Blema Adesãi Komɛi ni Kɔɔ Gbele He lɛ Amlipɛimɔ Jogbaŋŋ

YƐ YINƆSANE bei fɛɛ mli lɛ, gbele ní haa ayeɔ awerɛho ni baanyɛ aba lɛ eha gbɔmɛi ehao kɛ tsuifaa. Nɔ ni fe fɛɛ lɛ, nɔ ni eha gbele he gbeyeishemɔ lɛ mli ewo wu ji apasa jamɔ mli yiŋsusumɔi ni efutu, kusumii ni ehe shi, kɛ hemɔkɛyelii ni ehe shi waa yɛ mɔ mli lɛ. Naagba ni gbele he gbeyeishemɔ kɛbaa ji akɛ, ebaanyɛ efo nyɛmɔ ni mɔ ko yɔɔ akɛ eeená shihilɛ mli miishɛɛ lɛ sɛɛ, ní efite hekɛnɔfɔɔ ni mɔ yɔɔ ákɛ yiŋtoo yɛ shihilɛ sɛɛ lɛ.

Jamɔi wuji lɛ sa shwamɔ waa yɛ blema adesãi babaoo ni kɔɔ gbele he ni amɛha egbɛ eshwã lɛ hewɔ. Kɛtsɔ amɛteŋ fioo komɛi ni wɔbaasusu he yɛ Biblia mli anɔkwalei lɛ anaa lɛ nɔ lɛ, kwɛmɔ akɛ abaanyɛ ajaje susumɔi ni oyɔɔ yɛ gbele he lɛ lo.

Blema Adesã ni Ji 1: Gbele ji adebɔɔ naa shihilɛ ni foɔ wala sɛɛ.

Wolo ko ni gbɛi ji Death—The Final Stage of Growth lɛ kɛɔ akɛ: “Gbele . . . ji wɔshihilɛ lɛ fã titri ko.” Wiemɔi ni tamɔ nɛkɛ tsɔɔ hemɔkɛyeli ni ayɔɔ akɛ gbele nyɛɔ ebaa, eji adebɔɔ naa nifeemɔ ni kɛ nibii fɛɛ ni wala yɔɔ amɛmli lɛ baa naagbee. No hewɔ lɛ, hemɔkɛyeli ni tamɔ nɛkɛ eha mɛi babaoo ekɔ shihilɛ gbɛ ni ejaaa ni ewo jeŋ nilee ni kɛ yiŋkɔshikɔshifeemɔ baa lɛ he hewalɛ.

Shi ani eji anɔkwale akɛ gbele ji adebɔɔ naa nifeemɔ ni foɔ wala sɛɛ lɛɛlɛŋ? Jeee niiamlitaolɔi fɛɛ heɔ enɛ amɛyeɔ. Ákɛ nɔkwɛmɔnɔ lɛ, Calvin Harvey, ni ji nibii ni hiɛ kãmɔ ahe nilelɔ ni kaseɔ adesa gbɔlɛ he nii lɛ kɛɛ yɛ saji ní abibii lɛ lɛ mli akɛ, eheee eyeee akɛ “abɔ gbɔmɔ ní egbo.” William Clark, ni ji nilelɔ ni ekase hewalɛ ni wuɔ eshiɔ hela he nii lɛ yɔse akɛ: “Gbele kɛ bɔ ni atsɔɔ wala shishi aha lɛ bɛ tsakpãa ko kwraa.” Ni Seymour Benzer, ni tsɔɔ nii yɛ California Institute of Technology lɛ susu nii ahe ni ewie akɛ, “abaanyɛ atsɔɔ gbɔlɛ mli jogbaŋŋ akɛ etamɔɔɔ watsi ni akɛtsotsoroɔ shi, shi eji shihilɛ mli tsakemɔi ní wɔbaanyɛ wɔkpa gbɛ akɛ wɔbaanyɛ wɔtsake.”

