Bɔ Ni Fee Ni Miná Miishɛɛ Yɛ Hewalɛ Ni Mibɛ Lɛ Fɛɛ Sɛɛ

Taakɛ Paulette Gaspar gba

Eyɛ mli akɛ beni afɔ mi lɛ, mitsiimɔ shɛɔ kilogram etɛ sɔŋŋ moŋ, shi datrɛfonyo lɛ le akɛ miyɛ gbɔmɔtsoŋ naagba ko ni yɔɔ hiɛdɔɔ waa. Beni afɔɔ mi lɛ, miwui lɛ kumɔ. Ole nɔ ko, no mli lɛ, miiye hela ko ni atsɛɔ lɛ yɛ blɔfo mli akɛ “osteogenesis imperfecta,” ni ji hela ni haa mɔ wui kumɔɔ mramra lɛ. Oya nɔŋŋ ni akɛ mi tee ni ayafee mi opireshɛn, shi datrɛfoi lɛ bɛ hiɛnɔkamɔ tsɔ akɛ miyi baaná wala. Amɛgbɛkpamɔ ji akɛ, yɛ ŋmɛlɛtswai 24 mli lɛ magbo.

A FƆ mi yɛ Canberra, ni ji Australia maŋtiase lɛ, yɛ June 14, 1972 mli. Gbi kome ho ni miyɛ wala mli, eyɛ mli akɛ akpaaa gbɛ kwraa akɛ mahi wala mli. Kɛkɛ ni flufla hela ko ni atsɛɔ lɛ yɛ blɔfo mli akɛ pneumonia mɔ mi. Akɛni datrɛfoi lɛ asusumɔ ji akɛ bɔ fɛɛ bɔ ni fee lɛ magbo hewɔ lɛ, amɛhaaa mi tsofa ko kwraa, ni amɛkpɛ amɛyiŋ akɛ “amɛbaaha adebɔɔ diɛŋtsɛ atsu enii.” Hɛɛ, adebɔɔ diɛŋtsɛ tsu enii, ni miyi ná wala.

Minyɛŋ matsɔɔ bɔ ni mifɔlɔi hao amɛha yɛ nakai be lɛ mli jogbaŋŋ. Akɛni etamɔ nɔ ni miyi naŋ wala hewɔ lɛ, helatsamɔ nitsulɔi ni ehiɛɛɛ jwɛŋmɔ fɔŋ lɛ wo mifɔlɔi ahewalɛ ni amɛkadɔ mihe waa. Yɛ anɔkwale mli lɛ, yɛ klɛŋklɛŋ nyɔji etɛ ni miye yɛ helatsamɔhe lɛ mli lɛ, aŋmɛɛɛ mifɔlɔi agbɛ ni amɛta mihe po. Ewaaa kwraa akɛ amɛaapila mi kɛ́ amɛfee nakai. Beni ebafee faŋŋ akɛ ekolɛ miyi baaná wala lɛ, datrɛfoi lɛ wo mifɔlɔi aŋaa akɛ amɛyashi mi yɛ he ni akwɛɔ gbekɛbii ni eje kpa yɛ lɛ.

Shi mifɔlɔi kpɛ amɛyiŋ akɛ amɛkɛ mi baaya shĩa. Ole nɔ ko, no mli lɛ Yehowa Odasefoi kɛ mimami ebɔi Biblia lɛ kasemɔ. Nɔ ni ekase lɛ ha enu he waa akɛ lɛ ji mɔ ni sɔ̃ kã enɔ akɛ ekwɛ mi. Shi ekolɛ efee nɔ ni wa waa kɛha lɛ akɛ eeedɔ mihe waa, akɛni ekɛ ehenumɔ kɛ ehewalɛ fɛɛ tsu nii kɛkwɛ mi beni atsi minaa yɛ helatsamɔhe lɛ hewɔ. Akɛ mi fɔɔ helatsamɔhe lɛ yaa. Miwui lɛ waaa kwraa aahu akɛ, kɛ́ aaju mihe po lɛ amɛbaanyɛ amɛkumɔ. Ni kɛ́ mitsine po lɛ, miwui lɛ ateŋ eko he baanyɛ agba.

