Maŋtsɛyeli Jajelɔi Bɔ Amaniɛ

“Amɛmiinu” Maŋtsɛyeli Shɛɛ Sane lɛ yɛ Brazil

BƆNI afee ni Yehowa Odasefoi anyɛ ajaje Maŋtsɛyeli sanekpakpa lɛ yɛ akutsei ni Mumuii yɔɔ mli lɛ mli hewɔ lɛ, amɛteŋ mɛi babaoo ni yɔɔ Brazil lɛ ekpɛlɛ nitsumɔ ni wa ni ji Brazil Mumuii Awiemɔ lɛ kasemɔ nɔ. Amɛmɔdɛŋbɔi lɛ miiwo yibii kpakpai babaoo taakɛ niiashikpamɔi ni nyiɛ sɛɛ nɛɛ tsɔɔ lɛ.

Eva,a ni ji yoo ko ni emu toi ni yɔɔ São Paulo lɛ je mumuii awiemɔ kasemɔ shishi be mli ni ekɛ ebii etɛ lɛ kɛ nuu ko ni ji mumui yahi shi akɛ mɔ kɛ ehemɔ. Eva kɛ ehemɔ lɛ kɛ Odasefoi komɛi ni ji mumuii akuu ko kpe yɛ jarayelihe ko, ni amɛfɔ̃ amɛ nine ni amɛba kpee yɛ Maŋtsɛyeli Asa lɛ nɔ. Akɛni amɛyasusu akɛ eji hiɛtserɛjiemɔ henaabuamɔ ko hewɔ lɛ, amɛkpɛlɛ ninefɔ̃ɔ lɛ nɔ.

Akɛni mumuii awiemɔ he nilee fioo pɛ Eva yɔɔ hewɔ lɛ, saji fioo pɛ shishi enu yɛ kpee lɛ shishi. No sɛɛ lɛ, Odasefoi babaoo fɔ̃ lɛ nine kɛba amɛshiai amli kɛha daaŋjiemɔ fioo. Beni amɛkɛ mfonirii ni yɔɔ wolo bibioo ni ji Na Wala Mli Ŋɔɔmɔ yɛ Shikpɔŋ Nɔ Kɛya Naanɔ! lɛ tsɔɔ lɛ lɛ, amɛgbála Nyɔŋmɔ shiwoo ni kɔɔ wɔsɛɛ be mli paradeiso yɛ shikpɔŋ lɛ nɔ lɛ he lɛ mli amɛtsɔɔ lɛ. Eva ná nibii ni ekaseɔ lɛ he miishɛɛ ni ebɔi kpeeiyaa daa.

No sɛɛ etsɛɛɛ lɛ, Eva kɛ ehemɔ lɛ kpa bɔɔ bɔni afee ni ehi shi yɛ Biblia taomɔnii anaa. Yɛ shitee-kɛ-woo ni mli wa waa ni eweku lɛ kɛba enɔ lɛ fɛɛ sɛɛ lɛ, etee nɔ ená mumɔŋ nɔyaa ni abaptisi lɛ yɛ afi 1995. Nyɔji ekpaa sɛɛ lɛ, Eva batsɔ gbɛgbalɔ, loo be-fɛɛ Maŋtsɛyeli jajelɔ. Kɛjɛ no sɛɛ kɛbaa nɛɛ, eye ebua mumuii ejwɛ kɛyashi beni amɛjɔɔ amɛhe nɔ ní abaptisi amɛ.

Afɔ Carlos akɛ mumui. Ekɛ ehe wo tsofai fɔji kɛ nitsumɔ, jeŋba shara, kɛ juu mli kɛjɛ egbekɛbiiashi. Akɛni kuu ni eyɔɔ mli lɛ mli bii lɛ miiwo ehe gbeyei hewɔ lɛ, ejo foi kɛtee São Paulo ni ekɛ João yahi shi be fioo ko. Taakɛ Carlos ji lɛ, João ji mumui ni yɔɔ jeŋba shara shihilɛ mli.

Afii komɛi asɛɛ lɛ, Carlos kase Maŋtsɛyeli shɛɛ sane lɛ, ni ekanya lɛ koni efee tsakemɔ yɛ eshihilɛ mli, ni ekɛ egbalashihilɛ lɛ yawo mla shishi. Beni Carlos shɛ Ŋmalɛ naa taomɔnii lɛ ahe lɛ, abaptisi lɛ ni ekɛfee ehenɔjɔɔmɔ kɛha Yehowa lɛ he okadi. Yɛ nɛkɛ be nɛɛ mli lɛ, João hu ebale sanekpakpa lɛ, ni lɛ hu efee tsakemɔi wuji yɛ eshihilɛ mli ní Carlos leee. Beni João baná ele akɛ Yehowa ekpɛlɛɛɛ jamɔ mli amagai kɛ nitsumɔ nɔ lɛ, eshɛrɛ “hetselɔi” amagai babaoo ni eyɔɔ lɛ eshwie. Beni João etsi ehe kɛjɛ etsutsu shihilɛ gbɛ lɛ he sɛɛ lɛ, abaptisi lɛ hu.

Kwɛ miishɛɛ kpele ni Carlos kɛ João ná, beni amɛkpe yɛ Maŋtsɛyeli Asa ko nɔ ni amɛna tsakemɔi ni amɛteŋ mɔ fɛɛ mɔ efee lɛ! Amrɔ nɛɛ, amɛji weku yitsei kpakpai, ni amɛmiisɔmɔ akɛ Maŋtsɛyeli jajelɔi ni yɔɔ ekãa.

Amrɔ nɛɛ, ayɛ asafoi 30 ni awieɔ mumuii awiemɔ yɛ mli yɛ Brazil, kɛ asafo woloŋ nikasemɔ kui 154, kɛ shiɛlɔi ni fa fe 2,500 ni amɛteŋ mɛi 1,500 ji mumuii. Mɛi ni fa fe 3,000 ba afi 2001 “Nyɔŋmɔ Wiemɔ lɛ Tsɔɔlɔi” Kpokpaa Wulu nɔ Kpeei ni afee yɛ Brazil kɛha mumuii lɛ shishi, ni abaptisi mɛi 36. Yɛ Yehowa yelikɛbuamɔ naa lɛ, wɔhiɛ kã nɔ akɛ mumuii babaoo lolo baakpɛlɛ Maŋtsɛyeli shɛɛ sane lɛ nɔ.

[Shishigbɛ niŋmaa]