Kɛ jeŋ nilelɔi kase bɔ ni abɔ adesai ahã lɛ, amɛnaa kpɛɔ amɛhe. Amɛnaa akɛ aduro adesai kɛ nilee kɛ nyɛmɔi ni fa kwraa fe nibii ni he hiaa wɔ yɛ wɔ afii 70 kɛyashi afii 80 ni wɔyeɔ lɛ mli. Ákɛ nɔkwɛmɔnɔ lɛ, jeŋ nilelɔi ena akɛ adesai ajwɛŋmɔ lɛ nyɛɔ ekaiɔ saji babaoo diɛŋtsɛ. Niiamlitaolɔ ko bu akɔntaa akɛ, wɔjwɛŋmɔ lɛ baanyɛ ekɛ saji ni “abaanyɛ aŋma yɛ wolokpoi ni naa shɛɔ akpei nyɔŋmai enyɔ mli ni falɛ shɛɔ wolokpoi ni yɔɔ wojiatoohe ni da fe fɛɛ yɛ je lɛ mli” lɛ ato. Adesai agbɔmɔtsoŋ fãji ahe nilelɔi komɛi heɔ yeɔ akɛ, saji abɔ ni ansɔ lɛ baanyɛ ekɛto lɛ oha mlijaa ekome (1/100) ni aja mli oha mli ekome (.0001) pɛ mɔ ni wala sɛɛ kɛ bɔ ni sa lɛ baanyɛ ekɛtsu nii yɛ ewala shihilɛ mli. Ebaahi jogbaŋŋ akɛ wɔɔbi akɛ, ‘Mɛni hewɔ wɔyɔɔ jwɛŋmɔ ni nyɛɔ ekɛ nibii babaoo toɔ beni wɔkɛ emli nɔ ko nyɛkɛsiɔɔ pɛ tsuɔ nii yɛ wɔwala afii ni wɔyeɔ lɛ mli lɛ?’

Agbɛnɛ hu, susumɔ bɔ ni adesai feɔ amɛnii yɛ gbɛ ni yɔɔ srɔto kwraa nɔ yɛ gbele he lɛ he okwɛ! Yɛ mɛi pii agbɛfaŋ lɛ, ŋa, wu, loo bi ko gbele baanyɛ efee shihilɛ mli niiashikpamɔ ko ni naa wa waa. Bei pii lɛ, bɔ ni mɛi ahenumɔ yɔɔ ha lɛ fiteɔ yɛ be kpalaŋŋ mli kɛji mɔ ko ni amɛsumɔɔ lɛ waa lɛ gbo. Mɛi ni kɛɔ akɛ gbele nyɛɔ ebaa adesai anɔ lɛ po naa akɛ, ewa akɛ amɛaakpɛlɛ susumɔ ni ahiɛ akɛ amɛ diɛŋtsɛ amɛgbele kɛ nɔ fɛɛ nɔ baaba naagbee lɛ nɔ. British Medical Journal lɛ wie “susumɔ ni ja ni ale jogbaŋŋ ni ji akɛ, mɔ fɛɛ mɔ miitao ni ehi wala mli be kpalaŋŋ bɔ ni eeenyɛ” lɛ he.

Yɛ bɔ ni adesa feɔ enii ehaa yɛ gbele he hewɔ lɛ, ani bɔ ni eyɔɔ nyɛmɔ ni ekɛaakai nii kɛ nikasemɔ, kɛ shwelɛ ni eyɔɔ akɛ ebaahi shi kɛya naanɔ lɛ etsɔɔɔ faŋŋ akɛ abɔ lɛ ni ehi shi kɛya naanɔ? Eyɛ faŋŋ akɛ, Nyɔŋmɔ kɛ gbele ebɔɔɔ adesai ákɛ adebɔɔ naa nɔ̃, shi kɛ hiɛnɔkamɔ akɛ amɛbaahi shi kɛya naanɔi anaanɔ. Kadimɔ wɔsɛɛ be ni Nyɔŋmɔ kɛha klɛŋklɛŋ adesai enyɔ lɛ: “Nyɛfɔa ni nyɛyi afáa ni nyɛyia shikpɔŋ lɛ nɔ obɔ, ni nyɛnaanaa nɔ, ni nyɛyea ŋshɔŋloi kɛ ŋwɛi loofɔji kɛ kooloo fɛɛ kooloo ni tsiɔ ehe yɛ shikpɔŋ lɛ nɔ lɛ nɔ.” (1 Mose 1:28) Mɛɛ hiɛnɔkamɔ ni nɔ bɛ, ni hiɔ shi kɛyaa naanɔ eji nɛkɛ!

