Amɛfee Yehowa Suɔmɔnaa nii

Tsuijurɔnaa Nikeenii ni Akɛhaa Kɛha Jamɔ Krɔŋŋ Hiɛyaa

ISRAELBII lɛ ji mɛi ni na Yehowa hewalɛ ni ekɛhereɔ mɔ lɛ. Amɛna beni Ŋshɔ Tsuru lɛ nui lɛ amli ja yɛ naakpɛɛ gbɛ nɔ, ni eha amɛfo kɛtsɔ shikpɔŋ gbiŋ nɔ ni amɛye amɛhe kɛjɛ Mizraim asraafoi lɛ adɛŋ. Beni amɛdamɔ afagbɛ kroko lɛ, amɛkwɛ kɛjɛ he ko ni yɔɔ shweshweeshwe beni nakai nui lɛ nɔŋŋ baloo mɛi ni nyiɛ amɛsɛɛ lɛ. Yehowa ehere amɛyiwala!​—⁠2 Mose 14:​21-​31.

Shi dɔlɛ sane ji akɛ, Israelbii komɛi ku amɛhiɛ amɛshwie nɔ ni amɛ-Nyɔŋmɔ lɛ efee lɛ nɔ. Beni Mose yɔɔ Sinai Gɔŋ lɛ nɔ lɛ, amɛkɛ amɛshika jwinei lɛ baha Aaron ni amɛbi ni efee amaga eha amɛ koni amɛjá. Yɛ Mose sɛɛkuu mli lɛ, ebanina nɛkɛ atuatselɔi ni amɛbua amɛhe naa nɛɛ ni amɛmiiye nii, amɛmiinu nii, amɛmiijo, ni amɛmiikoto shi amɛmiiha shika tsinabi ko! Yɛ Yehowa famɔ naa lɛ agbe mɛi 3,000​—⁠ni eka shi faŋŋ akɛ​—ekolɛ amɛji mɛi ni wo atuatsemɔ nɛɛ he hewalɛ lɛ. Nakai gbi lɛ, Nyɔŋmɔ webii lɛ kase nikasemɔ ko ni he hiaa waa ni kɔɔ bɔ ni ehe hiaa ni atuu he fɛɛ aha Yehowa pɛ.​—⁠2 Mose 32:​1-6, 19-​29.

Yɛ nɛkɛ sane nɛɛ sɛɛ nɔŋŋ lɛ, Mose fee klalo koni etsu Nyɔŋmɔ famɔ akɛ ema kpeebuu, ni ji jamɔ buu ko ni anyɛɔ akɛfãa gbɛ lɛ he nii. Nɛkɛ tsumaa nitsumɔ nɛɛ baabi nibii ni jara wa kɛ nitsulɔi ni he esa. Nɛgbɛ enɛɛmɛi baajɛ aba? Ni mɛni wɔbaanyɛ wɔkase kɛjɛ nɛkɛ Biblia mli sane nɛɛ mli?

Nibii kɛ Hesaai ni Akɛye Abua

Yehowa fã Israelbii lɛ kɛtsɔ Mose nɔ akɛ: “Nyɛjiea nɔwomɔ nikeenii yɛ nyɛteŋ nyɛbahaa Yehowa; mɔ fɛɛ mɔ ni yɔɔ he tsuijurɔ lɛ, ha ni ekɛ nɔwomɔ nikeenii aba abaha Yehowa.” Mɛɛ nɔwomɔ nikeenii nɛkɛ? Nɔ ni fata nibii ni Mose tsĩ tã lɛ ahe ji shika, jwiɛtɛi, akɔɔble, kuntu kpãai, mamai, hewoji, tso, kɛ tɛi ni jara wa.​—⁠2 Mose 35:​5-⁠9.

Israelbii lɛ yɛ nii ni fa kɛteke nɔ bɔ ni amɛaanyɛ amɛkɛ nɛkɛ mlihilɛ oniatsumɔ nɛɛ aha. Kaimɔ akɛ, beni amɛshiɔ Mizraim lɛ amɛkɛ shika kɛ jwiɛtɛi nibii, kɛ mamai babaoo tee. Yɛ anɔkwale mli lɛ, “amɛkpakpaa Mizraimbii ahe nii.”a (2 Mose 12:​35, 36) Tsutsu lɛ, Israelbii lɛ jie amɛhe jwinei lɛ ni amɛkɛfee amaga kɛha apasa jamɔ. Ani amɛbaajie amɛhe kpo amrɔ nɛɛ akɛ mɛi ni kɛ nakai ekãa lɛ nɔŋŋ baashã afɔle koni akɛha anɔkwa jamɔ aya hiɛ?

Shi kadimɔ akɛ, Mose etsɔɔɔ yibɔ pɔtɛɛ ko ni mɔ aŋkro kɛbaha, aloo ni ekɛ fɔyeli loo hiɛgbele ko aaatsu nii ni ekɛwo nihamɔ lɛ ekãa. Shi moŋ, ekpa “mɔ fɛɛ mɔ ni yɔɔ he tsuijurɔ lɛ” fai kɛkɛ. Eka shi faŋŋ akɛ Mose nuuu he akɛ esa akɛ enyɛ Nyɔŋmɔ webii lɛ anɔ. Eyɛ hekɛnɔfɔɔ akɛ mɔ fɛɛ mɔ baaha bɔ ni eeenyɛ.​—⁠Okɛto 2 Korintobii 8:​10-​12 he.

