Ani Anɔkwale lɛ Miiwo Yibii yɛ Mɛi ni Otsɔɔ Amɛ Nii lɛ Amli?

BE NI oblanyo fioo Eric kɛɛ esumɔɔɔ akɛ ale lɛ akɛ Yehowa Odasefoi lɛ ateŋ mɔ kome dɔŋŋ lɛ, efɔlɔi lɛ atsui kumɔ. Amɛleee akɛ ebaafee no ko ni tamɔ nakai. Be ni Eric ji gbekɛ lɛ, ekɛ ehe woɔ weku Biblia mli nikasemɔ lɛ mli, eyaa Kristofoi akpeei, ni efataa asafo lɛ he kɛyaa shiɛmɔ. Kɛ́ aaawie yɛ gbɛ ko nɔ lɛ, etamɔ nɔ ni eyɛ anɔkwale lɛ mli. Shi be ni eshi shia lɛ, efɔlɔi lɛ yoo akɛ Biblia mli anɔkwale lɛ boteko emli. Enɛ ni amɛyoo lɛ ha amɛnaa kpɛ amɛhe ni amɛnijiaŋ je wui.

Mɛi krokomɛi nuɔ nijiaŋwujee ni tamɔ nakai he kɛ́ amɛ Biblia mli nikaselɔ ko kpa nikasemɔ be ni amɛkpaaa gbɛ lɛ. Mɛi fɔɔ amɛhe bimɔ yɛ bei ni tamɔ nɛkɛ mli akɛ, ‘Mɛni hewɔ miyooo akɛ nɔ ko tamɔ nɛkɛ miiba lɛ?’ Ojogbaŋŋ, dani mumɔŋ oshara ko aaaba lɛ, ani wɔbaanyɛ wɔyoo kɛji akɛ anɔkwale lɛ miiwo yibii yɛ mɛi ni wɔtsɔɔ amɛ nii lɛ amli? Kɛ́ wɔbaanyɛ lɛ, te wɔɔfee tɛŋŋ wɔná nɔmimaa akɛ anɔkwale lɛ miitsu nii yɛ wɔ kɛ mɛi ni wɔtsɔɔ amɛnii lɛ amli lɛ? Yesu kɛ nɔ ni baaye abua wɔ koni wɔna sanebimɔi nɛɛ ahetoo lɛ ha yɛ ebɛbua ní ale waa ni kɔɔ nidulɔ lɛ he lɛ mli.

Esa akɛ Anɔkwale lɛ Ashɛ Tsui lɛ He

Yesu wie akɛ: “Wú lɛ ji Nyɔŋmɔ wiemɔ lɛ. Shi shikpɔŋ kpakpa mli nɔ lɛ ji mɛi ni be ni amɛnu wiemɔ lɛ amɛkɛtoɔ tsui krɔŋŋ ni hi mli, ni amɛkɛ tsuishiŋmɛɛ woɔ yibii.” (Luka 8:11, 15) No hewɔ lɛ dani Maŋtsɛyeli anɔkwale lɛ baanyɛ awo yibii yɛ wɔ nikaselɔi lɛ amli lɛ, esa akɛ ehé shi yɛ amɛ mfonirifeemɔŋ tsui lɛ mli. Yesu ma nɔ mi eha wɔ akɛ kɛ́ Nyɔŋmɔ anɔkwalei lɛ sa tsui krɔŋŋ he lɛ, etsuɔ nii amrɔ nɔŋŋ ni ewoɔ yibii, tamɔ wú kpakpa yɛ sũ kpakpa mli. Mɛni esa akɛ wɔtao?

