Yehowa Gbɛjianɔtoo lɛ Fiɔ Osɔɔmɔ lɛ Sɛɛ
“Mina bɔfo kroko miifiliki yɛ ŋwɛi teŋ, ni ehiɛ naanɔ sanekpakpa ni eyaajaje etsɔɔ.”—KPOJIEMƆ 14:6.
1. Aka Yehowa Odasefoi akwɛ yɛ mɛɛ gbɛ nɔ, ni mɛni hewɔ amɛje mli shweshweeshwe lɛ?
MƐNI hewɔ ehe hiaa waa akɛ wɔɔyoo nii ni Yehowa ŋwɛi gbɛjianɔtoo lɛ tsuɔ yɛ Kristofoi asɔɔmɔ nitsumɔ lɛ sɛɛfimɔ mli lɛ? Ojogbaŋŋ, ani kulɛ Yehowa Odasefoi baanyɛ atsu Nyɔŋmɔ Maŋtsɛyeli lɛ he sanekpakpa lɛ shiɛmɔ he nii yɛ jeŋ ni nyɛ̃ɛɔ wɔ nɛɛ fɛɛ mli ni Yehowa ŋwɛi tai lɛ asɛɛfimɔ bɛ mli? Odasefoi lɛ etsu shiɛmɔ nitsumɔ ni tamɔ nɛkɛ yɛ afii oha ni maŋhedɔɔ ni naa wa, yiwalɛ maŋkwramɔ gbɛjianɔtoi, jeŋ tai, kɛ amanehului srɔtoi yɔɔ mli lɛ mli. Ani kulɛ Odasefoi lɛ baanyɛ aje majimaji ateŋ hetsɛ̃, jwɛŋmɔ fɔŋ, kɛ yiwaa ni naa wa ni akɛbaa amɛnɔ shii abɔ lɛ mli kɛ́ Yehowa yelikɛbuamɔ bɛ mli?—Lala 34:8.
Yibaamɔ yɛ Jeŋ Fɛɛ Shitee-kɛ-Woo lɛ Fɛɛ Sɛɛ
2. Mɛni yɔɔ ni je amɛhe yɛ anɔkwa Kristofoi ni hi shi yɛ klɛŋklɛŋ afii oha lɛ mli lɛ kɛ mɛi ni yɔɔ ŋmɛnɛ lɛ ahe?
2 Yɛ afii ohai 20 nɛɛ mli lɛ, henyɛlɔi, ni jɛ jamɔŋ kɛ maŋkwramɔŋ lɛ fɛɛ kɛ gbɛtsiinii fɛɛ ni amɛaanyɛ etsu nii, mla naa nɔ̃ kɛ nɔ ni jeee mla naa nɔ̃, koni amɛkɛbɔ mɔdɛŋ ni amɛkɛtsĩ Yehowa nitsumɔ lɛ gbɛ loo amɛgu kwraa. Áwa nyɛmimɛi hii kɛ yei Kristofoi ayi, ámale amɛhe, áfite amɛgbɛi, ni ágbe amɛhe guɔ,—ágbe amɛteŋ mɛi pii po—bei pii lɛ yɛ Babilon Kpeteŋkpele lɛ mli osɔfoi lɛ ayisɛɛtsirɛmɔ hewɔ. Abaanyɛ awie, taakɛ awie yɛ mra be mli Kristofoi lɛ ahe lɛ, ákɛ, “nɛkɛ kufã nɛɛ wɔle akɛ awieɔ he efɔŋ yɛ he fɛɛ he.” Taakɛ Yudafoi osɔfoi ni hi shi yɛ Kristo be lɛ mli lɛ wuu waa koni amɛtsĩ esɔɔmɔ nitsumɔ lɛ naa lɛ, nakai nɔŋŋ osɔfoi lɛ kɛ mɛi ni amɛkwa hemɔkɛyeli lɛ, ni kɛ amɛ maŋkwramɔŋ hemɛi lɛ efee ekome lɛ, ebɔ mɔdɛŋ koni amɛgbe Yehowa webii odaseyeli nitsumɔ kpeteŋkpele ni tsɔseɔ mɔ lɛ.—Bɔfoi lɛ Asaji 28:22; Mateo 26:59, 65-67.
