Wala Shihilɛ He Sane

Kɛjɛ Tsuŋwoohei Ni Ewo Duŋ Amli Kɛtee Switzerland Gɔji Ni Kwɔlɔ Lɛ Anɔ

TAAKƐ LOTHAR WALTHER GBA

Beni mikɛ afii etɛ sɔŋŋ ehi shi yɛ East Germany Komunist tsuŋwoohei lɛ amli sɛɛ lɛ, mishwe waa akɛ maná heyeli ni mikɛ miweku lɛ aná miishɛɛ mli ŋɔɔmɔ ekoŋŋ.

SHI KƐLƐ, mifeko klalo kɛha bɔ ni mibinuu Johannes ni eye afii ekpaa lɛ hiɛ baafee lɛ yaa aha lɛ. Enako etsɛ hiɛ yɛ afii etɛ ni tsɔ hiɛ lɛ mli. Mi ji gbɔ kwraa kɛha lɛ.

Ákɛ mɔ ni tamɔɔɔ mibinuu lɛ, miná mifɔlɔi anaanyobɔɔ ni suɔmɔ yɔɔ mli lɛ mli ŋɔɔmɔ. Miishɛɛ yɛ wɔshia ni yɔɔ Chemnitz, Germany, heni afɔ mi yɛ afi 1928 mli lɛ mli. Mitsɛ wieɔ nɔ hewɔ ni esumɔɔɔ jamɔ kwraa lɛ he yɛ faŋŋ mli. Ekaiɔ akɛ yɛ Jeŋ Ta I lɛ mli lɛ, asraafoi ni ji “Kristofoi” ni yɔɔ afã kome mli lɛ kɛɛ mɛi ni yɔɔ fã krokomɛi lɛ yɛ December 25 lɛ mli akɛ “Merry Christmas,” kɛkɛ ni enɔ jetsɛremɔ lɛ amɛbɔi amɛhe gbee. Yɛ egbɛfaŋ lɛ, jamɔ ji osatofeemɔi lɛ ateŋ nɔ ni ehiii fe fɛɛ.

Hemɔkɛyeli Baye Nijiaŋwujee Najiaŋ

Miishɛɛ sane ji akɛ, mikɛ nijiaŋwujee ni tamɔ nakai ekpeee. Jeŋ Ta II lɛ ba naagbee beni miye afii 17, ni shwɛ fioo ni kulɛ amɔ mi awo asraafoi anitsumɔ lɛ mli. Kɛlɛ, mihao yɛ sanebimɔi tamɔ ‘Mɛni hewɔ agbeɔ gbɔmɛi nɛkɛ? Namɔ manyɛ maná hekɛnɔfɔɔ yɛ emli? Nɛgbɛ maná anɔkwa shweshweeshwe shihilɛ yɛ?’ Heni wɔyɔɔ yɛ East Germany lɛ baje Sovietbii akwɛmɔ shishi. Komunistbii asusumɔi yɛ jalɛsaneyeli, hegbɔyeli, ekomefeemɔ, kɛ toiŋjɔlɛ ni bakaa mɔ kɛ mɛi krokomɛi ateŋ lɛ sa mɛi ni nibii ni jɛɔ ta mli baa lɛ eha etɔ amɛ lɛ ahiɛ. Etsɛɛɛ kwraa ni nɛkɛ aŋkroaŋkroi anɔkwafoi nɛɛ anijiaŋ baaje wui waa—yɛ nɛkɛ be nɛɛ mli lɛ, jeee kɛtsɔ jamɔ nɔ, shi moŋ maŋkwramɔŋ saji anɔ.

Yɛ be mli ni mitaoɔ hetoo ni shishinumɔ yɔɔ mli kɛha mi diɛŋtsɛ mihe nɛɛ mli ni minyɛkwɛmɛi lɛ ateŋ mɔ kome, ni eji Yehowa Odasefonyo lɛ kɛ mi wie ehemɔkɛyeli lɛ he. Eha mi Biblia kasemɔ wolo ko ní wo mi hewalɛ koni makane—Mateo yitso 24 lɛ fɛɛ—klɛŋklɛŋ kwraa yɛ mishihilɛ mli. Miná niiamlitsɔɔmɔ ni nilee yɔɔ mli ni kɔneɔ mɔ yiŋ ni akɛha yɛ wolo lɛ mli ni haa aleɔ bei ni wɔyɔɔ mli nɛɛ akɛ “nibii agbɛjianɔtoo lɛ naagbee lɛ,” ni etsɔɔ nibii ni kɛ adesai anaagbai baa lɛ he miishɛɛ.—Mateo 24:3; Kpojiemɔ 12:9.