Esa akɛ wɔtao sui ni yɔɔ tsui lɛ mli, jeee kponɔgbɛ nifeemɔi kɛkɛ. Jamɔ gbɛjianɔtoo ní akɛtsuɔ nii kɛkɛ lɛ etsɔɔɔ nɔ diɛŋtsɛ ni yɔɔ mɔ ko tsui mli. (Yeremia 17:9, 10; Mateo 15:7-9) Esa akɛ wɔkwɛ nii kɛya shɔŋŋ. Esa akɛ ana tsakemɔi diɛŋtsɛ yɛ nibii ni mɔ lɛ shweɔ, eyiŋtoi, kɛ nibii ni ekɛyeɔ klɛŋklɛŋ gbɛhe lɛ amli. Esa akɛ mɔ lɛ abɔi gbɔmɔ hee ni kɛ Nyɔŋmɔ suɔmɔnaa nii kpaa gbee lɛ woo. (Efesobii 4:20-24) Ákɛ nɔkwɛmɔnɔ lɛ: Paulo wie akɛ be ni Tesalonikabii lɛ nu sanekpakpa lɛ, amɛmɔ mli amrɔ nɔŋŋ akɛ Nyɔŋmɔ wiemɔ. Shi tsuishiŋmɛɛ, anɔkwayeli kɛ suɔmɔ ni amɛjie lɛ kpo yɛ sɛɛ mli lɛ ma nɔ mi eha lɛ akɛ anɔkwale lɛ ‘miitsu nii yɛ amɛmli.’—1 Tesalonikabii 2:13, 14; 3:6.

Yɛ anɔkwale mli lɛ, taakɛ Eric sane lɛ tsɔɔ lɛ, etsɛŋ ni nɔ fɛɛ nɔ ni yɔɔ nikaselɔ lɛ tsui mli lɛ baaje kpo yɛ enifeemɔ mli. (Marko 7:21, 22; Yakobo 1:14, 15) Mɔbɔ sane ji akɛ, be ni su gbonyo ko baakɛɛ ejeɔ kpo yɛ mɔ lɛ nifeemɔi amli lɛ, no mli lɛ ekolɛ ekpe sɛɛ tsɔ. No hewɔ lɛ, bɔ ni wɔɔfee wɔyoo gbɔjɔmɔi pɔtɛɛ komɛi dani amɛbatsɔmɔ mumɔŋ gbɛtsii nii lɛ ji naagba lɛ. Ehe miihia ni wɔná gbɛ ko ni wɔɔtsɔ nɔ wɔkɛkwɛ mfonirifeemɔŋ tsui lɛ mli. Mɛɛ gbɛ nɔ wɔɔtsɔ wɔfee enɛ?

Kasemɔ Yesu

Yɛ anɔkwale mli lɛ, Yesu nyɛɔ eleɔ nɔ ni yɔɔ gbɔmɛi atsuii amli ni tɔmɔ ko kwraa bɛ he. (Mateo 12:25) Wɔteŋ mɔ ko nyɛŋ afee nakai. Shi kɛlɛ, eha wɔle akɛ wɔ hu wɔbaanyɛ wɔyoo nibii ni mɔ ko shweɔ, eyiŋtoi, kɛ nibii ni ekɛyeɔ klɛŋklɛŋ gbɛhe. Taakɛ bɔ ni datrɛfonyo ko ni he esa tsɔɔ gbɛ̀i srɔtoi anɔ koni ekɛle nɔ ni gbáa helatsɛ ko tsui naa lɛ, Yesu kɛ Nyɔŋmɔ Wiemɔ lɛ tsu nii ni ‘ekɛgbala’ “tsuiiaŋ susumɔi kɛ jwɛŋmɔi” ni yɔɔ teemɔŋ lolo lɛ po ni ejie amɛ kpo.—Abɛi 20:5; Hebribii 4:12.

