Maŋtsɛyeli Jajelɔi Bɔ Amaniɛ

Ní Akɛ Hegbɛ Fɛɛ Hegbɛ Aaatsu Nii

ALE Yehowa Odasefoi yɛ jeŋ fɛɛ yɛ amɛ Biblia kasemɔ nitsumɔ lɛ hewɔ. Shi amɛtsuɔ gbɛjianɔtoi ni kɛ sɛɛnamɔi krokomɛi bahaa maŋbii lɛ ahe nii. Anya nɛkɛ maŋsɔɔmɔ nɛɛ he waa, taakɛ niiashikpamɔi ni nyiɛ sɛɛ ni jɛ Ecuador lɛ tsɔɔ lɛ.

◻ Glasefeemɔ nitsumɔhe agbo ko nɔkwɛlɔi lɛ miitao koni amɛto gbɛjianɔ koni abaha amɛnitsulɔi lɛ wiemɔi ni kɔɔ weku jeŋba kpakpai ahe. Onukpa ni kwɛɔ nitsulɔi lɛ anɔ lɛ fɔ̃ Katolik osɔfoi lɛ babaoo nine koni amɛkɛ amɛhe abawo mli, shi amɛbaaa. Osɔfo ko kɛɛ lɛ akɛ osɔfoi fioo kwraa yɔɔ ni baanyɛ awie sane nɛɛ he, ni etamɔ nɔ ni mɔ ko mɔ ko bɛ. Beni enu enɛ lɛ, Odasefonyo ko ni tsuɔ nii yɛ jɛmɛ lɛ to gbɛjianɔ eha nyɛmi ko ni fɔɔ nitsumɔ yɛ jarayeli shikpɔŋkuku ko nɔ lɛ koni ebasara nitsumɔhe lɛ.

Enɔ jetsɛremɔ nɔŋŋ lɛ, Odasefonyo lɛ tee onukpa ni kwɛɔ nitsulɔi lɛ anɔ lɛ ŋɔɔ ni ekɛ nikasemɔ he gbɛjianɔtoo ko yatsɔɔ lɛ. Ato saji ni ajie kɛjɛ Buu-Mɔɔ Asafo lɛ woji sɔrɔtoi lɛ amli lɛ naa. Onukpa lɛ ná he miishɛɛ. Ehala sane yitsei etɛ koni agba he sane—adesai kɛ shihilɛ, jeŋba kpakpa kpojiemɔ yɛ nitsumɔhe, kɛ jeŋba kpakpa kpojiemɔ yɛ weku lɛ mli. Ato gbɛjianɔ koni akɛ nitsulɔi lɛ fɛɛ asusu sane lɛ he.

Ajara nitsulɔi lɛ awo kui kpawo ni mɛi 30 yɔɔ eko fɛɛ eko mli lɛ mli, ni no sɛɛ lɛ, nyɛmimɛi hii etɛ ni he esa wie etsɔɔ amɛ. Mɛni jɛ mli ba? Nitsulɔi lɛ ateŋ mɛi komɛi bi koni abasara amɛ yɛ amɛshiai amli, ni aja Biblia kasemɔ he woji 216. Nitsumɔ mli onukpai lɛ ná he miishɛɛ aahu akɛ amɛbi kɛji akɛ Odasefoi lɛ baanyɛ ato wiemɔi krokomɛi ni tsara nɔ he gbɛjianɔ lo.

◻ Nyɛsɛɛ nɛɛ, Ecuador maŋ lɛ kɛ mla ni ŋmɛɔ gbɛ koni atsɔɔ jamɔ he nii yɛ skul lɛ ha. Nyɛmiyoo ko ni ji maŋsɛɛ sanekpakpa shiɛlɔ tee shishijee skul nɔkwɛlɔ yoo ko ŋɔɔ, ni ebi bɔ ni mla hee lɛ tsuɔ nii ehaa lɛ he sane. Nɔkwɛlɔ lɛ tsɔɔ mli akɛ aka koni akɛ Maria jamɔ he gbɛjianɔtoo ko aje shishi, shi eyeee omanye. Beni nyɛmiyoo lɛ wie akɛ nakai jamɔ lɛ baanyɛ etee naagbai ashi eha gbekɛbii ni jeee Katolikbii lɛ, nɔkwɛlɔ lɛ kpɛlɛ nɔ. Maŋsɛɛ sanekpakpa shiɛlɔ lɛ kɛɛ akɛ: “Yɛ gbɛ kroko nɔ lɛ, wɔyɛ gbɛjianɔtoo ko ni jɛɔ Biblia lɛ mli etsɔɔ jeŋba he mlai ahe nii, ní biii ni mɔ ko akpɛlɛ jamɔ pɔtɛɛ ko nɔ dã.” Nɔkwɛlɔ lɛ here nɔ akɛ: “Mɛɛ be obaanyɛ oba? Wɔ́ sɛɛ?” Beni maŋsɛɛ sanekpakpa shiɛlɔ lɛ kɛ Tsɔɔlɔ Kpele lɛ Toiboo wolo lɛ tsɔɔ lɛ sɛɛ lɛ, amɛto gbɛjianɔ akɛ amɛbaasusu yitso ni ji “Miishɛɛ Ji Mɛi ni Sumɔɔ Toiŋjɔlɛ” lɛ he.

Beni eku esɛɛ lɛ, maŋsɛɛ sanekpakpa shiɛlɔ lɛ kɛ ŋmɛlɛtswai etɛ sara klas sɔrɔtoi kpawo ni nɔkwɛlɔ lɛ fata ehe ni ebo toi. Beni ekɛ klas ni ji enumɔ lɛ egbe naa sɛɛ lɛ, nikaselɔi lɛ ateŋ mɔ kome kɛɛ: “Awula, ofainɛ bɔɔ mɔdɛŋ ni oyasara klas ni ji ekpaa lɛ. Amɛsumɔɔ ni amɛyi wɔ daa nɛɛ, ni enɛ teeɔ béi shi!” Tsɔɔlɔ ko wie akɛ: “Awuiyeli ji sane yitso ko ni he hiaa. Bei babaoo he miihia wɔ koni wɔkɛ susu sane ni tamɔ nɛkɛ he.”

Ato gbɛjianɔi koni aku sɛɛ ayasara skulbii lɛ ni asusu sane yitsei tamɔ toiboo kɛ amale he. Kɛbashi amrɔ nɛɛ lɛ, nɔ ni ejɛ mli eba lɛ sa yijiemɔ waa. Amrɔ nɛɛ kɛ́ maŋsɛɛ sanekpakpa shiɛlɔ lɛ nyiɛ gbɛjegbɛ lɛ nɔ lɛ, gbekɛbii lɛ kɛ foi baŋaa lɛ, ni amɛbiɔ Biblia mli saji. Mɛi krokomɛi kɛ lɛ yatsɔɔ amɛfɔlɔi ni amɛsheee gbeyei. Kɛfata he lɛ, akɛ skulbii lɛ enyɔ ebɔi Biblia mli nikasemɔ feemɔ.