Etsɛɛɛ ni minine shɛ Yehowa Odasefoi awoji babaoo nɔ, ni beni mikaneɔ amɛ jogbaŋŋ lɛ, miyɔse akɛ mina anɔkwale ní mikɛ ekãa taoɔ lɛ. Eji miishɛɛ sane ákɛ aaakase ákɛ akɛ Yesu Kristo ta maŋtsɛsɛi nɔ yɛ ŋwɛi yɛ afi 1914, ni ákɛ etsɛŋ ni ebaaye nibii ni Nyɔŋmɔ gbeyeishemɔ bɛ mli lɛ anɔ kunim bɔni afee ni ekɛ jɔɔmɔi abaha adesai toibolɔi lɛ. Yɛ migbɛfaŋ lɛ, niiashikpamɔ kpele kroko ji kpɔmɔnɔ lɛ shishinumɔ ni yɔɔ faŋŋ lɛ. Eye ebua mi ni mikɛ sɔlemɔ ni jɛ tsuiiaŋ bɛŋkɛ Yehowa Nyɔŋmɔ, ni mibi eshaifaa. Mlihilɛ ninefɔɔ ni yɔɔ Yakobo 4:8 ni kɛɔ akɛ: “Nyɛtsia nyɛbɛŋkɛa Nyɔŋmɔ, ni eeetsi eeebɛŋkɛ nyɛ” lɛ sa mitsui he waa diɛŋtsɛ.

Yɛ henumɔ ni mli wa ní miná kɛha hemɔkɛyeli hee ni miná lɛ fɛɛ sɛɛ lɛ, mifɔlɔi kɛ minyɛmimɛi yei lɛ shashao shi yɛ shishijee mli akɛ amɛaakpɛlɛ nɔ ni mikɛɛ amɛ lɛ nɔ. Shi kɛlɛ, enɛ baaa shwelɛ ni miyɔɔ akɛ maya Kristofoi akpeei ni Odasefoi akuu fioo lɛ feɔ yɛ heni bɛŋkɛ Chemnitz lɛ shishi. Nɔ ni fee mi naakpɛɛ ji akɛ, mifɔlɔi kɛ minyɛmimɛi yei lɛ kɛ mi tee klɛŋklɛŋ kpee lɛ shishi! Enɛ ba mli yɛ afi 1945 kɛ afi 1946 fɛibe lɛ mli. Sɛɛ mli beni ato Biblia kasemɔ kuu shishi yɛ Harthau, heni wɔyɔɔ lɛ, miweku lɛ bɔi nikasemɔ yaa daa.

“Gbekɛ Ji Mi”

Biblia mli anɔkwalei ni he hiaa ni mikaseɔ kɛ Yehowa webii ni mikɛbɔɔ daa lɛ kanya mi koni majɔɔ miwala nɔ maha Yehowa, ni abaptisi mi yɛ May 25, afi 1946 lɛ nɔ. Nɔ ni ha mitsui nyɔ mimli waa ji akɛ, miweku lɛ mlibii lɛ hu tee amɛhiɛ yɛ mumɔŋ, ni yɛ be ni sa mli lɛ amɛyi etɛ lɛ fɛɛ amɛbatsɔmɔ Odasefoi anɔkwafoi. Minyɛmiyoo lɛ kã he eji asafoi ni yɔɔ Chemnitz lɛ ateŋ ekome mlinyo ni yɔɔ ekãa. Minyɛ kɛ mitsɛ kɛ anɔkwayeli sɔmɔ kɛyashi amɛgboi yɛ afi 1965 kɛ afi 1986 mli.

