Miishɛjemɔ Miishɛjemɔ Kɛha Mɛi ni Naa Amanehulu Lɛ

SANE ni kɔɔ nɔ hewɔ ni Nyɔŋmɔ ŋmɛɔ amanehulu gbɛ lɛ he lɛ efutu jeŋnilelɔi kɛ Nyɔŋmɔ jamɔ he nilelɔi babaoo ajwɛŋmɔ yɛ afii ohai abɔ lɛ fɛɛ amli. Mɛi komɛi ema nɔ mi akɛ akɛni Nyɔŋmɔ ji mɔ ni yɔɔ hewalɛ fe fɛɛ hewɔ lɛ, lɛ ji mɔ tuuntu ni kɛ amanehulu baa. Mɔ ni ŋma The Clementine Homilies, ni ji afii ohai enyɔ lɛ mli apokrifa wolo ko lɛ tsɔɔ akɛ Nyɔŋmɔ kɛ eniji enyɔ lɛ fɛɛ yeɔ je lɛ nɔ. Ekɛ “enine abɛku” ni ji Abonsam lɛ haa amanehulu kɛ piŋmɔ baa mɛi anɔ, ni ekɛ “eninejurɔ” ni ji Yesu lɛ báa mɛi ayi ni ejɔɔ amɛ.

Akɛni mɛi komɛi nyɛɛɛ akpɛlɛ nɔ akɛ Nyɔŋmɔ baanyɛ aŋmɛ amanehulu gbɛ kɛ́ jeee lɛ ekɛbaa po hewɔ lɛ, amɛkpoo akɛ amanehulu yɛ. Mary Baker Eddy ŋma akɛ: “Susumɔ akɛ efɔŋ yɛ lɛ ji yiŋsusumɔ folo ko kɛkɛ, ni ebɛ nɔdaamɔ nɔ pɔtɛɛ ko. Kɛ́ anu shishi akɛ esha, hela, kɛ gbele ji nɔ ko ni bɛ lɛ, amɛsɛɛ baafo.”—Science and Health With Key to the Scriptures.

Yɛ yinɔsane mli osharai ni eba, titri lɛ kɛjɛ klɛŋklɛŋ jeŋ ta lɛ nɔ kɛbashi wɔbe nɛɛ mli hewɔ lɛ, mɛi babaoo emu sane naa akɛ Nyɔŋmɔ nyɛɛɛ atsĩ amanehulu kɛkɛ po naa. Yudanyo woloŋlelɔ David Wolf Silverman ŋma akɛ: “Yɛ misusumɔ naa lɛ, Mɛi Ahiɛkpatamɔ yɛ Jeŋ Ta II lɛ mli lɛ jie susumɔ akɛ Nyɔŋmɔ ji mɔ ko ni yɔɔ hewalɛ kpele lɛ kɛtee.” Ni ekɛfata he akɛ: “Kɛ́ aaanu Nyɔŋmɔ shishi yɛ gbɛ ko nɔ lɛ, belɛ E-ejurɔfeemɔ kɛ efɔŋ ni yɔɔ lɛ yɛ tsakpaa, ni enɛ ji anɔkwale kɛ́ E-jeee mɔ ni yɔɔ hewalɛ fe fɛɛ.”

Shi kɛlɛ, tsɔɔmɔi akɛ yɛ gbɛ ko nɔ lɛ Nyɔŋmɔ ji mɔ ni kɛ amanehulu baa, akɛ enyɛɛɛ etsi naa, loo akɛ amanehulu ji yiŋsusumɔ folo ko loo yiŋ ko ni akaa kɛkɛ lɛ kɛ miishɛjemɔ fioo pɛ haa mɛi ni naa nɔ lɛ. Ni nɔ ni fe fɛɛ lɛ, hemɔkɛyelii nɛɛ teɔ shi kwraa ewoɔ Nyɔŋmɔ ni ja, ni yɔɔ hewalɛ kpele kɛ suɔmɔ ni yɔɔ Biblia lɛ mli lɛ. (Hiob 34:10, 12; Yeremia 32:17; 1 Yohane 4:8) Belɛ, mɛni Biblia lɛ kɛɔ yɛ nɔ hewɔ ni aŋmɛ amanehulu gbɛ lɛ he mɔ?

Te Fee Tɛŋŋ ni Amanehulu Je Shishi?