Ákɛ nɔkwɛmɔnɔ lɛ, be ko lɛ Yesu ye ebua Petro koni eyɔse gbɔjɔmɔ ko ni batsɔ gbɛtsii nii kɛha lɛ yɛ sɛɛ mli lɛ. Yesu le akɛ Petro sumɔɔ lɛ. Yɛ anɔkwale mli lɛ, etsɛko tsɔ̃ ni ekɛ “ŋwɛi maŋtsɛyeli lɛ naa samfei” wo Petro dɛŋ. (Mateo 16:13-19) Shi kɛlɛ, Yesu le hu akɛ Satan ejie ehiɛ eka bɔfoi lɛ. Abaanyɛ̃ amɛnɔ yɛ gbii ni kã amɛhiɛ lɛ amli koni amɛŋmɛɛ saji ahe kɛsaa. Eka shi faŋŋ akɛ Yesu yoo akɛ ekaselɔi lɛ ekomɛi ahemɔkɛyeli egbɔjɔ. Enɛ hewɔ lɛ eshashaooo shi akɛ eeetsɔɔ amɛ nibii ni esa akɛ amɛtsu he nii. Susumɔ bɔ ni ekɛ amɛ je sanegbaa lɛ shishi eha lɛ he okwɛ.

Mateo 16:21 kɛɔ akɛ: “Kɛjɛ no be lɛ nɔ nɔŋŋ ni Yesu bɔi ekaselɔi lɛ tsɔɔmɔ akɛ ja . . . eyana amanehulu pii . . . ní agbe lɛ.” Kadimɔ akɛ Yesu tsɔɔ amɛ nɔ ni baaba enɔ, jeee akɛ ekɛɛ amɛ kɛkɛ. Eeenyɛ efee akɛ ekɛ Biblia mli kukuji komɛi, tamɔ Lala 22:15-19 loo Yesaia 53:10-12, ni tsɔɔ akɛ esa akɛ Mesia lɛ ana amanehulu ní egbo lɛ tsu nii. Kɛ́ hooo kwraa lɛ, Yesu kane loo etsɛ Ŋmalɛi ayisɛɛ tɛ̃ɛ, ni ekɛ enɛ ha Petro kɛ mɛi krokomɛi lɛ ahegbɛ ní amɛwie kɛjɛ amɛtsui mli. Te amɛbaafee amɛnii yɛ yiwaa ní baaba amɛnɔ lɛ he amɛha tɛŋŋ?

Naakpɛɛ sane ji akɛ, yɛ ekãa ni Petro yɔɔ lɛ fɛɛ sɛɛ lɛ, ehe ní fee oya kɛwie yɛ nɛkɛ be nɛɛ mli lɛ jie eniiahesusumɔ he gbɔjɔmɔ ko ni yɔɔ hiɛdɔɔ lɛ kpo. Ewie akɛ: “Naa ohe mɔbɔ, Nuŋtsɔ, enɛ akagbeleo fɔ̃ɔŋfɔ̃!” Eka shi faŋŋ akɛ bɔ ni Petro susu nii ahe eha lɛ ejaaa, ejaakɛ taakɛ Yesu tsɔɔ mli lɛ, Petro ‘jwɛŋŋ Nyɔŋmɔ nii ahe, shi gbɔmɛi anii ahe moŋ ejwɛŋɔ’—tɔmɔ ko ni yɔɔ hiɛdɔɔ, ní nibii ni hiɛdɔɔ waa baanyɛ ajɛ mli kɛba. No hewɔ lɛ mɛni Yesu fee? Be ni Yesu kã Petro hiɛ sɛɛ lɛ, ekɛɛ lɛ kɛ kaselɔi krokomɛi lɛ akɛ: “Kɛji mɔ ko miisumɔ akɛ enyiɛɔ misɛɛ lɛ, ha ní ekwa ehe ní ewó esɛŋmɔtso lɛ ní enyiɛ misɛɛ.” Ejɛ mlihilɛ mli ekɛ wiemɔi ni yɔɔ Lala 49:8 kɛ 62:12 lɛ amli lɛ tsu nii ni ekɛkai amɛ akɛ amɛnaanɔ wala he hiɛnɔkamɔ lɛ damɔɔɔ adesai ni nyɛŋ ahere amɛyiwala lɛ anɔ, shi moŋ edamɔ Nyɔŋmɔ nɔ.—Mateo 16:22-28.

