‘Miyelikɛbuamɔ Jɛɔ Yehowa Ŋɔɔ’

Oblahii kɛ Oblayei ní Kɛ Yijiemɔ Haa Yehowa lɛ Ashihilɛ Yaa Hiɛ

“MIITAO nɔ ni hi fe fɛɛ yɛ shihilɛ mli!” Nɛkɛ ji bɔ ni oblanyo fioo ko tsɔɔ nibii ni etaoɔ koni ená lɛ mli eha. Shi mɛɛ gbɛ nɔ oblanyo loo oblayoo fioo aaatsɔ enine ashɛ nibii ni hi fe fɛɛ yɛ shihilɛ mli lɛ anɔ? Biblia lɛ kɛ hetoo ni yɔɔ tɛ̃ɛ haa akɛ: “Kaimɔ o-Bɔlɔ lɛ yɛ oblahiiaŋ loo oblayeiaŋ gbii lɛ amli!”—Jajelɔ 12:1, Contemporary English Version.

Jeee onukpai pɛ jieɔ Yehowa yi ni amɛsɔmɔɔ lɛ. Samuel ni ji Elkana kɛ Hana binuu lɛ ji gbekɛ fioo beni eyasɔmɔ Yehowa yɛ kpee buu lɛ mli lɛ. (1 Samuel 1:19, 20, 24; 2:11) Hebri gbekɛ yoo fioo ko tsɔɔ akɛ eyɛ hemɔkɛyeli ni mli wa yɛ Yehowa mli kɛtsɔ Siria tatsɛnukpa Naeman ni ekɛɛ lɛ akɛ eyana gbalɔ Elisha koni gbalɔ lɛ atsá kpiti ni eyeɔ lɛ eha lɛ lɛ nɔ. (2 Maŋtsɛmɛi 5:2, 3) Lala 148:7, 12 lɛ kɛ famɔ haa gbekɛbii hii kɛ yei fɛɛ akɛ amɛjie Yehowa yi.a Yesu ná e-Tsɛ sɔɔmɔ he miishɛɛ waa beni éye afii 12 pɛ. (Luka 2:41-49) Yɛ Ŋmalɛi lɛ amli tsɔsemɔ ni gbekɛbii komɛi ná lɛ hewɔ lɛ, beni amɛna Yesu yɛ sɔlemɔwe lɛ, amɛbolɔ akɛ: “Hosiana David bi!”—Mateo 21:15, 16.

Yijiemɔ ni Akɛhaa Yehowa Ŋmɛnɛ

Oblahii kɛ oblayei babaoo ni yɔɔ Yehowa Odasefoi ateŋ ŋmɛnɛ lɛ amii shɛɔ amɛhe yɛ amɛhemɔkɛyelii lɛ ahe, ni amɛkɛ ekãa wieɔ hemɔkɛyelii nɛɛ ahe saji amɛtsɔɔ mɛi krokomɛi yɛ skul kɛ hei krokomɛi. Susumɔ enɛ he nɔkwɛmɔnii enyɔ ahe okwɛ.

Yɛ Britain lɛ, Stephanie ni eye afii 18 lɛ klasbii miisusu hɔkpɔmɔ kɛ saji krokomɛi ni kɔɔ jeŋba he lɛ ahe. Amɛtsɔɔlɔ lɛ tsɔɔ mli akɛ, amrɔ nɛɛ akpɛlɛɔ hɔkpɔmɔ nɔ yɛ hei pii, ni no hewɔ lɛ nɔ ko kwraa bɛ ni oblayoo ko aaadamɔ nɔ ekpoo nifeemɔ nɛɛ. Beni mɛi ni yɔɔ klas lɛ fɛɛ fua nɛkɛ susumɔ nɛɛ sɛɛ lɛ, Stephanie nu he akɛ esa akɛ efã shidaamɔ ni ekɔ ni damɔ Biblia lɛ nɔ lɛ he. Hegbɛ lɛ naa gbele eha Stephanie beni tsɔɔlɔ lɛ bi lɛ koni etsɔɔ esusumɔ yɛ sane lɛ he lɛ. Eyɛ mli akɛ yɛ shishijee lɛ Stephanie tsui fã moŋ, shi ekɛ hegbɛ lɛ tsu nii ni ekɛtsɔɔ nɔ ni Ŋmalɛ lɛ kɛɔ yɛ sane lɛ he. Ewie ŋmalɛ ni yɔɔ 2 Mose 21: 22-24 lɛ he, ni egbála mli akɛ, kɛ́ eji tɔmɔ ákɛ aaaye gbekɛ ni ahiɛ lɛ hɔ lɛ awui lɛ, belɛ ekã shi faŋŋ akɛ hɔkpɔmɔ kɛ Nyɔŋmɔ suɔmɔnaa nii kpaŋ gbee.

Amɛtsɔɔlɔ ní eji osɔfo lɛ kaneko ŋmalɛ kukuji nɛɛ pɛŋ. Nɔ ni jɛ ekãa ni Stephanie kɛye odase lɛ mli ba ji akɛ, no sɛɛ lɛ ekɛ eklasbii lɛ susu saji srɔtoi ahe kɛ miishɛɛ. Gbekɛbii yei lɛ ateŋ mɔ kome heɔ Buu-Mɔɔ kɛ Awake! woji tɛtrɛbii ní baa ehee lɛ eko be fɛɛ be agbɛnɛ, ni amɛteŋ mɛi enyɔ hu tee kpokpaa wulu nɔ kpee ko ni Yehowa Odasefoi fee lɛ shishi koni amɛyakwɛ Stephanie baptisimɔ ní ekɛfee ehe nɔ ní ejɔɔ eha Nyɔŋmɔ lɛ he okadi lɛ.