Mibɔi sɔɔmɔ akɛ gbɛgbalɔ krɛdɛɛ yɛ mibaptisimɔ lɛ sɛɛ nyɔji ekpaa. Enɛ kadi wala be-fɛɛ sɔɔmɔ yɛ be mli ni ‘dekã yɔɔ, loo dekã bɛ lɛ’ lɛ shishijee. (2 Timoteo 4:2) Etsɛɛɛ ni hegbɛi heei kɛha sɔɔmɔ anaa gbele. Be-fɛɛ shiɛlɔi ahe bahia yɛ heko ni etse ehe banee yɛ Germany bokagbɛ. Mikɛ nyɛminuu ko kɛ wɔgbɛi ha kɛha nitsumɔ nɛɛ, shi minu he akɛ mibɛ niiashikpamɔ loo mumɔŋ salɛ kɛha nitsumɔ ni wa waa nɛɛ. Akɛni afii 18 pɛ miye hewɔ lɛ, miná henumɔ ni tamɔ Yeremia nɔ lɛ nɔŋŋ eko, akɛ: “Ao, . . . Yehowa! naa, mileee wiemɔ; ejaakɛ gbekɛ ji mi.” (Yeremia 1:6) Yɛ yiŋkɔshikɔshifeemɔ lɛ fɛɛ sɛɛ lɛ, nyɛmimɛi onukpai lɛ kɛ mlihilɛ kpɛ amɛyiŋ akɛ amɛaaka wɔ amɛkwɛ. No hewɔ lɛ, aha wɔtee Belzig, ni ji maŋ bibioo ko ni yɔɔ Brandenburg maŋ lɛ mli lɛ mli.

Eji nɔ ni wa waa akɛ aaashiɛ yɛ nakai shikpɔŋkuku lɛ mli, shi ekɛ tsɔsemɔ ni he yɔɔ sɛɛnamɔ ha mi. Yɛ be ni sa mli lɛ, nitsumɔtsɛmɛi ni ji yei ni ehé gbɛi waa lɛ kpɛlɛ Maŋtsɛyeli shɛɛ sane lɛ nɔ ni amɛbatsɔmɔ Yehowa Odasefoi. Shi kɛlɛ, amɛshidaamɔ akɛ Yehowa Odasefoi lɛ fee nɔ ni teɔ shi ewoɔ nakai akrowa lɛ mlibii akusumii kɛ shihilɛ gbɛ ni yɔɔ gbeyei lɛ. Katolik kɛ Protestant osɔfoi fɛɛ te shi amɛwo wɔ waa ni amɛwie naafolɔmɔ wiemɔi amɛshi wɔ yɛ wɔshiɛmɔ nitsumɔ lɛ he. Shi akɛni wɔkɛ wɔhe fɔ Yehowa nɔ kɛha gbɛtsɔɔmɔ kɛ hebuu hewɔ lɛ, wɔnyɛ wɔye wɔbua mɛi babaoo ni yɔɔ wiemɔ lɛ he miishɛɛ lɛ ni amɛkpɛlɛ anɔkwale lɛ nɔ.

Odaseyelii ni Tee nɔ Etsɔɔ akɛ Abɛ Wɔhe Miishɛɛ

Afi 1948 lɛ kɛ jɔɔmɔi kɛ shihilɛi ni mli wawai ni akpaaa gbɛ fɛɛ ba. Klɛŋklɛŋ lɛ, minine shɛ gbɛgbamɔ nitsumɔ nɔ yɛ Rudolstadt, Thuringia. Jɛmɛ mibale minyɛmimɛi hii kɛ yei anɔkwafoi lɛ jogbaŋŋ, ni miná amɛnaanyobɔɔ lɛ he miishɛɛ. Jɔɔmɔ ko ni he hiaa waa hu ba yɛ July nakai afi lɛ mli. Mikɛ Erika Ullmann, ni ji Kristofonyo anɔkwafo oblayoo fioo ko ni yɔɔ ekãa ní mile lɛ kɛjɛ be mli ni mije kpeeiyaa shishi yɛ Chemnitz Asafo lɛ mli lɛ bote gbalashihilɛ mli. Wɔyi enyɔ lɛ fɛɛ wɔbɔi gbɛgbamɔ nitsumɔ lɛ yɛ Harthau, ni ji maŋ ni mijɛ mli lɛ mli. Shi kɛlɛ, yɛ be ko sɛɛ lɛ, Erika nyɛɛɛ ni eya nɔ etsu be-fɛɛ sɔɔmɔ nitsumɔ lɛ yɛ gbɔmɔtsoŋ hewalɛnamɔ mli naagbai kɛ yiŋtoi krokomɛi ahewɔ.

