Wala Shihilɛ He Sane

Wɔhiɛ ni Wɔmiaa Kɛyaa Hiɛ yɛ Yehowa Sɔɔmɔ Mli lɛ Ji Wɔhewalɛ kɛ Miishɛɛ

TAAKƐ LUIGGI D. VALENTINO GBA

Yehowa kɛ famɔ haa akɛ: “Gbɛ lɛ nɛ! nyɛnyiɛa nɔ!” (Yesaia 30:21) Kɛjɛ afii 60 ni eho nɛ ni abaptisi mi kɛbaa nɛɛ lɛ, nɛkɛ ŋaawoo nɛɛ kɛ nitsumɔ efee oti ni ma mihiɛ. Nɔkwɛmɔ ni mifɔlɔi ni efa kɛjɛ Italy kɛ́ba Cleveland, Ohio, yɛ U.S.A. yɛ afi 1921 lɛ fee lɛ ji nɔ ni ha mikɛ oti nɛɛ mã mihiɛ. Amɛlɛ bii etɛ yɛ jɛmɛ—mi, minyɛminuu onukpa Mike, kɛ minyɛmiyoo fioo Lydia.

MIFƆLƆI pɛi jamɔi srɔtoi amli amɛkwɛ, shi yɛ naagbee lɛ, amɛkɛ nijiaŋwujee kpa. Kɛkɛ ni gbi ko yɛ afi 1932 mli lɛ, Ataa miibo redio nɔ nifeemɔ ko toi yɛ Italy wiemɔ mli. No mli lɛ, eji Yehowa Odasefoi lɛ anifeemɔ ko, ni Ataa ná nɔ ni enu lɛ he miishɛɛ. Eŋma wolo emaje kɛbi saji babaoo, kɛkɛ ni Italynyo Odasefonyo ko ni jɛ Yehowa Odasefoi lɛ anitsumɔhe wulu ni yɔɔ Brooklyn, New York lɛ, basara wɔ. Yɛ beni amɛkɛ miishɛɛ egba sane gbi muu fɛɛ sɛɛ lɛ, mifɔlɔi he amɛye akɛ amɛna anɔkwale jamɔ lɛ.

Ataa kɛ Awo bɔi Kristofoi akpeeiyaa, ni amɛhaa nɔkwɛlɔ gbɛfalɔi bahiɔ amɛshia. Eyɛ mli akɛ no mli lɛ, gbekɛnuu fioo ji mi moŋ, shi hii nɛɛ haa mifataa amɛhe kɛyaa shiɛmɔ, ni amɛha mibɔi be-fɛɛ ni mikɛaasɔmɔ Yehowa lɛ he jwɛŋmɔ. Nɛkɛ saralɔi nɛɛ ateŋ mɔ kome ji Carey W. Barber, ní amrɔ nɛɛ eji Yehowa Odasefoi lɛ a-Nɔyeli Kuu lɛ mlinyo lɛ. Etsɛɛɛ ni yɛ February 1941 mli lɛ abaptisi mi beni miye afii 14, ni yɛ afi 1944 mli lɛ, mibɔi sɔɔmɔ ákɛ gbɛgbalɔ yɛ Cleveland. Mike kɛ Lydia hu je shishi amɛkɛ Biblia mli anɔkwalei lɛ bɔi nitsumɔ. Mike sɔmɔ Yehowa aahu kɛyashi egbo, ni Lydia kɛ afii 28 fata ewu Harold Weidner he yɛ gbɛfaa sɔɔmɔ nitsumɔ lɛ mli. Ŋmɛnɛ, amɛmiisɔmɔ ákɛ be-fɛɛ sɔɔlɔi krɛdɛɛi.

