“Nyɛtsia Nyɛbɛŋkɛa Nyɔŋmɔ, ni Eeetsi Eeebɛŋkɛ Nyɛ”
Be ni Tsɔ Hiɛ kɛ No Sɛɛ—Ená Hewalɛ Kɛfee Tsakemɔ
SANDRA, ni ji yoo ko ni yɔɔ Mexico lɛ tsɔɔ bɔ ni lɛ diɛŋtsɛ eji lɛ mli akɛ, ebɛ jeŋba yɛ weku ni ejɛ mli lɛ mli. Ejeŋ ni akpoo aha lɛ kɛ suɔmɔ kpo ni ajieee atsɔɔɔ lɛ lɛ fite lɛ beni eye kɛjɛ afii 13 kɛyaa lɛ. Ekɛɛ akɛ: “Beni miyɔɔ miblayeiaŋ lɛ, minuɔ he be fɛɛ be akɛ mifee shwɛm ni miyiŋ feɔ mi kɔshikɔshi yɛ nɔ hewɔ ni miyɔɔ shihilɛ mli kɛ nɔ ni kɔɔ wala he lɛ he.”
Beni Sandra yaa nɔtsamɔ skul lɛ, ebɔi dãa ni etsɛ yɔɔ yɛ shia lɛ numɔ. Etsɛɛɛ ni lɛ diɛŋtsɛ ebɔi dãa lɛ hemɔ ni ebatsɔ dãatɔlɔ. Ekpɛlɛ nɔ akɛ: “Nɔ ko kanyaaa mi koni mahi wala mli.” Akɛni Sandra nijiaŋ eje wui hewɔ lɛ, ekɛ tsofai fɔji bɔi nitsumɔ. Ekɛɛ akɛ: “Nɔ̃ pɛ ni yeɔ ebuaa mi ni mihiɛ kpaa minaagbai lɛ anɔ ji nibii ni mihiɛɔ yɛ mipɔɔsu lɛ mli lɛ: dãa, tsofai fɔji komɛi, loo wii fioo ko.”
Beni Sandra gbe skul ni akaseɔ tsofafeemɔ he nii yɛ lɛ naa lɛ, ekɛ ehe wo dãatɔɔ mli vii. Eka akɛ ebaafo ewala sɛɛ. Shi egbooo.
Sandra tee jamɔi srɔtoi amli kɛha mumɔŋ yelikɛbuamɔ kɛ henumɔŋ sɛɛfimɔ, shi enine shɛɛɛ eko kwraa nɔ. Akɛni ebɛ hiɛnɔkamɔ ko ni enijiaŋ eje wui hewɔ lɛ, ebolɔ etsɛ́ Nyɔŋmɔ shii abɔ akɛ: “Nɛgbɛ oyɔɔ? Mɛni hewɔ oyeee obuaaa mi lɛ?” Bulɛ ni eyɔɔ kɛha ehe lɛ miihe atã kwraa beni Yehowa Odasefoi lɛ ateŋ mɔ ko kɛ lɛ gba sane lɛ. Enɛ ha eje teemɔŋ Biblia mli nikasemɔ shishi. Beni Sandra ná ele akɛ “Yehowa bɛŋkɛɔ mɛi ni tsuii ekumɔ lɛ,” enɛ kanya lɛ waa diɛŋtsɛ.—Lala 34:19.
Mɔ ni kɛ Sandra kaseɔ Biblia lɛ ye ebua lɛ ni eha enu shishi akɛ, Yehowa Nyɔŋmɔ le akɛ gbɔjɔmɔi yɛ wɔhe yɛ esha kɛ emuu ni ayeee ni wɔná kɛjɛ Adam ŋɔɔ lɛ hewɔ. Sandra yɔse akɛ Nyɔŋmɔ nuɔ shishi akɛ wɔnyɛŋ wɔshɛ ejalɛ tɛi lɛ ahe kɛmɔ shi. (Lala 51:7; Romabii 3:23; 5:12, 18) Ená miishɛɛ akɛ eeele akɛ Yehowa gbalaaa ejwɛŋmɔ kɛyaaa wɔfatɔɔi anɔ, ni ekpaaa babaoo fe bɔ ni wɔbaanyɛ wɔtsu gbɛ kɛjɛɛɛ wɔdɛŋ. Lalatsɛ lɛ bi akɛ: “Kɛji bo, Yehowa, okɛɛ ooodi nishaianii asɛɛ lɛ, kulɛ, [Oo Yehowa, NW], namɔ po aaanyɛ shi adamɔ?”—Lala 130:3.
Biblia mli anɔkwale ko ni he hiaa ni ha Sandra tsui nyɔ emli ji Yesu Kristo kpɔmɔ afɔleshaa lɛ. Kɛtsɔ no nɔ lɛ, Yehowa jɛɔ mɔbɔnalɛ mli ekpɛlɛɔ adesai ni feɔ toiboo lɛ anɔ akɛ mɛi ni ja yɛ emuu ni amɛyeee lɛ fɛɛ sɛɛ. (1 Yohane 2:2; 4:9, 10) Hɛɛ, wɔnine baanyɛ ashɛ “nɔtɔmɔi afaa” nɔ koni eye ebua wɔ ni wɔye henumɔ fɛɛ henumɔ ni haa wɔnuɔ he akɛ wɔhe bɛ sɛɛnamɔ lɛ nɔ.—Efesobii 1:7.
