Nyɛnáa Miishɛɛ yɛ Yehowa Mli ni Nyɛmli Afilia Nyɛ
NITSUMƆ fɛɛ nitsumɔ ni he yɔɔ sɛɛnamɔ ni agbeɔ naa yɛ omanyeyeli mli lɛ kɛ miishɛɛ baa be fɛɛ be. Buu Mɔɔ Biblia Gilead Skul klas ni ji 106 lɛ nikasemɔ naagbee nifeemɔ ni afee yɛ Watchtower Educational Center ni yɔɔ Patterson, New York yɛ March 13, 1999 lɛ ji gbi ni sa kadimɔ lɛɛlɛŋ kɛha emli nikaselɔi 48 lɛ.
Nifeemɔ lɛ shishijee wiemɔ ni Theodore Jaracz, ni ji Nɔyeli Kuu lɛ mlinyo, mɔ ni gbe Gilead klas ni ji kpawo lɛ naa, kɛ nikasemɔ lɛ naagbee nifeemɔ he gbɛjianɔtoo lɛ nɔ sɛinɔtalɔ lɛ kɛha lɛ, ma wiemɔi ni yɔɔ Lala 32:11 ni ji: “Nyɛ jalɔi, nyɛmii ashɛa nyɛhe yɛ Yehowa mli, ni nyɛmli afilia nyɛ” lɛ nɔ mi. Beni etsɔɔ nɔ hewɔ ni esa akɛ mɔ fɛɛ mɔ aná miishɛɛ yɛ nɛkɛ nifeemɔ nɛɛ shishi lɛ mli lɛ, ekɛɛ akɛ: “Ejɛ nɔ ni Yehowa kɛ mɛi ni ji anɔkwafoi yɛ amɛtsui mli lɛ tsuɔ he nii lɛ hewɔ, ní wɔ Gilead nikaselɔi lɛ fata he lɛ ji nɔ ni haa wɔnáa miishɛɛ yɛ nifeemɔi ni tamɔ enɛɛmɛi ashishi.” Eyɛ mli akɛ nikaselɔi lɛ ji mɛi ni to gbɛjianɔ koni amɛnyɛ amɛba Gilead Skul lɛ ni amɛbɔ mɔdɛŋ waa koni amɛhe asa kɛha maŋsɛɛ sanekpakpa shiɛmɔ nitsumɔ lɛ moŋ, shi Yehowa ji mɔ ni ha nɔ fɛɛ nɔ nyɛ eba naagbee yɛ omanyeyeli mli. (Abɛi 21:5; 27:1) No hewɔ ni Nyɛminuu Jaracz ma nɔ mi akɛ, shishinumɔ yɛ mli akɛ ‘aaaná miishɛɛ yɛ Yehowa mli.’
Mɛi ni yɔɔ mɛi lɛ ateŋ yɛ Patterson asa lɛ nɔ ji nikaselɔi lɛ awekumɛi kɛ mɛi ni amɛfɔ̃ amɛ nine ni jɛ maji 12 nɔ kɛba koni amɛbaye nɛkɛ mlifilimɔ nifeemɔ nɛɛ he odase. Bɔ ni mɛi 5,198 ni naa ebakpe shi—ni Betel weku ni yɔɔ Brooklyn, Patterson, kɛ Wallkill ni atsɔ redio kɛ vidio nɔ aha amɛbo toi lɛ—kpa gbɛjianɔtoo ni baanyiɛ sɛɛ lɛ gbɛ lɛ, eka shi faŋŋ akɛ aná miishɛɛ waa.
Awo Amɛ Ŋaa ni Amɛhiɛ Mlifilimɔ Mumɔ lɛ Mli
Beni Nyɛminuu Jaracz muɔ ehiɛkpamɔ wiemɔ lɛ naa lɛ, efɔ̃ nine etsɛ wielɔi enumɔ ni amɛsaa Ŋmalɛ mli hewalɛwoo wiemɔi ni jeee kɛha Gilead nikaselɔi lɛ pɛ kɛkɛ, shi moŋ kɛha mɛi fɛɛ ni naa ebakpe shi lɛ ateŋ klɛŋklɛŋ mɔ.