Tsuŋwoo Wo Mifaishitswaa akɛ Maya Hiɛ lɛ Mli Hewalɛ

Yɛ afi 1945 afi lɛ shishijee mli lɛ, ayawo mi tsuŋ yɛ Ohio Chillicothe Federal Prison lɛ akɛni mihenilee ni Biblia etsɔse lɛ lɛ tsirɛ mi koni minifeemɔ kɛ Yesaia 2:4 lɛ ni kɛɔ akɛ wɔkɛ wɔklante baasɔ̃ kɔi lɛ akpã gbee lɛ hewɔ. Be ko lɛ, mɛi ni kwɛɔ gboklɛfoi lɛ anɔ lɛ ŋmɛ Odasefoi gboklɛfoi lɛ gbɛ koni amɛnine ashɛ Biblia he woji ni Yehowa Odasefoi lɛ efee lɛ fioo ko pɛ nɔ. Shi kɛlɛ, Odasefoi ni yɔɔ asafoi ni bɛŋkɛ wɔ lɛ ye amɛbua. Bei komɛi lɛ, amɛbaŋmɛɔ woji fioo komɛi ahe amɛshwieɔ ŋa ni bɛŋkɛ tsuŋwoohe lɛ anɔ. Kɛkɛ lɛ, enɔ jetsɛremɔ leebi lɛ, yɛ be mli ni akɛ gboklɛfoi lɛ yaa hei ni amɛyaatsu nii lɛ yɛ lɛ, amɛtaoɔ hei ni nɛkɛ woji nɛɛ jwere, ni amɛbɔɔ mɔdɛŋ amɛkɛyaa tsuŋwoohe lɛ. Beni awo mi tsuŋ lɛ, no mli lɛ, aŋmɛ wɔ gbɛ ni wɔnine miishɛ woji pii anɔ. Enɛ ha mibana bɔ ni abuɔ mumɔŋ niyenii ni jɛɔ Yehowa ŋɔɔ baa lɛ waa diɛŋtsɛ—nɔ ko ni mikase, ni mikaiɔ daa kɛji minine shɛ Buu-Mɔɔ kɛ Awake! lɛ nɔ lɛ.

Eyɛ mli akɛ aŋmɛ wɔ gbɛ koni wɔfee asafoŋ kpeei yɛ tsuŋwoohe lɛ moŋ, shi aŋmɛɛɛ gbɛ ni mɛi ni amɛjeee Odasefoi aba jɛmɛ. Ni kɛlɛ, gboklɛfoi anɔkwɛlɔi lɛ kɛ gboklɛfoi komɛi baa yɛ teemɔŋ, ni amɛteŋ mɛi fioo komɛi kpɛlɛ anɔkwale lɛ nɔ. (Bɔfoi lɛ Asaji 16:30-34) Nyɛminuu A. H. Macmillan saramɔi lɛ ji miishɛjemɔ jɛɛhe ni he bahia waa. Emaa nɔ mi ehaa wɔ be fɛɛ be akɛ, be ni wɔyeɔ yɛ tsuŋwoohe lɛ efeee efolo ejaakɛ eesaa wɔ kɛha wɔsɛɛ nitsumɔi. Nakai nyɛminuu onukpa lɛ ni misumɔɔ esane lɛ ná minɔ hewalɛ waa, ni eha mifaishitswaa akɛ manyiɛ yɛ Yehowa gbɛ lɛ nɔ lɛ mli wa.

Miná Hefatalɔ

Jeŋ Ta II lɛ ba naagbee, kɛkɛ ni ajie wɔ kɛjɛ tsuŋ, ni mije be-fɛɛ nitsumɔ ni ji gbɛgbamɔ nitsumɔ lɛ shishi. Shi ataa gbo yɛ afi 1947 mli. Bɔni afee ni manyɛ maye mabua weku lɛ, miyatsu heloonaa nitsumɔ, ni mibale bɔ ni agbɔleɔ mɔ he nitsumɔ waa—hesaa ko ni baaye ebua mi yɛ fimɔ beaŋ ni mi kɛ miŋa fɛɛ kɛkpe yɛ aaafee afii 30 sɛɛ lɛ. Shi mitooo miwiemɔi lɛ anaa. Klɛŋklɛŋ lɛ, nyɛhaa magbaa nyɛ miŋa he sane.

Gbi ko shwane yɛ afi 1949 mli, beni miyɔɔ Maŋtsɛyeli Asa lɛ nɔ lɛ, ni tɛlifoŋ lɛ gbɛɛ. Miwo nɔ, ni minu gbee ŋɔɔmɔŋɔɔmɔ ko ni kɛɛ akɛ: “Atsɛɔ mi Christine Genchur. Miji Yehowa Odasefoi lɛ ateŋ mɔ kome. Mifã kɛba Cleveland koni mibatao nitsumɔ, ni miitao ni mikɛ asafo ko abɔ.” Eyɛ mli akɛ he ni wɔ Maŋtsɛyeli Asa lɛ yɔɔ kɛ he ni eyɔɔ lɛ jɛkɛ moŋ, shi egbee ŋɔɔ minaa, no hewɔ lɛ, mitsɔɔ lɛ gbɛ kɛba wɔ asa lɛ nɔ, ni miwo lɛ hewalɛ ni eba nakai Hɔgbaa lɛ—gbi ni mikɛbaaha maŋshiɛmɔ lɛ. Hɔgbaa lɛ, mi ji klɛŋklɛŋ mɔ ni yashɛ Maŋtsɛyeli Asa lɛ nɔ, shi nyɛmi yoo gbɔ ko baaa. Beni mihaa wiemɔ lɛ fɛɛ lɛ, mitee nɔ mikwɛ shinaa lɛ naa, shi mɔ ko mɔ ko baaa. Ni je tsɛre lɛ mitswa lɛ, ni etsɔɔ mli akɛ eleko gbɛ̀i lɛ anɔ ní bɔɔsii lɛ tsɔɔ lɛ lolo. No hewɔ lɛ mijɛ misuɔmɔ mli mikɛ lɛ yakpe ni mitsɔɔ lɛ nibii amli jogbaŋŋ.

