Bɔ ni Ooofee Onu Biblia lɛ Shishi
1. Bi Nyɔŋmɔ Ni Eye Ebua Bo
Ninfa ni yɔɔ Italy lɛ wie akɛ, “Be ko ni eho lɛ, mikaneɔ Biblia lɛ dani miboteɔ saa mli. Mifee nakai ejaakɛ mile akɛ eji Nyɔŋmɔ Wiemɔ. Agbɛnɛ hu, minyaaa ekanemɔ he moŋ, shi miisumɔ ni male nɔ ni Nyɔŋmɔ eŋma yɛ Biblia lɛ mli. Mito miyiŋ akɛ makane Biblia tso muu lɛ fɛɛ. Shishijee lɛ miná lɛ mlɛo, shi beni mishɛ saji ni shishinumɔ wala kɛha mi lɛ anɔ lɛ, mikpa kanemɔ.”
ANI bo hu oná niiashikpamɔ ni tamɔ Ninfa nɔ̃ lɛ eko? Mɛi babaoo yɛ niiashikpamɔ ni tamɔ nɛkɛ. Shi taakɛ wɔkane yɛ sane ni tsɔ hiɛ lɛ mli lɛ, Yehowa Nyɔŋmɔ miisumɔ ni wɔnu e-Wiemɔ ni ji Biblia lɛ shishi. Shi te ooofee tɛŋŋ oná niiashishinumɔ ni tamɔ nɛkɛ? Nɔ̃ klɛŋklɛŋ ni esa akɛ ofee ji, ni obi Nyɔŋmɔ koni eye ebua bo.
Akɛni atsɔseee Yesu bɔfoi lɛ yɛ skul srɔtoi ni atsɔɔ Nyɔŋmɔjamɔ nibii yɛ mli ni rabifoi lɛ kwɛɔ nɔ lɛ amli hewɔ lɛ, abu amɛ akɛ ‘amɛjeee woloŋlelɔi kɛ nilelɔi.’ (Bɔfoi lɛ Asaji 4:13) Fɛɛ sɛɛ lɛ, Yesu ha amɛná nɔmimaa akɛ amɛbaanyɛ amɛnu Nyɔŋmɔ Wiemɔ lɛ shishi. Yɛ mɛɛ gbɛ nɔ? Yesu tsɔɔ mli akɛ: “Hefatalɔ lɛ, ni ji Mumɔ krɔŋkrɔŋ lɛ, mɔ ni tsɛ lɛ baatsu yɛ migbɛi anɔ lɛ, lɛ eeetsɔɔ nyɛ nii fɛɛ.” (Yohane 14:26) Nyɔŋmɔ kɛ mumɔ krɔŋkrɔŋ nɛɛ loo ehewalɛ ni miitsu nii lɛ bɔ shikpɔŋ lɛ kɛ nibii fɛɛ ni yɔɔ nɔ ni wala yɔɔ amɛmli lɛ. (1 Mose 1:2) Agbɛnɛ hu, ekɛ emumɔ lɛ tsirɛ mɛi 40 ni amɛŋmala esusumɔi yɛ Biblia lɛ mli. (2 Petro 1:20, 21) Nyɔŋmɔ kɛ mumɔ nɛɛ nɔŋŋ yeɔ ebuaa mɛi ni miisumɔ ni amɛnu Biblia lɛ shishi lɛ.
Te ooofee tɛŋŋ oná Nyɔŋmɔ mumɔ krɔŋkrɔŋ lɛ? Esa akɛ obi enɛ yɛ hemɔkɛyeli mli. Eji anɔkwale akɛ, esa akɛ oya nɔ obi ni okafɔ̃ɔ. Yesu wie akɛ, ‘Nyɛyaa nɔ nyɛbia, ni aaaha nyɛ; kɛji nyɛle bɔ ni nyɛfeɔ ni nyɛkɛ nikeenii kpakpai keɔ nyɛbii lɛ, enyiɛ nɔŋŋ nyɛtsɛ ni yɔɔ ŋwɛi lɛ eŋɔŋ Mumɔ krɔŋkrɔŋ ehaŋ mɛi ni biɔ lɛ lɛ.’ (Luka 11:9, 13) Yehowa miisumɔ ni ekɛ mumɔ krɔŋkrɔŋ lɛ aha mɛi ni jɛɔ tsui kpakpa mli amɛbiɔ lɛ lɛ. Nyɔŋmɔ hewalɛ ni miitsu nii nɛɛ baanyɛ aye abua bo ni onu wiemɔi ni ajɛ mumɔŋ aŋmala yɛ Biblia lɛ mli afii akpei abɔ nɛ lɛ ashishi. Agbɛnɛ hu, Nyɔŋmɔ mumɔ lɛ baanyɛ aye abua bo ni ole bɔ ni okɛ Biblia lɛ mli shɛɛ sane ni yɔɔ hewalɛ lɛ baatsu nii oha yɛ oshihilɛ mli.—Hebribii 4:12; Yakobo 1:5, 6.
No hewɔ lɛ, be fɛɛ be ni obaata shi ni okane Biblia lɛ, sɔlemɔ oha Nyɔŋmɔ, ni obi lɛ ni ekɛ mumɔ krɔŋkrɔŋ lɛ aye abua bo ni onu e-Wiemɔ lɛ shishi.—w09 07/01-E.