“Kwɛ Bɔ ni Nyɔŋmɔ Wiemɔ lɛ Yɔɔ Hewalɛ Waa Diɛŋtsɛ Ha!”
“NYƆŊMƆ wiemɔ hiɛ kã ni eyɛ hewalɛ.” (Hebribii 4:12) Beni 2003 Calendar of Jehovah’s Witnesses lɛ yeɔ hewalɛ ni Nyɔŋmɔ Wiemɔ lɛ yɔɔ ni anyɛɛɛ atsĩ naa lɛ he odase lɛ, ekɛ wala shihilɛ mli saji diɛŋtsɛ ekpaa ni jɛ je lɛŋ he fɛɛ he lɛ ha. Yɛ saneyitso ni ji “Be ni Tsɔ Hiɛ kɛ No Sɛɛ” lɛ shishi lɛ, kalanda lɛ tsɔɔ bɔ ni Yehowa Odasefoi atsɔsemɔ nitsumɔ lɛ yeɔ ebuaa gbɔmɛi koni amɛjeŋba aya hiɛ, amɛkwa shihilɛ gbɛ ni fiteɔ nii, ni amɛwo amɛweku shihilɛ mli hewalɛ, ni amɛná amɛkɛ Nyɔŋmɔ teŋ wekukpaa kpakpa.
Nine eshɛ majemɔ woji babaoo nɔ kɛmiijie hiɛsɔɔ kpo yɛ afi 2003 kalanda lɛ he. Naa amɛmli wiemɔi lɛ ekomɛi:
“Nɛkɛ kalanda nɛɛ ji odaseyeli kɛha anɔkwa Kristofoi akɛ, mɛi komɛi yɛ ni tamɔ amɛ nɔŋŋ, ni ehe ebahia ni amɛwu hemɔkɛyeli lɛ he ta lɛ waa. Amrɔ nɛɛ amɛbaanyɛ amɛkwɛ mfonirii lɛ akɛ tsakemɔi ni mɛi komɛi efee lɛ ahe kaimɔnɔ.”—Steven, United States.
“Miisumɔ diɛŋtsɛ akɛ maŋma nɛkɛ wiemɔi fioo nɛɛ ni mikɛtsɔɔ nyɛ bɔ ni afi 2003 kalanda lɛ eta mitsui he eha. Kalanda ko náko minɔ hewalɛ nɛkɛ dã. Mikɛ wala shihilɛ mli saji nɛɛ baafata nibii ni mahiɛ yɛ mishiɛmɔyaa baagi lɛ mli lɛ ahe, bɔni afee ni mikɛtsɔɔ mɛi odaseyeli ni anaa ni kanyaa mɔ ni tsɔɔ hewalɛ ni Biblia lɛ baanyɛ aná yɛ aŋkroaŋkroi anɔ.”—Marc, Belgium.
“Kalanda lɛ kanya mi waa. Ená mihenumɔi anɔ hewalɛ waa beni mikane ni mina bɔ ni Yehowa etsake nɛkɛ aŋkroaŋkroi nɛɛ eha lɛ. Nɔ ni ejɛ mli eba ji akɛ, ewo mi hewalɛ koni maya nɔ mafee tsakemɔi yɛ mi diɛŋtsɛ mishihilɛ mli. Minuɔ he bianɛ fe bei fɛɛ ni eho akɛ mifata wɔ jeŋ muu fɛɛ nyɛmifeemɔ lɛ he.”—Mary, United States.
“Mumɔŋ jaramɔ shihilɛ mli ni asafoi lɛ yɔɔ lɛ sa Yesu henumɔ he waa. Miida nyɛ shi akɛ nyɛmiikase Kristo nɔkwɛmɔnɔ lɛ kɛtsɔ wala shihilɛ mli saji ni nyɛkɛwo wɔ afi 2003 kalanda lɛ mli lɛ nɔ. Kalanda ko kanyako mi yɛ mishihilɛ mli ni eha mifo nɛkɛ dã.”—Cassandra, United States.
“Mibɔi tawa shɛremɔ beni miye afii 11; mikɛ tsofai fɔji tsu nii yɛ sɛɛ mli. Bei pii lɛ misusuɔ miyiŋ akɛ magbe mihe. Beni mibale Yehowa lɛ, aye abua mi ni mifɔ̃ɔ nakai sui lɛ. Nɛkɛ kalanda nɛɛ he yɛ sɛɛnamɔ waa kɛha mi. Nɔkwɛmɔnii ni kɔɔ minyɛmimɛi hii kɛ yei ni jɛ je lɛŋ he fɛɛ he lɛ he lɛ woɔ mi hewalɛ. Amrɔ nɛɛ mile akɛ jeee mikome too pɛ miyɔɔ nɛkɛ tawuu nɛɛ mli, ni ákɛ nɔ ni he hiaa titri ji suɔmɔ kɛha Yehowa kɛ tsui muu fɛɛ sɔɔmɔ ni akɛhaa lɛ.”—Margaret, Poland.
“Oo, kwɛ bɔ ni Nyɔŋmɔ Wiemɔ lɛ yɔɔ hewalɛ waa diɛŋtsɛ ha! Beni minine shɛ afi 2003 kalanda lɛ nɔ lɛ, mimia mihiɛ waa koni mikafo. Nɛkɛ niiashikpamɔi ni mfonirii fata he nɛɛ woɔ mɔ hemɔkɛyeli mli hewalɛ waa.”—Darlene, United States.
“Gbɔmɛi nɛɛ ateŋ mɛi komɛi atsutsu shihilɛ gbɛ lɛ tamɔ mitsutsu shihilɛ gbɛ lɛ nɔŋŋ. Yehowa eha mi hewalɛ ni mikɛŋmɛɛ jeŋbai fɔji ni tamɔ nɔ ni anyɛŋ aye amɛnɔ kunim lɛ ahe. Miida nyɛ shi babaoo kɛha nɛkɛ wala shihilɛ mli saji diɛŋtsɛ nɛɛ.”—William, United States.