Miná mile akɛ efɔlɔi ní amɛfã kɛjɛ Czechoslovakia kɛba lɛ je shishi amɛkɛ Biblia Kaselɔi lɛ bɔi bɔɔ yɛ be mli ni amɛkane wolo bibioo ni ji Where Are the Dead? (Negbɛ Gbohii lɛ Yɔɔ?) lɛ. Abaptisi efɔlɔi yɛ afi 1935 mli. Yɛ afi 1938 mli lɛ, Christine tsɛ batsɔ Yehowa Odasefoi lɛ asafo nɔkwɛlɔ (ni amrɔ nɛɛ atsɛɔ lɛ onukpai asɛinɔtalɔ) yɛ Clymer, Pennsylvania, U.S.A., ni yɛ afi 1947 mli lɛ, abaptisi Christine beni eye afii 16. Etsɛɛɛ ni miná suɔmɔ miha nɛkɛ nyɛmiyoo fɛfɛo ni susuɔ mumɔŋ nibii ahe waa nɛɛ. Wɔbote gbalashihilɛ mli June 24, 1950, ni kɛjɛ nakai beaŋ kɛbaa nɛɛ Christine kɛ mi ehi shi akɛ hefatalɔ anɔkwafo, ni esumɔɔ ni ekɛ Nyɔŋmɔ Maŋtsɛyeli lɛ he nibii lɛ aye klɛŋklɛŋ gbɛhe be fɛɛ be. Midaa Yehowa shi akɛ eha nɛkɛ hefatalɔ kpakpa nɛɛ kpɛlɛ akɛ ekɛ eshihilɛ baatsa minɔ lɛ.—Abɛi 31:10.

Naakpɛɛ Nii Wulu

Wɔje gbɛgbamɔ nitsumɔ lɛ shishi November 1, 1951. Ni yɛ afii enyɔ sɛɛ, yɛ kpee ko ni afee yɛ Toledo, Ohio lɛ shishi lɛ, Nyɛminuu Hugo Riemer kɛ Nyɛminuu Albert Schroeder wie amɛtsɔɔ gbɛgbalɔi akuu ko ni miisumɔ ni amɛkɛ amɛhe awo maŋsɛɛ sɔɔmɔ nitsumɔ lɛ mli. Wɔfata nakai mɛi lɛ ahe. Awo wɔ hewalɛ koni wɔya nɔ wɔtsu gbɛgbamɔ nitsumɔ lɛ yɛ Cleveland, shi nyɔɔŋ ni nyiɛ sɛɛ lɛ nɔŋŋ mli lɛ wɔnine shɛ naakpɛɛ nii wulu ko nɔ—ninefɔɔ kɛmiiya Buu Mɔɔ Biblia Gilead Skul klas ni ji 23 lɛ yɛ February 1954!

Beni wɔkudɔɔ tsɔne lɛ kɛyaa Gilead Skul lɛ, ni no mli lɛ afeɔ yɛ South Lansing, New York lɛ, Christine tsui efa aahu akɛ etee nɔ ekɛɛ mi akɛ, “Nyiɛmɔ blɛoo!” Mikɛɛ lɛ akɛ, “Christine, kɛ minyiɛ blɛoo ekoŋŋ fe bɔ ni minyiɛ nɛɛ lɛ, ebaafee tamɔ nɔ ni wɔtsɔne lɛ ewa edamɔ shi.” Shi beni wɔyashɛ skul lɛ, wɔná ekãa babaoo. Nyɛminuu Nathan Knorr here nikaselɔi akuu lɛ atuu ni akɛ wɔ kpa nitsumɔhe lɛ mli. Agbɛnɛ hu, etsɔɔ wɔ bɔ ni esaaa akɛ wɔfiteɔ nu, kɛ sarawa hewalɛ, ni ema nɔ mi akɛ nibii ni wɔheŋ kɛkɛ lɛ ji gbɛ ni hi ni atsɔɔ nɔ akwɛɔ Maŋtsɛyeli lɛ nibii lɛ anɔ. Nakai ŋaawoo lɛ ka wɔjwɛŋmɔi amli. Wɔmiihi shi nakai lolo kɛbashi ŋmɛnɛ.