Eyɛ mli akɛ sɛɛ mli lɛ Petro she gbeyei yɛ be kukuoo ko mli ni ekwa Yesu shii etɛ moŋ, shi ŋwanejee ko kwraa bɛ he akɛ sanegbaa nɛɛ kɛ ekrokomɛi saa lɛ ni ená mumɔŋ hewalɛ oya ekoŋŋ. (Yohane 21:15-19) Gbii 50 pɛ sɛɛ lɛ, Petro kɛ ekãa damɔ asafo ni yɔɔ Yerusalem lɛ hiɛ ni eye Yesu shitee lɛ he odase. Ekɛ ekãa damɔ mɔmɔ, yii, kɛ tsuŋwoo naa shii abɔ yɛ otsii, nyɔji, kɛ afii ni nyiɛ sɛɛ kɛba lɛ amli, ni ekɛfee emuuyeli mlihiɛmɔ ni gbeyeishemɔ bɛ mli lɛ he nɔkwɛmɔnɔ ni nɔ bɛ efɔ̃ shi.—Bɔfoi lɛ Asaji 2:14-36; 4:18-21; 5:29-32, 40-42; 12:3-5.

Mɛni wɔkaseɔ kɛjɛɔ enɛ mli? Ani ona nɔ ni Yesu fee ni ekɛjie nɔ ni yɔɔ Petro tsui mli lɛ kpo lɛ? Klɛŋklɛŋ lɛ ehala ŋmalɛi ni sa, ni egbala Petro jwɛŋmɔ kɛtee sane tuuntu ni he hiaa lɛ nɔ. No sɛɛ lɛ, eha Petro hegbɛ koni ejɛ etsuiŋ ewie. Naagbee lɛ, ekɛ Ŋmalɛ mli ŋaawoo ni baaye abua Petro koni ejaje ejwɛŋmɔ kɛ ehenumɔi lɛ ha lɛ. Ekolɛ obaanu he akɛ onyɛŋ okɛ nitsɔɔmɔ gbɛ ni tamɔ nɛkɛ atsu nii, shi ha wɔsusu nɔkwɛmɔnii ni tsɔɔ bɔ ni hesaamɔ kɛ he ni akɛfɔ̃ɔ Yehowa nɔ lɛ baanyɛ aye abua wɔteŋ mɔ fɛɛ mɔ koni enyiɛ Yesu nɔkwɛmɔnɔ lɛ sɛɛ lɛ he.

Ní Aaale Nɔ ni Yɔɔ Tsui lɛ Mli

Be ni tsɛ ko ni ji Kristofonyo lɛ ná ele akɛ ebihii enyɔ ni eye aaafee afii ekpaa kɛ afii kpawo lɛ eyaju siklitɛ yɛ amɛtsɔɔlɔ lɛ okpɔlɔ lɛ nɔ lɛ, ekɛ amɛ tara shi kɛsusu saji ahe. Yɛ nɔ najiaŋ ni tsɛ lɛ aaakɛɛ akɛ efeee nɔ ko, ni akɛ eji gbekɛbii anifeemɔ lɛ, ewie akɛ, “Mibɔ mɔdɛŋ ní male nɔ ni kanya amɛtsui ni amɛfee nɔ fɔŋ nɛɛ.”