Nakai bei lɛ bafee be ni mli wa waa kɛha Yehowa webii. Labor Department (Nitsumɔhe ni Haa Maŋbii Anitsumɔ) yɛ Chemnitz lɛ fo wolo ni mikɛyaheɔ niyenii lɛ mli bɔni afee ni amɛkɛnyɛ minɔ ni makpa shiɛmɔ nitsumɔ, koni mayatao be-fɛɛ heloonaa nitsumɔ ni matsu. Asafoŋ onukpai ni yɔɔ jɛmɛ lɛ kɛ misane lɛ tsu nii kɛbi koni Maŋ lɛ akpɛlɛ enɛ nɔ yɛ mla naa. Akpoo enɛ, ni yɛ June 23, afi 1950 mli lɛ, abu mi fɔ́ koni mawo shika ko loo ni maye gbii 30 yɛ tsuŋwoo mli. Wɔbi ni akwɛ sane lɛ mli ekoŋŋ, shi kojomɔhe ni fe fɛɛ lɛ kpoo sane lɛ mlikwɛmɔ lɛ, ni ayawo mi tsuŋ.

No ji shitee-kɛwoo kɛ haomɔ ni baaba lɛ he okadii fioo komɛi kɛkɛ. Yɛ nɔ ni shɛɛɛ nyɔŋ kome sɛɛ, yɛ September afi 1950 lɛ mli beni Komunist nɔyeli lɛ eje wɔgbɛi fitemɔ he tafaa yɛ adafitswaa woji amli lɛ shishi sɛɛ lɛ, amɛtsi wɔ nitsumɔ lɛ naa. Yɛ wɔshweremɔ ni yaa hiɛ oyayaayai lɛ kɛ wɔhe ni wɔkɛwooo maŋ saji amli lɛ hewɔ lɛ, atsɛ́ wɔ akɛ Anaigbɛ gbɛjianɔtoo ko ni he yɔɔ oshara ni kpáa maŋ shi ni miifee “nibii ni esaaa” ni amɛkɛ jamɔ ehà hiɛ. Gbi ni atsi wɔnaa lɛ, nakai gbi lɛ nɔŋŋ miŋa fɔ wɔbinuu Johannes yɛ shia, ni nakai beaŋ lɛ miyɛ tsuŋwoo mli. Yɛ wiemɔi ni mɔ ni fɔɔ mɔ lɛ wie kɛshi Maŋ Shweshweeshwefeemɔ nitsulɔi onukpai lɛ fɛɛ sɛɛ lɛ, amɛkɛ ekãa bote wɔ asá lɛ nɔ ni amɛkwɛ nibii amli akɛ amɛaana odaseyeli nɔ ko, koni amɛkɛma amɛ naafolɔmɔ lɛ nɔ mi. Yɛ anɔkwale mli lɛ amɛnáaa nɔ ko. Shi kɛlɛ, sɛɛ mli lɛ amɛye omanye yɛ mɔ ko ni amɛkɛ lɛ bawo wɔ asafo lɛ mli koni ekpá wɔ shi lɛ mli. Enɛ ha yɛ October afi 1953 mli lɛ, amɔmɔ onukpai lɛ fɛɛ, ní mi hu mifata he.