Mihao Waa

Beni midaa lɛ, shwiili ni helatsɛmɛi taa mli lɛ mli mitaa kɛyaa kɛbaa. Minyɛŋ makase nyiɛmɔ. Yɛ naagbai nɛɛ fɛɛ sɛɛ lɛ, mifɔlɔi ha minine shɛ migbɔmɔtsoŋ hiamɔ nii anɔ jogbaŋŋ.

Kɛfata he lɛ, mimami bɔ mɔdɛŋ jogbaŋŋ etsɔɔ mi Biblia mli saji ni shɛjeɔ mɔ mii. Ákɛ nɔkwɛmɔnɔ lɛ, etsɔɔ mi akɛ wɔsɛɛ lɛ, Nyɔŋmɔ baaha shikpɔŋ lɛ atsɔ paradeiso ni gbɔmɛi fɛɛ baaná jwɛŋmɔŋ kɛ gbɔmɔtsoŋ hewalɛ ni yeɔ emuu, ni amɛbaajá Nyɔŋmɔ yɛ gbɛ ni hi kɛwulashi nɔ. (Lala 37:10, 11; Yesaia 33:24) Shi mimami kɛɛ mi akɛ amrɔ nɛɛ minyɛŋ maná shihilɛ kpakpa ko kɛyashi nakai be lɛ aaashɛ ni eshiuuu nɔ ko nɔ ko nɔ.

Klɛŋklɛŋ lɛ, mitee kpajelɔi askul. Mitsɔɔlɔi lɛ susuuu akɛ manyɛ mashɛ oti ko he, ni mi hu mikɛ oti ko emaaa mihiɛ. Yɛ anɔkwale mli lɛ, ewa waa kɛha mi akɛ manyɛ maya nɔ maya skul. Gbekɛbii lɛ ateŋ mɛi pii ayitsoŋ wa yɛ minɔ. Fee sɛɛ lɛ, mitee skul ni gbekɛbii ni ejeko kpa yaa. Mibayɔse akɛ, mɔdɛŋ ni mibɔɔ akɛ mikɛ mɛi aaahi shi jogbaŋŋ lɛ haa etɔɔ mi waa yɛ gbɔmɔtsoŋ, henumɔŋ, kɛ jwɛŋmɔŋ fɛɛ. Fɛɛ sɛɛ lɛ, mitswa mifai shi akɛ magbe skul ni abiɔ ni aya ni heɔ afii 12 lɛ naa.

Titri lɛ beni miyɔɔ nɔtsamɔ skul lɛ, misusu bɔ ni etamɔ nɔ ni minanemɛi skulbii krokomɛi lɛ ashihilɛi efee shwɛm ni hiɛnɔkamɔ ko bɛ kɛha amɛ lɛ he. Agbɛnɛ hu misusu nɔ ni mimami etsɔɔ mi kɛjɛ Biblia lɛ mli lɛ he. Mile yɛ mijwɛŋmɔ mli akɛ nɔ ni etsɔɔ mi lɛ ji anɔkwale. Shi yɛ nakai beaŋ lɛ Biblia mli tsɔɔmɔi lɛ enyɔko shi yɛ mitsui mli. Mikpɛ miyiŋ akɛ matiu shwɛmɔ-kɛ-ŋɔɔmɔ sɛɛ babaoo, ni misusuuu wɔsɛɛ he.