Tsɛ lɛ bi gbekɛbii lɛ koni amɛkai nɔ ni ba Akan nɔ, taakɛ atsɔɔ mli yɛ Yoshua yitso 7 lɛ mli lɛ. Amrɔ nɔŋŋ kɛkɛ ni gbekɛbii lɛ nu sane lɛ shishi ni amɛkpɛlɛ amɛtɔmɔ lɛ nɔ. Amɛhenilee eje shishi eegbá amɛnaa. No hewɔ lɛ amɛtsɛ ha amɛkane Efesobii 4:28 ni kɛɔ akɛ: ‘Julɔ lɛ ekaju dɔŋŋ, shi moŋ ebɔ mɔdɛŋ ni etsu nitsumɔ kpakpa, koni ená nɔ ko ni ekɛha mɔ ni ehia lɛ lɛ.’ Tsɛ lɛ ha gbekɛbii lɛ hé siklitɛ, ni amɛkɛtee amɛkɛyaha tsɔɔlɔ lɛ ni enɛ ha amɛkɛ Ŋmalɛ mli ŋaawoo lɛ tsu nii.

Tsɛ lɛ wie akɛ: “Kɛ́ wɔyoo akɛ gbekɛbii lɛ hiɛ susumɔi fɔji lɛ, wɔkɛ amɛ susuɔ nii ahe, ni wɔkɛ no feemɔ bɔɔ mɔdɛŋ koni wɔjie nakai susumɔi lɛ ni wɔkɛ susumɔi kpakpai aye najiaŋ.” Yɛ anɔkwale mli lɛ, akɛni fɔlɔi nɛɛ kase Yesu be ni amɛtsɔɔ amɛbii lɛ anii hewɔ lɛ, yibiiwoi kpakpai jɛ mli kɛba. Naagbee mli lɛ, afɔ̃ amɛbihii enyɔ lɛ fɛɛ nine koni amɛbatsɔmɔ nitsumɔhe yitso lɛ mlibii yɛ Brooklyn Betel, ni amɛteŋ mɔ kome miisɔmɔ yɛ jɛmɛ lolo yɛ afii 25 sɛɛ.

Susumɔ bɔ ni Kristofonyo kroko nyɛ eye kɛbua e-Biblia mli nikaselɔ lɛ he okwɛ. Nikaselɔ lɛ yaa kpeei ni ekɛ ehe woɔ shiɛmɔ nitsumɔ lɛ mli, ni ejie miishɛɛ kpo momo akɛ ebaasumɔ ni abaptisi lɛ. Shi kɛlɛ, etamɔ nɔ ni ekɛ ehe fɔ̃ɔ lɛ diɛŋtsɛ ehe nɔ fe bɔ ni ekɛ ehe fɔ̃ɔ Yehowa nɔ. Odasefonyo lɛ wie akɛ: “Ákɛ yoo oshijafonyo lɛ, ekɛ ehe fɔ̃ɔ lɛ diɛŋtsɛ ehe nɔ tsɔ. Miye mitsui akɛ ebaaná jwɛŋmɔŋ nɔnyɛɛ loo ebaakpa Nyɔŋmɔ jamɔ.”

Enɛ hewɔ lɛ Odasefonyo lɛ kɛ hegbɛ lɛ tsu nii ni ekɛ nikaselɔ lɛ susu Mateo 6:33 lɛ he, ni ewo lɛ hewalɛ koni etsake nibii ni ekɛyeɔ klɛŋklɛŋ gbɛhe lɛ, koni ekɛ Maŋtsɛyeli lɛ aye klɛŋklɛŋ gbɛhe, ní ekɛ ehe afɔ̃ Yehowa nɔ akɛ ebaatsu nibii ahe nii yɛ gbɛ ni hi fe fɛɛ nɔ. Ebi lɛ yɛ anɔkwayeli amli akɛ: “Ani hekɛnɔfɔɔ ni oyɔɔ yɛ bo diɛŋtsɛ omli lɛ haa ewaa kɛhaa bo bei komɛi akɛ okɛ ohe baafɔ̃ mɛi krokomɛi kɛ Yehowa nɔ?” Nikaselɔ lɛ kpɛlɛ nɔ akɛ efɔɔɔ sɔlemɔ kwraa. No sɛɛ lɛ, shiɛlɔ lɛ wo lɛ hewalɛ ní ekɛ ŋaawoo ni yɔɔ Lala 55:23 lɛ atsu nii, koni eshɛ ejatsu lɛ efɔ̃ Yehowa nɔ ejaakɛ ‘ejwɛŋɔ enɔ,’ taakɛ 1 Petro 5:7 lɛ woɔ wɔ shi lɛ. Nakai wiemɔi lɛ sa etsui he. Odasefonyo lɛ wie akɛ, “Nakai gbi lɛ ji bei fioo ni mina akɛ eefó lɛ ateŋ ekome.”