Yɛ Tsuŋwoohei ni Ewo Duŋ Amli

Beni abu wɔ fɔ ni atsɔɔ wɔ be ni wɔbaaye yɛ tsuŋwoo lɛ mli ni ji kɛjɛ afii etɛ kɛyashi afii ekpaa lɛ sɛɛ lɛ, wɔyafata wɔnyɛmimɛi lɛ ateŋ mɛi babaoo ahe yɛ Osterstein Mɔɔ lɛ mli tsuŋwoohei ni mli ewo muji lɛ amli, yɛ Zwickau. Yɛ gbeyei shihilɛ ni yɔɔ jɛmɛ lɛ fɛɛ sɛɛ lɛ, eji miishɛɛ nɔ diɛŋtsɛ kɛha wɔ akɛ wɔkɛ nyɛmimɛi ni edara yɛ mumɔŋ lɛ aaabɔ. Heyeli ni wɔbɛ lɛ etsɔɔɔ akɛ wɔnaaa mumɔŋ niyenii. Eyɛ mli akɛ agbeɔ wɔhe guɔ ni nɔyeli lɛ etsi wɔnaa moŋ, shi akɛ Buu-Mɔɔ ju shi kɛba tsuŋwoohe lɛ, ni akɛba tsũi ni wɔyɔɔ mli lɛ amli! Yɛ mɛɛ gbɛ nɔ?

Aha nyɛmimɛi lɛ ateŋ mɛi komɛi yatsu nii yɛ hei ni atsaa sũ mli nii ni tamɔ ŋai lɛ yɛ, ni amɛkɛ Odasefoi ni awoko amɛtsuŋ lɛ kpeɔ yɛ jɛmɛ ni amɛkɛ woji tɛtrɛbii lɛ haa amɛ. No sɛɛ lɛ nyɛmimɛi lɛ kɛ woji tɛtrɛbii lɛ teeɔ kɛbaa tsuŋwoohe lɛ, ni amɛtsɔɔ ŋaa gbɛ nɔ amɛjaa mumɔŋ niyenii ni he hiaa waa lɛ amɛhaa wɔteŋ mɛi ni eshwɛ lɛ. Mimii shɛ mihe waa ni ewo mi hewalɛ akɛ minine aaashɛ Yehowa kwɛmɔ kɛ gbɛtsɔɔmɔ nɔ yɛ nɛkɛ gbɛ nɔ!

Beni shɛɔ afi 1954 lɛ, ajie wɔ kɛtee tsuŋwoohe ni yɔɔ gbɛi gbonyo lɛ mli yɛ Torgau. Odasefoi ni yɔɔ jɛmɛ lɛ ná miishɛɛ akɛ amɛaakpee wɔ. Kɛyashi nakai be lɛ aaashɛ lɛ, amɛtee nɔ amɛhi shi akɛ mɛi ni he wa yɛ mumɔŋ kɛtsɔ nibii ni amɛbaanyɛ amɛkai yɛ Buu-Mɔɔ ni ebaho lɛ amli lɛ atã ni amɛtee nɔ amɛtsĩ lɛ nɔ. Kwɛ bɔ ni amɛshwe akɛ amɛnine aaashɛ mumɔŋ niyenii hee nɔ! Amrɔ nɛɛ eshɛ wɔnɔ akɛ wɔgba amɛ Biblia mli anɔkwalei ni wɔkase yɛ Zwickau lɛ. Shi te wɔɔfee tɛŋŋ wɔfee nakai beni awo wɔ shi dikadika akɛ wɔkɛ wɔhe akawie yɛ wɔdaa gbi nyiɛmɔi lɛ amli lɛ? Ojogbaŋŋ, nyɛmimɛi lɛ kɛ ŋaawoo ni he yɔɔ sɛɛnamɔ ha wɔ yɛ bɔ ni wɔɔtsɔ wɔfee nakai lɛ he, ni Yehowa nine wulu lɛ bu wɔhe. Enɛ tsɔɔ wɔ bɔ ni Biblia lɛ kasemɔ kɛ enɔjwɛŋmɔ beni wɔyɔɔ heyeli kɛ hegbɛ ni wɔkɛaafee nakai lɛ he hiaa ha.

