Tsi Obɛŋkɛ Nyɔŋmɔ
Enuɔ Wɔpiŋmɔi lɛ Ashishi
YEHOWA Odasefonyo ko ni eda yɛ afii amli ni eji maŋsɛɛ sanekpakpa shiɛlɔ lɛ tsɔɔ su ko ni sɛɛnamɔ yɔɔ he waa, ni ji nii ahe ni anuɔ ahaa mɔ lɛ mli akɛ: ‘Nii ahe ni anuɔ ahaa mɔ lɛ tsɔɔ nu ní obaanu mɔ lɛ piŋmɔ lɛ he yɛ otsui mli.’ Yehowa Nyɔŋmɔ ji mɔ ni nuɔ nii ahe ehaa mɔ fe fɛɛ. Enuɔ piŋmɔi ni ewebii lɛ piŋɔ lɛ ahe. Te wɔɔfee tɛŋŋ wɔná nɔmimaa yɛ enɛ he lɛ? Beni Yesu yɔɔ shikpɔŋ lɛ nɔ lɛ, etsɔ ewiemɔi kɛ enifeemɔi anɔ eha ana bɔ ni Yehowa jɛɔ suɔmɔ mli enuɔ he ehaa mɔ lɛ kɛmɔ shi. (Yohane 5:19) Ákɛ nɔkwɛmɔnɔ lɛ, susumɔ nifeemɔ ko ni awie he yɛ Yohane 11:33-35 lɛ he okwɛ.
Beni Yesu naanyo Lazaro gbo trukaa lɛ, Yesu tee akrowa ni Lazaro yɔɔ mli lɛ. Eyɛ faŋŋ akɛ no mli lɛ, Lazaro nyɛmimɛi yei Maria kɛ Marta miiye awerɛho waa. Yesu sumɔɔ weku nɛɛ waa diɛŋtsɛ. (Yohane 11:5) Belɛ, te ebaafee enii eha tɛŋŋ yɛ sane nɛɛ he? Amaniɛbɔɔ lɛ tsɔɔ akɛ: “Beni Yesu na [Maria] akɛ eefó, kɛ Yudafoi lɛ hu ni kɛ lɛ ba lɛ, akɛ amɛ hu amɛmiifó lɛ, ehuŋ yɛ emumɔ mli ni ekpokpo; ni ekɛɛ: Nɛgbɛ nyɛto lɛ yɛ? Amɛkɛɛ lɛ akɛ: Nuŋtsɔ, ba ni obakwɛ. Ni Yesu fó.” (Yohane 11:33-35) Mɛni hewɔ Yesu fó lɛ? Eji anɔkwale akɛ, Yesu naanyo Lazaro ni esumɔɔ lɛ waa lɛ egbo, shi etsɛŋ ni ebaatee lɛ shi. (Yohane 11:41-44) Ani nɔ kroko hu yɛ ni ha Yesu nu nii ahe waa nakai lɛ?
Susumɔ ŋmalɛ ni atsɛ yisɛɛ kɛtsɔ hiɛ lɛ he ekoŋŋ okwɛ. Kadimɔ akɛ beni Yesu na akɛ Maria kɛ mɛi ni kɛ lɛ yɔɔ lɛ miifo lɛ, “ehuŋ” ni “ekpokpo.” Hela wiemɔi ni akɛtsu nii yɛ ŋmalɛ nɛɛ mli lɛ tsɔɔ henumɔi ni mli wa waa diɛŋtsɛ.a Nɔ ni Yesu na lɛ ha emusuŋ shã lɛ waa. Ehiŋmɛiiaŋ ni tɔɔ nu lɛ maa nɔ mi akɛ nɔ ni ena lɛ sa ehenumɔi ahe waa. Eyɛ faŋŋ akɛ, piŋmɔ ni mɛi krokomɛi piŋɔ lɛ ta Yesu tsuiŋ. Ani ofó pɛŋ akɛni mɔ ko ni osumɔɔ esane waa lɛ miifó hewɔ?—Romabii 12:15.
Bɔ ni Yesu nuɔ nii ahe ehaa mɛi lɛ yeɔ ebuaa wɔ ni wɔkaseɔ Yehowa, ni ji e-Tsɛ lɛ sui kɛ egbɛ̀i lɛ ahe nii babaoo. Kaimɔ akɛ Yesu jie e-Tsɛ lɛ sui akpo jogbaŋŋ kɛmɔ shi, ni no ha enyɛ ewie akɛ: “Mɔ ni ena mi lɛ, ena tsɛ lɛ.” (Yohane 14:9) No hewɔ lɛ, kɛ́ wɔkane akɛ “ni Yesu fó” lɛ, wɔbaanyɛ wɔná nɔmimaa akɛ, no tsɔɔ akɛ Yehowa hu nuɔ piŋmɔi ni ejálɔi piŋɔ lɛ ahe. Eji anɔkwale akɛ, Biblia ŋmalɔi krokomɛi ma anɔkwa sane nɛɛ nɔ mi. (Yesaia 63:9; Zakaria 2:8) Mɛɛ Nyɔŋmɔ ni yɔɔ suɔmɔ po Yehowa ji nɛkɛ!
Wɔsumɔɔ ni wɔbɛŋkɛ mɛi ni nuɔ nii ahe amɛhaa mɛi krokomɛi. Kɛ́ wɔnijiaŋ je wui loo wɔhao lɛ, wɔsumɔɔ ni wɔbɛŋkɛ wɔnanemɛi adesai ni baanyɛ anu wɔshihilɛi lɛ ashishi ni amɛnu he amɛha wɔ lɛ. Kwɛ bɔ ni esa jogbaŋŋ akɛ wɔɔbɛŋkɛ Yehowa, ni ji Nyɔŋmɔ ni yɔɔ musuŋtsɔlɛ ni nuɔ wɔpiŋmɔi lɛ kɛ nɔ hewɔ ni wɔfóɔ lɛ ashishi lɛ!—Lala 56:9.
[Shishigbɛ niŋmaa]
a Hela wiemɔ ni akɛtsu nii kɛtsɔɔ wiemɔ ni ji ‘Yesu fó’ lɛ shishinumɔ kɔɔ “yaafó ni bolɔmɔ bɛ mli” lɛ he. Nɔ ni tamɔɔɔ nakai lɛ, wiemɔ ni akɛtsu nii kɛtsɔɔ Maria kɛ mɛi krokomɛi lɛ ayaafó lɛ mli lɛ tsɔɔ “fó ni afoɔ kɛ gbee ni wa, loo ŋkɔmɔyeli ni naa wa.”