Kɔɔyɔŋ Lɛlɛ Mlitamɔ Kɛmiiya Rio

Etsɛɛɛ ni wɔgbe skul lɛ naa, ni yɛ December 10, 1954 gbi lɛ nɔ lɛ, wɔkɛ miishɛɛ ni wɔyɔɔ akɛ wɔmiiya wɔyaje wɔnitsumɔ hee shishi yɛ Rio de Janeiro yɛ Brazil he ni hulu lɛ tsoɔ yɛ waa lɛ kwɔ kɔɔyɔŋ lɛlɛ yɛ New York City fɛi be lɛ mli. Peter kɛ Billie Carrbello ni ji nanemɛi maŋsɛɛ sanekpakpa shiɛlɔi lɛ hu fata wɔhe kɛfã gbɛ lɛ. Kulɛ esa akɛ wɔkɛ ŋmɛlɛtswai 24 afã gbɛ lɛ, ní wɔyama shi fioo yɛ Puerto Rico, Venezuela, kɛ Belém yɛ Brazil kooyigbɛ. Shi kɛlɛ, yɛ naagbai ni ba kɔɔyɔŋ lɛlɛ lɛ tsɔne lɛ he lɛ hewɔ lɛ, wɔye ŋmɛlɛtswai 36 dani wɔna Rio de Janeiro yɛ shikpɔŋ. Jɛmɛ yɛ fɛo waa diɛŋtsɛ! Kanei ni asu yɛ maŋtiase lɛ miikpɛlɛ tamɔ ojarawa tɛi yɛ kapɛti diŋ nɔ, ni nyɔɔŋtsere lɛ kpɛmɔ yɛ Guanabara Bay ŋshɔ lɛ hiɛ lɛ tamɔ jwiɛtɛi ni miikpɛlɛ.

Betel weku lɛ mli bii lɛ ateŋ mɛi pii miimɛ wɔ yɛ kɔɔyɔɔŋ lɛjiadaamɔhe lɛ. Beni amɛkɛ miishɛɛ ehere wɔ atuu sɛɛ lɛ, amɛkɛ tsɔne wo wɔ kɛtee nitsumɔhe nine lɛ, ni wɔbote saa mli aaafee leebi ŋmɛji etɛ. Ŋmɛlɛtswaa fioo komɛi asɛɛ lɛ ŋmɛlɛ ni atswaa kɛtsɛ̃ɔ mɛi ahiɛ lɛ kai wɔ akɛ wɔ klɛŋklɛŋ gbi yɛ maŋsɛɛ shiɛmɔ nitsumɔ lɛ mli lɛ eje shishi!

Shishijee Nikasemɔ

Etsɛɛɛ ni wɔkase nɔ ko ni he hiaa waa. Wɔkɛ weku ko ni amɛji Odasefoi yahi shi gbɛkɛ ko yɛ amɛshia. Beni wɔkɛɛ wɔmiisumɔ ni wɔnyiɛ kɛya nitsumɔhe nine lɛ, wɔgbɔfeelɔ lɛ ekpɛlɛɛɛ, ni ekɛɛ: “Dabi, nyɛnyɛŋ nyɛya; nugbɔ miinɛ,” ni ebɔ mɔdɛŋ enyɛ wɔnɔ koni wɔwɔ jɛmɛ. Shi mikɛɛ lɛ akɛ: “Nugbɔ nɛɔ yɛ wɔmaŋ lɛ mli nakai nɔŋŋ,” kɛkɛ ni mikɛ ŋmɔlɔ tswa ewiemɔ lɛ efɔ̃. Ni wɔyi gbɛ wɔtee.