Yaa Nɔ Okɛ Anɔkwale lɛ Atsu Nii

Kɛ́ wɔna akɛ mɛi ni wɔtsɔɔ amɛ nii lɛ ekpɛlɛ Biblia mli anɔkwale lɛ nɔ lɛ, ehaa wɔnáa miishɛɛ waa. Shi kɛlɛ, kɛ́ wɔɔye omanye yɛ mɔdɛŋ ni wɔbɔɔ koni wɔye wɔbua mɛi krokomɛi lɛ mli lɛ, esa akɛ wɔ diɛŋtsɛ lɛ wɔfee nɔkwɛmɔnɔ kpakpa. (Yuda 22, 23) Ehe miihia ni wɔ fɛɛ ‘wɔkɛ gbeyeishemɔ kɛ hekpokpomɔ atsu wɔ diɛŋtsɛ wɔyiwalaheremɔ lɛ he nii.’ (Filipibii 2:12) Nɔ ni fata he ji ni wɔha la ni jɛ Ŋmalɛi lɛ amli lɛ akpɛ́ yɛ wɔ diɛŋtsɛ wɔtsuii anɔ daa, ni wɔtao sui, akɔnɔi, kɛ nibii ni wɔsumɔɔ ni ekolɛ ehe baahia ni wɔfee tsakemɔi yɛ he.—2 Petro 1:19.

Ákɛ nɔkwɛmɔnɔ lɛ, ani ekãa ni oyɔɔ kɛha Kristofoi anitsumɔi lɛ eba shi gbii etɛ nɛɛ? Kɛ́ nakai ni lɛ, mɛni hewɔ? Ekolɛ yiŋtoo kome hewɔ ní eba lɛ nakai ji akɛ okɛ ohe miifɔ̃ bo diɛŋtsɛ ohe nɔ tsɔ. Mɛɛ gbɛ nɔ oootsɔ ole akɛ nakai eji? Kanemɔ Hagai 1:2-11 lɛ, ni okɛ anɔkwayeli asusu bɔ ni Yehowa kɛ Yudafoi ni amɛku amɛsɛɛ amɛba ekoŋŋ lɛ susu saji ahe eha lɛ he. No sɛɛ lɛ bi ohe akɛ: ‘Ani misusuɔ shika gbɛfaŋ shweshweeshwe shihilɛ kɛ heloonaa miishɛɛnamɔi ahe tsɔ fe nine? Ani mikɛ mumɔŋ nibii yeɔ klɛŋklɛŋ gbɛhe, ni mikɛ mihe fɔ̃ɔ Yehowa nɔ diɛŋtsɛ koni ekwɛ miweku lɛ? Aloo minuɔ he akɛ esa akɛ makwɛ mihe klɛŋklɛŋ?’ Kaashashao shi akɛ ooofee tsakemɔi yɛ osusumɔi loo ohenumɔi amli kɛ́ ehe miihia. Ŋmalɛ mli ŋaawoo, tamɔ nɔ ni yɔɔ Mateo 6:25-33, Luka 12:13-21, kɛ 1 Timoteo 6:6-12 lɛ kɛ nɔ ni aaadamɔ nɔ aŋmɛ pɛpɛɛpɛ yɛ heloonaa hiamɔ nii ahe, ní haa anáa Yehowa jɔɔmɔ daa lɛ haa.—Maleaki 3:10.

