Ani Anɔkwayeli He Yɛ Sɛɛnamɔ?
KARL ni eji inshuɔrans nitsulɔ lɛ kɛɛ Jens akɛ: “Ofiteɔ shika babaoo tsɔ yɛ gbɔmɔtsoŋ hewalɛnamɔ he inshuɔrans mli.a Kɛ́ otsake inshuɔrans nitsumɔhe ni okɛ oshika woɔ mli lɛ kɛba minitsumɔhe lɛ, obaana he sɛɛ U.S. dɔlai 20 yɛ daa nyɔŋ nɔ, ni eji shika ni fa diɛŋtsɛ.”
Jens ha lɛ hetoo akɛ: “Enɛ baanyɛ afee anɔkwale. Shi miwo migbɔmɔtsoŋ hewalɛnamɔ he inshuɔrans shika lɛ miha nakai nitsumɔhe lɛ nɔŋŋ afii babaoo. Amɛye amɛbua mi waa yɛ be ni eho lɛ mli, ni miisumɔ ni maya nɔ maye amɛ anɔkwa.”
Karl ha lɛ hetoo akɛ: “Anɔkwayeli ji su kpakpa. Shi anɔkwa ni oyeɔ lɛ miiha oofite shika babaoo tsɔ!”
Karl sane ja. Bei pii lɛ, anɔkwa ni mɔ ko aaaye lɛ baanyɛ aha efite shika. Agbɛnɛ hu, anɔkwayeli heɔ be, hewalɛ, kɛ hetuu-kɛhamɔ. Ani sɛɛnamɔ yɛ anɔkwa ni ayeɔ yɛ nɛkɛ gbɛ nɔ lɛ he?
Mɛi Pii Kɛɔ akɛ Ehi, shi Amɛkɛtsuuu Nii
Niiamlipɛimɔ ko ni Allensbach Opinion Research Institute lɛ fee yɛ Germany lɛ tsɔɔ akɛ, mɛi ni abi amɛ saji lɛ 100 mlijaa 96 kɛɛ akɛ amɛbuɔ anɔkwayeli akɛ su kpakpa. Niiamlipɛimɔ ni ji enyɔ ní Allensbach fee yɛ mɛi ni eye kɛjɛ afii 18 kɛyashi 24 lɛ ahe lɛ tsɔɔ akɛ, yɛ mɛi 3 ateŋ lɛ, mɛi 2 tsɔɔ akɛ amɛbuɔ anɔkwayeli akɛ su ni hi jogbaŋŋ.
Eyɛ mli akɛ mɛi pii ahiɛ sɔɔ anɔkwayeli yɛ je lɛŋ fɛɛ moŋ, shi jeee nakai ebaa lɛ kɛji akɛ ehe bahia ni aye anɔkwa diɛŋtsɛ. Ákɛ nɔkwɛmɔnɔ lɛ, yɛ Europa maji pii amli lɛ, anɔkwa fioo pɛ gbalashihilɛ mli hefatalɔi loo weku mli bii yeɔ amɛhe. Bei pii lɛ, nanemɛi yeee amɛhe anɔkwa. Ni anɔkwayeli ni tsutsu lɛ efeɔ nitsumɔtsɛ kɛ enitsulɔ loo jarayeli nitsumɔhe kɛ nihelɔi lɛ ekome lɛ etã kwrakwra. Mɛni hewɔ?
Bei komɛi lɛ dekã ni abɛ yɛ shihilɛ mli kwraa lɛ haaa aná be loo hewalɛ ni fa kɛtsu hetuu-kɛhamɔ ni biɔ ni aye anɔkwa lɛ he nii. Ekolɛ mɛi ni ayeee amɛ anɔkwa ni amɛnine enyɛ shi yɛ amɛkɛ mɛi asharamɔ mli lɛ baashashao shi akɛ amɛaaye mɔ ko anɔkwa. Ekolɛ mɛi komɛi baasumɔ ni amɛhi shi yɛ su ni ji wɔ́ benɛ wɔgboi ni anɔkwayeli he ehiaaa yɛ mli lɛ naa.
Bɔ fɛɛ bɔ ni sane lɛ ji lɛ, anɔkwayeli ji su ko ni afɔɔ kɛɛmɔ akɛ ehi, shi atsuuu he nii. Kɛ́ nakai ni lɛ, ha wɔsusu sanebimɔi nɛɛ ahe wɔkwɛ: Ani sɛɛnamɔ yɛ he akɛ aaaye anɔkwa? Kɛ́ sɛɛnamɔ yɛ he lɛ, namɛi esa akɛ wɔye amɛ anɔkwa, ni yɛ mɛɛ gbɛ̀i anɔ? Mɛɛ sɛɛnamɔi yɔɔ anɔkwa ni aaaye lɛ he?
[Shishigbɛ niŋmaa]
a Atsake gbɛii lɛ ekomɛi yɛ sane nɛɛ mli kɛ nɔ ni baanyiɛ sɛɛ lɛ mli.
[Wiemɔ ni akɔ ni akɛmiitsu nii ni yɔɔ baafa 3]
Anɔkwayeli ji su ko ni afɔɔ kɛɛmɔ akɛ ehi, shi atsuuu he nii