3. Mɛni wɔbaanyɛ wɔkase kɛjɛ emuuyeli mli ni Henryka Żur hiɛ lɛ mli?
3 Okɛ nɔ ni ba yɛ Poland yɛ March 1, 1946 lɛ afee nɔkwɛmɔnɔ. Henryka Żur, Odasefonyo gbekɛ yoo ni eye afii 15, ni jɛ Chelm ni bɛŋkɛ lɛ fata Odasefonyo kroko, ni ji nyɛminuu ko he kɛyasara mɛi ni yɔɔ wiemɔ lɛ he miishɛɛ yɛ akrowa ko ni bɛŋkɛ jɛmɛ lɛ mli. Katolikbii ni amɛfee amɛhe asraafoi akuu ni atsɛɔ amɛ Narodowe Siły Zbrojne (Maŋ Asraafoi Ata) lɛ mɔmɔ amɛ. Ayi nyɛminuu lɛ waa diɛŋtsɛ, shi enyɛ ejo foi kɛhere lɛ diɛŋtsɛ eyiwala. Shi jeee nakai eba lɛ yɛ Henryka gbɛfaŋ. Afee lɛ niseniianii ni yɔɔ gbeyei ŋmɛlɛtswai babaoo, koni efee Katolik okadi ni ji krɔɔs lɛ. Mɛi ni feɔ lɛ niseniianii lɛ ateŋ mɔ kome kɛɛ: “Obaanyɛ omɔ nɔ fɛɛ nɔ ni osusuɔ lɛ mli, shi feemɔ Katolik krɔɔs okadi lɛ pɛ. Kɛ jeee nakai lɛ, tuŋtɛ miimɛ bo!” Ani emuuyeli mli ni ehiɛ lɛ gbɔjɔ? Dabi. Jamɔ mli feetɔi lɛ gbala lɛ kɛtee koo ko ni bɛŋkɛ jɛmɛ lɛ mli ni amɛtswa lɛ tu yɛ jɛmɛ. Kɛlɛ, eye kunim! Amɛnyɛɛɛ ni amɛkumɔ emuuyeli mli ni ehiɛ lɛ.a—Romabii 8:35-39.
4. Maŋkwramɔŋ kɛ jamɔŋ hemɛi lɛ ebɔ mɔdɛŋ akɛ amɛaaba Maŋtsɛyeli shiɛmɔ nitsumɔ lɛ shi yɛ mɛɛ gbɛ nɔ?
4 Nɔ ni fe afii oha nɛ, ni akɛ Nyɔŋmɔ tsuji ni yɔɔ ŋmɛnɛŋmɛnɛ beaŋ lɛ eye dɛŋdɛŋ yɛ gbɛ ni bulɛ bɛ mli nɔ. Akɛni Yehowa Odasefoi jeee Satan jamɔi wuji lɛ ateŋ mɛi komɛi ni amɛsumɔɔɔ ni amɛfeɔ nakai hu hewɔ lɛ, abuɔ amɛ akɛ mɛi ni esa akɛ mɔ fɛɛ mɔ ni yɔɔ amɛhe jwɛŋmɔ fɔŋ loo ekɛ sɛkɛyeli teɔ shi woɔ amɛ lɛ awie ashi amɛ. Maŋkwramɔŋ hemɛi lɛ kɛ hiɛdɔɔ etutua amɛ. Odasefoi pii egboi akɛ lá odasefoi yɛ amɛhemɔkɛyeli hewɔ. Maji ni akɛɛ atsɛɔ amɛ demokrasei lɛ po ebɔ mɔdɛŋ akɛ amɛaatsĩ sanekpakpa lɛ shiɛmɔ naa. Mra mli yɛ afi 1917 tɔŋŋ yɛ Canada kɛ United States ni osɔfoi lɛ kanya maŋjwaa he naafolɔmɔi amɛshi Biblia Kaselɔi lɛ, taakɛ ale Odasefoi lɛ yɛ nakai bei lɛ amli lɛ. Awo Buu Mɔɔ Asafo lɛ mli onukpai lɛ tsuŋ yɛ gbɛ ni ejaaa nɔ, ni yɛ sɛɛ mli dani aŋmɛɛ amɛhe akɛ mɛi ni sane ko bɛ amɛhe.—Kpojiemɔ 11:7-9; 12:17.