Nyɔŋmɔ ebɔɔɔ adesai koni amɛna amanehulu. Nɔ ni tamɔɔɔ nakai lɛ, eha klɛŋklɛŋ gbalashihilɛ mli hefatalɔi ni ji Adam kɛ Hawa jwɛŋmɔ kɛ gbɔmɔtso ni yeɔ emuu, eto abɔɔ ko ni yɔɔ fɛo he gbɛjianɔ eha amɛ akɛ amɛshia, ni eha amɛ nitsumɔ ni shishinumɔ yɔɔ mli ni haa mɔ tsui nyɔɔ emli. (1 Mose 1:27, 28, 31; 2:8) Shi kɛlɛ, miishɛɛ ni amɛaaná daa lɛ damɔ Nyɔŋmɔ nɔyeli lɛ kɛ hegbɛ ni eyɔɔ akɛ ekpɛɔ eyiŋ yɛ nɔ ni ja kɛ nɔ ni ejaaa he ehaa amɛ lɛ ni amɛaayɔse lɛ nɔ. Akɛ “ekpakpa kɛ efɔŋ lee tso lɛ yibii” lɛ damɔ shi kɛha nakai ŋwɛi hegbɛ krɛdɛɛ lɛ. (1 Mose 2:17) Adam kɛ Hawa baatsɔɔ amɛhe shi ni amɛbaa kɛha Nyɔŋmɔ kɛ́ amɛbo efamɔ akɛ amɛkaye ekpakpa kɛ efɔŋ lee tso lɛ nɔ yibii lɛ toi lɛ.a

Mɔbɔ sane ji akɛ, Adam kɛ Hawa booo Nyɔŋmɔ toi. Mumɔŋ bɔɔ nɔ atuatselɔ ko, ni sɛɛ mli lɛ abale lɛ akɛ Satan Abonsam lɛ kɔne Hawa yiŋ akɛ toiboo ni eeefee eha Nyɔŋmɔ lɛ he baŋ sɛɛnamɔ kɛha lɛ. Ákɛ, etamɔ nɔ ni Nyɔŋmɔ miiha nɔ ko ni hi waa miiŋmɛɛ lɛ: heyeli, hegbɛ ni ekɛaahala nɔ ni ja kɛ nɔ ni ejaaa kɛha lɛ diɛŋtsɛ ehe. Satan tsɔɔ akɛ, kɛ́ eye tso lɛ yibii lɛ, ‘ehiŋmɛii baagbele, ni ebaatsɔ tamɔ Nyɔŋmɔ, ni ebaale ekpakpa kɛ efɔŋ.’ (1 Mose 3:1-6; Kpojiemɔ 12:9) Akɛni heyeli he gbɛkpamɔ lɛ laka Hawa hewɔ lɛ, eye tso ni agu eyeli lɛ yibii lɛ, ni Adam hu fee nakai nɔŋŋ.

Nakai gbi lɛ nɔŋŋ lɛ, Adam kɛ Hawa bɔi nɔ ni ejɛ amɛ atuatsemɔ mli kɛba lɛ he numɔ. Akɛni amɛkpoo ŋwɛi nɔyeli hewɔ lɛ, hebuu kɛ jɔɔmɔ ní amɛnine shɛɔ nɔ yɛ amɛhe shi ni amɛbaa kɛhaa Nyɔŋmɔ lɛ ŋmɛɛ amɛ. Nyɔŋmɔ shwie amɛ kɛjɛ Paradeiso lɛ mli ni ekɛɛ Adam akɛ: “Alomɔ shikpɔŋ sũ yɛ ohewɔ, jaramɔ mli oooye enɔ nii yɛ, owala gbii abɔ fɛɛ. Ohiɛ latsaa mli oooye nii yɛ, kɛyashi beyinɔ ni oooku osɛɛ kɛaatee shikpɔŋ sũ mli.” (1 Mose 3:17, 19) Adam kɛ Hawa batsɔmɔ nyɔji amɛha hela, piŋmɔ, gbɔlɛ, kɛ gbele. Amanehulu ebatsɔ adesai ashihilɛ lɛ fã.—1 Mose 5:29.