Gɔji ni ebɔle Rio kɛkpe lɛ hewɔ lɛ, nui lɛ buaa amɛhe naa oya kɛbɔleɔ maŋtiase lɛ, ni bei pii lɛ etsɔɔ nu afua. Etsɛɛɛ ni nui lɛ kwɔ kɛbashɛ wɔnakutsei anaa. Gbɛjegbɛi ni kã nitsumɔhe nine lɛ masɛi lɛ etsɔ faai, ni eta wɔtsitsi. Beni wɔshɛɔ Betel lɛ no mli lɛ, wɔfɔ tsóo. Enɔ jetsɛremɔ lɛ Christine fee basaa, ni atridii ni naa wa mɔ lɛ, ni enɛ ha ekumɔ bei saŋŋ. Kulɛ, ákɛ maŋsɛɛ sanekpakpa shiɛlɔi heei lɛ, esa akɛ wɔbo ŋaawoo ni Odasefoi ni yɔɔ niiashikpamɔ ni yɔɔ jɛmɛ lɛ kɛhaa wɔ lɛ toi.

Klɛŋklɛŋ Nifeemɔ yɛ Maŋsɛɛ Sanekpakpa Shiɛmɔ Nitsumɔ lɛ kɛ Gbɛfaa Nitsumɔ lɛ Mli

Yɛ nɛkɛ shishijee gbonyo nɛɛ sɛɛ lɛ, wɔkɛ ekãa je wɔsɔɔmɔ nitsumɔ lɛ shishi. Wɔkaneɔ wɔshiɛmɔ wiemɔ lɛ yɛ Portugal wiemɔ mli wɔhaa mɛi fɛɛ ni wɔkɛkpeɔ lɛ, ni efee tamɔ nɔ ni wɔmiibɔ wiemɔ lɛ he mɔdɛŋ bɔ ni sa. Shiatsɛ ko kɛɔ Christine akɛ: “Miinu nɔ ni owieɔ lɛ shishi, shi minuuu nɔ ni mɔnɛ wieɔ lɛ shishi,” bɛlɛ akɛ nine miitsɔɔ mi. Shiatsɛ kroko baakɛɛ mi akɛ, “Minuɔ bo shishi, shi minuuu yoo lɛ shishi.” Yɛ enɛɛmɛi fɛɛ sɛɛ po lɛ, wɔná miishɛɛ akɛ wɔnyɛ wɔha mɛi fe 100 shɛ Buu-Mɔɔ yɛ klɛŋklɛŋ otsii fioo lɛ amli. Yɛ anɔkwale mli lɛ, abaptisi wɔ Biblia kaselɔi lɛ babaoo yɛ wɔ klɛŋklɛŋ afi ni wɔye yɛ Brazil lɛ mli, ni eha wɔna bɔ ni maŋsɛɛ sanekpakpa shiɛmɔ nitsumɔ baafee nɔ ni baawo yibii aha.

Yɛ afi 1950 afii lɛ teŋgbɛ lɛ, no mli lɛ kpokpaa nɔ kwɛlɔi efɔɔɔ asafoi ni yɔɔ Brazil lɛ saramɔ, ejaakɛ amɛbɛ nyɛmimɛi hii ni he esa. No hewɔ lɛ, eyɛ mli akɛ miikase wiemɔ lɛ lolo, ni kɛbashi bianɛ lɛ mihako maŋshiɛmɔ yɛ Portugal wiemɔ mli dã moŋ, shi aha mi nitsumɔ akɛ kpokpaa nɔkwɛlɔ yɛ São Paulo maŋ lɛ mli yɛ afi 1956 mli.

Akɛni klɛŋklɛŋ asafo ni wɔyasara lɛ ji asafo ko ni yɛ afii enyɔ ni eho lɛ mli lɛ asarako amɛ dã hewɔ lɛ, mɔ fɛɛ mɔ kpa maŋshiɛmɔ lɛ gbɛ waa. Beni misaa mihe kɛha nakai wiemɔ lɛ, mifolɔ Portugal wiemɔ Buu-Mɔɔ lɛ mli niŋmaai lɛ, ni mikɛkpɛtɛ wolo lɛ nɔ. Nakai Hɔgbaa lɛ, Maŋtsɛyeli Asa lɛ nɔ yi obɔ. Mɛi komɛi po yatara wiemɔ kpoku lɛ nɔ kɛmiimɛ nifeemɔ wulu lɛ. Wiemɔ lɛ, aloo nikanemɔ lɛ je shishi. Kɛ eyɛ mli aahu lɛ, miwoɔ mihiɛ nɔ mikwɛɔ mɛi lɛ, ni efee mi naakpɛɛ akɛ mɔ ko mɔ ko eteee shi, gbekɛbii lɛ po eteee shi. Mɔ fɛɛ mɔ egbɛ ehiŋmɛiiaŋ waa kɛmiikwɛ mi. Mikɛɛ mihe akɛ: ‘Hei, Valentino, kwɛ bɔ ni mitee hiɛ yɛ Portugal wiemɔ lɛ mli eha! Gbɔmɛi nɛɛ miibo toi.’ Afii komɛi asɛɛ beni miyasara nakai asafo lɛ ekoŋŋ lɛ, nyɛminuu ko ni nakai gbi lɛ eba kpee lɛ beni mibasara amɛ klɛŋklɛŋ lɛ kɛɛ akɛ: “Ani okaiɔ nakai maŋshiɛmɔ lɛ ni oha lɛ? Wɔnuuu nɔ ko nɔ ko shishi yɛ mli.” Miwie anɔkwale akɛ, mi diɛŋtsɛ lɛ, minuuu nakai wiemɔ lɛ mli saji lɛ ateŋ babaoo shishi.