Blema Adesã ni Ji 2: Nyɔŋmɔ gbeɔ mɛi koni amɛkɛ lɛ ayahi shi.

Nyɛ ko ni eye afii 27 ní miihe agbo ni eshi bii etɛ yɛ esɛɛ lɛ kɛɛ Katolik yoo mɔ-kome shihilɔ ko akɛ: “Kaakɛɛ mi akɛ enɛ ji Nyɔŋmɔ suɔmɔnaa nii kɛha mi. . . . Mihaoɔ waa kɛji mɔ ko kɛɛ mi nɔ ko ni tamɔ nɛkɛ.” Ni kɛlɛ, nɛkɛ ji bɔ ni jamɔi babaoo tsɔɔ yɛ gbele he—ákɛ Nyɔŋmɔ gbeɔ mɛi bɔni afee ni amɛkɛ lɛ abahi shi.

Ani eji anɔkwale diɛŋtsɛ akɛ Bɔlɔ lɛ yitsoŋ wa aahu akɛ ekɛ gbele baaba wɔnɔ ni enuuu he ehaaa wɔ kwraa, yɛ be mli ni ele akɛ enɛ baakumɔ wɔtsuii? Dabi, Biblia Nyɔŋmɔ lɛ efeŋ nakai. Taakɛ 1 Yohane 4:8 lɛ tsɔɔ lɛ, “Nyɔŋmɔ lɛ, suɔmɔ ji lɛ.” Kadimɔ akɛ ekɛɛɛ akɛ Nyɔŋmɔ yɛ suɔmɔ, loo akɛ Nyɔŋmɔ jieɔ suɔmɔ kpo, shi ekɛɛ akɛ Nyɔŋmɔ lɛ, suɔmɔ ji lɛ. Suɔmɔ ni Nyɔŋmɔ yɔɔ lɛ mli wa, eyɛ krɔŋŋ, ni eye emuu, ehi aahu akɛ ejeɔ kpo yɛ sui ni eyɔɔ kɛ enifeemɔi fɛɛ amli, no hewɔ lɛ abaanyɛ awie ehe yɛ gbɛ ni ja nɔ akɛ, suɔmɔ ni jieɔ ehe kpo yɛ gbɔmɔtso su mli. Ejeee Nyɔŋmɔ ni gbeɔ mɛi bɔni afee ni amɛkɛ lɛ abahi shi.

Apasa jamɔ eha mɛi babaoo ayiŋ efutu amɛ yɛ he ni gbohii lɛ yɔɔ kɛ shihilɛ mli ni amɛyɔɔ lɛ he. Ŋwɛi, hɛl, hetsuumɔhe, Limbo—shihilɛhei nɛɛ kɛ ekrokomɛi srɔtoi jeɔ shishi kɛjɛɔ nɔ ni jwɛŋmɔ shɛɛɛ he lɛ nɔ kɛyaa nɔ ni yɔɔ gbeyei waa lɛ nɔ. Nɔ ni tamɔɔɔ nakai lɛ, Biblia lɛ kɛɔ wɔ akɛ gbohii lɛ leee nɔ ko nɔ ko; amɛyɛ shihilɛ ko ni abaanyɛ akɛto wɔ̀ he lɛ mli. (Jajelɔ 9:5, 10; Yohane 11:11-14) No hewɔ lɛ, ehe ehiaaa ni wɔhao wɔhe yɛ nɔ ni baa wɔnɔ beni wɔgboi, tamɔ bɔ ni wɔhaoŋ wɔhe kɛji wɔna mɔ ko ni ewɔ̀ waa lɛ. Yesu wie be ko ni ‘mɛi fɛɛ ni yɔɔ gbohiiabui lɛ amli’ lɛ ‘baaje kpo’ ni amɛbaaná wala yɛ shikpɔŋ nɔ paradeiso lɛ he.—Yohane 5:28, 29; Luka 23:43.

