Kaaha Yeyeeyefeemɔ Miiye Onɔ
“NYƐKAHAOA nyɛhe nyɛtoa wɔ́; ejaakɛ wɔ́ diɛŋtsɛ aaahao yɛ enii ahe. Gbi fɛɛ gbi nɔ efɔŋ lɛ fá ha lɛ.” (Mateo 6:34) Eka shi faŋŋ akɛ, wɔ fɛɛ ni wɔyɔɔ ŋmɛnɛŋmɛnɛ shihilɛ mli ní nibii yaa hiɛ oyayaayai kɛ emli nɔnyɛɛ lɛ mli lɛ baanyɛ wɔkɛ nakai ŋaawoo ni Yesu Kristo kɛha lɛ atsu nii.
Shi yɛ anɔkwale mli lɛ, ani wɔbaanyɛ wɔhi shi ni wɔfeee yeyeeye yɛ wɔ naagbai, wɔyiŋkpɛi, nitsumɔi ni kã wɔnɔ, kɛ wɔgbɛnaa nii ahe? Gbɔmɛi akpekpei abɔ nuɔ he akɛ amɛbɛ miishɛɛ, amɛhao, ni amɛtere jatsu ni tsii. No hewɔ ni tsofai ni jɔɔ jwɛŋmɔŋ henumɔi ahe kɛ tsofai ni jɔɔ henumɔi ahe etsɔmɔ nitsumɔ ni anáa dɔlai akpekpei toi akpekpei abɔ yɛ mli lɛ.
He ni Esa akɛ Afo Husu lɛ Afɔ̃
Ehe miihia koni wɔto nitsumɔi ni kã wɔnɔ, nibii ni wɔbaafee, wɔyiŋkpɛi, kɛ wɔnaagbai ahe gbɛjianɔ ni wɔsaa wɔhe kɛha nomɛi—kɛ́ amɛhe miihia amrɔ nɔŋŋ loo yɛ gbɛ kroko nɔ jio. Biblia lɛ woɔ wɔ hewalɛ koni ‘wɔta shi, ni wɔbu naa wɔkwɛ dã’ dani wɔje nitsumɔ wulu ko shishi. (Luka 14:28-30) Nɔ ni fata enɛ he ji nibii ni yɔɔ lɛ amlihalamɔ, nɔ ni baanyɛ ajɛ mli aba lɛ mlipɛimɔ, kɛ nɔ ni wɔbaalaaje yɛ be, hewalɛ kɛ shika gbɛfaŋ lɛ ni wɔɔbu naa wɔkwɛ.
Yɛ be mli ni esa akɛ mɔ lɛ asusu nɔ ni baanyɛ ajɛ mli aba lɛ he jogbaŋŋ lɛ, ejeee nɔ ni abaanyɛ afee aloo nɔ ni baatsu nii akɛ aaabɔ mɔdɛŋ ni asusu nɔ fɛɛ nɔ ni baanyɛ aba lɛ he. Ákɛ nɔkwɛmɔnɔ lɛ, yɛ weku lɛ shweshweeshwefeemɔ hewɔ lɛ, ekolɛ obaasusu nɔ ni obaafee he kɛ́ la je yɛ oshia. Ekolɛ obaahe tsɔnei ni gbɛɛɔ kɛ́ lasu bote mli koni okɛwo oshia lɛ mli kɛ nibii ni akɛgbeɔ la. Ekolɛ obaato hei srɔtoi ni yɔɔ shia lɛ mli ni abaanyɛ atsɔ jɛmɛ kɛje kpo lɛ ahe gbɛjianɔ ni nyɛbaaka nyɛkwɛ. Shi mɛɛ be gbɛjianɔtoo ni jwɛŋmɔ yɔɔ mli ni anyɛɔ akɛtsuɔ nii lɛ baa naagbee, ni yeyeeyefeemɔ babaoo ni amako nɔ mi jeɔ shishi? Yeyeeyefeemɔ ni tamɔ nɛkɛ baa beni ojeɔ shishi ohaa shihilɛ mli nibii ni osusu akɛ ebaanyɛ eba ni fa babaoo ni bɛ naagbee lɛ ahe jwɛŋmɔ gbaa onaa lɛ, ní babaoo yɛ ni ekolɛ ejɛɔ yiŋsusumɔ babaoo mli kɛbaa lɛ. Ekolɛ susumɔi ni gbaa mɔ naa baaye onɔ, ni ebaaha oná nɔmimaa akɛ ekolɛ oku ohiɛ oshwie nɔ ko nɔ aloo ofeko nɔ ko tsɔ̃ ni okɛaabu oweku lɛ he. Nɛkɛ yeyeeyefeemɔ ni okɛpiŋɔ ohe nɛɛ baanyɛ anyɛ ojwɛŋmɔ nɔ waa diɛŋtsɛ aahu akɛ ekolɛ onyɛŋ owɔ yɛ no hewɔ.