5. Mɛɛ wiemɔi efee nɔ ni ewo Yehowa tsuji ahewalɛ?
5 Satan kɛ gbɛ̀i srɔtoi fɛɛ ni eeenyɛ etsu nii koni ekɛbɔ mɔdɛŋ ni ekɛtsĩ Kristo nyɛmimɛi lɛ kɛ amɛ hefatalɔi anɔkwafoi lɛ odaseyeli nitsumɔ lɛ naa. Ni kɛlɛ, taakɛ niiashikpamɔi babaoo tsɔɔ lɛ, amɛhegbeyeiwoo, nijiaŋwujee, gbɔmɔtsoŋ awuiyeli, tsuŋwoi, gbokɛlɛfoi ansaraiaŋ, loo gbele po muako Yehowa Odasefoi anaa. Ni nɛkɛ sane lɛ ji yɛ yinɔsane bei fɛɛ mli. Elisha wiemɔi lɛ etsu nii akɛ hewalɛwoo nɔ yɛ be kɛ bei amli akɛ: “Kaashe gbeyei; ejaakɛ mɛi ni kɛ wɔ yɔɔ lɛ fa fe mɛi ni kɛ amɛ yɔɔ lɛ.” Yiŋtoo kome ji akɛ, ŋwɛibɔfoi anɔkwafoi lɛ ayi fa fe Abonsam tai lɛ!—2 Maŋtsɛmɛi 6:16; Bɔfoi lɛ Asaji 5:27-32, 41, 42.
Yehowa Jɔ́ɔ Shiɛmɔ kɛ Ekãa Nɔ
6, 7. (a) Mɛɛ mɔdɛŋ abɔ yɛ mra mli koni ashiɛ sanekpakpa lɛ? (b) Mɛɛ tsakemɔ ni he yɔɔ sɛɛnamɔ ba ni je shishi yɛ afi 1943?
6 Yɛ afii ohai 20 lɛ mli lɛ, Yehowa Odasefoi kɛ nileei babaoo ni etee hiɛ yɛ tsɔnei ahe nitsumɔ mli lɛ etsu nii koni amɛkɛha odaseyeli nitsumɔ kpeteŋkpele lɛ ashwere ni eya hiɛ kɛ foi dani naagbee lɛ aba. Yɛ afi 1914 mli tɔŋŋ ni Pastor Russell, Buu Mɔɔ Biblia kɛ Woji Bibii Asafo lɛ klɛŋklɛŋ sɛinɔtalɔ lɛ wo mfonirii kɛ sinii ni damɔ Biblia mli saji anɔ ni awieɔ he ni yɔɔ gramafon plɛtei anɔ ni kɛ lɛ yaa pɛpɛɛpɛ, ni heɔ ŋmɛlɛtswai kpaanyɔ, ni atsɛɔ lɛ ‘Photo-Drama of Creation’ lɛ he hewalɛ. Eha mɛi ni bakwɛ enɛ yɛ maji pii anɔ lɛ anaa kpɛ amɛhe yɛ nakai bei lɛ amli. Yɛ sɛɛ mli, yɛ afi 1930 kɛ afi 1940 afii lɛ amli lɛ, abale Odasefoi lɛ yɛ amɛ gramafon kɛ enɔ plɛtei ni Biblia mli wiemɔi ni J. F. Rutherford, Asafo lɛ sɛinɔtalɔ ni ji enyɔ lɛ wiemɔi yɔɔ nɔ ni atswaa yɛ shia kɛ shia lɛ hewɔ.
