Egbɔyeli Ni Bɛ Ani Eji Nyɔŋmɔ Yiŋtoo?

Hetoo kuku ji dabi. Nyɛhaa wɔkwɛa nɔ hewɔ.

NYƆŊMƆ yiŋtoo ji ni adesai fɛɛ aye egbɔ yɛ shihilɛ mli ŋɔɔmɔ kɛ miishɛɛnamɔ mli. Wɔkaneɔ yɛ gbɔmɔ bɔɔ he akɛ: “Nyɔŋmɔ kɛɛ: Nyɛhaa wɔfea gbɔmɔ yɛ wɔsubaŋ nɔ, tamɔ wɔhe nɔ, ni amɛye ŋshɔŋlooi kɛ ŋwɛi loofɔji kɛ shia kooloi kɛ shikpɔŋ lɛ fɛɛ kɛ waamɔ nibii fɛɛ ni wamɔɔ yɛ shikpɔŋ lɛ nɔ lɛ nɔ.” Beni abɔ nibii ni yɔɔ shikpɔŋ lɛ nɔ agbe naa lɛ, “Nyɔŋmɔ kwɛ nibii fɛɛ ni efee lɛ, ni naa, ehi naakpa.”​—⁠1 Mose 1:​26, 31.

Ani Nyɔŋmɔ baanyɛ akɛɛ akɛ egbɔyeli ni bɛ ŋmɛnɛ lɛ ‘hi naakpa.’ Dabi kwraa, ejaakɛ “Nyɔŋmɔ lɛ, suɔmɔ ji lɛ.” (1 Yohane 4:⁠8) Akɛɔ yɛ ehe akɛ, ‘ekwɛɛɛ mɛi ahiɛaŋ,’ ni “enitsumɔ hi pɛ; ejaakɛ egbɛ̀i fɛɛ jalɛ ni. Anɔkwa Mawu ji lɛ, nɔ̃ sha bɛ lɛ; jalɔ ji lɛ ni esa pɛ.” (5 Mose 10:17; 32:4; okɛto Hiob 34:19 he.) Kɛkɛ ni bɔfo Petro mu sane naa akɛ: “Lɛɛlɛŋ, miyoo akɛ, Nyɔŋmɔ jeee mɛi ahiɛaŋkwɛlɔ; shi moŋ maŋ fɛɛ maŋ mli lɛ, mɔ ni sheɔ lɛ gbeyei ni etsuɔ jalɛ nii lɛ, lɛ ji mɔ ni saa ehiɛ.”​—⁠Bɔfoi lɛ Asaji 10:​34, 35.

Akɛni Nyɔŋmɔ yɛ suɔmɔ, ekwɛɛɛ mɛi ahiɛaŋ, eja, ni eyeɔ jalɛ sane hewɔ lɛ, te eeefee tɛŋŋ ebɔ adesai kɛ gboshinii akɛ mɛi ni yeee egbɔ yɛ hegbɛ ni ayɔɔ yɛ shihilɛ mli ŋɔɔmɔyeli kɛ miishɛɛnamɔ mli? Kɛ eŋmɛ gbɔmɛi ahiɛaŋkwɛmɔ gbɛ, ni ekɛ amɛ wo egbɔyeli ni bɛ gbɛjianɔtoo ko mli lɛ, no lɛ ebaafee nɔ ni yɔɔ srɔto waa kɛ akɛto esui lɛ ahe. Eyiŋtoo ji akɛ, “afɔ́ amɛ fɛɛ akɛ eyelilɔi ni yeɔ egbɔ yɛ bulɛ kɛ hegbɛi amli.” Shi kɛlɛ, ŋmɛnɛ, nibii tamɔɔɔ nakai kwraa. Mɛni hã eba lɛ nakai?