Blema Adesã ni Ji 3: Nyɔŋmɔ gbeɔ abifabii ní amɛtsɔmɔ ŋwɛibɔfoi.

Elisabeth Kübler-Ross, ní kase mɛi ni yeɔ gbele helai lɛ ahe nii lɛ, wie susumɔ kroko ni ehe shi waa yɛ sɔlemɔyalɔi ateŋ lɛ he. Beni etsɔɔ shihilɛ ko ni ba diɛŋtsɛ lɛ mli lɛ, ewie akɛ, “jwɛŋmɔ bɛ mli akɛ obaakɛɛ gbekɛ bibioo ko ni enyɛmi nuu egbo lɛ akɛ Nyɔŋmɔ sumɔɔ gbekɛbii hii bibii asane waa ni no hewɔ lɛ ebaŋɔ Johnny, enyɛmi nuu fioo lɛ kɛtee ŋwɛi lɛ.” Wiemɔi ni tamɔ nɛkɛ haaa aná jwɛŋmɔ ni ja yɛ Nyɔŋmɔ he, ni ejieee esu kɛ bɔ ni eyɔɔ hã lɛ kpo. Datrɛfonyo Kübler-Ross tsa nɔ akɛ: “Beni gbekɛ yoo fioo nɛɛ da ni ebatsɔ yoonukpa lɛ, eŋmɛɛɛ emli ni efu Nyɔŋmɔ lɛ he, ni enɛ hã ená jwɛŋmɔŋ hela ni naa wa afii nyɔŋmai etɛ sɛɛ beni ebinuu fioo lɛ gbo sɛɛ lɛ.”

Mɛni hewɔ Nyɔŋmɔ baaŋɔ gbekɛ fioo ko kɛya ni eyatsɔ ŋwɛibɔfo kroko eha lɛ—tamɔ nɔ ni gbekɛ lɛ he miihia Nyɔŋmɔ waa fe bɔ ni gbekɛ lɛ he hiaa efɔlɔi? Kɛ́ eji anɔkwale akɛ Nyɔŋmɔ ŋɔɔ gbekɛbii kɛyaa lɛ, ani enɛ haŋ efee mɔ ni bɛ suɔmɔ, Bɔlɔ ni feɔ pɛsɛmkunya? Nɔ ni tamɔɔɔ susumɔ ni tamɔ nɛkɛ ni mɛi ená lɛ, Biblia lɛ kɛɔ akɛ: “Suɔmɔ lɛ Nyɔŋmɔ mli ejɛ.” (1 Yohane 4:7) Ani Nyɔŋmɔ ni yɔɔ suɔmɔ lɛ baaha agbo ni no aha adesai po ni yɔɔ nilee fioo ko lɛ ana akɛ nilee bɛ mli?

Belɛ, mɛni hewɔ gbekɛbii gboiɔ mɔ? Hetoo ni Biblia lɛ kɛhaa lɛ fã ko yɛ Jajelɔ 9:11 (NW) lɛ mli, akɛ: “Ejaakɛ be kɛ nibii ni aleee ni baa trukaa ninaa amɛ fɛɛ.” Ni Lala 51:7 lɛ kɛɔ wɔ akɛ wɔteŋ mɔ ko mɔ ko yeee emuu, wɔji eshafeelɔi kɛjɛ wɔ hɔŋɔɔ mli, ni nɔ ni baa gbɔmɛi fɛɛ anɔ ji gbele ni baa yɛ gbɛ̀i srɔtoi anɔ. Bei komɛi lɛ, mɔ ko gboɔ dani afɔɔ lɛ, ni nɔ ni jɛɔ mli kɛbaa ji bi ni gboɔ ewoɔ enyɛ musuŋ. Yɛ saji krokomɛi amli lɛ, gbekɛbii lɛ nyɔɔ yɛ shihilɛ ni yeɔ mɔ awui mli loo amɛkɛ oshara kpeɔ ni amɛgboiɔ. Oshara ni tamɔ nɛkɛ jɛɛɛ Nyɔŋmɔ.

Blema Adesã ni Ji 4: Apiŋɔ mɛi komɛi be mli ni amɛgboi.