7 Yɛ afi 1943 mli lɛ, akɛ ekãa fee nɔ ko yɛ Nathan H. Knorr, ni ji Asafo lɛ sɛinɔtalɔ ni ji etɛ lɛ gbɛtsɔɔmɔ shishi, beni akpɛ yiŋ akɛ abaafee skul aha sɔɔlɔi ni yɔɔ asafo fɛɛ asafo mli lɛ. Abaatsɔse Odasefoi lɛ ni amɛshiɛ ni amɛtsɔɔ nii yɛ shia kɛ shia ni gramafon nɔ plɛtei bɛ mli. Kɛjɛ nakai be lɛ mli kɛbaa nɛɛ, ato skul srɔtoi krokomɛi ahe gbɛjianɔ koni akɛtsɔse maŋsɛɛ sanekpakpa shiɛlɔi, be-fɛɛ sɔɔlɔi ni ji gbɛgbalɔi, asafo mli onukpai kɛ nɔkwɛlɔi ni gbɛnaa nii jwere amɛnɔ yɛ Buu Mɔɔ Asafo lɛ nitsumɔhe niji lɛ amli. Mɛni ejɛ mli kɛba?
8. Yɛ mɛɛ gbɛ nɔ Odasefoi lɛ jie hemɔkɛyeli ni da waa kpo yɛ afi 1943?
8 Yɛ afi 1943, beni Jeŋ Ta II yaa nɔ lɛ, no mli lɛ Odasefoi 129,000 pɛ shiɛɔ yɛ shikpɔji 54 nɔ. Ni kɛlɛ, amɛyɛ hemɔkɛyeli kɛ faishitswaa akɛ Mateo 24:14 baaba mli dani naagbee lɛ baaba. Amɛheɔ amɛyeɔ akɛ Yehowa baaha ajaje kɔkɔbɔɔ shɛɛ sane ni he hiaa lɛ atsɔɔ klɛŋklɛŋ dã, dani saji ni baatsara nɔ aba ni kɛ nibii agbɛjianɔtoo ni ekpɔtɔ nɛɛ baaba enaagbee lɛ aba. (Mateo 24:21; Kpojiemɔ 16:16; 19:11-16, 19-21; 20:1-3) Ani awo amɛ mɔdɛŋbɔi lɛ ahe nyɔmɔ?
9. Mɛɛ anɔkwa saji tsɔɔ akɛ odaseyeli nitsumɔ lɛ eshwere?
9 Kɛ hoo lɛ, maji 13 yɛ bianɛ ni yɔɔ Odasefoi ni yɔɔ ekãa fe 100,000. Maji nɛɛ ateŋ babaoo ji he ni Katolik Sɔlemɔ lɛ yeɔ nɔ yɛ. Shi kɛlɛ, kwɛmɔ bɔ ni shihilɛ lɛ yɔɔ. Brazil yɛ sanekpakpa shiɛlɔi 450,000, ni mɛi ni fe 1,200,000 ba Kristo gbele lɛ Kaimɔ lɛ shishi yɛ afi 1997. Mexico ji nɔkwɛmɔnɔ kroko, amɛyɛ Odasefoi ni miihe ashɛ 500,000, ni mɛi ni fe 1,600,000 ba Kaimɔ lɛ yeli shishi. Katolik maji krokomɛi ji Italy (Odasefoi aaafee 225,000) yɛ jɛmɛ, France (aaafee 125,000), Spain (amɛfe 105,000), kɛ Argentina (fe 115,000). Yɛ United States, he ni Protestant, Katolik, kɛ Yudafoi ajamɔi fa yɛ lɛ, Odasefoi ni yɔɔ jɛmɛ lɛ aaafee 975,000 ni mɛi ni fe 2,000,000 ba Kaimɔ lɛ shishi. Yɛ anɔkwale mli lɛ, asafoi babaoo miiho yuu kɛmiije kpo kɛmiijɛ Babilon Kpeteŋkpele lɛ ni ji jeŋ apasa jamɔ maŋtsɛyeli lɛ kɛ eteemɔŋ tsɔɔmɔi lɛ amli, ni amɛmiitsɔ amɛhe kɛmiiba Nyɔŋmɔ shiwoi ni mli kã shi faŋŋ ni ji anɔkwale ni kɔɔ “ŋwɛi hee kɛ shikpɔŋ hee” lɛ he lɛ he.—2 Petro 3:13; Yesaia 2:3, 4; 65:17; Kpojiemɔ 18:4, 5; 21:1-4.