Sane lɛ Naa Ní Aaana

Ekolɛ mɔ ko baabi akɛ, ‘Ani Nyɔŋmɔ nyɛɛɛ aku ehiɛ efɔ Adam kɛ Hawa esha lɛ nɔ kɛkɛ?’ Dabi, no baanyɛ aba bulɛ kɛha ehegbɛ lɛ shi, ni ebaanyɛ ewo mɛi krokomɛi hewalɛ koni amɛtse atua wɔsɛɛ, ni no kɛ amanehulu ni naa wa waa po baaba. (Jajelɔ 8:11) Kɛfata he lɛ, Nyɔŋmɔ hiɛ ni eeeku efɔ toigbele nɛɛ nɔ lɛ baaha efee mɔ ko ni fiɔ efɔŋfeemɔ sɛɛ. Biblia ŋmalɔ Mose kaiɔ wɔ akɛ: “Tɛsaa ji lɛ, ni enitsumɔi hi pɛ; ejaakɛ egbɛ̀i fɛɛ jalɛ ni. Anɔkwa Mawu ji lɛ, nɔ̃ sha bɛ lɛ; jalɔ ji lɛ ni esa pɛ.” (5 Mose 32:4) Esa akɛ Nyɔŋmɔ aha Adam kɛ Hawa anu nɔ ni ejɛ amɛ toigbele lɛ mli kɛba lɛ he, koni no kɛ eshishitoo mlai lɛ akpã gbee.

Mɛni hewɔ Nyɔŋmɔ kpataaa klɛŋklɛŋ gbalashihilɛ mli hefatalɔi lɛ kɛ Satan, ni ji amɛ yiŋwolɔ ni anaaa lɛ lɛ hiɛ amrɔ nɔŋŋ lɛ? Eyɛ hewalɛ ni ekɛbaafee nakai. Kulɛ Adam kɛ Hawa fɔŋ bii ní amanehulu kɛ gbele baatsɔ amɛgboshinii. Shi kɛlɛ, ŋwɛi hewalɛ ni akɛaatsu nii yɛ gbɛ ni tamɔ nɛkɛ nɔ lɛ yeŋ bɔ ni Nyɔŋmɔ hegbɛ ni ekɛtsuɔ nii yɛ ebɔɔ nii ni yɔɔ nilee lɛ anɔ lɛ ja ha lɛ he odase. Agbɛnɛ hu, eji Adam kɛ Hawa fɔɔɔ ni amɛgboi kulɛ, no baatsɔɔ omanye ni Nyɔŋmɔ yiŋtoo akɛ ekɛ amɛseshibii ni yeɔ emuu baawo shikpɔŋ nɔ obɔ lɛ yeee. (1 Mose 1:28) Ni “Nyɔŋmɔ tamɔɔɔ gbɔmɛi . . . Nɔ fɛɛ nɔ ni ewoɔ he shi lɛ, eyeɔ nɔ; kɛ ewie lɛ, ebaa mli.”—4 Mose 23:19, Today’s English Version.

Yehowa Nyɔŋmɔ kɛ enilee ni yeɔ emuu lɛ kpɛ eyiŋ koni atuatsemɔ lɛ aya nɔ yɛ be fioo mli. Atuatselɔi lɛ baaná hegbɛ ni sa koni amɛkɛnu nibii ni ejɛ amɛhe ni amɛtsi kɛjɛ Nyɔŋmɔ he lɛ he. Yinɔsane baaye bɔ ni ŋwɛi gbɛtsɔɔmɔ he hiaa adesai kɛ bɔ ni Nyɔŋmɔ nɔyeli lɛ hi fe adesai loo Satan nɔ lɛ he odase yɛ faŋŋ mli. Yɛ nakai beaŋ nɔŋŋ lɛ, Nyɔŋmɔ fee nii koni ekwɛ ni eshishijee yiŋtoo kɛha shikpɔŋ lɛ aba mli. Ewo shi akɛ ‘seshi’ loo ‘shwie’ ko ni ‘baatswa Satan yitso nɔ̃,’ ni baajie nibii gbohii ni ejɛ etuatsemɔ lɛ mli kɛba lɛ fɛɛ kwraa kɛya lɛ baaba.—1 Mose 3:15.

Yesu Kristo ji nakai shiwoo Seshi lɛ ni awo he shi lɛ. Wɔkaneɔ yɛ 1 Yohane 3:8 akɛ “Nyɔŋmɔ bi lɛ jie ehe kpo, koni efite abonsam nitsumɔi lɛ.” Efee enɛ kɛtsɔ e-adesa wala ni yeɔ emuu lɛ ni ekɛshã afɔle, kɛ kpɔmɔnɔ jara lɛ ni ewo koni ekɛkpɔ̃ Adam bii lɛ kɛjɛ esha kɛ gbele ni amɛná akɛ gboshinii lɛ mli lɛ nɔ. (Yohane 1:29; 1 Timoteo 2:5, 6) Akɛ heyeli ni hiɔ shi daa kɛmiijɛ amanehulu mli lɛ he shiwoo eha mɛi ni jieɔ hemɔkɛyeli diɛŋtsɛ kpo yɛ Yesu afɔleshaa lɛ mli lɛ. (Yohane 3:16; Kpojiemɔ 7:17) Mɛɛ be enɛ baaba?