Nakai afi lɛ ni mikɛsɔmɔ akɛ kpokpaa nɔkwɛlɔ lɛ, mifɔɔ Zakaria 4:6 lɛ kanemɔ. Jɛmɛ wiemɔi lɛ kɛɔ akɛ, “Jeee hewalɛ naa, shi Mimumɔ lɛ naa” lɛ, kaiɔ mi akɛ Yehowa mumɔ lɛ naa pɛ hewɔ ni Maŋtsɛyeli nitsumɔ lɛ yaa hiɛ lɛ. Ni nakai etee hiɛ hu yɛ wɔfatɔɔi ni anaa faŋŋ lɛ fɛɛ sɛɛ.

Kaai kɛ Jɔɔmɔ yɛ Nitsumɔ lɛ Mli

Nɔ ni wɔfeɔ yɛ kpokpaa nitsumɔ lɛ mli ji akɛ, wɔkɛ tɔlɛ hiɛɔ taipi, adeka kɛ woji, baagii wuji kɛ bibii kɛkpaa maŋ lɛ mli. Christine kɛ nilee ŋmala nɔmbai ewo wɔbaagii lɛ ahe bɔni afee ni wɔhiɛ akakpa eko nɔ yɛ be mli ni wɔjɛɔ bɔs kome mli kɛyaa ekroko mli lɛ. Wɔkɛ bɔs fɔɔ gbɛfaa ŋmɛlɛtswai 15 yɛ gbɛjegbɛi ni nɔ ehiii anɔ kɛyaa hei ni wɔyaa lɛ. Bei komɛi lɛ wɔtsui fãa fioo, titri, kɛji akɛ bɔs enyɔ bakpe yɛ be kome too lɛ nɔŋŋ mli yɛ agba ni kã faa bibioo ko nɔ lɛ nɔ lɛ, ni kɛ eba lɛ nakai lɛ, gbɛ ko kwraa kãaa amɛteŋ, ni efeɔ tamɔ nɔ ni agba lɛ mli baaku. Wɔkɛ oketeke, lɛlɛ, kɛ okpɔŋɔ hu fãa gbɛ.

Yɛ afi 1961 mli lɛ, wɔje kpokpaa wulu nɔ sɔɔmɔ nitsumɔ lɛ shishi, ni wɔfãa gbɛ kɛjɛɔ kpokpaa kome nɔ kɛyaa kpokpaa kroko nɔ, shi jeee asafo kɛmiiya asafo mli. Wɔjieɔ sinii ni Yehowa gbɛjianɔtoo lɛ efee lɛ wɔtsɔɔ shii abɔ yɛ otsi mli—ni wɔjieɔ yɛ hei srɔtoi be fɛɛ be. Bei pii lɛ ebiɔ ni wɔjɛ nilee mli wɔye osɔfoi ni yɔɔ jɛmɛ ni bɔɔ mɔdɛŋ koni amɛtsĩ wɔnaa koni wɔkanyɛ wɔjie lɛ anɔ kunim. Yɛ maŋ ko mli lɛ, osɔfo lɛ fee asa he ni wɔbaajie yɛ lɛ nɔtsɛ lɛ basabasa ni eha afo kpaŋmɔ ni ekɛ wɔ efee lɛ mli. Beni wɔkɛ gbii saŋŋ etao eko sɛɛ lɛ, wɔyana eko yɛ he kroko, shi wɔkɛɛɛ mɔ ko mɔ ko, shi wɔtee nɔ wɔfɔ̃ mɛi lɛ nine kɛtee he ni tsutsu lɛ wɔto akɛ wɔbaajie yɛ lɛ. Dani nifeemɔ lɛ aaaje shishi lɛ, Christine tee he ni abaajie yɛ lɛ ni etsɔɔ mɛi ni sumɔɔ ni amɛkwɛ sini lɛ gbɛ kɛtee he kroko ni ato ni abaajie yɛ lɛ yɛ teemɔŋ. Nakai gbi gbɛkɛ lɛ, mɛi 150 bakwɛ sini lɛ ni hiɛ sane yitso ni sa ni ji The New World Society in Action.