He ni Egbɔyeli ni Bɛ lɛ Je Shishi Kɛjɛ

Ákɛ Nyɔŋmɔ bɔ adesai akɛ mɛi ni yeɔ egbɔ lɛ etsɔɔɔ akɛ, eyiŋtoo ji ni amɛ fɛɛ amɛye egbɔ yɛ nɔ fɛɛ nɔ mli. Amɛbaanyɛ amɛfee mɛi ni yɔɔ nilee srɔtoi, nibii srɔtoi ni amɛsumɔɔ, kɛ sui srɔtoi. Amɛbaanyɛ amɛfee mɛi ni yɔɔ srɔto hu yɛ shihilɛ mli, loo yɛ gbɛhe ni amɛyɔɔ lɛ mli. Ákɛ nɔkwɛmɔnɔ lɛ, nuu kɛ yoo yeee egbɔ yɛ nɔ fɛɛ nɔ mli, shi Nyɔŋmɔ bɔ yoo akɛ nuu lɛ “hefatalɔ.” (1 Mose 2:18) Eka shi faŋŋ akɛ fɔlɔi kɛ bii yɛ srɔto yɛ gbɛhei amli. Shi yɛ srɔtofeemɔi nɛɛ fɛɛ sɛɛ lɛ,​—⁠esa akɛ hii, yei, kɛ gbekɛbii fɛɛ​—⁠aye egbɔ yɛ hegbɛ ni Nyɔŋmɔ kɛha koni amɛná nibii ni baaha amɛná miishɛɛ lɛ mli ŋɔɔmɔ. Esa akɛ bulɛ ni amɛyɔɔ kɛ shidaamɔ yɛ Nyɔŋmɔ hiɛ lɛ mli miishɛɛnamɔ afee nɔ ni yeɔ egbɔ.

Nakai nɔŋŋ akɛ nitsumɔi kɛ gbɛnaa nii srɔtoi wo Nyɔŋmɔ mumɔ bii ní abɔ amɛ dani abɔ adesai lɛ adɛŋ. (1 Mose 3:​24; 16:​7-​11; Yesaia 6:​6; Yuda 9) Shi kɛlɛ, yɛ nɔ ni akɛha amɛ lɛ mli lɛ, amɛ fɛɛ amɛnyɛɔ amɛyeɔ egbɔ yɛ wala kɛ miishɛɛnamɔ mli ŋɔɔmɔ mli. Enɛ hewɔ lɛ, amɛhaa bɔ ni Nyɔŋmɔ kwɛɛɛ mɛi ahiɛaŋ lɛ jeɔ kpo yɛ naakpɛɛ gbɛ nɔ.

Dɔlɛ sane ji akɛ, mumɔ bɔɔnɔ ko mii shɛɛɛ ehe yɛ Nyɔŋmɔ gbɛjianɔtoo ni hiɛaŋkwɛmɔ bɛ mli lɛ he. Eesumɔ ni ená babaoo fe nɔ ni Nyɔŋmɔ kɛha lɛ lɛ, eeshwe ni ená hegbɛ ni nɔ kwɔ waa diɛŋtsɛ. Akɛni etee nɔ esusu shwelɛ fɔŋ ni ená nɛɛ he hewɔ lɛ, ete shi ewo Yehowa, mɔ ni ji Bɔlɔ lɛ, ní yɔɔ hegbɛ akɛ ehiɛɔ hegbɛ ni nɔ kwɔ fe fɛɛ mli lɛ. Sɛɛ mli lɛ nɛkɛ Nyɔŋmɔ mumɔ bi atuatselɔ nɛɛ ha adesai bɔi Nyɔŋmɔ nibii babaoo bimɔ fe nɔ ni E-kɛha amɛ lɛ. (1 Mose 3:1-6; okɛto Yesaia 14:​12-​14 he.) Enɛ hewɔ lɛ, nibii ni Yehowa kɛha adesai bɔni afee ni amɛná shihilɛ kɛ miishɛɛnamɔ mli ŋɔɔmɔ lɛ bafee tamɔ nɔ ni eŋmɛɛɛ pɛpɛɛpɛ. Nɛkɛ mumɔ atuatselɔ ni Kpojiemɔ 20:2 lɛ tsɛ lɛ akɛ “Satan kɛ Abonsam” lɛ batsɔ mɔ ni kɛ egbɔyeli ni bɛ adesai ateŋ lɛ ba.

Ani Nibii Baatsake Gbi Ko?

Hetoo kuku ji hɛɛ!

Shi namɔ baanyɛ ekɛ tsakemɔi ni ataoɔ nɛɛ aba? Ŋwanejee ko bɛ he akɛ adesai nɔyelɔi komɛi etsu he nii yɛ anɔkwale diɛŋtsɛ mli, amɛgbo he deŋme waa afii abɔ amɛkɛmiitsu he nii. Akɛni amɛyeee omanye hewɔ lɛ, eha gbɔmɛi pii emu sane naa akɛ anyɛŋ atsu egbɔyeli ni bɛ adesai ateŋ lɛ he naagba lɛ he nii kɛmɔ shi kɔkɔɔkɔ. Shi kɛlɛ, áŋma susumɔ ni Nyɔŋmɔ hiɛ lɛ yɛ Yesaia 55:​10, 11 lɛ akɛ: “Tamɔ bɔ ni nugbɔnemɔ kɛ snoo jɛɔ ŋwɛi shwieɔ shi, ni ekuuu esɛɛ kɛyaaa jɛi dɔŋŋ, akɛ ja eha shikpɔŋ lɛ nu, ni eha eba nii ni ewo yibii, ni ekɛ dumɔnii eha nidulɔ ni ekɛ niyenii hu eha mɔ ni yeɔ lɛ: nakai miwiemɔ ni jɛɔ midaaŋ lɛ hu aaafee: ekuŋ esɛɛ kɛbaŋ miŋɔɔ efolo, shi moŋ eeefee nɔ ni sa mihiɛ lɛ, ni eeeha nɔ ni mitsu lɛ yɛ hewɔ lɛ aya nɔ!”