Amanehulu Sɛɛ Baafo

Nyɔŋmɔ hegbɛ ni akpoo lɛ kɛ amanehulu babaoo eba. Belɛ, esa jogbaŋŋ mɔ akɛ Nyɔŋmɔ kɛ ehegbɛ lɛ aaatsu nii yɛ gbɛ krɛdɛɛ nɔ koni ekɛha adesai amanehulu sɛɛ afo ni eha eshishijee yiŋtoo kɛha shikpɔŋ lɛ aba mli. Yesu tsĩ ŋwɛi gbɛjianɔtoo nɛɛ tã beni etsɔɔ esɛɛnyiɛlɔi lɛ ni amɛsɔle akɛ: “Wɔtsɛ ni yɔɔ ŋwɛi, . . . omaŋtsɛyeli lɛ aba; afee nɔ ni osumɔɔ yɛ shikpɔŋ lɛ nɔ, taakɛ afeɔ yɛ ŋwɛi lɛ.”—Mateo 6:9, 10; wɔma efã ko nɔ mi.

Be ni Nyɔŋmɔ kɛŋmɛ adesai agbɛ koni amɛkɛka amɛ diɛŋtsɛ amɛhe nɔ ni amɛaaye amɛkwɛ lɛ miihe aba naagbee. Yɛ Biblia gbalɛ mlibaa naa lɛ, ato e-Maŋtsɛyeli lɛ ama shi yɛ ŋwɛi yɛ afi 1914, kɛ Yesu Kristo ákɛ enɔ Maŋtsɛ.b Etsɛŋ ni ebaajwara adesai anɔyelii fɛɛ wɔtsɔwɔtsɔ ni ebaakpata amɛhiɛ.—Daniel 2:44.

Yesu kɛ jɔɔmɔi ni baajɛ ŋwɛi nɔyeli ni asaa akɛba ekoŋŋ lɛ mli aba lɛ he okadi ha yɛ esɔɔmɔ kukuoo yɛ shikpɔŋ nɔ lɛ mli. Sanekpakpai lɛ kɛ odaseyeli ni tsɔɔ akɛ Yesu jie musuŋtsɔlɛ kpo etsɔɔ adesai aweku lɛ mli ohiafoi kɛ mɛi ni akɛ amɛyeɔ yɛ gbɛ ni ejaaa nɔ lɛ haa. Etsa helatsɛmɛi lɛ, eha mɛi ni hɔmɔ yeɔ amɛ lɛ niyenii, ni etée gbohii ashi. Adebɔɔ mli hewalɛi lɛ po bo egbee toi. (Mateo 11:5; Marko 4:37-39; Luka 9:11-16) Susumɔ nɔ ni Yesu baatsu beni ekɛ ekpɔmɔ afɔleshaa lɛ mli hewalɛ lɛ tsuɔ nii kɛtsuuɔ adesai toibolɔi fɛɛ he koni ehe aba sɛɛnamɔ kɛha amɛ lɛ he okwɛ! Biblia lɛ woɔ shi akɛ, kɛtsɔ Kristo nɔyeli lɛ nɔ lɛ, Nyɔŋmɔ ‘baatsumɔ adesai ahiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ.’—Kpojiemɔ 21:4.

Miishɛjemɔ Kɛha Mɛi ni Naa Amanehulu Lɛ

Mɛɛ hewalɛwoo po eji nɛkɛ akɛ wɔɔle akɛ wɔ-Nyɔŋmɔ ni ji Yehowa ni yɔɔ suɔmɔ kɛ hewalɛ ni fe fɛɛ lɛ, susuɔ wɔhe ni akɛ etsɛŋ ni ebaaha adesai aná hejɔlɛ! Bei pii lɛ, mɔ ko ni bɛ hewalɛ kwraa lɛ jɛɔ esuɔmɔ mli ekpɛlɛɔ tsofafeemɔ ni baatsa lɛ lɛ nɔ, kɛ́ eji nɔ ni waa mɔ he waa po. Yɛ nakai gbɛ nɔ nɔŋŋ nɔ lɛ, kɛ́ wɔle akɛ gbɛ ni Nyɔŋmɔ tsɔɔ nɔ etsuɔ saji ahe nii lɛ kɛ naanɔ jɔɔmɔi baaba lɛ, nakai nilee lɛ baanyɛ awo wɔ hewalɛ yɛ be kukuoo mli naagbai ni wɔkɛkpeɔ lɛ fɛɛ sɛɛ.