Klɛŋklɛŋ wielɔ lɛ ji William Malenfant ni ji Gilead nikaselɔ ni gbe klas 34 lɛ naa lɛ, ni amrɔ nɛɛ eesɔmɔ akɛ yelikɛbualɔ kɛha Nitsɔɔmɔ Ajinafoi akuu ni yɔɔ Nɔyeli Kuu lɛ mli lɛ. Yɛ nɔ ni kɔɔ esaneyitso lɛ he, ni ji “ ‘Nɔ Fɛɛ Nɔ’ Jeee Yakayaka Nii!” ni damɔ Jajelɔi 1:2 lɛ nɔ lɛ, etée sanebimɔ shi akɛ: “Ani Salomo miitsɔɔ lɛɛlɛŋ akɛ nɔ fɛɛ nɔ ni yɔɔ yɛ ewiemɔ lɛ shishinumɔ naa lɛ ji yakayaka nii?” Hetoo lɛ ji: “Dabi. Eema oti ni ji adesa nitsumɔi ni kpoɔ nɔ ni nibii ni kɛ Nyɔŋmɔ suɔmɔnaa nii kpãaa gbee lɛ ji—nakai nibii lɛ fɛɛ ji yakayaka nii.” Nɔ ni tamɔɔɔ nakai lɛ, Yehowa ni ji anɔkwa Nyɔŋmɔ lɛ ni aaajá lɛ lɛ, jeee yakayaka nii; ni nakai nɔŋŋ eji yɛ Nyɔŋmɔ Wiemɔ lɛ, ni ji Biblia lɛ kasemɔ, kɛ mɛi krokomɛi ní aaatsɔɔ amɛ nii hu. Nyɔŋmɔ hiɛ kpaaa nakai mɔdɛŋ ni etsuji bɔɔ lɛ nɔ. (Hebribii 6:10) Yɛ anɔkwale mli lɛ, kɛji amanehulu po aaaba mɛi ni ená Nyɔŋmɔ hiɛ duromɔ lɛ agbɛ nɔ lɛ, no lɛ ‘aaafi amɛ afata mɛi ni yɔɔ wala lɛ ahe ato Yehowa.’ (1 Samuel 25:29) Mɛɛ sane ni haa mɔ tsui nyɔɔ emli nɛ! Ní aaakai nɛkɛ otii nɛɛ baaye abua Yehowa jálɔi fɛɛ koni amɛhiɛ mlifilimɔ mumɔ lɛ mli.
John Barr, ni ji Nɔyeli Kuu lɛ mlinyo lɛ ateŋ mɔ kome lɛ, wo klas ni egbe naa lɛ hewalɛ kɛ ewiemɔ ni ji “Ná Miishɛɛ yɛ Omaŋsɛɛ Sanekpakpa Shiɛmɔ Nitsumɔ lɛ Mli.” Etsɔɔ mli akɛ maŋsɛɛ sanekpakpa shiɛmɔ nitsumɔ lɛ ji nɔ ko ni daa nɛɛ ekã Yehowa Nyɔŋmɔ tsui nɔ. “Eji nɔ ko ni kɛ Yehowa subaŋ kɛ esuɔmɔ kpojiemɔ kɛha je lɛ yɔɔ tsakpaa. Etsu e-Bi koome lɛ kɛba shikpɔŋ nɛɛ nɔ. Yesu ji maŋsɛɛ sanekpakpa shiɛlɔ ni fe fɛɛ, klɛŋklɛŋ maŋsɛɛ sanekpakpa shiɛlɔ.” Eyɛ mli akɛ nikaselɔi lɛ baashwie amɛyiŋ yɛ tsakemɔi ni ebaabi ni Yesu afee bɔni afee ni eye omanye yɛ enitsumɔ yɛ shikpɔŋ nɔ lɛ he moŋ, shi sɛɛnamɔ ni yɔɔ Yesu maŋsɛɛ sanekpakpa shiɛmɔ nitsumɔ lɛ he lɛ kã he eyɛ lolo kɛha mɛi fɛɛ ni baasumɔ ni amɛná he sɛɛ. Nɔ hewɔ lɛ ji, taakɛ Nyɛminuu Barr jie lɛ kpo lɛ, Yesu náa miishɛɛ kɛ eetsu Nyɔŋmɔ nitsumɔ lɛ, ni esumɔɔ adesai aweku lɛ hu. (Abɛi 8:30, 31) Nyɛminuu Barr wo nikaselɔi lɛ hewalɛ ni amɛkpɛtɛ amɛ nitsumɔi lɛ ahe, jeee akɛ yɛ tsuishiŋmɛɛ sane mli shi moŋ ejaakɛ amɛyɛ he miishɛɛ akɛ amɛaafee nakai. Ekɛɛ klasbii lɛ akɛ: “Nyɛkɛ nyɛhe afɔ̃a Yehowa nɔ; ni ehaŋ nyɛnine anyɛ shi kɔkɔɔkɔ.”—Lala 55:23.GA Bible