Gbɔmɛi lɛ Ahiamɔ Nii ni Atsakeɔ He Awoɔ Mli
10. Shihilɛi etsake yɛ hei komɛi yɛ mɛɛ gbɛ nɔ?
10 Aná mɛi ni amɛtsɔ Kristo Yesu nɔ kɛba Yehowa ŋɔɔ lɛ ateŋ mɛi pii yɛ shia kɛ shia. (Yohane 3:16; Bɔfoi lɛ Asaji 20:20) Shi akɛ gbɛ̀i krokomɛi etsu nii. Shihilɛi etsake, ni bɔ ni shika helɛtemɔ shihilɛi lɛ yɔɔ hewɔ lɛ, yei pii miitsu nii agbɛnɛ. Bei pii lɛ gbɔmɛi fioo ko pɛ anyɛɔ anaa amɛ yɛ shia yɛ otsi lɛ mli. No hewɔ lɛ, Yehowa Odasefoi etsake amɛhe kɛwo shihilɛ lɛ mli. Taakɛ Yesu kɛ mra be mli kaselɔi lɛ ji lɛ, amɛyaa he ni amɛbaana gbɔmɛi lɛ yɛ, yɛ be ni amɛbaana amɛ lɛ mli.—Mateo 5:1, 2; 9:35; Marko 6:34; 10:1; Bɔfoi lɛ Asaji 2:14; 17:16, 17.
11. Nɛgbɛ Yehowa Odasefoi shiɛɔ yɛ ŋmɛnɛ, ni mɛni ejɛ mli eba?
11 Odasefoi lɛ miiŋɔ hegbɛ lɛ ni amɛkɛ ŋaa miishiɛ kɛmiiha gbɔmɛi yɛ hei ni dara ni tsɔnei mamɔɔ, gbɛjegbɛi ahe shwapoi amli, guɔyeli nitsumɔhei, ɔfisii kɛ nitsumɔhei, skul srɔtoi amli, polisifoi anitsumɔhei, gas hɔɔmɔhei, gbɔiatoohei kɛ niyelihei, kɛ gbɛjegbɛi anɔ. Yɛ anɔkwale mli lɛ amɛshiɛɔ yɛ he fɛɛ he ni amɛbaana gbɔmɛi yɛ. Ni kɛ gbɔmɛi yɛ shia lɛ, Odasefoi lɛ yaa nɔ amɛyaa amɛŋɔɔ yɛ jɛmɛ. Nɔ ni jɛɔ shihilɛ ni átsake he awo mli kɛ gbɛ ni anyɛɔ atsuɔ he nii nɛɛ mli baa ji Biblia kasemɔ he woji babaoo ni akɛhaa. Aana mɛi ni tamɔ gwantɛŋi lɛ. Aaje Biblia mli nikasemɔ heei ashishi. Sɔɔlɔi ni ámɛtu amɛhe amɛha fe akpekpei enumɔ kɛ fã ni yɔɔ ekãa miitsu tsɔsemɔ nitsumɔ kpeteŋkpele ni da fe fɛɛ yɛ adesa yinɔsane mli nɛɛ! Ani ona hegbɛ akɛ oootsɔ amɛteŋ mɔ kome?—2 Korintobii 2:14-17; 3:5, 6.
Mɛni Kanyãa Yehowa Odasefoi?
12. (a)Yehowa miitsɔɔ ewebii anii yɛ mɛɛ gbɛ nɔ? (b) Mɛni jɛɔ nitsɔɔmɔ ni tamɔ nɛkɛ mli baa?
12 Mɛni ŋwɛi gbɛjianɔtoo lɛ tsuɔ yɛ enɛɛmɛi fɛɛ mli? Yesaia gba akɛ: “Obii lɛ fɛɛ aaafee Yehowa kaselɔi, ni maha obii lɛ hejɔlɛ babaoo.” (Yesaia 54:13) Yehowa miitsɔɔ jeŋ muu fɛɛ nyɛmifeemɔ ni efee ekome nɛɛ nii kɛmiitsɔ egbɛjianɔtoo ni anaa yɛ shikpɔŋ nɔ lɛ nɔ—yɛ Maŋtsɛyeli Asai anɔ, yɛ kpeei wuji kɛ kpeei bibii ashishi. Nɔ ni jɛɔ mli baa ji ekomefeemɔ kɛ toiŋjɔlɛ. Yehowa tsɔɔmɔ lɛ eha aná gbɔmɛi ni yɔɔ srɔto kwraa, átsɔse amɛ koni amɛsumɔ amɛhe kɛ amɛnanemɛi tamɔ amɛ diɛŋtsɛ amɛhe, amɛkanyɛ̃ amɛnanemɛi, yɛ he fɛɛ he ni amɛaahi yɛ jeŋ ni jieɔ nii amli ni mli egbala nɛɛ mli.—Mateo 22:36-40.