Jamɔi pii tsɔɔ akɛ mɛi fɔji lɛ baaya hɛl la ni tsoɔ grigri mli ni abaapiŋ amɛ kɛya naanɔ. Ani tsɔɔmɔ nɛɛ sa ni edamɔ Ŋmalɛ nɔ? Aha adesai awala sɛɛkɛlɛ fee afii 70 loo afii 80. Kɛji eba lɛ akɛ mɔ ko kɛ ewala afii lɛ fɛɛ fee efɔŋ ni mli wa waa po lɛ, ani piŋmɔ ni abaapiŋ lɛ kɛya naanɔ lɛ baafee nɔ ni sa? Dabida. Ebaafee jalɛ sane ni ayeee kwraa ákɛ abaawa adesa ko yi kɛya naanɔi anaanɔ yɛ esha ni efee yɛ ewala shihilɛ be kukuoo ko nɛɛ mli lɛ hewɔ.

Nyɔŋmɔ pɛ ji mɔ ni baanyɛ atsɔɔ nɔ ni baa adesai anɔ kɛji amɛgboi, ni éfee nakai yɛ e-Wiemɔ, ni ji Biblia ni aŋma lɛ mli. Nɔ ni Biblia lɛ kɛɔ nɛ: “Bɔ ni mɔnɛ [kooloo] gboɔ lɛ, nakai mɔnɛ hu [gbɔmɔ] gboɔ, . . . Amɛ fɛɛ amɛyaa hekome: amɛ fɛɛ amɛjɛ sũ mli, ni amɛ fɛɛ amɛtsɔɔ sũ ekoŋŋ.” (Jajelɔ 3:19, 20) Atsĩii la ni tsoɔ grigri ko tã yɛ biɛ. Adesai kuɔ amɛsɛɛ kɛyaa sũ mli—kɛyaa shihilɛ mli ni abɛ lɛ mli—kɛ́ amɛgboi.

Bɔni afee ni apiŋ adesa ko lɛ, esa akɛ ehi wala mli. Ani gbohii ahiɛ kamɔ? Shikome ekoŋŋ lɛ, Biblia lɛ kɛ hetoo lɛ haa akɛ: “Shi hiɛkalɔi le akɛ amɛbaagboi; shi gbohii lɛ, amɛleee nɔ ko nɔ ko, ni amɛbɛ nyɔmɔwoo ko dɔŋŋ; ejaakɛ hiɛ eje amɛkaimɔ nɔ.” (Jajelɔ 9:5) Enyɛŋ eba lɛ akɛ gbohii ni “amɛleee nɔ ko nɔ ko” lɛ baanu piŋmɔ he yɛ he ko.

Blema Adesã ni Ji 5: Gbele tsɔɔ akɛ wɔwala eba naagbee kɛmiiya naanɔ.

Wala mli ni wɔyɔɔ lɛ baa naagbee kɛji wɔgboi, shi enɛ etsɔɔɔ doo akɛ gbele efo wɔwala sɛɛ kwraa kɛmiiya naanɔ. Hiob, nuu anɔkwafo lɛ le akɛ kɛji egbo lɛ ebaaya Sheol, ni ji gbohiiaje. Shi, bó esɔlemɔ ní esɔle eha Nyɔŋmɔ lɛ toi: “Miná ni kulɛ oŋɔ mi otée yɛ gbohiiaje, ní oŋɔ mi ohɔ shi kɛyashi beyinɔ ni omlifu lɛ aaaho, ní oto be oha mi, ní okai mi! Kɛji gbɔmɔ gbo lɛ, ani ehiɛ aaakã ekoŋŋ? . . . Kulɛ oootsɛ́, ni mahereo nɔ.”—Hiob 14:13-15.