Wielɔ ni nyiɛ sɛɛ, Lloyd Barry, ni ji Nɔyeli Kuu lɛ mlinyo kroko lɛ hala saneyitso ni ji “Ní Aaanyiɛ yɛ Yehowa Gbɛi lɛ Mli Kɛya Naanɔ.” Ákɛ mɔ ni kɛ afii 25 esɔmɔ yɛ Japan akɛ maŋsɛɛ sanekpakpa shiɛlɔ beni egbe Gilead nikasemɔ klas ni ji 11 lɛ naa lɛ, Nyɛminuu Barry gba mra be mli maŋsɛɛ sanekpakpa shiɛlɔi lɛ anitsumɔ lɛ mli niiashikpamɔi komɛi ni etsɔɔ mpoatswai ni amɛkɛbaakpe lɛ mli. Mɛɛ ŋaawoo ni anyɛɔ atsuɔ he nii eyɔɔ kɛha klas ni gbeɔ naa lɛ? “Nɔni fe fɛɛ lɛ, nyɛhiɛa nyɛ mumɔŋ shidaamɔ lɛ mli. Kɛfata he lɛ kasemɔ wiemɔ lɛ kɛ kusum lɛ. Ohiɛ ahi ojwɛŋmɔ nyɛmɔi lɛ ahe. Kpɛtɛmɔ nitsumɔ lɛ he; kaaha eetɔ bo loo ni oooŋmɛɛ he.” Nyɛminuu Barry kɛɛ nikaselɔi lɛ akɛ yɛ amɛ maŋsɛɛ nitsumɔi lɛ amli lɛ, amɛkɛ mɛi babaoo ni nyiɛɔ yɛ nyɔŋmɔi srɔtoi agbɛi amli baakpe, ni ekai amɛ Mika wiemɔi lɛ: “Majimaji lɛ fɛɛ ateŋ mɔ fɛɛ mɔ nyiɛɔ yɛ enyɔŋmɔ gbɛi amli; shi wɔ lɛ wɔɔnyiɛ yɛ Yehowa, wɔ-Nyɔŋmɔ lɛ, gbɛi amli kɛaatee naanɔi anaanɔ.” (Mika 4:5) Tsutsu maŋsɛɛ sanekpakpa shiɛlɔi lɛ anɔkwɛmɔnɔ lɛ ji hewalɛwoo lɛɛlɛŋ kɛha Nyɔŋmɔ tsuji fɛɛ koni amɛya nɔ amɛnyiɛ yɛ Yehowa gbɛi lɛ mli ni amɛsɔmɔ lɛ yɛ anɔkwayeli mli.
Mɔni nyiɛ sɛɛ yɛ gbɛjianɔtoo lɛ mli ji Gilead nitsɔɔlɔ Lawrence Bowen. Ewiemɔ ni ebaha lɛ tée sanebimɔ ni ji “Mɛni Obaatsɔɔ Akɛ Oji?” lɛ shi. Etsɔɔ akɛ omanyeyeli yɛ Nyɔŋmɔ sɔɔmɔ mli lɛ damɔ Yehowa mli hemɔkɛyeli kɛ hekɛnɔfɔɔ nɔ. Maŋtsɛ Asa he ni ekɛfɔ̃ Yehowa nɔ kwraa lɛ ha eye asraafoi akpekpe kome ni ji ehenyɛlɔi lɛ anɔ kunim kwraa. Kɛlɛ gbalɔ Azaria kai lɛ yɛ bɔ ni ehe hiaa ni eya nɔ ekɛ ehe afɔ̃ Nyɔŋmɔ nɔ lɛ he akɛ: “Yehowa kɛ nyɛ yɛ gbii abɔ ni nyɛkɛ lɛ yɔɔ lɛ.” (2 Kronika 14:9-12; 15:1, 2) Akɛni Nyɔŋmɔ gbɛi, Yehowa, lɛ kɛ shishinumɔ haa akɛ etsɔɔ nɔ fɛɛ nɔ ni he hiaa kɛha eyiŋtoo ahe nitsumɔ—Kɛji no tsɔɔ akɛ efee Durolɔ, Yibaalɔ, aloo Oblafo tete po lɛ—maŋsɛɛ sanekpakpa shiɛlɔi ni kɛ amɛhe fɔ̃ɔ Yehowa nɔ kɛ mɛi ni tsuɔ nii yɛ eyiŋtoo kɛ gbeekpamɔ naa lɛ baaye omanye yɛ amɛ nitsumɔi lɛ amli. (2 Mose 3:14) Nyɛminuu Bowen mu naa akɛ: “Kaaha ohiɛ miikpa nɔ akɛ, gbii abɔ ni ohaa Yehowa yiŋtoi feɔ oyiŋtoi lɛ, ebaaha obatsɔ nɔ fɛɛ nɔ ni he hiaa koni otsu onitsumɔ lɛ ogbe naa.”