13. Te wɔɔfee tɛŋŋ wɔná nɔmimaa akɛ ŋwɛibɔfoi agbɛtsɔɔmɔ fata shiɛmɔ nitsumɔ lɛ he?
13 Suɔmɔ ji nɔ ni kanyaã Yehowa Odasefoi koni amɛya nɔ amɛshiɛ yɛ shikpilikpiifeemɔ loo yiwaa fɛɛ sɛɛ. (1 Korintobii 13:1-8) Amɛle akɛ aakudɔ amɛ yiwalaheremɔ nitsumɔ lɛ kɛmiijɛ ŋwɛi, taakɛ Kpojiemɔ 14:6 tsɔɔ lɛ. Mɛni ji shɛɛ sane ni ajajeɔ yɛ ŋwɛibɔfoi agbɛtsɔɔmɔ shishi lɛ? “Nyɛshea Nyɔŋmɔ gbeyei ni nyɛkɛ anunyam ahaa lɛ, ejaakɛ ekojomɔ ŋmɛlɛtswaa lɛ eshɛ; ni nyɛjaa mɔ ni fee ŋwɛi kɛ shikpɔŋ kɛ ŋshɔ kɛ nubui ni baa lɛ.” Maŋtsɛyeli sanekpakpa lɛ shiɛmɔ wóɔ Yehowa gbɛi lɛ nɔ. Aafɔ̃ nine aatsɛ gbɔmɛi koni amɛkɛ anunyam abaha Bɔlɔ lɛ, Nyɔŋmɔ, shi jeee bɔɔnii kɛ sutsakemɔ ni bɛ gbɛtsɔɔmɔ. Ni mɛni hewɔ shiɛmɔ nitsumɔ lɛ he hiaa waa nakai lɛ? Ejaakɛ kojomɔ ŋmɛlɛtswaa lɛ eshɛ—kojomɔ ni akɛbaa Babilon Kpeteŋkpele lɛ kɛ Satan nibii agbɛjianɔtoo ni anaa lɛ fãi krokomɛi fɛɛ nɔ lɛ.—Kpojiemɔ 14:7; 18:8-10.
14. Namɛi kɛ amɛhe ewo nitsɔɔmɔ he tafaa kpeteŋkpele nɛɛ mli lɛ?
14 Ajieee Kristofonyo ko kwraa ni ejɔɔ ehe nɔ kɛjɛɛɛ nɛkɛ shiɛmɔ nitsumɔ nɛɛ mli. Onukpai ni amɛdara yɛ mumɔŋ nyiɛɔ asafo lɛ shiɛmɔ nitsumɔ lɛ hiɛ. Gbɛgbalɔi ni atsɔse amɛ kɛ amɛhe woɔ nitsumɔ lɛ mli kwraa. Maŋtsɛyeli shɛɛ sane lɛ he shiɛlɔi ni yɔɔ ekãa miigbɛ sane lɛ kɛmiishwã shikpɔŋ lɛ nɔ he fɛɛ he, kɛji akɛ ŋmɛlɛtswai fioo loo babaoo amɛnyɛɔ amɛkɛshiɛɔ yɛ daa nyɔŋ nɔ.—Mateo 28:19, 20; Hebribii 13:7, 17.
15. Mɛni tsɔɔ hewalɛ ni Yehowa Odasefoi ashiɛmɔ lɛ ená?
15 Ani mɔdɛŋbɔɔ nɛɛ fɛɛ ená je lɛ nɔ hewalɛ? Odaseyeli kome ni yɔɔ faŋŋ akɛ éfee nakai ji shii abɔ ni akɛ Yehowa Odasefoi baa TV nɔ saji amli kɛ adafitswaa woji amli lɛ. Enɛɛmɛi maa hekãmɔ kɛ faishitswaa akɛ wɔnine aaashɛ mɔ fɛɛ mɔ nɔ lɛ nɔ mi yɛ bei pii amli. Hɛɛ, ekãa ni wɔyɔɔ lɛ kɛ na ni anaa wɔ be fɛɛ be lɛ kaa gbɔmɛi ajwɛŋmɔ mli, kɛji akɛ gbɔmɛi ni fa po kpoo shɛɛ sane lɛ kɛ bɔfoi ni atsu amɛ lɛ!