Beni miye afii 18 lɛ, mifã kɛjɛ mifɔlɔi ashĩa lɛ mli ni miyafata kpajelɔi krokomɛi ahe ni wɔyahi shĩa ko mli. Miná he miishɛɛ akɛ mishi shĩa, shi yɛ nakai beaŋ nɔŋŋ lɛ mishe gbeyei. Heyeli krokomɛi ni miná, yiŋ ni mi diɛŋtsɛ mikpɛɔ mihaa mihe, nanemɛi ni miná kɛ minanemɛi lɛ ni mikɛbɔɔ lɛ fɛɛ ji nibii ni miná he miishɛɛ waa. Minanemɛi lɛ ateŋ mɛi babaoo bote gbalashihilɛ mli. Mi hu gbalashihilɛ kɛ suɔmɔ ba mitsine waa. Shi akɛni mibɛ gbɔmɔtsoŋ hewalɛ kpakpa hewɔ lɛ, enyɛŋ eba akɛ maná gbalashihilɛ mli hefatalɔ. Enɛ ha miye awerɛho.

Shi mishwaaa Nyɔŋmɔ kɔkɔɔkɔ yɛ mishihilɛ nɛɛ hewɔ. Yɛ nibii ni mikase yɛ Nyɔŋmɔ he lɛ hewɔ lɛ, mile akɛ egbaleŋ lɛ kɔkɔɔkɔ akɛ ebaafee nɔ ko ni ejaaa gbɛ. (Hiob 34:10) Mibɔ mɔdɛŋ akɛ makpɛlɛ bɔ ni miji lɛ nɔ. Shi fɛɛ sɛɛ lɛ, mihao waa diɛŋtsɛ.

Fiofio lɛ Miye Mihaomɔ lɛ Nɔ

Duromɔ naa lɛ, mimami bale shihilɛ ni miyɔɔ mli lɛ, ni eyana asafoŋ onukpa ko ni bɛŋkɛ he ni miyɔɔ lɛ. Asafoŋ onukpa lɛ tswa mi yɛ tɛlifoŋ nɔ ni efɔ̃ minine akɛ miba Kristofoi akpeei yɛ Yehowa Odasefoi a-Maŋtsɛyeli Asa ni yɔɔ he ni miyɔɔ lɛ nɔ. Kɛfata he lɛ, nyɛmi yoo ko ni yɔɔ asafo lɛ mli lɛ kɛ mi bɔi Biblia lɛ kasemɔ daa otsi.

Akɛni nikasemɔ lɛ ha mikai Biblia mli anɔkwalei ni mimami tsɔɔ mi yɛ afii ni eho lɛ amli lɛ hewɔ lɛ, eha mitsake bɔ ni misusuɔ shihilɛ he mihaa. Miná mikɛ nanemɛi Kristofoi lɛ anaanyobɔɔ lɛ he miishɛɛ waa. Shi efee misu akɛ miwieee bɔ ni minuɔ nii ahe mihaa lɛ he, ejaakɛ misheɔ gbeyei akɛ no baaha aye mi awui yɛ henumɔŋ. Misusuɔ akɛ enɛ ha ewa waa kɛha mi akɛ maná suɔmɔ ni mli kwɔ maha Nyɔŋmɔ. Fɛɛ sɛɛ lɛ, mile akɛ eja gbɛ akɛ majɔɔ miwala nɔ maha lɛ. No hewɔ lɛ, yɛ December 1991 lɛ, abaptisi mi kɛfee mihenɔjɔɔmɔ lɛ he okadi.

Mifã kɛjɛ shĩa ni mikɛ minanemɛi kpajelɔi lɛ yɔɔ mli lɛ mli, ni miyahai tsu ko ni mipɛ mihi mli. Sɛɛnamɔ yɛ tsakemɔ ni mifee nɛɛ mli, shi naagbai hu yɛ mli. Ákɛ nɔkwɛmɔnɔ lɛ, mifee shoo waa diɛŋtsɛ. Ni kɛ́ eba miyiŋ akɛ hii baanyɛ abatutua mi lɛ, ehaa mitsui fãa. Etsɛɛɛ ni mihao waa ekoŋŋ. Eyɛ mli akɛ mifeɔ mihiɛ ŋmɔlɔŋmɔlɔ tamɔ nɔ ni miyɛ miishɛɛ moŋ, shi ejeee nakai kwraa. Naanyo kpakpa ko ni baabɛŋkɛ mi daa he miihia mi waa.

