Sanebimɔi ni Jɛ Kanelɔi Adɛŋ

Nɛgbɛ Daniel yɔɔ beni akaa Hebribii etɛ lɛ yɛ amaga ni kwɔ kpeteŋkpele ni Nebukadnezar eshɔ yɛ Dura ŋa lɛ nɔ lɛ hiɛ lɛ?

Biblia lɛ etsɔɔɔ, no hewɔ lɛ mɔ ko mɔ ko bɛ ŋmɛnɛ ni baanyɛ atsɔɔ he ni Daniel yɔɔ beni nakai emuuyeli he kaa lɛ yaa nɔ lɛ.

Mɛi komɛi ewie akɛ, akɛni Daniel ná hegbɛ krɛdɛɛ ko kɛjɛ Nebukadnezar ŋɔɔ hewɔ lɛ, enɔ kwɔ kwraa fe Shadrak, Meshak, kɛ Abednego ni no hewɔ lɛ abiii ni Daniel aya Dura ŋa lɛ nɔ. Daniel 2:49 tsɔɔ akɛ yɛ be ko mli lɛ ená hegbɛ ni nɔ kwɔ fe enanemɛi etɛ lɛ anɔ̃. Shi wɔnyɛŋ wɔma nɔ mi akɛ enɛ jie lɛ kɛjɛ mɛi krokomɛi ni ekɛ amɛ aaabua amɛhe naa yɛ amaga lɛ hiɛ lɛ mli.

Be mli ni mɛi krokomɛi bɔɔ mɔdɛŋ koni amɛtsɔɔ jɛmɛ ni Daniel baaa lɛ mli lɛ, amɛtsɔɔ akɛ ekolɛ eetsu nitsumɔ ni nɔyeli lɛ kɛwo edɛŋ lɛ he nii, loo ehe miiye ni no hewɔ ni ehiii lɛ jɛmɛ yaa lɛ. Shi kɛlɛ, Biblia lɛ ewieee nɔ ko tamɔ nakai. Bɔ fɛɛ bɔ ni sane lɛ ba lɛ eha lɛ, esaaa akɛ Daniel sane nɛɛ bafeɔ nɔ ni abaawie ashi, ejaakɛ eji eba lɛ nakai kulɛ, ŋwanejee ko bɛ he akɛ Babilon maŋ onukpai ni yeɔ awuŋa lɛ kɛbaatsu nii koni amɛkɛfolɔ enaa. (Daniel 3:8) Dani sane nɛɛ baaje shishi kɛ yɛ enaagbee sɛɛ fɛɛ lɛ, Daniel jie ehe kpo akɛ emuuyeli mlihiɛlɔ, ni yeɔ Nyɔŋmɔ anɔkwa ekɔɔɔ he eko kaa ni ekɛkpe. (Daniel 1:8; 5:17; 6:4, 10, 11) No hewɔ lɛ, eyɛ mli akɛ Biblia lɛ ewieee nɔ hewɔ ni Daniel bɛ Dura ŋa lɛ nɔ moŋ, shi wɔbaanyɛ wɔná nɔmimaa akɛ eye Yehowa Nyɔŋmɔ anɔkwa ni eŋmɛɛɛ saji ahe ni ekɛsaa.—Ezekiel 14:14; Hebribii 11:33.