sɔmɔɔ Yehowa ni kɛ sɔɔmɔ bibioo kwraa miiha. Yehowa hiɛ sɔɔ mɛi fɛɛ ni jɛɔ amɛsuɔmɔ mli amɛsɔmɔɔ lɛ lɛ, ni ebaajɔɔ amɛ he-kɛ-afɔleshaa mumɔ lɛ.—Marko 10:29, 30.

Elisha hi Elia masɛi kɛyashi naagbee. Ekpoo akɛ eeeshi gbalɔ nuumo lɛ be mli po ni aha lɛ hegbɛ lɛ. Ŋwanejee ko bɛ he akɛ, wekukpaa ni bɛŋkɛ kpaakpa ni ená yɛ ekɛ Elia teŋ lɛ ha nakai anɔkwa suɔmɔ lɛ bafee miishɛɛ nɔ. Ŋmɛnɛ lɛ, Nyɔŋmɔ tsuji bɔɔ mɔdɛŋ koni amɛwaje amɛkɛ Nyɔŋmɔ teŋ wekukpaa lɛ ni amɛbɛŋkɛ amɛnanemɛi jalɔi lɛ gbagbalii. Abaajɔɔ ekomefeemɔ tsakpaa ni yɔɔ gbagbalii lɛ, ejaakɛ Biblia lɛ kɛɔ yɛ Yehowa he akɛ: “Okɛ mɔ ni yeɔ anɔkwa lɛ aaaye yɛ anɔkwayeli mli.”—2 Samuel 22:26, NW.

[Shishigbɛ niŋmai]