Naagbee wielɔ yɛ gbɛjianɔtoo nɛɛ fã lɛ mli ji Wallace Liverance, tsutsu maŋsɛɛ sanekpakpa shiɛlɔ kɛ amrɔ nɛɛ skul lɛ saji aŋmalɔ lɛ. Esane lɛ ni yitso ji “Ha Nyɔŋmɔ Wiemɔ lɛ Hiɛ Akã ni Etsu Nii yɛ Omli” lɛ tsɛ jwɛŋmɔ yisɛɛ kɛtee sane ni efeŋ efolo, loo Nyɔŋmɔ shiwoo ni daa nɛɛ eeya ehiɛ kɛmiiya enaagbee lɛ nɔ. (Hebribii 4:12) Enáa mɛi ni ŋmɛɔ gbɛ koni efee nakai lɛ ashihilɛ nɔ hewalɛ. (1 Tesalonika 2:13) Mɛɛ gbɛ nɔ aaaha nakai wiemɔ lɛ ahi wala mli ni etsu nii yɛ wɔ shihilɛ mli hu? Kɛtsɔ mɔdɛŋbɔɔ yɛ Biblia lɛ kasemɔ mli. Nyɛminuu Liverance kai nikaselɔi lɛ yɛ gbɛ̀i ni atsɔɔ nɔ akaseɔ Biblia lɛ ni amɛkase he nii yɛ Gilead, ni nɔ ni fata he ji ekanemɔ kɛ jwɛŋmɔ ni yɔɔ mli lɛ shishinumɔ kɛ Nyɔŋmɔ Wiemɔ lɛ kɛ nitsumɔ. Etsɛ Albert Schroeder, ni ji Nɔyeli Kuu lɛ mlinyo ni sɔmɔ akɛ sɛinɔtalɔ yɛ ajinafoi ni to Gilead Skul lɛ shishi, nɔ ni fe afii 50 ni eho nɛ lɛ wiemɔi lɛ ayisɛɛ akɛ: “Kɛtsɔ shishinumɔ ni yɔɔ wiemɔ kuku lɛ mli lɛ kɛ nitsumɔ nɔ lɛ, mɔ ko nine nyɛɔ eshɛɔ shishinumɔ muu lɛ fɛɛ, anɔkwalei, kɛ mumɔŋ ekãa ni Nyɔŋmɔ kɛha yɛ e-Wiemɔ lɛ mli lɛ nɔ.” Biblia lɛ ní aaakase yɛ nɛkɛ gbɛ nɔ lɛ haa Nyɔŋmɔ Wiemɔ lɛ bafeɔ nɔ ni hiɛ kã ni etsuɔ nii.