Sandra kase nikasemɔi ni he yɔɔ sɛɛnamɔ kpele kɛjɛ bɔfo Paulo nɔkwɛmɔnɔ lɛ mli. Ehiɛ sɔ mlihilɛ ni Nyɔŋmɔ jie lɛ kpo etsɔɔ lɛ kɛtsɔ mɔbɔnalɛ mli ni ejɛ ni ekɛ eshai ni efee be ko ni eho lɛ ke lɛ kɛ esɛɛ ni efi koni enyɛ ekpee gbɔjɔmɔi ni baanyɛ aje kpo yɛ ehe ekoŋŋ lɛ naa lɛ waa. (Romabii 7:15-25; 1 Korintobii 15:9, 10) Paulo jaje eshihilɛ gbɛ lɛ, ‘egbála egbɔmɔtso lɛ mai ni eye lɛ nyɔŋ’ bɔni afee ni enyiɛ gbɛ ni Nyɔŋmɔ kpɛlɛɔ nɔ lɛ nɔ. (1 Korintobii 9:27) Eŋmɛɛɛ gbɛ ni eshafeemɔ susumɔi lɛ aye lɛ nyɔŋ.
Sandra gbɔjɔmɔi lɛ ná enɔ hewalɛ, shi etee nɔ ewuu eshi amɛ. Ekɛ hiɛdɔɔ sɔle ebi Yehowa dɛŋ yelikɛbuamɔ koni ekɛye gbɔjɔmɔi nɛɛ anɔ ni ebi ni ena lɛ mɔbɔ. (Lala 55:23; Yakobo 4:8) Beni Sandra nu he akɛ Nyɔŋmɔ yɛ ehe miishɛɛ lɛ, efee tsakemɔ yɛ eshihilɛ mli. Ekɛɛ akɛ: “Miyɛ miishɛɛ akɛ mikɛ mibe fɛɛ baatsɔɔ mɛi krokomɛi Biblia lɛ.” Sandra ná hegbɛ akɛ eeeye ebua enyɛmi yoo nukpa kɛ enyɛmi yoo fioo koni amɛbale Yehowa. Be mli ni ‘efeɔ ejurɔ nɛɛ’ lɛ, ekɛ ehe haa hu yɛ Yehowa Odasefoi akpeei ashishi ni ekɛ nilee ni eyɔɔ yɛ tsofafeemɔ mli lɛ yeɔ ebuaa.—Galatabii 6:10.
Ni tsofai fɔji ni Sandra kɛtsuɔ nii lɛ hu? Ekɛ nɔmimaa wie akɛ: “Mijwɛŋmɔ ekã mi shi. Mikpa dãanumɔ, mikpa tawa shɛremɔ, ni mikɛ tsofai fɔji ekpa nitsumɔ. Amɛhe ehiaaa mi. Minine eshɛ nɔ ni mitaoɔ lɛ nɔ.”
[Wiemɔ ni akɔ ni akɛmiitsu nii ni yɔɔ baafa 9]
“Minine eshɛ nɔ ni mitaoɔ lɛ nɔ”
[Akrabatsa ni yɔɔ baafa 9]
Biblia Mli Shishitoo Mlai Miitsu Nii
Nɔ ni nyiɛ sɛɛ nɛɛ ji Biblia mli shishitoo mlai komɛi ni eye ebua mɛi babaoo ni amɛtsi amɛhe kɛjɛ nifeemɔi ni buleɔ mɔ ni kaa mɔ he lɛ he:
“Nyɛhaa wɔtsuua wɔhe kɛjɛa heloo kɛ mumɔ fɛɛ he muji mli, ni wɔgbe hetsemɔ naa yɛ Nyɔŋmɔ gbeyeishemɔ mli.” (2 Korintobii 7:1) Nyɔŋmɔ jɔ́ɔ mɛi ni etsuu amɛhe kɛjɛ nibii ni buleɔ mɔ lɛ ahe, ni amɛtsiɔ amɛhe kɛjɛɔ nifeemɔi ni he tseee lɛ ahe.
“Yehowa gbeyeishemɔ ji akɛ anyɛ̃ efɔŋ.” (Abɛi 8:13) Nyɔŋmɔ gbeyeishemɔ ni woo yɔɔ mli yeɔ ebuaa mɔ, ni etsiɔ ehe kɛjɛɔ sui gbohii ní tsofai fɔji fata he lɛ ahe. Yɛ Yehowa nɔkpɛlɛmɔ ni mɔ ni etsake lɛ aaaná sɛɛ lɛ, eyeɔ ehe kɛjɛɔ helai ni yɔɔ gbeyei ahe.
“Amɛba amɛhe shi amɛhã onukpai kɛ nɔyelɔi lɛ, amɛbo amɛ toi.” (Tito 3:1) Yɛ hei babaoo lɛ, eji mla mlikuu ákɛ abaana tsofai komɛi yɛ mɔ ko dɛŋ loo ní ekɛmiitsu nii. Anɔkwa Kristofoi ehiɛɛɛ loo amɛkɛ tsofai fɔji ni mla eŋmɛɛɛ gbɛ tsuuu nii.