Minu he akɛ Yehowa Nyɔŋmɔ ha miná naanyo ni mitaoɔ lɛ pɛpɛɛpɛ. Misafoŋ onukpai lɛ jɛ mlihilɛ mli amɛto gbɛjianɔ koni Suzie ni ji nyɛmi yoo ko ni ebote gbalashihilɛ mli lɛ kɛ mi aya nɔ akase Biblia lɛ. Suzie jeee mitsɔɔlɔ kɛkɛ. Ebatsɔ minaanyo kpaakpa ni misumɔɔ esane naakpa.

Suzie tsɔse mi koni mashiɛ nɔ ni mikaseɔ lɛ matsɔɔ mɛi krokomɛi—kɛtsɔ shĩa kɛ shĩa shiɛmɔ nitsumɔ lɛ mli kɛ agbɛnɛ hu yɛ be ni mifeko miyiŋ akɛ miiya shiɛmɔ lɛ mli. Enɛ ha mibɔi Nyɔŋmɔ sui lɛ ashishinumɔ jogbaŋŋ diɛŋtsɛ. No mli lɛ, eyɛ mli akɛ abaptisi mi moŋ, shi mináko suɔmɔ ni mli kwɔ kɛhako Nyɔŋmɔ. Be ko po lɛ, mibɔi he susumɔ akɛ makpa lɛ sɔɔmɔ. Mikɛ Suzie gba miyitsoŋ sane nɛɛ he sane, ni eye ebua mi kɛtsɔ jaramɔ shihilɛ nɛɛ mli.

Suzie saa eye ebua mi ni mibayɔse akɛ mɛi ni bɛ suɔmɔ ni mli wa kɛha Yehowa ni mikɛbɔɔ lɛ ji nɔ titri hewɔ ni mináaa miishɛɛ lɛ. No hewɔ lɛ, mibɔi mɛi ni kɛ hiɛdɔɔ jáa Nyɔŋmɔ, titri lɛ mɛi ni edara yɛ afii amli, lɛ kɛbɔɔ. Mikɛ mimami hu teŋ bɛ jogbaŋŋ; no hewɔ lɛ, mibɔ mɔdɛŋ koni masaa mi kɛ lɛ teŋ, kɛ agbɛnɛ hu mi kɛ minyɛmi nuu onukpa lɛ hu teŋ. Miná miishɛɛ waa yɛ gbɛ ni minuko he nakai pɛŋ nɔ, ni enɛ ha minaa kpɛ mihe. Nyɛmimɛi Kristofoi hii kɛ yei lɛ, miweku lɛ kɛ nɔ ni fe fɛɛ lɛ, Yehowa haa mináa miishɛɛ kɛ hewalɛ.—Lala 28:7.

Nitsumɔ Hee

Aha wiemɔ ko ni kɔɔ miishɛɛ ni mɛi babaoo náa yɛ Kristofoi abe fɛɛ sɔɔmɔ nitsumɔ lɛ mli yɛ kpokpaa wulu nɔ kpee ko ni mitee lɛ shishi, ni yɛ kpee lɛ sɛɛ lɛ, mikɛ mihe wie akɛ, ‘Bɛ mi hu manyɛ mafee nakai!’ Shi mile akɛ minaŋ efeemɔ mlɛo. Shi beni mikɛ sɔlemɔ esusu sane lɛ he sɛɛ lɛ, mikɛ gbɛbimɔ wolo ni baaha matsɔ be fɛɛ Biblia tsɔɔlɔ lɛ yaha, ni yɛ April 1998 mli lɛ, mije nitsumɔ nɛɛ shishi.

