Sanebimɔi Ni Jɛ Kanelɔi Adɛŋ
Te Yehowa Odasefoi buɔ oshikifɔɔ amɛhaa tɛŋŋ?
Shishitoo mlai ni yɔɔ faŋŋ ni yeɔ ebuaa Nyɔŋmɔ tsuji koni amɛná jwɛŋmɔ ni ja yɛ sane nɛɛ he lɛ yɛ Biblia lɛ mli. Shi kɛlɛ, etamɔ nɔ ni shishitoo mla ko kwraa bɛ ni teɔ shi eshiɔ oshikifɔɔ nifeemɔ lɛ diɛŋtsɛ. Ákɛ nɔkwɛmɔnɔ lɛ, yiŋtoo ko kwraa bɛ ni tsɔɔ akɛ esaaa akɛ nitsumɔ nɔkwɛlɔi akuu ko fɔ̃ɔ oshiki ní amɛkɛfeɔ yiŋkpɛi ni kɔɔ amɛnitsumɔ lɛ he. Bei pii lɛ Yehowa Odasefoi asafoi lɛ feɔ yiŋkpɛi ni kɔɔ kpee bei ahe kɛ asafo shika ni akɛaatsu nɔ ko lɛ he kɛtsɔ niji anɔ ni aholeɔ akɛfɔ̃ɔ oshiki lɛ nɔ.
Ni oshiki ni afɔ̃ɔ koni akɛhala mɛi yɛ maŋkwramɔ mli hu? Ojogbaŋŋ, yɛ dɛmokrase shikpɔji komɛi anɔ lɛ, aaafee maŋbii lɛ ayibɔ lɛ oha mlijaa 50 sɔŋŋ baaa koni amɛbafɔ̃ oshiki yɛ mɛi ahalamɔ gbi yɛ maŋkwramɔ mli lɛ nɔ. Yɛ Yehowa Odasefoi agbɛfaŋ lɛ, amɛteee shi amɛwooo hegbɛ ni mɛi krokomɛi yɔɔ akɛ amɛaafɔ̃ oshiki lɛ; ni amɛfeee nɔ ko nɔ ko kwraa ní amɛkɛaate shi amɛwo maŋkwramɔŋ halamɔi hu. Amɛyɛ bulɛ kɛha nɔyelɔi ni aje gbɛ ahala amɛ yɛ maŋkwramɔŋ halamɔi ni tamɔ nɛkɛ mli lɛ, ni amɛkɛ amɛ feɔ ekome. (Romabii 13:1-7) Kɛji Yehowa Odasefoi lɛ diɛŋtsɛ baafɔ̃ oshiki amɛha mɔ ko ni shiɔ akaŋ yɛ maŋkwramɔŋ halamɔ ko mli lɛ, no lɛ amɛteŋ mɔ fɛɛ mɔ feɔ eyiŋkpɛɛ ni damɔ ehenilee ni Biblia etsɔse lɛ lɛ nɔ kɛ bɔ ni enuɔ sɔ̃ ni kã enɔ yɛ Nyɔŋmɔ hiɛ kɛ Maŋ lɛ he lɛ shishi ehaa. (Mateo 22:21; 1 Petro 3:16) Beni Odasefoi lɛ kpɛɔ yiŋ amɛhaa amɛhe yɛ sane nɛɛ he lɛ, amɛsusuɔ shihilɛi komɛi ahe.
Klɛŋklɛŋ lɛ, Yesu Kristo wie yɛ esɛɛnyiɛlɔi lɛ ahe akɛ: “Amɛjɛɛɛ je lɛ mli, taakɛ bɔ ni mi hu mijɛɛɛ je lɛ mli lɛ.” (Yohane 17:14) Yehowa Odasefoi kɛ hiɛdɔɔ tsuɔ shishitoo mla nɛɛ he nii. Akɛni “amɛjɛɛɛ je lɛ mli” hewɔ lɛ, amɛkɛ amɛhe wooo je lɛŋ maŋkwramɔŋ saji amli.—Yohane 18:36.
Nɔ ni ji enyɔ lɛ, bɔfo Paulo wie lɛ diɛŋtsɛ ehe akɛ gbɔmɛi ni yɔɔ egbii amli lɛ ‘abɔfo’ ni damɔ Kristo najiaŋ. (Efesobii 6:20; 2 Korintobii 5:20) Yehowa Odasefoi heɔ yeɔ akɛ amrɔ nɛɛ Kristo Yesu ji mɔ ni awo lɛ Nyɔŋmɔ ŋwɛi Maŋtsɛyeli lɛ nɔ Maŋtsɛ, ni esa akɛ amɛtswa enɛ he adafi amɛtsɔɔ maji lɛ tamɔ bɔfoi. (Mateo 24:14; Kpojiemɔ 11:15) Aakpa gbɛ akɛ bɔfoi kɛ amɛhe woŋ mɛi asaji amli ní amɛkɛ amɛhe akawo maji ni atsu amɛ kɛtee mli lɛ ateemɔŋ saji amli. Ákɛ Nyɔŋmɔ ŋwɛi Maŋtsɛyeli lɛ najiaŋdamɔlɔi lɛ, Yehowa Odasefoi nuɔ he akɛ gbɛnaa nii ni tamɔ nakai nɔŋŋ kã amɛnɔ akɛ amɛkɛ amɛhe woŋ maji ni amɛyɔɔ mli lɛ amaŋkwramɔŋ saji amli.