Be Eshɛ Kɛha Yiŋkpɛi ni Hiaa Afeemɔ

Kɛtsɔ Yehowa yelikɛbuamɔ nɔ lɛ, wɔfi shi shiŋŋ. Nɔ ni fee wɔ naakpɛɛ waa ji akɛ, yɛ afi 1956 lɛ naagbee mli lɛ aŋmɛɛ wɔteŋ mɛi babaoo ahe. Ewa akɛ wɔɔtsɔɔ miishɛɛ ni wɔná beni agbele tsuŋwoohei lɛ agboi lɛ mli! Nakai beaŋ lɛ, mibinuu lɛ eye afii ekpaa, ni eji miishɛɛnamɔ kpele diɛŋtsɛ kɛha mi akɛ mayafata miŋa he kɛtsɔse wɔbi lɛ. Johannes kɛ mi ye be saŋŋ tamɔ gbɔ ko, shi etsɛɛɛ ni wekukpaa ni hedɔɔ yɔɔ mli bakã wɔteŋ.

Nakai beaŋ lɛ Yehowa Odasefoi ni yɔɔ East Germany lɛ kɛ shihilɛ ni mli wa waa miikpe. Nyɛɛ ni ayɔɔ kɛha wɔ Kristofoi asɔɔmɔ nitsumɔ lɛ ni mli waa daa lɛ kɛ wɔhe ni wɔkɛwooo maŋ saji amli lɛ tsɔɔ akɛ wɔbaahi shi yɛ hegbeyeiwoo mli—shihilɛ ni oshara yɔɔ mli, yeyeeyefeemɔ, kɛ haomɔ shishi daa nɛɛ. No hewɔ lɛ, ehe bahia ni mikɛ Erika apɛi wɔshihilɛ mli jogbaŋŋ ni wɔsɔle yɛ he, ni wɔnu he akɛ ehe miihia ni wɔshi bɔni afee ni wɔyahi shihilɛi ni hi saŋŋ mli koni wɔkahao fe nine. Wɔmiisumɔ ni wɔná heyeli kɛsɔmɔ Yehowa koni wɔtiu mumɔŋ otii asɛɛ.

Yɛ afi 1957 agbiɛnaa be mli lɛ, hegbɛ ko naa gbele kɛha wɔ koni wɔshi kɛya Stuttgart, West Germany. Atsĩko shiɛmɔ nitsumɔ lɛ naa yɛ jɛmɛ, ni wɔbaanyɛ wɔkɛ wɔnyɛmimɛi lɛ abɔ ni mɔ ko etsiii wɔnaa. Amɛsuɔmɔ yelikɛbuamɔ lɛ fa babaoo. Wɔkɛ asafo ni yɔɔ Hedelfingen lɛ hi shi afii kpawo sɔŋŋ. Wɔbinuu lɛ bɔi skulyaa yɛ nakai afii lɛ amli, ni etee ehiɛ babaoo yɛ anɔkwale lɛ mli. Miná hegbɛ yɛ September afi 1962 lɛ mli akɛ maya Maŋtsɛyeli Sɔɔmɔ Skul lɛ yɛ Wiesbaden. Jɛmɛ awo mi hewalɛ yɛ koni mikɛ miweku lɛ ashi kɛya heni Biblia tsɔɔlɔi ni wieɔ Germany wiemɔ lɛ ahe hiaa yɛ koni wɔyasɔmɔ. Hei ni fata he ji Germany kɛ Switzerland hei komɛi.

Wɔshi Kɛtee Switzerland Gɔji lɛ Anɔ

No hewɔ lɛ, yɛ afi 1963 lɛ mli lɛ, wɔfa kɛtee Switzerland. Akɛɛ wɔ koni wɔkɛ asafo bibioo ko ni yɔɔ Brunnen, yɛ Kpaakpo fɛfɛo ko ni gbɛi ji Lucerne ni yɔɔ Switzerland Gɔji lɛ ateŋ tuuŋtu lɛ ayatsu nii. Kɛha wɔ lɛ, etamɔ nɔ ni wɔyɛ paradeiso. Ehe bahia ni wɔkase Germany wiemɔ ni awieɔ yɛ jɛmɛ lɛ, wɔle jɛmɛ shihilɛ, ni wɔle gbɔmɛi lɛ asui hu. Ni kɛlɛ, wɔná nitsumɔ ni wɔtsuɔ kɛ shiɛmɔ ni wɔshiɛɔ yɛ gbɔmɛi ni sumɔɔ toiŋjɔlɛ lɛ ateŋ lɛ mli miishɛɛ. Wɔye afii 14 yɛ Brunnen. Wɔbinuu lɛ da yɛ jɛmɛ.