Te mifeɔ tɛŋŋ mikɛ mihe woɔ shiɛmɔ nitsumɔ lɛ mli yɛ gbɔmɔtsoŋ hewalɛ ni mibɛ lɛ fɛɛ sɛɛ? Yɛ mifɔmɔ su naa lɛ, misumɔɔ ni mi diɛŋtsɛ mafee nibii maha mihe, ni misumɔɔɔ ni mitsɔɔ jatsu kɛhaa mɛi krokomɛi ni amɛwa mi kɛfo tsɔne loo amɛkɛ yelikɛbuamɔ krokomɛi aha mi. No hewɔ lɛ Suzie kɛ ewu Michael wo mi ŋaa akɛ: Hemɔ moto! Shi te mafee tɛŋŋ mata moto? Taakɛ mfoniri ni yɔɔ baafa nɛɛ mli lɛ tsɔɔ lɛ, mimoto lɛ ji moto ko ni aje gbɛ afee aha mi. Ni no hewɔ lɛ, ehe ehiaaa po ni mawo migbɔmɔtso bibioo ni tsiimɔ ji kilogram 19 lɛ nɔ kɛjɛ helatsɛmɛi ashwiili lɛ mli!

Moto nɛɛ ni miná lɛ haa mi diɛŋtsɛ minyɛɔ mifeɔ nibii pii, ehaa minyɛɔ miyasaraa mɛi ni mikɛ amɛ kaseɔ Biblia lɛ yɛ bei ni hi ha mi kɛ amɛ hu mli. Yɛ anɔkwale mli lɛ, kɛ́ mita mimoto lɛ nɔ ni kɔɔyɔɔ miishwie mihiɛ lɛ, minyaa he waa—eji nibii bibii ni haa shihilɛ ŋɔɔ lɛ ateŋ ekome!

Minyaa he waa akɛ mikɛ mɛi aaaje sanegbaa shishi yɛ gbɛjegbɛi ahe yɛ be ni mifeko miyiŋ akɛ miiya shiɛmɔ po mli, ni mɛi nɛɛ ateŋ mɛi babaoo kɛ mi yeɔ jogbaŋŋ ni amɛjieɔ bulɛ kpo amɛtsɔɔ mi. Mináa he miishɛɛ akɛ maye mabua mɛi krokomɛi kɛkase Biblia lɛ. Mikɛ miishɛɛ kaiɔ gbi ko beni mikɛ nyɛmi nuu ko ni nɔ kwɔ nyiɛ yɛ shĩa kɛ shĩa shiɛmɔ nitsumɔ lɛ mli lɛ. Nyɛmi nuu lɛ ŋa shiatsɛ lɛ ni shiatsɛ lɛ kwɛ mi gãa akɛni enaa ekpɛ ehe lɛ hewɔ, ni ebi nyɛmi nuu lɛ akɛ, “Ani ebaanyɛ ewie?” Wɔyi enyɔ lɛ fɛɛ shwie shi kɛŋmɔlɔ. Beni mishiɛ mitsɔɔ yoo lɛ migbe naa lɛ, eyɔse yɛ anɔkwale mli akɛ manyɛ mawie lɛɛlɛŋ!

Amrɔ nɛɛ miyɛ miishɛɛ yɛ shihilɛ mli ni mibaná suɔmɔ kɛha Yehowa Nyɔŋmɔ. Midaa mimami shi waa akɛ etsɔɔ mi Biblia mli anɔkwalei, ni mi kɛ nɔmimaa miikwɛ wɔsɛɛ be ni etsɛŋ ebaaba lɛ gbɛ, nakai beaŋ lɛ Nyɔŋmɔ ‘baafee nii fɛɛ ehee,’ ni migbɔmɔtso bibioo lɛ hu fata he.—Kpojiemɔ 21:4, 5.—w09 05/01-E.

[Wiemɔ ni akɔ ni akɛmiitsu nii ni yɔɔ baafa 26]

“Mibɔ mɔdɛŋ akɛ makpɛlɛ bɔ ni miji lɛ nɔ. Shi fɛɛ sɛɛ lɛ, mihao waa diɛŋtsɛ”