Shihilɛ ni ji etɛ ni esa akɛ asusu he ji akɛ sɔ̃ baanyɛ abakã mɛi ni náa gbɛfaŋnɔ yɛ oshikifɔɔ mli kɛhalaa mɔ ko kɛbawoɔ nitsumɔ mli lɛ nɔ yɛ nɔ ni efeɔ hewɔ. (Okɛto 1 Timoteo 5:22 he, The New English Bible.) Esa akɛ Kristofoi lɛ asusu he ojogbaŋŋ koni amɛle kɛji amɛmiisumɔ ni amɛtere nakai sɔ̃ lɛ.
Nɔ ni ji ejwɛ lɛ, Yehowa Odasefoi buɔ amɛ Kristofoi ekomefeemɔ lɛ akɛ ejara wa waa diɛŋtsɛ. (Kolosebii 3:14) Kɛ jamɔi kɛ amɛhe wo maŋkwramɔŋ saji amli lɛ, bei pii lɛ nɔ ni jɛɔ mli baa ji mligbalamɔ ni baa amɛmli bii lɛ ateŋ. Bɔni afee ni Yehowa Odasefoi akase Yesu Kristo lɛ, amɛkɛ amɛhe wooo maŋkwramɔŋ saji amli, ni yɛ no hewɔ lɛ, amɛhiɛɔ amɛ Kristofoi ateŋ ekomefeemɔ lɛ mli daa.—Mateo 12:25; Yohane 6:15; 18:36, 37.
Nɔ ni ji enumɔ kɛ naagbee nɔ̃ lɛ, akɛni Yehowa Odasefoi kɛ amɛhe wooo maŋkwramɔŋ saji amli hewɔ lɛ, ehaa amɛnáa wiemɔ mli heyeli koni amɛnyɛ amɛkɛ Maŋtsɛyeli he shɛɛ sane ni he hiaa lɛ aya mɛi fɛɛ aŋɔɔ ni maŋkwramɔŋ kuu ni mɔ lɛ fĩɔ sɛɛ lɛ kɔɔɔ he eko.—Hebribii 10:35.
Yɛ Ŋmalɛ naa shishitoo mlai ni atsɔɔ yɛ yiteŋgbɛ lɛ hewɔ lɛ, yɛ shikpɔji babaoo nɔ lɛ, Yehowa Odasefoi kpɛɔ amɛ diɛŋtsɛ amɛyiŋ akɛ amɛfɔ̃ŋ oshiki yɛ maŋkwramɔŋ halamɔi amli, ni maŋ lɛ mli mla fĩɔ heyeli ni amɛyɔɔ akɛ amɛaakpɛ amɛyiŋ nakai lɛ sɛɛ. Ni kɛ́ mla lɛ biɔ koni maŋbii lɛ afɔ̃ oshiki hu? Yɛ sane ni tamɔ nakai mli lɛ, eji sɔ̃ ni kã Odasefonyo fɛɛ Odasefonyo nɔ akɛ ekɛ henilee afee yiŋkpɛɛ ni damɔ Biblia lɛ nɔ, ni tsɔɔ bɔ ni eeetsu shihilɛ lɛ he nii. Kɛ mɔ ko kpɛ eyiŋ akɛ ebaabote agba ni afɔ̃ɔ oshiki yɛ mli lɛ mli lɛ, lɛ diɛŋtsɛ eyiŋkpɛɛ ni. Nɔ ni efeɔ yɛ agba ni afɔ̃ɔ oshiki yɛ mli lɛ mli lɛ ji lɛ kɛ e-Bɔlɔ lɛ teŋ sane.
November 15, 1950 The Watchtower lɛ baafai 445 kɛ 446 lɛ kɛɛ akɛ: “He ni Kaisare kɛfĩɔ maŋbii lɛ anɔ doo akɛ esa akɛ amɛfɔ̃ oshiki lɛ . . . [Odasefoi] baanyɛ aya oshikifɔɔhe lɛ ni amɛbote oshikifɔɔ agbai lɛ amli. Biɛ ji he ni abiɔ koni amɛkadi wolo ni akɛfɔ̃ɔ oshiki lɛ nɔ loo amɛŋmala nɔ ni amɛdamɔ shi kɛha yɛ nɔ. Mɛi ni fɔ̃ɔ oshiki lɛ kɛ woji ni amɛkɛfɔ̃ɔ oshiki lɛ feɔ nɔ ni amɛsumɔɔ. No hewɔ lɛ yɛ Nyɔŋmɔ hiɛ lɛ, biɛ ji he ni esa akɛ edasefoi lɛ afee nɔ ni kɛ ekitãi lɛ kpãa gbee yɛ amɛhemɔkɛyeli lɛ kɛ gbeekpamɔ naa. Ejeee sɔ̃ ni kã wɔnɔ akɛ wɔtsɔɔ amɛ nɔ ni esa akɛ akɛ wolo ni akɛfɔ̃ɔ oshiki lɛ afee.”