Ricardo, ni atsĩ etã yɛ sane ni tsɔ hiɛ lɛ mli lɛ ji mɔ ko ni miiná miishɛjemɔ kɛmiijɛ Biblia mli shiwoi lɛ amli. Ekaiɔ akɛ: “Yɛ miŋa gbele sɛɛ lɛ, minu he waa akɛ matse mihe kɛjɛ mɛi ahe, shi etsɛɛɛ ni miyɔse akɛ no kɛ miŋa baŋ wala mli, ni ákɛ henumɔŋ shihilɛ mli ni miyɔɔ lɛ mli wu pɛ ebaawo.” Yɛ no najiaŋ lɛ, Ricardo kɛ ehe kpɛtɛ egbɛjianɔtoo kɛha Kristofoi akpeeiyaa kɛ Biblia mli shɛɛ sane ni egbaa mɛi krokomɛi lɛ he. Ricardo kɛɛ akɛ: “Beni minu Yehowa sɛɛfimɔ ni suɔmɔ yɔɔ mli lɛ he, ni miyɔse bɔ ni eha misɔlemɔi lɛ ahetoo yɛ saji bibii po mli lɛ, mibɛŋkɛ lɛ kpaakpa. Enɛ ni miyɔse yɛ Nyɔŋmɔ suɔmɔ lɛ he lɛ ji nɔ ni wo mi hewalɛ ni midamɔ nɔ ni yɛ anɔkwale mli lɛ eji kaa ni mli wa waa ni mikɛkpe pɛŋ lɛ naa.” Ekpɛlɛ nɔ akɛ: “Mihiɛ tseɔ miŋa waa lolo, shi amrɔ nɛɛ miheɔ miyeɔ waa akɛ nɔ ko ni Yehowa ŋmɛɔ gbɛ bɛ ni baanyɛ ekɛ haomɔ ni hiɔ shi daa aba wɔnɔ.”

Ani ooshwe be ni “akaiŋ” amrɔmrɔ amanehului lɛ “ni asaŋ ebaŋ jwɛŋmɔ mli dɔŋŋ” lɛ tamɔ Ricardo kɛ mɛi akpekpei krokomɛi lɛ ji lɛ? (Yesaia 65:17) Ná nɔmimaa akɛ onine baanyɛ ashɛ Nyɔŋmɔ Maŋtsɛyeli lɛ mli jɔɔmɔi lɛ anɔ kɛji akɛ okɛ Biblia mli ŋaawoo akɛ: “Nyɛtaoa Yehowa, be mli ni eeeha ana lɛ, nyɛtsɛa lɛ, be mli ni ebɛŋkɛ” lɛ tsu nii lɛ.—Yesaia 55:6.

Bɔni afee ni eye ebua bo koni ofee enɛ lɛ, ha Nyɔŋmɔ Wiemɔ lɛ kanemɔ kɛ ekasemɔ jogbaŋŋ afee nɔ ko ni he hiaa bo waa yɛ oshihilɛ mli. Ná ole Nyɔŋmɔ kɛ mɔ ni etsu lɛ, ni ji Yesu Kristo lɛ. Bɔɔ mɔdɛŋ ni ohi shi yɛ Nyɔŋmɔ mlai lɛ kɛ gbeekpamɔ naa, ni okɛtsɔɔ akɛ oosumɔ ni oba ohe shi oha emaŋtsɛyeli lɛ. Gbɛ ni tamɔ nɛkɛ baaha oná miishɛɛ waa amrɔ nɛɛ yɛ kaai ni ekolɛ okɛkpeɔ po lɛ fɛɛ sɛɛ. Ni yɛ wɔsɛɛ be mli lɛ, ebaaha oná wala mli ŋɔɔmɔ yɛ jeŋ ko ni amanehulu bɛ mli lɛ mli.—Yohane 17:3.

[Shishigbɛ niŋmai]

[Akrabatsa ni yɔɔ baafa 6, 7]

TE WƆƆFEE TƐŊŊ WƆDAMƆ AMANEHULU NAA?