Ekãa ni Wɔyɔɔ akɛ Wɔɔgbe Odaseyeli lɛ Naa
16. Mɛɛ su esa akɛ ajie lɛ kpo agbɛnɛ yɛ be kuku ni eshwɛ lɛ mli?
16 Wɔleee bei abɔ ni eshwɛ lolo kɛha nibii agbɛjianɔtoo nɛɛ, ni asaŋ ehe ehiaaa ni wɔle hu, bei abɔ ni yiŋtoo ni wɔkɛsɔmɔɔ Yehowa lɛ yɔɔ krɔŋŋ lɛ. (Mateo 24:36; 1 Korintobii 13:1-3) Shi wɔle akɛ, bɔni afee ni Yehowa suɔmɔ, hewalɛ, kɛ jalɛsaneyeli aje kpo lɛ, “ja” ashiɛ sanekpakpa lɛ atsɔɔ dã. (Marko 13:10) No hewɔ lɛ, yɛ bei abɔ ni ekolɛ wɔkɛ hehiamɔ emɛ yiwalɛ kɛ awuiyeli jeŋ ni yeee sane ni ja nɛɛ naagbee lɛ fɛɛ sɛɛ lɛ, esa akɛ wɔkɛ ekãa ahi shi yɛ wɔ henɔjɔɔmɔ lɛ naa bɔ ni wɔshihilɛi aaaŋmɛ wɔ gbɛ. Ekolɛ wɔgbɔlɔ aloo wɔhe miiye, shi wɔbaanyɛ ni wɔkɛ ekãa ni wɔyɔɔ yɛ gbii ni wɔji obalahii kɛ obalayei ni wɔyɔɔ hewalɛ lɛ amli lɛ asɔmɔ Yehowa lolo. Ekolɛ wɔnyɛɛɛ wɔye bei pii yɛ sɔɔmɔ nitsumɔ lɛ mli taakɛ wɔfeɔ tsutsu lɛ, shi kɛlɛ wɔbaanyɛ wɔhiɛ yijiemɔ afɔle ni wɔshãa wɔhaa Yehowa lɛ hilɛ lɛ mli lolo.—Hebribii 13:15.
17. Gbaa niiashikpamɔ ko ni woɔ mɔ hewalɛ ni baanyɛ aye abua wɔ fɛɛ.
17 No hewɔ lɛ, kɛji akɛ wɔji gbekɛbii loo wɔdara lɛ, nyɛhaa wɔjiea ekãa kpo, ni wɔkɛ wɔ jeŋ hee lɛ he sanekpakpa lɛ aha mɔ fɛɛ mɔ ni wɔkɛkpeɔ. Nyɛhaa wɔtamɔa gbekɛ yoo ni eye afii kpawo ni hiɛ gboɔ nii ni yɔɔ Australia ni kɛ enyɛ tee shwapo ko mli lɛ. Enu bɔ ni ehe hiaa ni mɔ fɛɛ mɔ ashiɛ lɛ yɛ Maŋtsɛyeli Asa lɛ nɔ, no hewɔ lɛ ekɛ woji bibii ni akɛkaseɔ Biblia lɛ enyɔ wo ebaagi mli. Beni enyɛ heɔ nii yɛ shwapo ko okpɔlɔ nɔ lɛ, gbekɛ yoo lɛ tsɔ̃ he kroko. Beni enyɛ taoɔ lɛ lɛ, naa lɛ ni ekɛ wolo bibioo ko miiha awula ko! Nyɛ lɛ tee jɛmɛ ni eyakpa awula lɛ naa ni ebi lɛ egba lɛ he fai. Shi no mli lɛ awula lɛ kɛ mlihilɛ ehe wolo bibioo lɛ. Beni nyɛ lɛ kɛ ebiyoo lɛ pɛ yɔɔ he ko lɛ, ebi lɛ bɔ ni fee ni ena ekãa ni ekɛ gbɔ lɛ wie lɛ. “Mikɛɛ kɛkɛ akɛ, Ósaa ohe, Ófee klalo, Yaa! Kɛkɛ ni mitee!”