Mose yɛ Farao Hiɛ
Yehowa Nyɔŋmɔ kɛ nitsumɔ ni wa ha egbalɔ Mose. Klɛŋklɛŋ lɛ, ehe bahia ni Mose ayapue yɛ Israelbii lɛ ahiɛ ni ekɔne amɛyiŋ akɛ Yehowa ehala lɛ koni enyiɛ amɛhiɛ kɛshi Mizraim. No sɛɛ lɛ, ehe bahia ni Mose ayapue yɛ Farao hiɛ ni ebi koni eha Israelbii lɛ aya. Yɛ naagbee lɛ, ehe bahia ni Mose anyiɛ asafo babaoo ni amɛyifalɛ shɛɔ akpekpei abɔ lɛ ahiɛ kɛtsɔ ŋa lɛ nɔ kɛya shikpɔŋ ko ni henyɛlɔi yɔɔ nɔ lɛ nɔ. (2 Mose 3:1-10) Kulɛ enɛɛmɛi fɛɛ baafee nɔ ni woɔ mɔ he gbeyei fe fɛɛ, shi ani Mose ŋmɛ gbɛ koni gbɛnaa nii nɛɛ kɛ yeyeeyefeemɔi ni esaaa agba ejwɛŋmɔ naa?
Eka shi faŋŋ akɛ, saji babaoo komɛi miigba Mose naa. Ebi Yehowa akɛ: “Naa, mi lɛ, kɛ́ mitee Israelbii lɛ aŋɔɔ, ni mikɛɛ amɛ akɛ: Nyɛtsɛmɛi a-Nyɔŋmɔ lɛ tsu mi nyɛŋɔɔ nɛɛ, ni amɛaabi mi akɛ: Te egbɛiŋ? lɛ, te mikɛɛ amɛ tɛŋŋ?” Yehowa ha lɛ hetoo. (2 Mose 3:13, 14) Nɔ ni baanyɛ aba kɛ́ Farao sumɔŋ ni ehe lɛ eye hu miigba Mose naa. Yehowa ha gbalɔ lɛ hetoo ekoŋŋ. Naagbee naagba kome—Mose kpɛlɛ nɔ akɛ ‘enaa tseee.’ Te abaafee tɛŋŋ ajaje enɛ? Yehowa kɛ Aaron ha koni ewie eha Mose.—2 Mose 4:1-5, 10-16.
Akɛni Mose kɛ saji ni abaabi lɛ lɛ ahetooi esaa ehe ni eyɛ Nyɔŋmɔ mli hemɔkɛyeli hewɔ lɛ, etee nɔ efee taakɛ Yehowa efã lɛ lɛ. Yɛ nɔ najiaŋ ni ekɛ nɔ ni baanyɛ aba kɛ́ ekɛ Farao yakpe lɛ he susumɔi gbeyeigbeyei aaapiŋ ehe moŋ lɛ, Mose ‘fee bɔ pɛ ni akɛɛ lɛ lɛ pɛpɛɛpɛ.’ (2 Mose 7:6) Eji eŋmɛ gbɛ ni yeyeeyefeemɔi ye enɔ kulɛ, enɛɛmɛi hu baagbɔjɔ hemɔkɛyeli kɛ ekãafeemɔ ni he hiaa ni ekɛaatsu nii lɛ.