“Nyɛŋɔa nyɛhaomɔ fɛɛ nyɛfɔa [Nyɔŋmɔ] enɔ.” (1 Petro 5:7) Yɛ adebɔɔ su naa lɛ, wɔnuɔ yiŋfutumɔ, mlifu, kɛ kpoomɔ henumɔi ahe beni wɔŋmɛɔ wɔtsui shi yɛ amanehulu mli loo wɔnaa ni wɔsuɔlɔ ko miina amanehulu lɛ. Fɛɛ sɛɛ lɛ, ná nɔmimaa akɛ Yehowa nuɔ bɔ ni wɔnuɔ nii ahe wɔhaa lɛ shishi. (2 Mose 3:7; Yesaia 63:9) Taakɛ blema anɔkwafoi lɛ ji lɛ, wɔbaanyɛ wɔfɔse wɔtsuiaŋ henumɔi lɛ wɔshwie enɔ koni wɔjaje wɔyiŋkɔshikɔshifeemɔi kɛ wɔhaomɔi lɛ wɔtsɔɔ lɛ. (2 Mose 5:22; Hiob 10:1-3; Yeremia 14:19; Habakuk 1:13) Ekolɛ etsɔŋ naakpɛɛ gbɛ nɔ ejieŋ wɔkaai lɛ kɛyaŋ, shi moŋ yɛ sɔlemɔi ni jɛ wɔtsuiaŋ lɛ ahetoo hamɔ mli lɛ, ebaanyɛ eha wɔ nilee kɛ hewalɛ koni wɔnyɛ wɔkɛdamɔ naa.—Yakobo 1:5, 6.

“Nyɛkahaa kaa ni naa wa waa ni baa nyɛnɔ lɛ miifee nyɛ naakpɛɛ, tamɔ nɔ ni nɔ ko srɔto ko feɔ nyɛ lɛ.” (1 Petro 4:12, New International Version) Petro miiwie yiwaa he yɛ biɛ, shi nakai nɔŋŋ ewiemɔi lɛ hu kɔɔ amanehului srɔtoi fɛɛ ni ekolɛ heyelilɔ ko baaŋmɛ etsui shi yɛ mli lɛ he jogbaŋŋ. Adesai naa amanehulu yɛ ohiayeli, hela kɛ suɔlɔ ko gbele hewɔ. Biblia lɛ kɛɔ akɛ, “be kɛ nibii ni aleee ni baa trukaa” baa mɔ fɛɛ mɔ nɔ. (Jajelɔ 9:11, NW) Amrɔ nɛɛ, nibii ni tamɔ enɛ ebatsɔ adesai ashihilɛ lɛ fã. Enɛ ni wɔbaayɔse lɛ baaye abua wɔ ni wɔdamɔ amanehulu kɛ oshara naa kɛ́ eba. (1 Petro 5:9) Nɔ ni fe fɛɛ lɛ, ni wɔɔkai nɔmimaa wiemɔ ni ji akɛ, “Yehowa hiŋmɛi kã jalɔi ahe, ni efeɔ toi ehaa amɛbolɔmɔi lɛ” baafee miishɛjemɔ jɛɛhe diɛŋtsɛ.—Lala 34:16; Abɛi 15:3; 1 Petro 3:12.

“Nyɛnyaa yɛ hiɛnɔkamɔ mli.” (Romabii 12:12) Yɛ nɔ najiaŋ ni wɔɔha wɔjwɛŋmɔ ahi miishɛɛnamɔi ni eho lɛ anɔ lɛ, wɔbaanyɛ ni wɔsusu Nyɔŋmɔ shiwoo akɛ ebaafo amanehului fɛɛ asɛɛ lɛ he. (Jajelɔ 7:10) Nɛkɛ hiɛnɔkamɔ ni ma shi shiŋŋ nɛɛ baabu wɔhe taakɛ dadefai buɔ yitso lɛ he lɛ. Hiɛnɔkamɔ baa shihilɛ mli osharai ashi, ni eyeɔ ebuaa koni amɛkaye wɔjwɛŋmɔŋ, henumɔŋ loo mumɔŋ hewalɛnamɔ awui.—1 Tesalonikabii 5:8.

[Mfoniri ni yɔɔ baafa 5]

Adam kɛ Hawa kpoo ŋwɛi nɔyeli

[Mfoniri ni yɔɔ baafa 7]

Nyɔŋmɔ ewo jeŋ ko ni amanehulu bɛ mli he shi