Eyɛ mli akɛ bei komɛi lɛ, tɔlɛ yɛ gbɛfaa nitsumɔ lɛ mli yɛ hei ni etse amɛhe banee lɛ moŋ, shi nyɛmimɛi heshibalɔi ni yɔɔ jɛmɛ lɛ ahiɛ sɔɔ saramɔi ni wɔbasaraa amɛ lɛ waa, ni amɛhereɔ wɔ hiɛmɛɛ waa yɛ amɛshiai ni baa shi lɛ amli aahu akɛ, wɔdaa Yehowa shi be fɛɛ be akɛ wɔyaa amɛ ŋɔɔ. Amɛ ni wɔkɛ bɔɔ naanyo lɛ haa wɔnáa jɔɔmɔi kɛ miishɛɛ. (Abɛi 19:17; Hagai 2:7) No hewɔ lɛ, kwɛ bɔ ni edɔ wɔ eha, beni wɔkɛ nɔ ni fe afii 21 esɔmɔ yɛ Brazil sɛɛ lɛ wɔ maŋsɛɛ sanekpakpa shiɛmɔ gbii lɛ ba naagbee lɛ!

Yehowa Tsɔɔ Wɔ Gbɛ lɛ Beni Wɔkɛ Naagbai Kpe

Afee Christine opireshɛŋ yɛ afi 1975 mli. Wɔtsa gbɛfaa nitsumɔ lɛ nɔ ekoŋŋ, shi Christine gbɔjɔ kwraa yɛ gbɔmɔtsoŋ. Etamɔ nɔ ni ehi moŋ akɛ wɔɔku wɔsɛɛ kɛya United States koni ayafee lɛ tsofa. Yɛ April 1976 mli lɛ, wɔyashɛ Long Beach, California, ni wɔkɛ minyɛ yahi jɛmɛ. Beni wɔkɛ afii nyɔŋmai enyɔ ehi maŋsɛɛ sɛɛ lɛ, wɔleee bɔ ni wɔɔfee wɔtsu nɛkɛ shihilɛ nɛɛ he nii. Mibɔi mɛi gbɔlemɔ, ni shika ni mináa kɛjɛɔ nakai nitsumɔ lɛ mli lɛ wɔyeɔ. California maŋ lɛ he Christine amɛfɔ̃ helatsamɔhe ko, shi be fɛɛ be lɛ gbɔjɔmɔ egbɔjɔɔ, ejaakɛ datrɛfoi lɛ ekpɛlɛɛɛ ni amɛtsaa lɛ ni lá fataaa he. Akɛni wɔyaje shihilɛ ni mli wa mli hewɔ lɛ, wɔbi Yehowa ni etsɔɔ wɔ gbɛ ni wɔtsɔ nɔ.

Gbi ko shwane lɛ, beni mitee shiɛmɔ lɛ, mina datrɛfonyo ko ɔfis, ni amrɔ nɔŋŋ lɛ mikpɛ miyiŋ akɛ mabote mli. Eyɛ mli akɛ datrɛfonyo lɛ miitao eya shia moŋ, shi eha mibote e-ɔfis lɛ, ni wɔwie ŋmɛlɛtswai enyɔ. Kɛkɛ ni ekɛɛ mi akɛ: “Mihiɛ esɔ nii ni nyɛtsuɔ akɛ maŋsɛɛ sanekpakpa shiɛlɔi lɛ, ni matsa oŋa lɛ ni miheee bo shika ko, ni mikɛ lá hu efeŋ.” Minyɛɛɛ mahe nɔ ni minuɔ lɛ maye.

Nɛkɛ datrɛfonyo nɛɛ, ni sɛɛ mli lɛ mibale akɛ eji mɔ ko ni he esa waa lɛ ha ajie Christine kɛtee helatsamɔhe ni etsuɔ nii yɛ lɛ, ni kɛtsɔ lɛ ekwɛmɔ nɔ lɛ, ebɔi hewalɛ namɔ nɔŋŋ. Kwɛ shi ni wɔdaa akɛ Yehowa etsɔɔ wɔ gbɛ ni wɔtsɔ nɔ yɛ nakai haomɔ be lɛ mli!

