Maŋtsɛyeli Jajelɔi Bɔ Amaniɛ

“Omaŋ lɛ Aaaba Yɛ Amɛsuɔmɔ Naa”

KPITI miiye Aram tatsɛnukpa Naeman ni ji nuu kãkãlɔ lɛ. Kɛ atsaaa hela ni yɔɔ nyaŋemɔ nɛɛ lɛ, no lɛ, yɛ naagbee lɛ, ebaanyɛ etsake gbɔmɔtso lɛ ni egbe mɔ. Mɛni Naeman baafee? Mɔ ni fata Naeman shiabii lɛ ahe ji gbekɛyoo fioo ko, ni ‘aŋɔ lɛ nom kɛjɛ Israel shikpɔŋ lɛ nɔ.’ Ekɛ ekãa wie, ni ejie gbalɔ Elisha shi etsɔɔ akɛ mɔ ni baanyɛ atsa Naeman.—2 Maŋtsɛmɛi 5:1-3.

Yɛ gbekɛyoo lɛ ekãa ni efee lɛ hewɔ lɛ, Naeman yatao Elisha sɛɛgbɛ ni atsa lɛ. No sɛɛ hu lɛ, Naeman batsɔ Yehowa jálɔ! Nɛkɛ niiashikpamɔ ni aŋma yɛ Biblia lɛ mli lɛ tee nɔ yɛ afii ohai nyɔŋma D.Ŋ.B. lɛ mli. (2 Maŋtsɛmɛi 5:4-15) Ŋmɛnɛ, gbekɛbii pii jieɔ ekãafeemɔ ni tamɔ nɛkɛ kpo amɛtsɔɔ yɛ Maŋtsɛyeli lɛ he ni amɛwieɔ ni amɛsheee gbeyei lɛ mli. Niiashikpamɔ ni nyiɛ sɛɛ nɛɛ ni jɛ Mozambique lɛ maa enɛ nɔ mi.

Nuno ni eye afii ekpaa lɛ ji sanekpakpa lɛ shiɛlɔ ni abaptisiko lɛ. Dani ebatsɔ shiɛlɔ ni abaptisiko lɛ po lɛ, no mli lɛ Nuno buaa gbekɛbii ni yɔɔ ekutsoŋ lɛ anaa, ni esɔleɔ, ni ekɛ wolo ni ji Mi-Wolo ni Gbaa Biblia Mli Saji lɛ tsuɔ nii kɛtsɔɔ amɛ Biblia lɛ.

Bei pii lɛ, Nuno teɔ shi Hɔɔ leebi mra, ni ekaiɔ eweku lɛ akɛ: “Ŋmɛnɛ lɛ wɔbaaya shiɛmɔ.” Ekãa ni eyɔɔ yɛ sɔɔmɔ nitsumɔ lɛ mli lɛ jeɔ kpo yɛ gbɛi krokomɛi anɔ. Nuno diɛŋtsɛ fɔɔ gbɔmɛi aŋɔɔ yaa kɛ́ efata efɔlɔi ahe yɛ gbɛjegbɛi anɔ sɔɔmɔ lɛ mli yɛ Maputo. Yɛ nifeemɔ ni tamɔ nakai eko mli lɛ, nitsulɔ ko ba eŋɔɔ ni ebi akɛ: “Mɛni hewɔ ohɔɔ woji tɛtrɛbii nɛɛ?” Nuno kɛɛ: “Mihɔɔɔ woji tɛtrɛbii lɛ, shi moŋ mikpɛlɛɔ tooyeli nɔ, koni mikɛye mabua shiɛmɔ nitsumɔ lɛ yɛ shika gbɛfaŋ.” Nuu nitsulɔ lɛ here nɔ akɛ: “Eyɛ mli akɛ mibɛ he miishɛɛ moŋ, shi osubaŋ kɛ omɔdɛŋbɔɔ lɛ ena minɔ hewalɛ. Masumɔ koni maye too kɛha nitsumɔ nɛɛ.”

Be kroko hu lɛ, Nuno yanina nuu ko yɛ gbɛjegbɛ lɛ nɔ, ni ekɛ True Peace and Security—How Can You Find It? wolo lɛ ha lɛ. Nuu lɛ bi akɛ: “Jeee bo oyaa nakai skul lɛ ni yɔɔ jɛmɛ lɛ?” Nuno here nɔ akɛ: “Hɛɛ, nakai skul lɛ miyaa, shi ŋmɛnɛ lɛ mikɛ shɛɛ sane ko ni he hiaa ni yɔɔ wolo nɛɛ mli lɛ miiha. Etsɔɔ bo akɛ, obaanyɛ ohi shi yɛ jeŋ hee ni Nyɔŋmɔ kɛbaaba lɛ mli, taakɛ átsɔɔ yɛ mfoniri ni yɔɔ wolo nɛɛ mli lɛ.” Nuno leee akɛ nuu ni ekɛwie lɛ ji tsɔɔlɔ yɛ eskul lɛ. Jeee wolo lɛ pɛ tsɔɔlɔ lɛ he, shi moŋ bianɛ lɛ enine shɛɔ Buu-Mɔɔ kɛ Awake! woji tɛtrɛbii lɛ anɔ daa kɛjɛɔ Nuno dɛŋ.

Kɛ abi Nuno nɔ hewɔ ni esumɔɔ ni ekɛ ehe awo shiɛmɔ nitsumɔ lɛ mli lɛ, ekɛɔ akɛ: “Miisumɔ ni mikɛ gbɔmɛi awie, ni matsɔɔ amɛ saji ni kɔɔ Yehowa kɛ e-Bi, Yesu Kristo he lɛ he nii.” Ekɛfataa he akɛ: “Ni kɛ gbɔmɛi lɛ sumɔɔɔ ni amɛboɔ toi lɛ ehe ehiaaa ni mɔ mli fuɔ.”

Gbekɛbii ni tamɔ Nuno yɛ je lɛŋ he fɛɛ he lɛ ‘baa yɛ amɛsuɔmɔ naa’ koni amɛtsɔɔ ni amɛshiɛ Nyɔŋmɔ Maŋtsɛyeli lɛ. (Lala 110:3) Shi enɛ baaa trukaa. Abaawo fɔlɔi ni tsɔɔ amɛbii Yehowa he nii kɛjɛɔ amɛgbekɛbiiashi, ni amɛfeɔ nɔkwɛmɔnɔ kpakpa amɛfɔɔ shi yɛ sɔɔmɔ nitsumɔ lɛ mli, ni amɛkɛ ekãa tiuɔ Maŋtsɛyeli lɛ he nibii asɛɛ lɛ nyɔmɔ babaoo.