Yɛ afi 1977 mli beni mibɛŋkɛɔ afii 50 lɛ, wɔnine shɛ ninefɔɔ nɔ koni wɔyasɔmɔ yɛ Switzerland Betel yɛ Thun. Wɔna enɛ akɛ eji hegbɛ ni wɔkpaaa gbɛ, ni wɔkɛ hiɛsɔɔ babaoo kpɛlɛ nɔ. Mikɛ miŋa ye afii nɛɛhu yɛ Betel sɔɔmɔ mli, ni wɔkaiɔ akɛ eji kadimɔnɔ krɛdɛɛ yɛ wɔ Kristofoi ashihilɛ kɛ aŋkro mumɔŋ nɔyaa mli. Wɔná miishɛɛ yɛ shiɛlɔi ni yɔɔ Thun kɛ hei ni bɛŋkɛ lɛ ni wɔkɛ amɛ feɔ ekome kɛyashiɛɔ lɛ mli, ni daa nɛɛ wɔkwɛɔ Yehowa ‘naakpɛɛ nitsumɔi’ ni ji Bernese Gɔji ni nɔ kwɔlɔ ni snoo ehà amɛyiteŋ lɛ.—Lala 9:2.

Wɔfã Shikome Ekoŋŋ

Wɔfaa ni nyiɛ sɛɛ lɛ ba mli yɛ afi 1986 mra be mli. Abi koni wɔyasɔmɔ akɛ gbɛgbalɔi krɛdɛɛi yɛ shikpɔŋkuku ko ni da waa ni akɛha Buchs Asafo ni yɔɔ Switzerland bokagbɛ lɛ mli. Shikome ekoŋŋ lɛ, ehe bahia ni wɔkase shihilɛ gbɛ kroko. Shi kɛlɛ, shwelɛ ni wɔyɔɔ akɛ wɔɔsɔmɔ Yehowa yɛ he fɛɛ he ni abaanyɛ akɛwɔ atsu nii yɛ lɛ kanya wɔ, wɔtsu nitsumɔ hee nɛɛ he nii ni wɔná jɔɔmɔ. Bei komɛi lɛ miyayeɔ gbɛfalɔi saralɔi anajiaŋ, ni misaraa ni miwoɔ asafoi ahewalɛ. Afii 18 eho, ni wɔná niiashikpamɔ ni miishɛɛ yɔɔ mli babaoo yɛ shiɛmɔ ni wɔshiɛ yɛ nɛkɛ hei nɛɛ amli lɛ. Asafo ni yɔɔ Buchs lɛ eda, ni wɔnáa kpeei amli miishɛɛ yɛ Maŋtsɛyeli Asa fɛfɛo ko ni ajɔɔ nɔ afii enumɔ ni eho lɛ mli.

Yehowa ekwɛ wɔnɔ babaoo diɛŋtsɛ. Wɔkɛ wɔshihilɛ mli be ni hi fe fɛɛ lɛ tsu nii yɛ be-fɛɛ sɔɔmɔ nitsumɔ lɛ mli, ni kɛlɛ nɔ ko nɔ ko he ehiaaa wɔ. Wɔná miishɛɛ ni wɔtsui nyɔ wɔmli ákɛ wɔɔna akɛ wɔbinuu lɛ, eŋa, kɛ amɛbii, kɛ wɔnabii hu miinyiɛ yɛ anɔkwayeli mli yɛ Yehowa gbɛ lɛ nɔ.

Kɛ́ misusu be ni eho lɛ he lɛ, minuɔ he akɛ wɔsɔmɔ Yehowa “dekã yɛ jio, dekã bɛ jio.” Kristofoi asɔɔmɔ nitsumɔ lɛ ni mitiu sɛɛ lɛ ejie mi kɛjɛ Komunist tsuŋwoohei ni mli ewo duŋ lɛ amli kɛtee Switzerland Gɔji fɛfɛji ni nɔ kwɔlɔ lɛ anɔ. Mikɛ miweku lɛ shwako wɔhe kɔkɔɔkɔ akɛ wɔhala Kristofoi asɔɔmɔ nitsumɔ lɛ.