Nitsumɔi Heei

Beni Christine ná hewalɛ ekoŋŋ lɛ, wɔsɔmɔ akɛ gbɛgbalɔi, ni wɔná miishɛɛ yɛ mɛi babaoo ni wɔye wɔbua amɛ yɛ Long Beach maŋ lɛ mli koni amɛbatsɔmɔ Yehowa jálɔi lɛ hewɔ. Yɛ afi 1982 afi lɛ mli lɛ, afɔ̃ wɔ nine ní wɔyatsu kpokpaa nɔkwɛmɔ nitsumɔ lɛ yɛ United States. Wɔdaa Yehowa shi daa gbi akɛ ekɛ wɔ tsu nii ekoŋŋ yɛ gbɛfaa nitsumɔ lɛ mli—nitsumɔ ko ni wɔsumɔɔ lɛ. Wɔsɔmɔ yɛ California, ni wɔyasɔmɔ yɛ New England, he ni Portugal asafoi fata asafoi ni yɔɔ nakai kpokpaa lɛ nɔ he lɛ. Sɛɛ mli lɛ, akɛ Bermuda fata he.

Yɛ afii ejwɛ kɛ ŋɔɔmɔ sɛɛ lɛ, wɔnine shɛ nitsumɔ kroko nɔ. Afɔ̃ wɔ nine koni wɔyasɔmɔ akɛ gbɛgbalɔi krɛdɛɛi yɛ he fɛɛ he ni wɔsumɔɔ. Eyɛ mli akɛ edɔ wɔ akɛ wɔmiishi gbɛfaa nitsumɔ lɛ moŋ, shi wɔtswa wɔfai shi akɛ wɔbaamia wɔhiɛ yɛ wɔnitsumɔ hee lɛ mli yɛ naagbai lɛ fɛɛ sɛɛ. Shi nɛgbɛ wɔbaatsu nii lɛ yɛ? Mikadi yɛ gbɛfaa nitsumɔ lɛ mli akɛ, yelikɛbuamɔ he miihia Portuguese Asafo ni yɔɔ New Bedford, Massachusetts lɛ—no hewɔ lɛ, wɔyigbɛ kɛtee New Bedford.

Beni wɔyashɛ jɛmɛ lɛ, asafo lɛ ŋmɛ wɔ okpɔlɔ wulu ko kɛhere wɔ atuu. Kwɛ bɔ ni eha wɔnu he akɛ wɔhe hiaa! Eha wɔfo. Gbalashihilɛ mli hefatalɔi ni darako tsɔ ni hiɛ bii enyɔ kɛ mlihilɛ he wɔ kɛtee amɛshia ni wɔyahi jɛmɛ kɛyashi wɔná wɔ diɛŋtsɛ wɔshia. Lɛɛlɛŋ, Yehowa jɔɔ nɛkɛ gbɛgbamɔ krɛdɛɛ nitsumɔ nɛɛ nɔ bɔ ni wɔkpaaa gbɛ. Kɛjɛ afi 1986 kɛbashi ŋmɛnɛ lɛ, wɔye wɔbua mɛi srɔtoi 40 yɛ nɛkɛ maŋ nɛɛ mli, ni amɛbatsɔmɔ Odasefoi. Amɛji wɔmumɔŋ wekumɛi. Kɛfata he lɛ, miná miishɛɛ akɛ mina nyɛmimɛi ni yɔɔ jɛmɛ lɛ ateŋ mɛi enumɔ eda ni amɛtsɔmɔ tookwɛlɔi. Etamɔ nɔ ni wɔmiisɔmɔ yɛ maŋsɛɛ nitsumɔ ni miiwo yibii nɔŋŋ mli.

Kɛ wɔsusu bei ni eho lɛ he lɛ, wɔnáa miishɛɛ akɛ wɔsɔmɔ Yehowa kɛjɛ wɔblahiaŋ tɔ̃ɔ ni wɔha anɔkwale lɛ efee wɔshihilɛ gbɛ. Yɛ anɔkwale mli lɛ, amrɔ nɛɛ, gbɔlɛ kɛ gbɔmɔtsoŋ hewalɛ ni wɔbɛ miiná wɔnɔ hewalɛ bianɛ moŋ, shi hiɛyaa yɛ Yehowa gbɛ lɛ nɔ lɛ ji wɔhewalɛ kɛ miishɛɛ lolo.

[Mfoniri ni yɔɔ baafa 26]

Beni wɔyashɛ Rio de Janeiro ehee lɛ

[Mfoniri ni yɔɔ baafa 28]

Wɔmumɔŋ weku lɛ ni yɔɔ New Bedford, Massachusetts lɛ