Gbɛ ni ŋmɛɔ pɛpɛɛpɛ ni Mose kɛtsuɔ enitsumɔ lɛ he nii lɛ ji nɔ ni bɔfo Paulo tsɛ lɛ akɛ “jwɛŋmɔ ni sa” lɛ he nɔkwɛmɔnɔ. (2 Timoteo 1:7; Tito 2:2-6) Eji Mose kɛ jwɛŋmɔ ni sa tsuuu nii kulɛ, bɔ ni enitsumɔ lɛ da waa ha lɛ baaye enɔ kwraa yɛ gbɛ ni waaa nɔ ni ekolɛ ekpɛlɛŋ nɔ.
Osusumɔi lɛ ni Oooye Nɔ
Te ofeɔ onii ohaa tɛŋŋ, kɛ́ okɛ ohemɔkɛyeli lɛ he kaai loo amanehului kpe yɛ odaa gbi shihilɛ mli? Ani otsui fãa, ni osusuɔ gbɛtsii nii kɛ kaai babaoo ni baajɛ mli aba lɛ he kɛkɛ? Aloo ani obuɔ amɛ yɛ gbɛ ni ŋmɛɔ pɛpɛɛpɛ nɔ? Taakɛ mɛi komɛi aaakɛɛ lɛ, ‘Kaatsɔ faahiɛagba lɛ nɔ ja obɛŋkɛ he.’ Yɛ fɛɛ sɛɛ lɛ, ekolɛ ehe ebahiaŋ ni atsɔ faahiɛagba ni afeɔ he mfoniri yɛ jwɛŋmɔŋ lɛ nɔ! No hewɔ lɛ, mɛni hewɔ esa akɛ okɛ nɔ ko ni baŋ mli kɔkɔɔkɔ lɛ apiŋ ohe? Biblia lɛ kɛɛ: “Gbɔmɔ tsui mli ŋkɔmɔyeli haa edɔɔ kɔmɔɔ.” (Abɛi 12:25) Bei pii lɛ nɔ ni jɛɔ mli baa ji ni mɔ lɛ baatsi yiŋkpɛɛfeemɔ eto, ni eha nibii ahi shi nakai kɛyashi beni eeekpe sɛɛ tsɔ̃.
Nɔ ni hiɛdɔɔ yɔɔ he babaoo ji mumɔŋ naagba ni yeyeeyefeemɔ ni esaaa baanyɛ ekɛba. Yesu Kristo tsɔɔ akɛ hewalɛ ni ninámɔ kɛlakaa mɔ kɛ “je nɛŋ he naagbamɔ” lɛ baanyɛ agbe hiɛsɔɔ ni ayɔɔ kɛha “maŋtsɛyeli lɛ he wiemɔ lɛ” kwraa. (Mateo 13:19, 22) Taakɛ bɔ ni ŋmei baanyɛ atsĩ tsei ni atɛo lɛ naa koni amɛkadara ni amɛwo yibii lɛ, nakai nɔŋŋ yeyeeyefeemɔ ni anyɛɛɛ nɔ aye lɛ baanyɛ atsĩ wɔnaa koni wɔkaya hiɛ yɛ mumɔŋ ni wɔkawo yibii kɛha Nyɔŋmɔ yijiemɔ. Yeyeeyefeemɔ ni mɔ ko kɛpiŋɔ ehe ni pilaa mɔ lɛ po etee nɔ efee nɔ ni haaa mɛi komɛi ajɔɔ amɛhe nɔ amɛha Yehowa. Amɛhaoɔ akɛ, ‘Ni kɛ́ mihiii shi yɛ mihenɔjɔɔmɔ lɛ naa hu?’