Ni kɛ́ Kristofonyo yoo ko wu ni heee yeee lɛ ma nɔ mi veveeve akɛ eya koni eyafɔ̃ oshiki hu? Ojogbaŋŋ, eyɛ ewu lɛ shishi, taakɛ Kristofoi yɔɔ nɔyeli hegbɛi ashishi lɛ. (Efesobii 5:22; 1 Petro 2:13-17) Kɛ ebo ewu lɛ toi ni eyabote agba ni afɔ̃ɔ oshiki lɛ yɛ mli lɛ mli lɛ, lɛ diɛŋtsɛ eyiŋkpɛɛ ni. Esaaa akɛ mɔ ko wieɔ shiɔ lɛ.—Okɛto Romabii 14:4 he.
Ni maŋ ni kɛ oshikifɔɔ fĩii mɔ nɔ doo shi akɛ henumɔi teɔ shi awoɔ mɛi ni eyaboteee agba ni afɔ̃ɔ oshiki yɛ mli lɛ mli—ekolɛ ní no baanyɛ ekɛ oshara diɛŋtsɛ aba amɛ nɔ hu lɛ? Aloo kɛ́ aŋkroaŋkroi ni yɛ be mli ni mla fĩii amɛ nɔ doo akɛ amɛfɔ̃ oshiki moŋ, shi akɛ toigbalamɔ ni naa wa baa amɛnɔ yɛ gbɛ ko nɔ kɛji amɛyaboteee agba ni afɔ̃ɔ oshiki yɛ mli lɛ mli lɛ hu? Yɛ enɛɛmɛi kɛ shihilɛi ni tamɔ nakai mli lɛ, esa akɛ Kristofonyo lɛ afee lɛ diɛŋtsɛ eyiŋkpɛɛ. “Mɔ fɛɛ mɔ aaatere lɛ diɛŋtsɛ ejatsu.”—Galatabii 6:5.
Ekolɛ mɛi komɛi yɛ ni amɛnane tɔ̃tɔ̃ɔ, kɛ́ amɛna akɛ be mli ni oshikifɔɔ yɛ maŋkwramɔŋ nifeemɔ mli yaa nɔ yɛ amɛmaŋ mli lɛ, Yehowa Odasefoi komɛi yaboteɔ agba ni afɔ̃ɔ oshiki yɛ mli lɛ mli yɛ be mli ni mɛi krokomɛi lɛ efeee nakai lɛ. Ekolɛ amɛbaakɛɛ akɛ, ‘Gbeekpamɔ bɛ Yehowa Odasefoi ateŋ.’ Shi esa akɛ mɛi ayɔse akɛ, yɛ saji ni kɔɔ aŋkroaŋkroi ahenilee he tamɔ nɛkɛ lɛ, esa akɛ Kristofonyo fɛɛ Kristofonyo afee lɛ diɛŋtsɛ eyiŋkpɛɛ yɛ Yehowa Nyɔŋmɔ hiɛ.—Romabii 14:12.
Yiŋkpɛɛ fɛɛ yiŋkpɛɛ ni Yehowa Odasefoi feɔ yɛ shihilɛi srɔtoi anaa lɛ, amɛkwɛɔ jogbaŋŋ koni amɛbu amɛhe ni amɛkɛwooo maŋ saji amli lɛ he akɛ Kristofoi, ni amɛbu wiemɔ mli heyeli ni amɛyɔɔ lɛ hu he. Amɛŋɔɔ amɛhiɛ amɛfɔ̃ɔ Yehowa Nyɔŋmɔ nɔ yɛ nɔ fɛɛ nɔ mli koni ewo amɛ hewalɛ, koni eha amɛ nilee, ní eye ebua amɛ ni amɛkaŋmɛɛ amɛhemɔkɛyeli lɛ he amɛkɛsaa yɛ gbɛ ko gbɛ ko kwraa nɔ. Yɛ no feemɔ mli lɛ, amɛtsɔ̃ɔ akɛ amɛyɛ lalatsɛ lɛ wiemɔi nɛɛ amli hekɛnɔfɔɔ, ni ji: “Mitɛsaa kɛ mimɔɔ jio, no hewɔ lɛ tsɔɔmɔ mi gbɛ ni owa mi yɛ ogbɛi lɛ hewɔ.”—Lala 31:4.