[Akrabatsa ni yɔɔ baafa 28]

“Mɛi ni Piŋ Shii Enyɔ Sɔŋŋ lɛ” Fi Shi Shiŋŋ yɛ Yiwaa Shishi

Akɛ hiɛ ká Yehowa Odasefoi yɛ German Democratic Republic (GDR), ni ale lɛ hu akɛ East Germany lɛ shishi, ni akɛ nɔnyɛɛ ni naa wa ba amɛnɔ. Saji ni aŋmala ashwie shi lɛ tsɔɔ ákɛ akɛ Odasefoi ni fa fe 5,000 tee tsuŋwoohei ni anyɛɛɔ gboklɛfoi anɔ ni amɛtsuɔ nii dɛŋdɛŋ lɛ kɛ tsuŋwoohei amli yɛ amɛ Kristofoi asɔɔmɔ nitsumɔ lɛ kɛ amɛhe ni amɛkɛwooo maŋ saji amli lɛ hewɔ.—Yesaia 2:4.

Awie nɛkɛ Odasefoi nɛɛ ateŋ mɛi komɛi ahe akɛ amɛji “mɛi ni piŋ shii enyɔ sɔŋŋ.” Awo amɛteŋ mɛi 250 tsuŋ yɛ Nazi yiwalɛ nsrai kɛ tsuŋwoohei amli. Kɛkɛ ni yɛ afi 1950 mli lɛ, Stasi, ni ji Maŋ Shweshweeshwefeemɔ Nitsumɔhe ni yɔɔ GDR shishi lɛ nyiɛ amɛsɛɛ ni amɛyamɔmɔ amɛ amɛwo tsuŋ. Tsuŋwoohei lɛ ekomɛi po tsu nitsumɔi enyɔ ahe nii—klɛŋklɛŋ lɛ akɛ Nazi tsuŋwoohei kɛ no sɛɛ lɛ akɛ Stasi tsuŋwoohei.

Yɛ klɛŋklɛŋ afii nyɔŋma lɛ mli yiwaa ni naa wa waa, ni je shishi kɛjɛ afi 1950 kɛyashi afi 1961 lɛ mli lɛ, Odasefoi 60—ni ji hii kɛ yei—gboi yɛ tsuŋwoohei lɛ mli yɛ niseniianifeemɔ, niyenii kpakpa ni anaaa, hela, kɛ gbɔlɛ hewɔ. Awo Odasefoi 12 tsuŋ amɛwala gbii be fɛɛ, nɔ ni sɛɛ mli lɛ atse nɔ kɛba afii 15 yɛ tsuŋwoo mli lɛ.

Ŋmɛnɛ, nɔ ko ni akɛtsɔɔ ni yɔɔ daa ni maa afii 40 maŋ yiwaa ni akɛba Yehowa Odasefoi anɔ yɛ East Germany lɛ yɛ tsutsu Stasi nitsumɔhe yitso ni yɔɔ Berlin lɛ mli. Mfonirii kɛ saji ni kɔɔ aŋkroaŋkroi ahe ni akɛtsɔɔ yɛ jɛmɛ lɛ yeɔ ekãa kɛ mumɔŋ hewalɛ ni nɛkɛ Odasefoi ni ye anɔkwa yɛ yiwaa nɛɛ shishi lɛ yɔɔ lɛ he odase ni jeee nɔ ni akɛ naabu yeɔ.

[Shikpɔŋ he mfoniri ni yɔɔ baafa 24, 25]

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)

EAST GERMANY

Rudolstadt

Belzig

Torgau

Chemnitz

Zwickau

[Mfoniri ni yɔɔ baafa 25]

Osterstein Mɔɔ lɛ, yɛ Zwickau

[He ni Sane lɛ Jɛ]

Fotosammlung des Stadtarchiv Zwickau, Deutschland

[Mfoniri ni yɔɔ baafa 26]

Mikɛ miŋa Erika