Bɔfo Paulo kɛɛ wɔ akɛ, yɛ wɔmumɔŋ ta lɛ mli lɛ, wɔmiibɔ mɔdɛŋ koni ‘wɔŋɔ jwɛŋmɔ fɛɛ jwɛŋmɔ nom wɔha Kristo toiboo lɛ.’ (2 Korintobii 10:5) Wɔhenyɛlɔ ni fe fɛɛ, Satan Abonsam baaná he miishɛɛ waa akɛ ekɛ wɔnaagbai aaatsu nii bɔni afee ni ekɛje wɔnijiaŋ wui koni ekɛgbɔjɔ wɔ yɛ gbɔmɔtsoŋ, henumɔŋ kɛ mumɔŋ. Ehe esa waa diɛŋtsɛ yɛ bɔ ni ekɛ yiŋkɔshikɔshifeemɔi tsuɔ nii koni ekɛdũ mɛi ni hiɛ bɛ amɛhe nɔ lɛ mli. No hewɔ ni Paulo hu bɔ Kristofoi kɔkɔ koni ‘amɛkɛ amɛhe akafɔ̃ shi amɛha Abonsam’ lɛ. (Efesobii 4:27) Ákɛ “je nɛŋ nyɔŋmɔ lɛ,” Satan kɛ omanyeyeli “eshwila mɛi ni heee yeee lɛ ajwɛŋmɔi lɛ.” (2 Korintobii 4:4) Eba akɛ wɔŋmɛŋ gbɛ kɔkɔɔkɔ koni ekudɔ wɔjwɛŋmɔi!
Yelikɛbuamɔ Yɛ
Kɛ gbekɛ ko kɛ naagbai miikpe lɛ ebaanyɛ eya tsɛ ni yɔɔ suɔmɔ ŋɔɔ koni aha lɛ gbɛtsɔɔmɔ ni ashɛje emii. Nakai nɔŋŋ wɔbaanyɛ wɔkɛ wɔnaagbai aya wɔŋwɛi Tsɛ, Yehowa ŋɔɔ. Lɛɛlɛŋ, Yehowa fɔ̃ɔ nine etsɛɔ wɔ koni wɔshɛrɛ wɔjatsui kɛ yeyeeyefeemɔi wɔshwie enɔ. (Lala 55:23) Taakɛ gbekɛ ko haomɔi gbaaa enaa dɔŋŋ be mli ni enine eshɛ miishɛjemɔ wiemɔi anɔ kɛjɛ etsɛ ŋɔɔ lɛ ji lɛ, esaaa akɛ wɔshɛrɛɔ wɔjatsui lɛ wɔshwieɔ Yehowa nɔ kɛkɛ, shi esa akɛ wɔshi wɔha lɛ hu.—Yakobo 1:6.
Te wɔfeɔ tɛŋŋ wɔshɛrɛɔ wɔyeyeeyefeemɔi wɔshwieɔ Yehowa nɔ? Filipibii 4:6, 7 haa hetoo akɛ: “Nyɛkahaoa yɛ nɔ ko nɔ ko he, shi moŋ nɔ fɛɛ nɔ mli lɛ nyɛkɛ sɔlemɔ kɛ faikpamɔ kɛ shidaa atsĩa nyɛtutɔmɔi lɛ atã yɛ Nyɔŋmɔ hiɛ; ni Nyɔŋmɔ hejɔlɛ ni fe jwɛŋmɔi fɛɛ lɛ aaato nyɛtsuii kɛ nyɛjwɛŋmɔi lɛ yɛ Kristo Yesu mli!” Hɛɛ, Yehowa baanyɛ eha wɔ mligbɛ toiŋjɔlɛ ni buɔ wɔjwɛŋmɔi ahe kɛjɛɔ naagba ni yeyeeyefeemɔi ni esaaa kɛbaa lɛ he koni ekɛhere sɔlemɔi kɛ faikpamɔi ni wɔkɛhaa lɛ be fɛɛ be lɛ nɔ.—Yeremia 17:7, 8; Mateo 6:25-34.