Beni miishɛjemɔ he hiaa Vareta ni eye afii ekpaa ni eyɔɔ Suriname, yɛ Amerika Wuoyigbɛ lɛ tsɔɔlɔ lɛ, Vareta kɛ hegbɛ lɛ tsu nii ni ekɛjie Nyɔŋmɔ yi. Beni amɛtsɔɔlɔ lɛ yaye gbii etɛ yɛ shia ni eku esɛɛ kɛba skul lɛ, ebi amɛ kɛji amɛle nɔ hewɔ ni no mli lɛ ebaaa skul lɛ. Amɛha hetoo akɛ: “No mli lɛ obɛ hewalɛ, aloo jeee nakai?” Amɛtsɔɔlɔ lɛ ha hetoo akɛ: “Dabi. Minyɛmi yoo eje mli, ni eedɔ mi waa. No hewɔ lɛ, nyɛfea diŋŋ ejaakɛ miyitso miigba mi.”

Nakai gbi lɛ shwane beni Vareta nyɛ yakã shi ni eejɔɔ ehe fioo lɛ, Vareta kɛ hiɛdɔɔ gbɛlɛ́ woji tɛtrɛbii memeji ni amɛyɔɔ lɛ amli, ni yɛ no beaŋ nɔŋŋ lɛ eekane amɛmli saneyitsei lɛ. Eyana Buu-Mɔɔ ni je kpo yɛ July 15 afi 2001 ní hiɛ saneyitso akɛ, “Ani Wala yɛ Gbele Sɛɛ?” lɛ. Miishɛɛ sɔŋŋ ni ená lɛ ha etsĩɛ enyɛ hiɛ ni ekɛɛ, “Maa kwɛmɔ, Maa kwɛmɔ! Miná wolo tɛtrɛɛ ko ni wieɔ gbele he ni mikɛbaaha mitsɔɔlɔ lɛ!” Vareta ŋma wolo efata wolo tɛtrɛɛ lɛ he ni akɛyaha etsɔɔlɔ lɛ. Wolo ni eŋma lɛ kaneɔ akɛ: “Enɛ ji wolo krɛdɛɛ ní miŋmaa bo. Obaaku sɛɛ ona onyɛmi yoo lɛ ekoŋŋ yɛ Paradeiso lɛ mli, ejaakɛ Yehowa maleee. Ewo shi akɛ ekɛ paradeiso baaba, jeee yɛ ŋwɛi, shi moŋ yɛ shikpɔŋ nɔ.” Etsɔɔlɔ lɛ jie hiɛsɔɔ kpele kpo yɛ miishɛjemɔ wiemɔi ni damɔ Biblia lɛ nɔ ní saji ni yɔɔ wolo tɛtrɛɛ lɛ mli kɛhaa lɛ ahe.

Ní Wɔɔsaa Wɔhe Wɔto Wɔsɛɛ

Yehowa ji “miishɛɛ Nyɔŋmɔ,” ni eesumɔ ni oblahii kɛ oblayei aná miishɛɛ. (1 Timoteo 1:11, NW) Lɛ diɛŋtsɛ e-Wiemɔ lɛ kɛɔ akɛ: “Omii ashɛ ohe yɛ oblahiiaŋ loo oblayeiaŋ. Ná miishɛɛ beni okãhe oji oblanyo loo oblayoo.” (Jajelɔ 11:9, Today’s English Version) Yehowa naa nii kɛtekeɔ amrɔmrɔ shihilɛ nɛɛ, ni enaa nibii ni baajɛ jeŋba kpakpa kɛ jeŋba fɔŋ fɛɛ mli aba wɔsɛɛ lɛ. No hewɔ ni e-Wiemɔ lɛ woɔ oblahii kɛ oblayei aŋaa akɛ: “Asaŋ kaimɔ obɔlɔ lɛ yɛ oblahiiaŋ gbii lɛ amli, be mli ni gbii fɔji lɛ náko aba, ni afii ní obaakɛɛ yɛ amɛhe akɛ: ‘Minaaa amɛhe miishɛɛ’ lɛ, náko ashɛ lɛ.”—Jajelɔ 12:1.

Hɛɛ, Yehowa miisumɔ ni oblahii kɛ oblayei aná miishɛɛ diɛŋtsɛ yɛ wala ni ji nikeenii lɛ he kɛmɔ shi. Kɛji akɛ oblahii kɛ oblayei aaakai Nyɔŋmɔ ni amɛkɛ yijiemɔ aha lɛ lɛ, no lɛ amɛbaaná wala shihilɛ ni yɔɔ miishɛɛ ní haa mɔ tsui nyɔɔ emli. Kɛ́ amɛkɛ naagbai po kpe lɛ, amɛbaanyɛ amɛkɛ nɔmimaa akɛɛ akɛ: ‘Miyelikɛbuamɔ jɛɔ Yehowa ŋɔɔ.’—Lala 121:2.

[Shishigbɛ niŋmaa]

[Wiemɔ ni akɔ ni akɛmiitsu nii ni yɔɔ baafa 9]

“Nyɛjɛa shikpɔŋ lɛ nɔ nyɛjiea Yehowa yi, . . . oblahii kɛ oblayei.”—LALA 148:7, 12

[Akrabatsa ni yɔɔ baafa 8]

YEHOWA YEƆ EBUAA OBLAHII KƐ OBLAYEI

“Bo, Nuŋtsɔ Yehowa, ji mihiɛnɔkamɔ, bo onɔ mikɛ mihiɛ fɔ̃ kɛjɛ miblahiiaŋ.”—Lala 71:5.

“[Nyɔŋmɔ] lɛ ekɛ nii kpakpai woɔ odaaŋ obɔ̃, ni ehaa oblahiiaŋ tsɔɔ ehee tamɔ okropɔŋ.”—Lala 103:5.