Niiashikpamɔi ni Miishɛɛ Yɔɔ Mli kɛ Sanebimɔi
Yɛ wiemɔi lɛ asɛɛ lɛ, toibolɔi lɛ anine shɛ niiashikpamɔi ni miishɛɛ yɔɔ mli nɔ kɛjɛ nikaselɔi lɛ adɛŋ. Yɛ Mark Noumair, ni ji tsutsu maŋsɛɛ sanekpakpa shiɛlɔ kɛ amrɔ nɛɛ Gilead nitsɔɔlɔ lɛ gbɛtsɔɔmɔ naa lɛ, nikaselɔi akuu ko gba, ni amɛfee bɔ ni amɛbɔ mɔdɛŋ ni amɛye odase yɛ shihilɛi srɔtoi amli lɛ he nɔkwɛmɔnɔ. Amɛteŋ mɛi komɛi nyɛ amɛkɛ mɛi je Biblia kasemɔ shishi yɛ shikpɔŋkuku lɛ mli kɛtsɔ shihilɛ mli ni mɛi lɛ yɔɔ ni amɛyɔse kɛ wiemɔ su kɛ agbɛnɛ kɛtsɔ mɔ he susumɔ kpojiemɔ nɔ. No tsɔɔ akɛ nikaselɔi lɛ ‘Ahiɛ yɛ amɛhe nɔ kɛ tsɔɔmɔ lɛ nɔ’ ni amɛmiisumɔ koni amɛye amɛbua mɛi krokomɛi lɛɛlɛŋ koni ahere amɛyiwala.—1 Timoteo 4:16.
Akɛ shihilɛ mli susumɔi diɛŋtsɛ ha, ni aha miishɛɛ ni yɔɔ maŋsɛɛ sanekpakpa shiɛmɔ nitsumɔ lɛ mli lɛ fee faŋŋ kɛtsɔ nyɛmimɛi pii ni yɔɔ niiashikpamɔ ni nine shɛɔ tsɔsemɔ nɔ yɛ skul kɛha nitsumɔhe niji ajinafoi akuu lɛ mli bii lɛ nɔ ni afeɔ yɛ Watchtower Educational Center lɛ. Nyɛmimɛi Samuel Herd kɛ Robert Johnson ni fata asafo lɛ yitso lɛ mli nitsulɔi lɛ ahe lɛ bibii mɛi ni jɛ Asafo lɛ nitsumɔhe niji ni yɔɔ Bolivia, Zimbabwe, Nicaragua, Central African Republic, Dominican Republic, Papua New Guinea, kɛ Cameroon lɛ anajiaŋdamɔlɔi lɛ saji ni ha nifeemɔ lɛ sɔ.
Yɛ niiashikpamɔi kɛ sanebimɔi lɛ asɛɛ lɛ, Gerrit Lösch, nikaselɔ ni fata Gilead klas ni ji 41 lɛ he lɛ kɛ amrɔ nɛɛ Nɔyeli Kuu lɛ mlinyo lɛ, kɛ naagbee wiemɔ ni teɔ nii ahe susumɔ shi ni yitso ji “Ani Oji ‘Gbɔmɔ ni Asumɔɔ’?” lɛ ha. Klɛŋklɛŋ lɛ, Nyɛminuu Lösch kai nikaselɔi lɛ akɛ Yesu, ni ji Nyɔŋmɔ Bi ni eye emuu lɛ, gbɔmɛi lɛ ekpɛlɛɛɛ enɔ akɛ mɔ ni asumɔɔ shi akɛ “agbe ehe guɔ ni gbɔmɛi kwa lɛ.” (Yesaia 53:3) No hewɔ lɛ ebɛ naakpɛɛ mɔ akɛ ŋmɛnɛ, yɛ je lɛŋ hei pii lɛ, anaa maŋsɛɛ sanekpakpa shiɛlɔi akɛ gbɔmɛi ni akpɛlɛɛɛ amɛnɔ, aŋkroaŋkroi ni akpɛlɛɛɛ amɛnɔ loo mɛi ni ahereee amɛ hiɛmɛɛ. Yɛ gbɛ kroko nɔ lɛ, afii babaoo ni Daniel kɛ sɔmɔ yɛ Babilon lɛ, Bɔlɔ lɛ tsɛ́ Daniel shii etɛ akɛ “mɔ ni asumɔɔ diɛŋtsɛ” kɛtsɔ bɔfo ko nɔ. (Daniel 9:23; 10:11, 19) Mɛni fee Daniel nakai? Eŋmɛɛɛ Biblia shishitoo mlai ahe ekɛsaaa beni efeɔ tsakemɔi kɛha kusum ni yɔɔ Babilon lɛ; efeɔ nɔ ni ja yɛ gbɛ̀i fɛɛ anɔ, ekɛ egbɛhe lɛ tsuuu nii kɛha lɛ diɛŋtsɛ esɛɛnamɔ; ni eji Nyɔŋmɔ Wiemɔ lɛ kaselɔ ni yɔɔ ekãa. (Daniel 1:8, 9; 6:4; 9:2) Esɔleɔ ehaa Yehowa be kɛ beaŋ ni efee klalo akɛ ekɛ yijiemɔ baaha Nyɔŋmɔ yɛ nibi ni enyɛ etsu lɛ hewɔ. (Daniel 2:20) Kɛtsɔ Daniel nɔkwɛmɔnɔ lɛ sɛɛ nyiɛmɔ nɔ lɛ, Nyɔŋmɔ tsuji baanyɛ atsɔɔ akɛ amɛji mɛi ni asumɔɔ, jeee kɛmiiha je lɛ doo, shi kɛha Yehowa Nyɔŋmɔ.