Hiob le akɛ kɛji eye anɔkwa kɛyashi gbele mli lɛ, Nyɔŋmɔ baakai lɛ ni abaatée lɛ shi. Nyɔŋmɔ tsuji fɛɛ ni hi shi yɛ blema beaŋ lɛ yɛ nɛkɛ hemɔkɛyeli nɛɛ. Yesu diɛŋtsɛ mã hiɛnɔkamɔ nɛɛ nɔ mi, ni etsɔɔ akɛ Nyɔŋmɔ kɛ lɛ baatsu nii kɛtée gbohii ashi. Kristo diɛŋtsɛ daaŋ wiemɔi haa wɔnáa hiɛnɔkamɔ nɛɛ, akɛ: “Ŋmɛlɛtswaa lɛ miiba, nɔ̃ mli ni mɛi fɛɛ ni yɔɔ gbohiiabui lɛ amli lɛ aaanu [Yesu] gbee, ni amɛaaje kpo, mɛi ni efee ekpakpa lɛ aaate shi kɛaatee wala mli, ni mɛi ni etsu nishaianii lɛ aaate shi kɛaatee kojomɔ lɛ mli.”—Yohane 5:28, 29.

Etsɛŋ kwraa ni Nyɔŋmɔ baafo eshai fɛɛ sɛɛ ní eto jeŋ hee ko ni kɛ ŋwɛi gbɛtsɔɔmɔ baatsu nii lɛ shishi. (Lala 37:10, 11; Daniel 2:44; Kpojiemɔ 16:14, 16) Nɔ ni baajɛ mli aba lɛ baafee paradeiso ni baakpele jeŋ muu lɛ fɛɛ, ní mɛi ni sɔmɔɔ Nyɔŋmɔ baahi mli. Wɔkaneɔ yɛ Biblia lɛ mli akɛ: “Ni minu gbee kpeteŋkpele ko jɛ maŋtsɛsɛi lɛ mli kɛɛ: Naa, Nyɔŋmɔ buu lɛ yɛ gbɔmɛi ateŋ, ni eeeshi ebuu lɛ yɛ amɛteŋ, ni amɛaatsɔmɔ emaŋ, ni Nyɔŋmɔ diɛŋtsɛ kɛ amɛ aaahi shi, ni eeetsɔ amɛ-Nyɔŋmɔ. Ni Nyɔŋmɔ aaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ; ejaakɛ tsutsu nii lɛ eho etee.”—Kpojiemɔ 21:3, 4.

Gbeyeishemɔ ko Kwraa Bɛ

Nilee ni kɔɔ gbohiiashitee lɛ he kɛ nilee ni kɔɔ Mɔ ni to gbohiiashitee lɛ he gbɛjianɔ he lɛ baanyɛ ashɛje omii. Yesu wo shi akɛ: “Nyɛaale anɔkwale lɛ, ni anɔkwale lɛ aaaha nyɛye nyɛhe.” (Yohane 8:32) Nɔ ni fata he ji gbele he gbeyeishemɔ ni ebaaha wɔye wɔhe kɛjɛ mli lɛ. Yehowa ji mɔ pɛ ni baanyɛ afo gbɔlɛ kɛ gbele sɛɛ ní eha wɔ naanɔ wala. Ani obaanyɛ ohe Nyɔŋmɔ shiwoi lɛ oye? Hɛɛ, obaanyɛ ejaakɛ be fɛɛ be lɛ, Nyɔŋmɔ Wiemɔ lɛ ji anɔkwale. (Yesaia 55:11) Wɔmiiwo bo hewalɛ ni okase Nyɔŋmɔ yiŋtoi kɛha adesai lɛ ahe nii babaoo. Yehowa Odasefoi baaná he miishɛɛ akɛ amɛbaaye amɛbua bo.

[Wiemɔ ni akɔ ni akɛmiitsu nii ni yɔɔ baafa 6]

Naagba ni gbele he gbeyeishemɔ kɛbaa ji akɛ, ebaanyɛ efo nyɛmɔ ni mɔ ko yɔɔ akɛ eeená shihilɛ mli miishɛɛ lɛ sɛɛ

[Akrabatsa ni yɔɔ baafa 7

BLEMA ADESÃI KOMƐI NI EGBƐ ESHWÃ MƐNI ŊMALƐI LƐ KƐƆ?

[Mfoniri ni yɔɔ baafa 8]

Anɔkwalei ni kɔɔ gbele he ní wɔɔle lɛ haŋ wɔshe gbeyei

[He ni Mfoniri ni yɔɔ baafa 5 lɛ Jɛ]

Barrators—Giampolo/The Doré Illustrations For Dante’s Divine Comedy/Dover Publications Inc.