Ní wɔkɛ anɔkwayeli tamɔ nɛkɛ aaapɛi wɔ diɛŋtsɛ wɔmli lɛ baanyɛ afee nɔ ni wa. Kɛ́ aha wɔle gbɔjɔmɔ pɔtɛɛ ni wɔyɔɔ lɛ, amɛnɔ kpɛlɛmɔ baanyɛ aye wɔhenumɔi awui. Shi kɛlɛ, kɛ́ ojɛ suɔmɔ mli oye obua obi, o-Biblia mli nikaselɔ, loo bo diɛŋtsɛ ohe—ekɔɔɔ he eko bɔ ni sane lɛ ji mɔ aŋkro sane loo nɔ ni hiɛdɔɔ yɔɔ mli lɛ—ekolɛ ooje klɛŋklɛŋ nifeemɔ kɛha ewala loo bo diɛŋtsɛ onɔ̃ lɛ yibaamɔ shishi.—Galatabii 6:1.

Ni kɛ́ efee tamɔ nɔ ni yibiiwoo kpakpai jɛɛɛ omɔdɛŋbɔɔ lɛ mli kɛbaaa hu? Onijiaŋ akaje wui oya. Tsui ni yeee emuu jajemɔ baanyɛ afee nifeemɔ ni wa, ní heɔ be, ni bei komɛi lɛ ejieɔ mɔ nijiaŋ wui. Shi kɛlɛ ebaanyɛ efee nɔ ni sɛɛnamɔ yɔɔ he.

Sɛɛ mli lɛ oblanyo Eric ni atsĩ etã kɛtsɔ hiɛ lɛ hiɛ tserɛ lɛ, ni ebɔi ‘anɔkwale lɛ mli nyiɛmɔ’ ekoŋŋ. (2 Yohane 4) Ewie akɛ: “Be ni miyɔse akɛ milaaje lɛ sɛɛ dani miku misɛɛ kɛba Yehowa ŋɔɔ.” Kɛtsɔ Eric fɔlɔi lɛ ayelikɛbuamɔ nɔ lɛ, amrɔ nɛɛ ekɛ anɔkwayeli miisɔmɔ Nyɔŋmɔ. Eyɛ mli akɛ etse mɔdɛŋ ní efɔlɔi lɛ bɔ shii abɔ koni amɛha epɛi etsui mli lɛ hiɛ atua moŋ, shi amrɔ nɛɛ ehiɛ esɔ nɔ ni amɛfee lɛ waa. Ewie akɛ: “Mifɔlɔi lɛ bɔ mɔdɛŋ waa. Suɔmɔ ni amɛyɔɔ kɛha mi lɛ sɛɛ efooo.”

Ní wɔɔha Nyɔŋmɔ Wiemɔ lɛ mli la lɛ akpɛ́ yɛ mɛi ni wɔtsɔɔ amɛ nii lɛ atsui nɔ lɛ ji mlihilɛ kpojiemɔ. (Lala 141:5) Yaa nɔ otao obii lɛ kɛ o-Biblia mli nikaselɔi lɛ atsuii amli, koni ona okadi ni tsɔɔ akɛ Kristofoi agbɔmɔtso hee lɛ miiná amɛnɔ hewalɛ. Yaa nɔ oha anɔkwale lɛ atsu nii yɛ bo diɛŋtsɛ kɛ mɛi krokomɛi amli kɛtsɔ ‘anɔkwale wiemɔ lɛ mli pɛpɛɛpɛ ni oooja’ lɛ nɔ.—2 Timoteo 2:15.

[Mfoniri ni yɔɔ baafa 29]

Yesu wiemɔi lɛ jie gbɔjɔmɔ ko kpo yɛ Petro he

[Mfoniri ni yɔɔ baafa 31]

Okɛ Biblia lɛ atsu nii ni okɛjie nɔ ni yɔɔ tsui lɛ mli lɛ kpo