Shi kɛlɛ, tsumaa nitsumɔ lɛ biɔ nɔ ni fe nibii kɛkɛ ni akɛaake. Yehowa kɛɛ Israelbii lɛ hu akɛ: “Nyɛteŋ mɔ fɛɛ mɔ ni le ŋaa yɛ etsui mli aba, ni ebafee nii fɛɛ ni Yehowa ekɛɛ lɛ.” Hɛɛ, nɛkɛ tsumaa nitsumɔ nɛɛ biɔ nitsulɔi ni he esa. Yɛ anɔkwale mli lɛ, “ŋaa nitsumɔi srɔtoi fɛɛ”​—⁠ni tsei ahe nitsumɔ, dadei ahe nitsumɔ, kɛ jwine nibii fata he lɛ​—⁠ahe baahia koni anyɛ agbe nitsumɔ nɛɛ naa. Yɛ anɔkwale mli lɛ, Yehowa baakudɔ nitsulɔi lɛ aduromɔ keenii lɛ, ni yijiemɔ kɛha nitsumɔ lɛ omanyeyeli lɛ baaya eŋɔɔ yɛ gbɛ ni ja nɔ.​—⁠2 Mose 35:​10, 30-​35; 36:​1, 2.

Israelbii lɛ kɛ hiɛdɔɔ kpɛlɛ ninefɔɔ akɛ amɛkɛ amɛ nibii kɛ amɛŋaai fɛɛ aha lɛ nɔ. Biblia lɛ mli sane lɛ kɛɔ akɛ: “Amɛba, mɔ fɛɛ mɔ ni etsui mli ta lɛ, kɛ mɔ fɛɛ mɔ ni ná he tsui lɛ, ni amɛkɛ Yehowa nɔwomɔ nikeenii lɛ ba ni akɛfee kpeebuu lɛ kɛ ehe sɔɔmɔnii lɛ fɛɛ kɛ atadei krɔŋkrɔŋi lɛ. Ni hii kɛ yei fɛɛ, mɛi abɔ ni yɔɔ he tsui lɛ ba.”​—⁠2 Mose 35:​21, 22.

Nikasemɔ Kɛha Wɔ

Ŋmɛnɛ aatsu nitsumɔ kpeteŋkpele ni ji Nyɔŋmɔ Maŋtsɛyeli lɛ he sanekpakpa shiɛmɔ nitsumɔ lɛ kɛmiitsɔ onia ni ajɛɔ suɔmɔ mli atsuɔ lɛ nɔ. Bei pii lɛ, enɛɛmɛi ji nibii ni kɔɔ shika he. Yɛ shihilɛi komɛi amli lɛ, nyɛmimɛi hii kɛ yei Kristofoi kɛ niiashikpamɔ ni amɛyɔɔ lɛ tsuɔ nii kɛyeɔ buaa koni akɛma Maŋtsɛyeli Asai, Kpeei Asai, kɛ nitsumɔhe niji. Agbɛnɛ, nitsumɔ miiya nɔ yɛ nɔ ni fe Betel shiai oha mli yɛ jeŋ muu lɛ fɛɛ, nitsumɔ ni biɔ hesaai srɔtoi babaoo yɛ ŋaa nitsumɔ mli. Mɛi fɛɛ ni tsui shweɔ ni amɛtsu nɛkɛ onia nɛɛ baanyɛ aná nɔmimaa akɛ Yehowa hiɛ kpaŋ amɛnitsumɔ ni wa lɛ nɔ!​—⁠Hebribii 6:⁠10.

Nakai nɔŋŋ ekɔɔ gbɛfaŋnɔ ni wɔteŋ mɔ fɛɛ mɔ yɔɔ yɛ Kristofoi asɔɔmɔ nitsumɔ lɛ mli lɛ he. Aawo mɔ fɛɛ mɔ hewalɛ ni ehe be koni ekɛná gbɛfaŋnɔ ni ekãa yɔɔ mli yɛ shiɛmɔ nitsumɔ lɛ mli. (Mateo 24:​14; Efesobii 5:​15-​17) Mɛi komɛi feɔ enɛ akɛ be-fɛɛ sanekpakpa jajelɔi, loo gbɛgbalɔi. Yɛ shihilɛi komɛi ahewɔ lɛ, mɛi krokomɛi nyɛɛɛ amɛkɛ be babaoo awo sɔɔmɔ nitsumɔ lɛ mli akɛ gbɛgbalɔ. Shi kɛlɛ, amɛ hu amɛsaa Yehowa hiɛ. Taakɛ eji yɛ kpeebuu lɛ oniatsumɔ gbɛfaŋ lɛ, Yehowa etsɔɔɔ yibɔ pɔtɛɛ ko ni esa akɛ mɔ aŋkro ko kɛha. Shi kɛlɛ, nɔ ni etaoɔ ji akɛ, wɔteŋ mɔ fɛɛ mɔ asɔmɔ lɛ kɛ wɔtsui muu fɛɛ, susuma, jwɛŋmɔ, kɛ nyɛmɔ fɛɛ. (Marko 12:​30) Kɛji akɛ wɔmiifee nakai lɛ, wɔbaanyɛ wɔná nɔmimaa akɛ ebaawo wɔ nyɔmɔ kɛha suɔmɔnaa oniatsumɔ ni wɔkɛhaa koni akɛha anɔkwa jamɔ aya hiɛ lɛ hewɔ.​—⁠Hebribii 11:⁠6.

[Shishigbɛ niŋmaa]