Yɛ gbɛjianɔtoo ni woɔ mɔ mumɔŋ hewalɛ lɛ namuu mli lɛ, sɛinɔtalɔ lɛ kane tɛligram kɛ shɛɛ saji ni jɛ jeŋ koji ejwɛ lɛ ateŋ ekomɛi. Kɛkɛ ni akɛ gbalashihilɛ mli hefatalɔi 24 lɛ ateŋ mɔ fɛɛ mɔ yijiemɔ woji ha amɛ, ni atswa maji anɔ ni amɛbaayatsu nii yɛ mli lɛ he adafi. Naagbee kwraa lɛ, klas lɛ najiaŋdamɔlɔ ko kane wolo ni aŋma kɛha Nɔyeli Kuu lɛ kɛ Bethel weku lɛ, ni amɛkɛmiijie hiɛsɔɔ ni klas lɛ ná kɛha tsɔsemɔ kɛ saamɔ ni amɛ nine eshɛ nɔ yɛ nyɔji enumɔ ni eho lɛ mli lɛ.
Be mli ni gbɛjianɔtoo lɛ ba naagbee lɛ, abaanyɛ anu “miishɛɛnamɔ nifeemɔ kɛ shidai” ahe yɛ gbɔmɛi ni shiɔ kɛyaa lɛ ateŋ.—Nehemia 12:27.
[Akrabatsa ni yɔɔ baafa 27]
Klasbii lɛ Ahe saji
Maji srɔtoi anɔ ni amɛjɛ kɛba: 10
Maji srɔtoi ni aha amɛ nitsumɔ yɛ mli: 19
Nikaselɔi lɛ ayifalɛ: 48
Gbalashihilɛ mli hefatalɔi lɛ ayibɔ: 24
Afii abɔ ni amɛye lɛ mlijaa: 33
Afii abɔ ni amɛkɛhi anɔkwale lɛ mli lɛ mlijaa: 16
Afii abɔ ni amɛkɛsɔmɔ kɛ amɛbe fɛɛ mlijaa: 13
[Mfoniri ni yɔɔ baafa 25]
Buu Mɔɔ Biblia Gilead Skul Klasbii ni Ji 106 ni Gbe Nikasemɔ Naa
Gbɛi ni yɔɔ shishigbɛ lɛ miitsɔɔ bɔ ni amɛdamɔ shi lɛ mli, kɛjɛ hiɛgbɛ kɛyaa sɛɛgbɛ, ni amɛgbɛi lɛ jeɔ shishi kɛjɛɔ abɛku kɛyaa ninejurɔgbɛ.
(1) Deakin, D.; Puopolo, M.; Laguna, M.; Davault, S.; Dominguez, E.; Burke, J. (2) Gauter, S.; Vazquez, W.; Seabrook, A.; Mosca, A.; Helly, L.; Breward, L. (3) Brandon, T.; Olivares, N.; Coleman, D.; Scott, V.; Petersen, L.; McLeod, K. (4) McLeod, J.; Thompson, J.; Luberisse, F.; Speta, B.; Lehtimäki, M.; Laguna, J. (5) Gauter, U.; Dominguez, R.; Helly, F.; Smith, M.; Beyer, D.; Mosca, A. (6) Scott, K.; Seabrook, V.; Speta, R.; Coleman, R.; Breward, L.; Davault, W. (7) Smith, D.; Lehtimäki, T.; Petersen, P.; Thompson, G.; Vazquez, R.; Beyer, A. (8) Luberisse, M.; Deakin, C.; Brandon, D.; Puopolo, D.; Olivares, O.; Burke, S.