Mɛi Miitao Saji Nɛɛ Ahetoo

“Beni wɔna sane ni ji ‘te mafee tɛŋŋ’ maná shika kɛkwɛ mihe kɛ miweku lɛ naa, ni asaŋ wɔnyɛ wɔná ogbɔjɔ shihilɛ mli nibii heei babaoo—tamɔ tsɔnei ni haa tsũ mli jɔɔ ŋanii, CD nɔ lalai ni mli tse ni gbɛɛɔ jogbaŋŋ . . . lɛ—nibii nɛɛ tsirɛɔ wɔ ni wɔsusuɔ ‘nɔ hewɔ’ ni wɔyɔɔ shihilɛ mli lɛ he. Mɛni hewɔ kwraa ni mɛi gboɔ deŋme yɛ shihilɛ mli nɛkɛ? Mɛni ji yiŋtoo hewɔ ni amɛfeɔ nakai?” —David G. Myers, adesai ajwɛŋmɔ he nilelɔ kpanaa ni yɔɔ Hope College yɛ Holland, Michigan, U.S.A.

TE OBAAHA sanebimɔi ni nilelɔ kpanaa nɛɛ tee lɛ shi lɛ ahetoo oha tɛŋŋ? Mɛi komɛi po baasusu akɛ ehe ehiaaa ni afiteɔ be kɛtaoɔ sanebimɔi nɛɛ ahetoo. Shi kɛlɛ, mɔdɛŋ ni ooobɔ akɛ oku ohiɛ oshwie sanebimɔi nɛɛ anɔ lɛ baafee tamɔ nɔ ni oobɔ mɔdɛŋ koni oku ohiɛ oshwie tɛ bibioo ko ni ebote aspaatere ni owo lɛ mli lɛ nɔ, obaanyɛ onyiɛ moŋ nɛ, shi ohe ejɔŋ bo kɔkɔɔkɔ.

Ani osusu he pɛŋ akɛ shihilɛ lɛ fɛɛ nɛ? No lɛ jeee okome too pɛ sane nɛɛ haoɔ bo. World Values Survey, ni ji gbɛjianɔ ko ni ato kɛkase adesai ashihilɛi ahe saji babaoo lɛ tsɔɔ mli akɛ, mɛi babaoo yɛ maji srɔtoi amli ni miijwɛŋ “nɔ diɛŋtsɛ ni shihilɛ mli ni ayɔɔ lɛ tsɔɔ kɛ yiŋtoo hewɔ ni ayɔɔ shihilɛ mli lɛ he.”

Kɛji ootao ni oná toiŋjɔlɛ diɛŋtsɛ lɛ, no lɛ ebiɔ ni oná sanebimɔi etɛ ni he hiaa waa nɛɛ ahetoo.

Nɛgbɛ wɔjɛ?

Mɛni hewɔ wɔyɔɔ shihilɛ mli?

Mɛni baaba wɔsɛɛ?

Nɛgbɛ obaana hetooi ni ja jogbaŋŋ kɛha sanebimɔi ni he hiaa waa nɛɛ yɛ? Yɛ nɔ najiaŋ ni wɔɔka wɔyiŋ loo wɔɔdamɔ jeŋ nilee nɔ wɔha sanebimɔi nɛɛ ahetoo lɛ, saji ni nyiɛ sɛɛ nɛɛ baaha wɔna hetooi lɛ yɛ Nyɔŋmɔ Wiemɔ, ni ji Biblia lɛ mli. Wɔmiiwo bo hewalɛ ni okɔ o-Biblia lɛ ni okwɛ nɔ ni ekɛɔ.