Shi kɛ́ wɔbaatsu nii yɛ wɔsɔlemɔi lɛ kɛ gbeekpamɔ naa lɛ, esaaa akɛ wɔtseɔ wɔhe, kɛ́ yɛ gbɔmɔtsoŋ loo yɛ jwɛŋmɔŋ. (Abɛi 18:1) Shi moŋ, wɔbaafee jogbaŋŋ akɛ wɔɔsusu Biblia mli shishitoo mlai kɛ gbɛtsɔɔmɔi ni wieɔ wɔnaagba lɛ he lɛ he, ni kɛtsɔ no nɔ lɛ wɔkɛ wɔhiɛ efɔŋ wɔ diɛŋtsɛ wɔ nilee nɔ. (Abɛi 3:5, 6) Gbekɛbii kɛ onukpai fɛɛ baanyɛ akane Biblia lɛ kɛ Buu Mɔɔ woji lɛ kɛha saji babaoo ni kɔɔ yiŋkpɛɛfeemɔi ahe kɛ nɔ ni wieɔ naagbai ni aaatsu he nii lɛ ahe. Kɛfata he lɛ, akɛ onukpai ni le nii ni yɔɔ niiashikpamɔ kɛ Kristofoi krokomɛi ni edara yɛ mumɔŋ ni miisumɔ koni amɛkɛ wɔ awie be fɛɛ be lɛ ejɔɔ wɔ yɛ Kristofoi asafo lɛ mli. (Abɛi 11:14; 15:22) Bei pii lɛ, mɛi ni kɛ henumɔi babaoo tsuuu wɔnaagbai ahe nii, ni amɛyɔɔ Nyɔŋmɔ jwɛŋmɔ yɛ sane ko he lɛ baanyɛ aye abua wɔ koni wɔkwɛ wɔnaagbai lɛ yɛ gbɛ kroko nɔ. Ni yɛ be mli ni amɛkpɛŋ yiŋ amɛhaŋ wɔ lɛ, amɛbaanyɛ amɛfee ekãawoo kɛ sɛɛfimɔ jɛɛhe kpele.
“Okɛ Ohiɛ Afɔ̃ Nyɔŋmɔ Nɔ”
Mɔ ko mɔ ko kwraa nyɛŋ aje he ŋwane akɛ etɔɔ wɔ saŋŋ yɛ be mli ni wɔtsuɔ wɔnaagbai diɛŋtsɛ lɛ ahe nii gbi fɛɛ gbi ni wɔhaaa amɛmli awo wu kɛtsɔ ekomɛi ni wɔfeɔ he mfoniri yɛ jwɛŋmɔŋ ni wɔkɛgbaa wɔhe naa lɛ nɔ. Kɛ nɔ ni baanyɛ aba lɛ he yeyeeyefeemɔ ha wɔshe gbeyei ni wɔhe ejɔɔɔ wɔ lɛ, belɛ nyɛhaa wɔtsɔɔa wɔhe kɛyaa Yehowa ŋɔɔ yɛ sɔlemɔ kɛ faikpamɔ mli. Taomɔ e-Wiemɔ lɛ kɛ egbɛjianɔtoo lɛ sɛɛgbɛ kɛha gbɛtsɔɔmɔ, nilee, kɛ jwɛŋmɔŋ toiŋjɔlɛ. Wɔbaana akɛ, yɛ shihilɛ fɛɛ shihilɛ ni baanyɛ aba lɛ fɛɛ sɛɛ lɛ, yelikɛbuamɔ yɛ ni akɛaatsu he nii.
Beni lalatsɛ lɛ fee yeyeeye ni ehao lɛ, elá akɛ: “Mɛɛ kɔmɔɔ odɔ nɛɛ, misusuma? Ni mɛɛ yeyeeye ofee yɛ mimli nɛɛ? Okɛ ohiɛ afɔ̃ Nyɔŋmɔ nɔ! Shi majie eyi kɛ̃, mɔ ni ji mihiɛ yelikɛbuamɔ kɛ mi-Nyɔŋmɔ lɛ.” (Lala 42:12) Nyɛhaa nomɛi afea wɔhenumɔi.
Hɛɛ, too gbɛjianɔ oha nɔ ni abaanyɛ akpa gbɛ lɛ, ni oshi nɔ ni anyɛŋ akpa gbɛ lɛ owo Yehowa dɛŋ. “Nyɛŋɔa nyɛhaomɔ fɛɛ nyɛfɔ̃a enɔ, ejaakɛ lɛ ejwɛŋɔ nyɛnɔ.”—1 Petro 5:7.
[Mfoniri ni yɔɔ baafa 23]
Taakɛ David ji lɛ, ani oshɛɔ ojatsui kɛ oyeyeeyefeemɔi oshwieɔ Yehowa nɔ?