Kwɛ bɔ ni eshɛjeɔ wɔmii ákɛ wɔɔle akɛ, Yehowa Nyɔŋmɔ ewie akɛ ebaatsu eshishijee yiŋtoo akɛ ebaaha adesai fɛɛ aye egbɔ yɛ shihilɛ kɛ miishɛɛnamɔ mli lɛ he nii! Ákɛ Nyɔŋmɔ ni yeɔ anɔkwa lɛ, eŋɔ efɔ̃ enɔ akɛ ebaatsu nɔ ni ewo shi yɛ he lɛ he nii. Miishɛɛ sane ji akɛ, eesumɔ, ni eyɛ hewalɛ ni ekɛaafee nakai hu. Te eeefee tɛŋŋ etsu enɛ he nii hu?

Hetoo lɛ baaba yɛ Maŋtsɛyeli ni Yesu Kristo tsɔɔ esɛɛnyiɛlɔi lɛ akɛ amɛsɔle yɛ he lɛ mli akɛ: “Wɔtsɛ ni yɔɔ ŋwɛi, . . . omaŋtsɛyeli lɛ aba; afee nɔ ni osumɔɔ yɛ shikpɔŋ lɛ nɔ, taakɛ afeɔ yɛ ŋwɛi lɛ.” (Mateo 6:​9, 10) Hɛɛ, Nyɔŋmɔ Maŋtsɛyeli lɛ nɔ Yehowa baatsɔ ni “eeejwara maŋtsɛyelii [ni yɔɔ amrɔ] nɛɛ fɛɛ wɔtsɔwɔtsɔ, ni eeekpata amɛhiɛ, shi lɛ diɛŋtsɛ lɛ eeedamɔ shi kɛaatee naanɔ.”​—⁠Daniel 2:44.

Adesai akuu hee ko baaje shishi yɛ ŋwɛi Maŋtsɛyeli lɛ nɔyeli lɛ shishi. Bɔfo Yohane ŋma enɛ he sane yɛ Biblia wolo ni ji Kpojiemɔ lɛ mli akɛ: “Mina ŋwɛi hee kɛ shikpɔŋ hee; ejaakɛ tsutsu ŋwɛi lɛ kɛ tsutsu shikpɔŋ lɛ eho etee.” (Kpojiemɔ 21:⁠1) Egbɔyeli ni bɛ lɛ he fãi srɔtoi ni ehiii lɛ fɛɛ​—⁠ohia, hela, woloŋ ni aleee, mɛi ahiɛaŋ kwɛmɔ, kɛ adesai amanehului krokomɛi lɛ hu baaho aya.a

Yehowa Odasefoi kɛ nɔ ni fe afii oha miigbala gbɔmɛi ajwɛŋmɔ kɛmiiya nakai Maŋtsɛyeli lɛ nɔ. (Mateo 24:14) Amɛmiitsɔ woji ni akala kɛ amɛ diɛŋtsɛ amɛyelikɛbuamɔ nɔ amɛkɛ ekãa miiye kɛmiibua gbɔmɛi koni amɛná Nyɔŋmɔ yiŋtoo ni áŋmala yɛ Biblia lɛ mli lɛ he anɔkwa nilee. Shi kɛlɛ, jeee akɛ amɛ jeŋ fɛɛ nitsɔɔmɔ nitsumɔ lɛ eha gbɔmɛi ená egbɔyeli kɛ miishɛɛnamɔ yɛ wɔsɛɛ shihilɛ mli he hiɛnɔkamɔ kɛkɛ, shi moŋ amrɔ nɛɛ, amɛha mɛi ená he sɛɛ ni amɛtsĩ piŋmɔi ni egbɔyeli ni bɛ kɛbaa lɛ naa. Nyɛhaa wɔkwɛa gbɛ nɔ ni amɛtsɔ amɛfee nakai.

[Shishigbɛ niŋmai]

[Wiemɔ ni akɔ ni akɛmiitsu nii ni yɔɔ baafa 5]

Nyɔŋmɔ yiŋtoo ji ni adesai fɛɛ aye egbɔ yɛ shihilɛ kɛ miishɛɛnamɔ mli