18. Te wɔɔfee tɛŋŋ wɔjie mumɔ ni sa yijiemɔ kpo?
18 Ehe miihia ni wɔ fɛɛ wɔna su ni tamɔ Australia gbekɛ yoo lɛ nɔ̃ lɛ, titri lɛ bɔni afee ni wɔkɛ sanekpakpa lɛ aya gbɔi kɛ maŋ onukpai aŋɔɔ. Ekolɛ wɔbaashe gbeyei akɛ abaakpoo wɔ. Nyɛkahaa wɔhiɛ kpaa nɔ ni Yesu wie lɛ nɔ: “Nyɛkagbaa nyɛhe naa yɛ bɔ ni loo nɔ ni nyɛkɛaajie nyɛnaa loo nɔ ni nyɛaakɛɛ lɛ he; ejaakɛ nɔ ni sa akɛ nyɛkɛɛ lɛ, Mumɔ krɔŋkrɔŋ lɛ aaatsɔɔ nyɛ yɛ nakai ŋmɛlɛtswaa lɛ nɔ nɔŋŋ.”—Luka 12:11, 12.
19. Te osusuɔ osɔɔmɔ nitsumɔ lɛ he ohaa tɛŋŋ?
19 No hewɔ lɛ, okɛ ohe afɔ̃ Nyɔŋmɔ mumɔ lɛ yelikɛbuamɔ nɔ yɛ be mli ni okɛ sanekpakpa lɛ yaa gbɔmɛi aŋɔɔ yɛ mlihilɛ mli lɛ. Bei pii lɛ akpekpei abɔ kɛ amɛhiɛ fɔ̃ɔ hii kɛ yei ni esaaa, ni yɔɔ biɛ ŋmɛnɛ ni wɔ lɛ amɛbɛ lɛ anɔ. Wɔkɛ wɔhiɛ fɔ̃ɔ Yehowa kɛ eŋwɛi gbɛjianɔtoo lɛ—Kristo Yesu, ŋwɛibɔfoi krɔŋkrɔŋi lɛ, kɛ Kristofoi ni afɔ amɛ mu ni atee amɛ shi lɛ—ni yɔɔ wala mli daa lɛ anɔ! No hewɔ lɛ kaimɔ akɛ: “Mɛi ni kɛ wɔ yɔɔ lɛ fa fe mɛi ni kɛ amɛ yɔɔ lɛ.”—2 Maŋtsɛmɛi 6:16.
[Shishigbɛ niŋmai]
a Kɛha nɔkwɛmɔnii krokomɛi lolo lɛ, kwɛmɔ 1994 Yearbook of Jehovah’s Witnesses wolo lɛ baafai 217-220.
Te Ohaa Hetoo Tɛŋŋ?
◻ Mɛni Nyɔŋmɔ ŋwɛi gbɛjianɔtoo lɛ etsu yɛ Yehowa webii ayibaamɔ mli?
◻ Mɛɛ maŋkwramɔŋ kɛ jamɔŋ hemɛi etutua Yehowa Odasefoi yɛ afii ohai 20 lɛ mli?
◻ Yɛ mɛɛ gbɛ nɔ Yehowa Odasefoi etsake amɛnitsumɔ lɛ mli koni amɛkɛtsu bei lɛ amli hiamɔ nii ahe nii?
◻ Mɛni kanyãa bo koni oshiɛ?
[Mfoniri ni yɔɔ baafa 17]
Henryka Żur
[Mfonirii ni yɔɔ baafa 18]
Japan
Martinique
United States
Kenya
United States
Yehowa Odasefoi shiɛɔ be fɛɛ be yɛ he fɛɛ he ni aaana gbɔmɛi yɛ
[Mfoniri ni yɔɔ baafa 20]
Yɛ afii oha nɛɛ shishijee mli lɛ, akɛ gramafon tsu nii ni akɛgbɛ Maŋtsɛyeli shɛɛ sane lɛ ashwã